KUVA KHAWPUIAH* GOSPEL ZABILI

By L.Keivom* Inpui Columnist

September 18-19, 2010 sunga Guwahati Hmar Christian Fellowship huoihot Gospel Centenary lawmnaah Delhi tlanga inthokin kan nupain kan hang thrang ve a. A hmaa thrang tuma inbuotsai lawk khom ni lo, a tawm trèpa fielna kan hmu ve leia phûr taka insiem thut kan nih. Triket kan lak hnungin Guwahati khawzawla lawmna buotsaituhai laia a pukhawi pakhatin Gospel Zabili an lawm ding chu phùr a um nawzie internet hmangin Hmar hnathlakhai titina dawkan HYG-ah a hung ziek a. Prokram siem le sut vong hnunga chuong ang thu rimsie hang dong chu fe dinga insiem po po a barakhaih seng ka ring. Vantlang tuikhura mani puon bal le êk sawp hi chu pipu chen khoma thil mawikhaia an lo ngai naw leia tronglamkei chen an lo ser pha hiel a ni ang khan, gospel zabili chen hmang phak tah hai thaw ding chun, a thu bulbal chu ieng po khom ni sien, thil poi tak a nih. Phùrna pang sa a sukzuoi roi roi el.

Delhi tlanga inthoka Zabili hmang dinga a hran deuh senga Guwahati-a vuong lut ka hriet po chu USA-a inthoka hung, sulsutu ropui le khawvel dâpa rongbawlna hmalatu Dr & Mrs Rochunga Pudaite, John Lalnunsang Pudaite le a nuhmei Ramhmingmawi le an naute Joshua Rochunga Pudaite, ‘Khawnvar’ Magazine Editor-in thiem mawl taka ‘tuchal’ tia a ko hai sungkuo dam; Manipura Hmar hnathlakhai laia I.Sc, B.Sc, B.D le M.Th duoi lo taka tling hmasa tak, kum tam tak Cachar Hills Presbytery Synod thruoitu lu le Hmar Bible Translation Committee-a Chief Translator sin kum 26 lo zet chel tah, Delhi tlanga damdawi pana a naunu daktor pahnihai kuoma hung, inât zoa gospel zabili hmang dinga hung kir Rev. Hrilrokhum Thriek dam; Delhi-a khawsa keini nupa, Pastor Lalditsak Inbuon, Pastor J. Thanglur, Timothy Shakum, Lalruotthang le a nuhmei Darlienzo le an sangpa Upa C.L.Huola hai dam kan nih.

Guwahati kan hang tlung chun an thruoitu le Pastor H.M.Mansang le a rawihaiin erpawt-ah vuongna hrang hranga hung tlunghai chu hmêl hlim takin an mi lo tuok a, tlungna dinga an buotsai sengah motor-in an thak a. Kum sawmthum chuong India palai sin ka thaw sunga kan sin laia pakhat chu mi poimaw fe le hnung inthla le hmuok, sin hautak deu el, vuongna inhnuk chang lem chu darkar tam imu hmu loa a thlawna nghak ngai hlak, ka sawl ka kham ti um thei lo a ni a, sin nghokum a nih. Kan penson hnung lem hin chu kan nauhai fe le hung inthla le hmuok hi ina inthok chauhin kan thaw tah hlak. Chuong chu a ni laiin, Guwahati-a Hmar Christian Fellowship thruoituhaiin a tûka gospel zabili lawmnaa an chanvo thaw seng lo intieng khup an nei laia erpawta mikhuol hung tlunghai hmel hlieu sanga an mi lo hmuok el kha chu a man a tam a nih. An mi chibaina kut thienghlim khan thu inril tak a hril a, thlarau a them a, phûrna pangsa dei tah hnung khom thawk-le-khatin a hung inchawm tho nawk phat el a nih.

Keini nupa ruok chu buotsaituhai ta dinga phurrik ni lo hrâm le a thei chun thrangpui thei dan lampui ngaituoin tlung in kan lo zong lawk a, kan um sunga fe le hunga hmang ding motor kan ngaituo lawk diem bok a. Internet hmanga sin ka thaw zing theina ding le inkhuongruol taka thukhawchang ka seppui thei, kha hma khoma kan tlungna hlak Dr. Chongrolien Chonzik ina tlung ding kan ni leiin, inhmaw lo deuin, erpawt bul ela um, kan rawinu, Airport Authority of India-a sin poimaw chel lai Rose Darthangpui inah sunbu hnienghnar tak, thingtlang rim innam ham ham el chu a khulang khangnain kan hei thret phot a. A nu Lalhlimpui khom a lo um lai a ni a, Guwahati ram lum le oxygen tamna chu Shillong dei le oxygen inphànna nêkin a lo ngei lei khom ning a ta, kan hmu nuhnung tak nekin a hmai a mâmin a hmêl khom nasa takin a lo inàng ta a, lawmna ding ngotin a mi lo hmuok a, kan tlungna ding pan el loin kan lam riek trèp a nih. Sienkhom a tûk, zîngkar inhma taka prokram intran chu erpawta inthoka a huna nang a harsa ding a ni leiin inthimin Dr. Chongro in kan tlung phak trawk a nih.

Darkar hni hnungah Diphua inthoka hung, an University thara Head of History Department sin chel lai Dr. Paul Chonzik khom a sungkuo leh a hung tlung a. Dr. Jacob Pudaite hai nupa khom Manipura inthokin an hung tlung bok a. Doctor tak tak pathum, a intekpa chu Medical Doctor (Specialist in Surgery), Jacob Pudaite chu theology tienga Ph.D le Sielmata Bible College Principal chel lai, Dr. Paul Chonzik chu secular tienga Ph.D, Doctor lem hming put thrang der lo pathum huol vel kara um chu a thlamuongum thlak kher el. Tu lai chu thiemna tieng, abikin theology tienga doctorate degree hmu ni lo, inhlan chop, thiemna kawruok chala bel ei pung pei leiin, vapuol chang ton vaak ruol bula inthrung fûk palh chang hin iengti lei amani ding, ka pang a’n thli huou tlat chu tie! Thiemna tienga doctor ei pung hi lemderna khawvel ei pal insang takzie hriltu a lo ni chun, chu lemchangnaa hmathruoituhai chu ei thiempuhai an nih. Dr. F.T.Hminga kha chu Faihriem University-a doctor hmu ni sien khom, a dam sunga lekhabu buotsai tienga a kutsuok enin doctorate degree pek a phu hlie hlie lem a nih. Doctorate Degree hi ei hmang pawlawt tah si si a ni chun, Churachandpur khawzawla mi challang, taima taka khawlai fanga mi suknui hlaktu Thawthawng le Laikhuplien hai dam khom hi anni thilpek tiengah doctorate degree inhlan ve tlak an niin ka hriet chu tie!

Gospel Zabili lung hongna

Zabili lung hong hi September 18 zing dar 7-8 inkar, Delhi tlanga chu nisa a suok hun vel, mi tam tak imu inhnik vanglai, kei ruok chu ka sinthawna dawkana ka thrung tran hun a nih. Hi lung ziek hi Guwahati le Meghalaya inramrinaa um Pillangkatta, nuhmei puonbil thla zar hnuoi, Meghalaya ram intranna thrut puollawia um, Guwahati-a Hmar hnathlakhaiin Sinlung Thar an indinna hmuna hmar tieng nghaa biekbuk an bawl thar inhuonna tuol tieng bang sunga an bel a nih. Kum 1964-66 a Gauhati University-a M.A (History) ka’n chuk lai khan ka la mal hle a, hieng lai hmuna hin Sinlung suokhaiin in le lo le biekbuk chen mani ram del ngeiah la nei ei tih ti dam chu ngaituonaah a la lut phak nawh. Tu ruok hin chu kum sawmli hnungah a hringhranin ka tong a, mang ram hlak chu a ni bok si nawh.

Lung hongtu ding, Gospel mansapui bangna khuoa inthoka hung suok, Pastor Thangngurin inhmui rum ruma van hla ruoi ropui a thretna Vangai tlang Phulpui khuoa seilien, tuta a chengna ram USA-a inthoka khawmuolpui pali deuthaw vuong khuma hung, Muolzavat an hril nêk daia ringna le beiseina ban hrat nei Dr. Rochunga Pudaite khomin, Jorhata inrieng taka sikul a kai lai khan chuh, tuta ei tlung ram hi a ngaituona thla kiin a la hawl phak ve naw el thei. Van ram, hriet phak loa um ruok chu ei lungphu le inzom, ei hnuoi taksa lungphu a chawl chara thlaraua ei lungphu ei sunzom nawk nghalna hmun dinga ei ring a ni leiin, ieng lai khomin a hnai zing a. India rama sin insang tak IAS/IFS tihai dam khom pen hmur hmanga inziek lut ve el thei a nizie ka hmu phak a. Sienkhom, hieng lai hmuna hin in le lo indinin, a sanga tiem thei inhawr khawmin Gospel Zabili la hmang ei tih ti ruok hi chuh, ka lo ngaituo sin ngai nawh.

Lung hongtu hi taksa kuma chu 84 fe lai mek, voi tam tlu sil tah, sienkhom tho nawk pei, khawl thrangpuia thuok la tah, a ngaituona ruok chu kum 17 mi anga tha inthak le inper zak zak zing, computer hmanga thrangtharhai titina dawkana khom thatho taka la thrang zing pei zing, Saptronga ‘indomitable and tameless spirit’ an ti, tukdol ruol lo le khawi zoi hne lo thlarau thatho nei a nih. A taksain a zo ta nawa chu a thlarauin a la pei tlat leiin, kelir hmangin a hung tlung a. Thrung puma thu hrila lung chu hong el thei a ni lai zingin, takchapa tia innam ngirin thu ropui tak a hril a, Zabili lung chu ama ang boka a tung zawnga inthrang chîng ve lo Treningthang inrawina hnuoiah khûn tak le mawi takin a hong a, mel lung thar inzaum tak el chu a ngîr tah a nih.

Zabili lawmna: Ni khatna

Lawmna inkhawm tak chu Pragjyoti, ITA Centre, Machkhowa-ah an buotsai a. Hi hall hi changkang tak el, khawpui lailia um, Guwahati-a inkhawm poimaw an huoihot changa an hmang hlak, mi sang ruol inlengna, a hun tawk chara sukdei, inzun inhnawmna thra tak le indai tak nei, a lutnaa pindan lien tak, a kuola an bawl chu ruoi threna hmuna hmang thei nghal, a compound-ah car tam tak sie theina, Delhi tlanga um ni sien, ni khat haw man khom a nuoi tela tiem ding a nih. Hieng anga hall changkang, Gospel Zabili lawmum hmangna ding le inphu hlie hlie haw ngam ding le haw dinga lungril an hang nei el dam hi Chanchin Thra thilthawtheina a tak ngeia a hung inlar suokna a ni leiin Iengkim Lalpa a chawimawi a, a hmangruoa a hmang hnam le mihriemhai khom nasa takin a mi chawimawi bok a nih.

Inkhawm tran hmain sumphuk hall-ah a hung taphot fak dingin zingbu an buotsai a, chu chu bu suongtu Vai caterer hai ruoia fel taka an thaw vong a nih. Chu hmuna bok chun sunbu, Zabili Ruoi khom chu an buotsai a nih. Lawmna nikhuoah hrim hrim dannaranin ruoi buotsaiin mi tam tak an chài a, thrang ve nuomhai sien khom thrang vena hun an nei nawh. Chuleiin, vairampura chuh a thaw thranghai ruoi top hi a varzâng lem bakah fatunaa ei hun seng leh hang sût inla, sum sêng khom inthlau bêk naw nih. Ei thaw tawpah, chartang amanih hmepok chauh suong inla, chu thaw ding chun mi tam buoi a ngai nawh.

Lawmna inkhawm ni khatna hi dar 9-ah tranin Session hniin an thre a. Session khatna chu Rev. H.M.Mansang, Pastor, Guwahati Hmar Christian Fellowship-in a thruoi a, Baibul tiema trongtraia hun hongtu chu Rev. Pumkam, Zomi Christian Fellowship pastor a na, thuhriltu chu Rev. Hrilrokhum Thriek (Cachar Hill Tribes Synod) a na, thawlawm inhlantu chu Guwahati Tangkhul Christian Fellowship-a an Chaplain L.Hungyo a nih. Centenary Souvenir tlangzar dingin Assam Minister of Health, Family & Welfare Hon’ble H.B.Sharma hung dinga beisei a ni laiin trulna dang leiin chawhnung dar 3:30-a dingin a hung son a. Chuleiin, hun inawng chu misawnari ripawt ngainuomum tak tak le lawmpuina thucha hrilna dingin hlawk takin an hmang a. Kei khomin minit 5-7 inkara tiem zo dinga thucha thumal 1000 chara ka buotsai chu ka tiem ve a. A khulâng khàngna chauh hang tar lang ei tih:

“Khawvel hmun hrang hranga khawsa keini sungkuo le Zoram khawvel aiawin Gospel Centenary ditsakna le lawmpuina chibai vochuom ka buk cheu.

Kum za liem tah hma khan ei pi le puhai chu khawvel mongpingah an lo cheng a. Ei tuoltro daktor thiem tak le operation thaw hmasa tak Dr. Sura’n a thiem tawp a’n suo khoma a rizal chu thina chauh a nih.

Ei mithi kotsuo khom mong inlang kûka inthrung, Mizorama dil lien tak, amiruokchu Burma rama um tia fiemthu taka an hril hlak, Ri Dil a nih. Chu taka lut tah chu ramsa khom an suok nawk tah ngai nawh an ti hlak. Thina dil, dil mong ping, tlak hlumna ngei ngei, Lake of No Return a nih.

Ei Pielral hlak chu faisa ringa thangsuohai chauh um theina, nuhmei ta ding lem chun pasala thangsuo an nei ngot naw chun lut le hluo thei lo naw hrim hrim a nih. Faisa ringa khawsak chu an thil inhnar tawpkhawk a ni leiin, chu ngirhmun chu hluo thei dan zongin, dam sungin an inrim hlak. Tu lai sanah, faisa ringot ringa khawsa ding mi zong inla, a nuom ei um ka ring nawh. Bu hmin lo voi khat ei fak hman ei dit tawk hle. Mazu, ar le vate hai chauh naw chuh faisa ring pei an vang hle ka ring.

Ei dawithiem hmingthang Lalruong le Hrangsaipui (Dawikungpu an ti bok) haiin an dawi thiemna an hmang dan ei hriet tawp chu dawi hmanga insoisak le inthat a nih. Sîr tina inthoka ei thlir khomin, ei khawvel kha khawvel mong ping vong a nih.

Chu khawvel, dil mong pinga chun 1894 khan damten Jordan vadung a hung luong lut a, a chim insang tiel tiel a, 1910 khan Manipur sim thlang Senvon khuoah a hung luong lut a. Chu taka inthok chun ei Sinlung Hlui chu Sinlung Thar, Bethlehema intran chun a hung hlàn a; ei Hringlang Tlang chu Kalvari Tlangin; ei dawithiemhai chu gospel meiser chawituhaiin; ei thangsuohai chu piengtharhaiin. Pielral chu thangsuohai ta ding chauh ni tah loin, mi tin ta ding le nuhmeihai ta ding chenin a hung inhong tah duoi el a nih. Chu champha voi zàna chu lawmin voisun hin ei inkhawm a nih” tiin.

Session khatna zo hin Zabili Ruoi hnienghnar takin kan kil a. Chawhnung dar hniah inkhawm kan tran nawk nghal a. Lawmpuina thucha le misawnari ripawt hrang hrang ngaithlak a ni hnungin thuhriltu dinga ruot Rev. Lalrosiem Songate, General Director, ECCI chu Manipur lampui an khar leiin a hung thei naw a, Rev. Rose Infimate, Executive Secretary, RPC (NEI) chun remchang tak le hnè takin in a hun chu a hluo a. Chief Guest dinga fiel Health Minister H.B.Sharma khom a hung a, GHCF buotsai souvenir changkang tak el, Gospel Centenary Celebration 1910-2010 (Celebrating 100 years of God’s faithfulness) ti chuh a tlangzar a, thu tlawmte, sienkhom umzie nei deu el, a hril a; a hnung peia khom harsatna nei chun a kuomah intlun a, a theitawpa thrangpui pei dingin thu a’n thla bok a.

Chief Guest thu hrila inthoka thil chieng êm êm pakhat chu: Hmar hnathlakhai a lo inkhina hlak chu Haflong-Muolhoi darthlalang a nih. Chuong anga Hmar Biel ei ti tak, Tipaimukh Biel amanih le Sinlung Hills Development Council (SHDC) Biela chenghai hi darthlalanga miin an mi lo hmang a ni chun a va buoithlak awm de aw! ti dam a mi’n ngaituortir a. Tu ruok khan chu mit ngeia Gospel Zabilia ei thilthaw a hmu tah leiin a mi en dan khom danglam sot tah dingin ka ring. Chu tak chu a nih GHCF haiin huop zo tak le khawvel standat hol phaka Zabili lawmna an buotsai hi poimaw le lawmum ka ti bêk bêk chu nih.

Hrâng hlui pasari- Dr. Rochunga Pudaite, Rev. Hrilrokhum Thriek, Rev. Ruolneikhum Pakhuongte, Rev. Darsanglien Ruolngul le fam tah Dr. Thanglung, Rev. Jamkhothang le Rev. Douzapau Haokip hai chu chawimawina thuchei pek an nih. Pastor Amun Leivon, Manipur Christian Fellowship, Guwahati-in trongtraia hun a khar zoin, khop lo tak le a zinga sunzom nawk nghakhla takin ni khatna chu kan hmang zo tah a nih.

Ni hnina: September 19, 2010

Ni hnina, Pathienni chu zingbu fak khop dar 10-ah Session khatna chu tran a ni a, L.L.Khongsai, Secretary, Kuki Worship Service, Guwahati-in hnè takin a thruoi a. Inthrumna (Invocation) chu Upa T.Hangzo, Chairman, EBC, Guwahati-in a nei a; thuhriltu chu Rev. Nengzakhup, Director, North-East Centre for Research & Training (NECTAR), Shillong a mi a na, benedikson hriltu chu Rev. J.Thumra nih. Hi Session-a hming suota hun changtu po po hi Zoram khawvel le khawvel dang huopa an thaw a ni a, Saptrong khom a tuolleng hle. Hi tûk hin ramthima biekbuk bawlna ding thawlawm dawl a ni a, target chu Rs. 1.3 lakh vel a ni a, pek po chu Rs. 1.8 lakh chuong a ni thung.

Chawhnung inkhawm, Session Hnina chu Dr. C.Chonzik, Chairman, GHCF-in a thruoi a. Rev. Jangmang Dougel, World Vision-a thoktuin Inthrumna (Invocation) a nei zoin darkar khat chuong zet prokram hrang hrang, misawnari ripawt le thucha hrilnain hmang a ni a. Chuong hriltuhai laia mi ngainuom le lawm tak phusuoktu chu ka ruolpa P.K.Singson niin ka hriet. Ama hi Guwahati-a hmun le hma nghet tak nei, kha hmaa hi hmuna Information & Broadcasting-a lu tak nina lo chel tah, Aizawl tlanga khom sumdawngna ngelnghet le in le lo nghet neia khawsa, Hmar trong thiem filor, kan tleirawl laia Pherzawl tlanga kan inkona, “ruolpa tiltawng” ti ngota ka la’n kopui chu a nih. Ama thu hril ringot hi ngaithla dingin bu fun leh inthokin umni kham inla, ei tlai dan ding chu hisap phak chi khom a ni nawh. A bula uma a titi ngaithlak hi damna thing hlima cheng ang a ni a, a kam suok Hmar trong hi a thlâra inthoka khuoizu hung far thla angin a thlum inthieng a, a mawi kim a, sumrisang inzâm chuoi ang a nih.

Hi Session tawpna taka thuhriltu chu Dr. Rochunga Pudaite, Founder President, Bibles For the World, Colarado Springs, Colarado, USA-a inthoka hung vang vang a nih. A hriselna ngaituona leia daktor thupek angin, a thu hril ding chu ziekin a hung chawi a, chu chu a tiem suok a. Aman a hril angin, hi hi a thuhril zieka a chawi le a tiem hmasakna tak a nih. Pathienin thuhril thiemna talen a pek, zalen taka muvanlai tlâng her anga pulpita inthoka thla phar a, boruok chiri khopa inkuk rai rai a, a zawlaidin ngaithlatuhai lungril a hang zèm tak tak chu…e khai, meia khuoihnûr em chu intui nêp tak a nih. A thuhril a tiema a hang tiem chu, a thaw ngai lo thil a ni leiin a’n khor a, a ning hang inîp dingzie ringot chu erkondison hnuoiah thlan sa phungin ka lo ngaituo a nih.

Thu a hril tran chun Baibul sa deu el hi a hung lek suok a. “Kotkhar bula son Baibul an lo zor a, ka hang indon leh Muonga inlet Delhi Version a ni thu an mi hril a, ka’n chawk nghal a. English chun version 250 chuong an nei ta a, eini trong chun version pathum chauh ei la nei a, a tam thei ang tak nei ve hi thil thra a nih. Chuleiin, tu khomin inchaw seng unla, version tin hi nei tum ro” tiin a hung hril a, ngaithlak a hadam khop el. Baibul thu zuk hril taka chun, hi Gospel Zabili-a hin Hmar Baibul hrang hrang buotsaitu pathum- Dr. Thanglung inlet, Bible Society of India sut siem phuisui peinaa Hmar Bible Translation Committee-in kum 26 sung zet Chief Translator-a a hmang Rev. Hrilrokhum Thriek; Bibles For the World sut ‘Hmar Bible’ buotsaitu Dr. Rochunga Pudaite le Baibul (Hmar), Delhi Version tia hriet inlettu le suttu keima- chu hi Zabili lawmnaa hin kan intuok khawm a, a ruola hmunkhata kan intuok khawmna hmasa tak, mel lung pakhat ve le Pathien remruot ngei niin ka hriet.

Hla le rimawi ruoi

Hla pawl le rimawi chi hrang hrang, ngaithlak seng lo khop an inbuotsai a, chu taka inrawitu ding chun Rev. Lallienthil Sellate, Music Promoter, EFCI chu an incha thlak a, a um chil top el a nih. Thralai hlapawl, 100 Voices an ti chu an indin a, thuom inang vong an thruipek a, chuonghai chun Halelujah Chorus le hla dang danga Pathien chawimawiin an mi’n awi zing a. A karlakah hla sak thiem Chin Lydia Valte, Lhingboi Singson, Vanlalngai, Rotlingpui Khobung, Arrow Prayer hai le Fellowships le kohran hrang hrang zaipawl- Zomi Christian Fellowship, Tangkhul Christian Fellowship, Manipuri Christian Fellowship, Kuki Worship Service, Evangelical Baptist Convention Church, Guwahati Baptist Church, Guwahati Mizo Presbyterian Kohhran, Baptist Church of Mizoram, Guwahati, Biete Christian Fellowship, Hrangkhol Christian Fellowship- haiin trong hrang hranga Pathien inpakna hla sakin, hla ruoi an mi’n kiltir zing bok a. Tlaiin kan fàn takzet a nih. Hnam tin lungruol taka vana Pathien inpaka leng hun ding ropuizie hlimthla dam a mi’n ngaituotir hiel a nih. Hnam tinin taah nei a, ei gospel zabili seng a nih an ti theina boruok kha a nih thlakhlaum chuh.

Hieng po po laia a bîka an hming sàm trûla ka hriet chu Naupang Sunday School Band hai an nih. An hla sak umzie hre phak an um meuh ka ring naw lai zingin, music an hnèsaw dan khah a turû khop el. An zàm naw a, inringzona an nei a, tu khom an chung en bik naw a, boruok an ngam a, khawvel an hmason ngam a nih ti a chieng. Hi hi chimbuka inthoka hung suok hlol mihriem le thiemna leia sivilaizeson insang nun intem phak tah chinhai indanglamna chu a nih. Rimawi tuma hla an sak laia ka ngaituona hluotu chu khawpuia seilien le seilien lo kar inhlatzie le ei nauhai le ei tu le tehai le ei inkara thrang-dan (generation gap) hang zàu takzie a nih. Lekha tiem zinga thil thar ei inchuk pei naw chun, ei rìla rahai ngei, ni tina thlaithleng ei kilpuihai leh ngei khom khawvel khata cheng hmun khat zing ei insawn lai khan, khawvel dang daia cheng, thlaithleng ot tlang mei mei ei nih. Hieng ruoltharhai hin an inhnikna zawng rimawi tienga ruol an ban thei chun, thil danga khom thrang an lak tak tak pha chun, zabili nawka chu khawpui lien lienah Birlas, Tatas, Ambanis, Bill Gates hai el phak ei la suok treuh ding a nih. Pathienin ama ringtuhai le a thu zawmtuhai chunga malsawmna a vur hin taluo a nei naw a, ama ta vong a pek suok a ni leiin inphalamna chikte khom a nei nawh.

Ka lawm nawk pakhat chu Sunday School naupang le an hotuhaiin hla pawl an sak kha a nih. A hmatawng lailunga naupang chumchiep ngir, a thunon chauh hre haiin a thunon an sak phaa phûr le uor mangkhènga an hang sak khan Gospel Zabili lawmna vawrtawp a hawl phakin ka hriet. Chu el bakah, hieng ang nikhuoa chan poimaw naupanghai ei inlaktir hin an hnam le sakhuo nina nghet tak el chuh anniah ei tu a, chu thil inphum tlat chun an nunah damten zung a kei nghet a, mani hnam le sakhuo ngaihlut nachang an hung hriet a, chu intling khawm chun hnam le sakhuoa dam khawsuokna a hung hring suok hlak a nih.

Tlangkawmna

Hi artikul ka ziek tran hin ka damsam mang naw lei le ka sungin a mi khaw bok leiin a’n khat tawka thosan a ngai bakah computer key takngiel khom khauh ti khopin ka tha a zoi a, ngaituona a zuoi bok a. Zàl le bathroom pan inkarah sawtnawte bek tiin computer ka ban trawk trawk a; serial thumin ka zo thei di’m ti ngaituo zing pumin a tlangpui chauh lawrin ka ziek pei a. Voituk Inrinni, Mahatma Gandhi le HSA piengchamin a mi hung nang a, a zinga Delhi Thurawn-a suok hman dinga zo a trûl si leiin, hun remchangah thil poimaw danghai chu la ziek dinga intiemin, dit khop lo takin ka khar hri phot a ngai tah.

Mani sum senga Guwahati-a Gospel Zabili hmanga kan nupaa kan fe hi sum le hun kan seng nêk daiin, kong hrang hranga Zabili ruoi kan hang kil hi kan hlawkpui lem a, hieng ang thil tonhriet hi malsawmna hlu, suma inchawk thei lo a nih. Gospel Zabili lawmna hi Delhi (HCFD), Saikot (RPC), Sielmat (EFCI), Shillong (EFCI) ah ka tong ta a, sienkhom Guwahati-a Hmar Christian Fellowship buotsai anga national le international level chauh ni loa Zoram khawvel huopa thilthaw hi ka la tong fuk nawh. Hi hin Zabili khel tienga ei hma lak dan ding a mi’n thlirtir a. Chu chun inpumbilna khawvel puo tienga rongbawlna, Isu Krista thucha ropui, The Great Commission tia Saptronga an sie hi a tin zawn tlat a nih. Hmathlir le hmadom sukzau hi Pathien mizie putna a nih.

Delhi tlanga khawsahai hi hmun dang danga Hmar Christian Fellowship hung ngir pei hai thlatu anga inngai kan ni a, Pathien lunginsietna zarin kan phak chinah puo tienga kan rongbawlna khomin ra thra a hung insuo pei niin kan ngai. Amiruokchu, a inpui taka inngaihai hi kan thrut (foundation) a nghet nawh. A san bulpui laia pakhat nia ka hriet chu, khauhlang ben threlh an ti ang elin, kohrana pawl buoinain a mi baw darh inlauna leiin, berampu tak nei loin, beramhai laia mi, an thrat le thrat naw, an tlak le tlak naw thlu loa kan thlanghaiin tu chen hin thuneina insang tak chelin, an mi enkol a. Iemani chen hi pastor kan nei ve taa chu trening nei lo, layman pastor an la ni hri a, hmun danga pastor-in kohran a thruoi anga thruoi dingin mawphurna fihlim pek an la ni nawh. Kan Fellowship hi in nghet ni loin tru bawla kan bawl la ngir zing mei mei ang a nih.

Guwahati khawzawla puitling taka Gospel Zabili an hmang theina san hi ka sui chet chet chun, pastor puitling le hrietna tienga ruol ban, inpumbilna le kholbingna khawvel puo tienga dak suok phakin an thruoi lei niin ka hriet. Layman-in kohrana thuneina inchu phêt ei tumna khawvela hin, hieng anga puitling tieng pan dinga berampuhai mi thruoina nghok pawl hi ei um naw thei naw a, ei um a ni khomin thil maka ngai ding a ni nawh. Thuneina chang nuom leia Pathiena inthoka helpa lungril khan khawvel hi a la uop zing a nih. Mi puitling chu puitling takin Pathienin a hmang hlak leiin, an ra suoka inthokin a rizal hriet thei a nih. Chu chu Kuva Khawpuia Gospel Zabili kan hang hmanga hin chieng taka hmu theiin a um. Pholeng ropui le poimaw, enton tlak a nih. (October 2, 2010 Delhi)

---

* Guwahati hming hi Assamese tronga thu mal pahnih ‘Guwa’ (kuva, areca nut) le ‘Haat’ (bazar, market place) inkopa phuok, a umzie chu ‘kuva bazar’ tina a nih. Hi lei hin a veng lùnna lai tak ni hlak chun ‘Pân Bazar’ ti hming a put hiel hrim a nih.