Tuithaphai, 20 Oct, 2010: Weslyan Methodist Church of East India (WMCEI) Regional Superintent (R/S) le Hmar hlaa miril le hlasakthiem Pu Paul Lalsiemlien (Paul Siemlien) chu zani hmasa (1910-2010) zan dar 11:45 vel khan kum 47 mi niin Hepatitis natna leiin chatuon ram a lo pan tah. A ruong hi zani zantieng khan ropui takin Rengkai thlanmuolah vuiliem a nih. Rev. Paul Siemlien hin a nuhmei Pi Lalremkim le a nauhai Mr Zairemthang le Miss Lalthazuol hai a thisan.
Rev. Paul Siemlien hi natna leia March 2010 a inthawk Doctor enkawlna hnuoia Imphal, Manipur a enkawl ani a, thla 7 lai zet natna rinum tak tuora a um hnung, a sung le kuo le Kohran mipui han a dam kar nghakhlaa tlumte thlira an lo thlir lai zingin Pathien chun ama kuom tieng a lo thuoi ta a nih.
Rev. Paul Siemlien hi September 23, 1963 khan a pieng a, WMCEI chawmnain kum 1999 khan UBS, Pune-ah BD inchuk dingin a fe a. Kum 2003 khan BD a hung zo a, hi kum vek hin WMCEI Headquarters hnuoia "Field Evangelist" sin thawa a tul anga Headquarters Office thangpui dinga a sin ding remruot pek ani a. Amiruokchu, Field Assistant sin a zawm hmain Executive Committee 23-4-2003 a neia chun Ruonglevaisuo District D/S incharge dingin a ruot a.
February 10-15, 2004 17th Regional Conerence Hmarkhawlien, Cachar a nei-ah Rev & Dr Paul E. Turner, Asia Area Director Minister-na hnuoia Ordination pek a ni a. Ruonglevaisuo District D/S incharge sin a chel lai mek 18th Regional Conference February, 10-15, 2005 a Chandmari, Aizawla neia chun Asst. R/S dinga ruot ani baka R/S sin kum khat sung incharge a chel dinga mawphurna pek a nih.
Hi hnung 19th Regional Conference February 16, 2010 nia Hmarkhawlien a neia chun Regional Superintendent (R/S) kum 3 sung chel dinga thlang hung niin a hnung March 7, 2009 Rengkaia 22nd Regional Conference neia chun kum thum dang R/S sin chel dinga thlang a hung ni nawk ta pei a nih.
Kohrana rawngbawla a lutchilna:
Pu/Rev Paul Siemlien hin Kohrana rawngbawlna a nei hmain ram le hman ta dinga thu le hla tienga hnam ta dinga ro hlu, khawvel um sunga a hming re ngai lo ding Hlaphuok le sak tienga rawngbawlna nasatak a lo nei ta a, a hun kum 1980s laia inthawk hlasak le phuokna sin tanin Kohran tienga rawngbawl dinga a lut hma khan Cassette/Album 6 a siem hman a. Chuong a Album hai laia 4 hai chu released anni a, pahni hai ruok chu a release tanaw a nih. Hla tienga inhnik ani leiin Kohran rawngbawlna tienga an hmang hnung khawmin a thi hma chen khan Pathien hla 4 a phuok nawk hman a nih. Pathien hla a phuok hai chu "Delilah", "Inhma chun Kros", "Tawngkam thiema hril el an nawh" ti le "Halleluiah Amen" ti hai an nih.
Kohran rawngbawlnaa an hmang hmaa Album a siem hmsatak turn hi kum 1987 lai kha nia hriet ani a, a album Vol-1 le II ti lova a album dang haia hla hai chu ama khata a phuok deu vawng anni a. Vol-I le II haia khawm hin ama hlaphuok pathum (3) ve ve a thang a. Mihriem hai kara hmangaina thu insamna hla (Love Song) a phuok popo hi 60 vel ni dinga hisap a nih.
Ei hnam ta dinga hieng zozai hla a lo phuok hai lei hin ei hnam ta dinga miril, mi ropui, ei literature suk hausatu a ni tinaw thei ani nawh. Hiengang talent tha hi mitin nei le chang thei ani nawa, ei hnam ta dingin ro hlu hla tamtak a mi maksan pek a nih. A hlaphuok le a hlasak hrim hrim hi ei hnam zie le inmil takel anni leiin tuchen khawma hlui thei lo, ngainuom um zing an nih. Mihriem ngaia kum la naupang tak thi hun la tlung lo ani leiin mipuiin an sun hle a nih. A album a release lo pahni hai khawm hi release la ni sien nuom a um hle. Hmasawnna Thar
Post a Comment
Comments not related to the news or article may be deleted.