Upa Ngama (1910-1982)

Kum 1910-in Hmar Biel Taithu khuoah a pieng a, a hming tak nek hmanin Singhleipa tia ko le hriet tlanglawn lem a nih. Naupang a ni laiin Parbung khuoah lekha a’n chuk a, ziek le tiem a thiem deu chauin a chawlsan a. Chuonglai chun Kristienhai lai harna runpui a tlung a, mi hlima lam dup dup le thlarau inrui tlu rem rum hai nungchang lem chu insirin a khawsa hlak. Kum 12 mi vêl a ni lai Parbung biek in thara Tirko Kunga rawia Pathienni inkhawmah Isu tuorna hla “Tlang thlavaium tak chu ram hla takah a um” ti an sak lai chun, Isun misuolhai ta dinga a tuor nasatzie chun a lungril a deng a, danglamna tuokin namen loin a tap a.

Chuong laia Pathien thu an awi dan chu, an nuom pha leh an ma a, an nuom hun hunah an thang nawk el hlak a nih. A rawi upa Kapa chun, “Iengkhom an nawh hi, ka rawi naupangpa i ni bok a, i Pathien thu awi hi ei inrem thei nawna tak a na, Pathien thu awi hi ma la, kawmol
puon pêng ka ti che” tiin a thlêm a. Chu chena inthok chun Pathien thu awi chu a bansan nawk a, la awi lohai leh sinthaw lawmpui siemin, ‘Lawmlaisaa’ thangin, lawmpui zu an dawn hlak a. Hun a fe peia, pipu dana thangsuo dam, hausak dam tumin dawr chen a siem a, zu hmun hlima chêngin a hun tam tak a hmang hlak. Chuonga a khawsak lai chun zan hni zet chu a zu rui hung tin, Independent Kohran biek in pansak a hraw lai chun ama le ama chu pulpita Pathien thu hrila ban vai zak zak hin a’n hmu a, a donsak chuong lèm nawh. Hi hun lai hin thihmun suolin a na ta rak el a, Kohran beiruol pawlhaiin va kanin an tongtai pek a, Pathien thu awi dingin a hming a lo pek a. Chu chu 1939 kum, Pathien thu awi hming a put tan kum a nih.

Pathien thu awi a ni hnung khom chun danglamna nei chuong loin fiemthu thawin a hun a hmang zo a. A kum nawk chun baptisma thu inchûkin Pastor Thanglêr kutah a nuhmei le a nauhai pathum leh baptisma an chang a. Baptisma an chang hnung kar khat hnung chun, a naupa Singhlei, Taithua a puhai ina um chu a va thuoi a. Parbung tieng an hung inlawi chun, Taithu khaw kawl, Bangla khêla tuikhur lam kawia kawi an phâk lai takin, “Ka ta i nih” tiin rawl ni si lo, rawl neka fie lema zuk hril hin a hriet leiin “I ta ka nih” tiin a don a. Chu zo chun “Ka nau i nih” tia zuk hrilin a hriet nawk leiin “I nau ka nih” tiin a don nawk a. A tawpa chun “Misuol i nih” tiin rawl a hriet a, “Misuol ka nih, Lalpa mi ngaidam rawh” tiin a don nawk a. Chu taka inthok chun hlimna hril hlei thei loa inthuoma a um leiin mitthli leh Parbung a tlung a. A thil ditzawng le thaw nuom zawng po po a hung inthlak danglam a, mi piengthar a lo ni tah a nih. Hi hnung hin a talen kol chu hla tienga hung vul suokin hla mawi tak tak a phuok. Ama hi hla phuok a thiem ang bokin thuhril a thiem èm ém bok. A piengthar kum 1940 chun thima inthoka vara thuoi suoktu Lalpa chungah a lawm bek bek leiin “Kan siengna thim lal kulpui” ti hla hi a phuok a, a hla phuok hmasa tak a nih. Kum 1946 in Rengkai khuoah an pèm a, chu taka inthokin Saidanah an pèm nawk a.

Kohranah kamdingna sin chel naw sienkom thuhril rongbawlin a’n vak suok nasa èm ém a, Independent Kohran sunga chu a hming hre naw hlei khom an um nawh.

(“Thûkna Ropui” lekhabua Pu HK Kawllienthang thuziek ‘Mihrang Pasalthahai’-a inthoka lâksawng a nih. – Editor)