Nk Lalsanhim is ‘Hmarram Lelte’ 2009

By Pu Thangsawihmang

Hmarram, Dec 19, 2009: Hmarram Kristien Thalai Pawl (HKTP) Annual Conference le Hmarram Lelte Contest Final Round chu December 10-13, 2009 khan Pathien malsawmna ropui tak dawngin zo a nih.

Hi hun sung hin Lelte Contestant hai chau ni lovin Gospel Singer inlar tak tak Joseph Zaihmingthanga, PBK Liankhuma, Lalramchan, Nk. Lalruathluii (Hlutei) le Nk. Ma Reme ha’n inkhawm an inawi. Thuhriltu; Pi Lalremsiem le Rev. Chungthang Thiek thuhril khawm a hring a, thu le hlaah malsawmna an dawng a, revival ropui tak dawng a nih.

Contestant Top Ten hai hla sak khawm ngainuomum chau ni lovin a hring a nih; chu chu a nih Pathien thil thaw mak inlang chu.

Nk. Lalsanhim Hmarram Lelte hi lawmman Rs. 10,000/- pek a nih a, NEREFS Ltd. Hnuoia sin a phu tawk pek ding ti a nih. Chun, vangnei chungchuong a pahnina chu Tv. Singneikhum Rs. 7000/- le a pathumna Nk. Daisy Rs. 5000/- pek an nih.

“ Ka theina le ka rosum hai hi,

I hmang nuom phawt chun aw Lalpa;

Ka hung inhlan, ka taksa khawm hi,

I hming ropuina dingin ka hung inhlan che.”

A chunga a hlaphuok ei tarlang ang hin sponsortu Pi Lalremsiem nuna inthawkin peka Pathien chu hneban thei an nawzie ei hriet. “Lalhai chun a ropuina la lut an tih” ti angin a neisun khawm inro lova Pathien ram ta dinga an phal dan hi a ropui a nih, a petu a pek ang peiin pekin a um pei ei ring. HK|P Annual Conference hin Hmarram a nghawrhning a, ram dang a la nghawrhning pei nuom a um.

Hmarram Kristien Thalai lai chu Kohran pawl bin a um ta nawh, pawl a tla tah, pawl inpindanna sukchim chu HKTP thiltum a nih. HKTP le Hmarram Lelte Contest hi Pi Lalremsiem rawngbawlna ra a nih. A rawngbawlna chun Hmarram chau ni lovin Mizoram a sukhning dur dur a, Pathienin hla tam tak a pek bawk , chuong hlahai chu Mizoram Salvation Kohran thalai pawlin hlapawla thiem em em a an sak dam hi Pathien ropuina a ni laizingin hnam le tawng khawm dawmsangin a um a nih.