Pathien IN i ni am?

By: Pi. Hringchawngsung
 
“Pathien In in ni le Pathien Thlarau nangniah a um ti inhriet naw am a ni? Tukhawmin Pathien In chu a sukkhawlo chun Pathienin ama chu sukkhawlo vêng a tih, Pathien In chu a thienghlim si a, chu In chu nangni in nih” (1Korinth 3:16,17).
 
 
 
ZIEKNA SAN
 
Kum 2007 September thla a zanrila trawngtraina ka nei lai chun ‘inruithei thilthaw a thrat naw zie le suol a ni zie’ thu in ka lungrilah hung dêng nal el a, mak khawm ka ti a. Chu thu lei chun zân thum vêl in thei lovin khumah kan let kan let a; inruithei thil thawhai chunga chun ka lungril a sip ta êm êm a. Trawngtraina chu ka nei zawm pei a. Kei inruithei thil chung chânga mâwl tak ka ni leiin hrilhai khawm ka ti hle el a. Inruithei thil thawhai thlarau invawina khawm ka lo nei ve ngai bawk si nawh. Lalpa kuoma chun, “Lalpa inruithei thaw a thratnaw zie le suol a ni zie chu thuhriltu le Bible inchuktirtu tam takin an hril zing zing an nâwm, a sim ding chun sim el an tih, ka hril ve kher khawm a ngai chuong nawh ie… kei chu hi thu puong ding hin tlinna iengkhawm ka nei nawh,” tiin ka trawngtrai a. Hi thu puong naw dân ding le hnawl dan ding  ngot chu ka ngaituo a, puong lang ngam lovin sawttak ka riel nghe nghe a. Nisienlakhawm, puongsuok dinga mawphurna Pathienin a mi pek ni a ka hriet leiin thiem naw tak pumin, trawngtraina leh lekha ziek a sem suok dingin ka hung buotsai a nih.
 
                                               
PATHIEN ‘IN’ I NI AM?
 
“Pathien In in ni le Pathien Thlarau nangniah a um ti inhriet naw am a ni? Tukhawmin Pathien In chu a sukkhawlo chun Pathienin ama chu sukkhawlo vêng a tih, Pathien In chu a thienghlim si a, chu In chu nangni in nih” (1Korinth 3:16,17).
 
Ringtu chu, Thlarau thienghlim In, Pathien Thlarau chêngna In thienghlim a nih, ti Bible in chieng deu elin a mi hril a. Nangteh tu chêngna In am i ni a? Krista sandamna i chang tah a, Pathien nau ni a inhrietchieng a ni chun, Pathien Thlarau thienghlim chêngna ‘In’, In thienghlim i ni zing a nih. I ta i ni tah naw a, mana inchawk i ni tah a nih.
 
Chuleiin, ringtuhai chu Pathien lawm tlâka um ding le hringnun thienghlima um dingin Pathienin a mi phût a, kawng iengkimah a ditzawng hai thaw le thrafamkim lampui chu hraw dingin a mi phût bawk a nih. Chun ringtu chun a hringnun le a taksa chu inthawina hring le Pathien rawngbawlna tlâk ni ngei dinga inhlân dingin a ngên bawk a nih (Rom 12:1). Ringtu chu Thlaraua um a ni ta leiin khawvelin a lâwm zâwng tisa ditzâwng hai le inkei hnawk chu a rem ta naw a nih.
 
Amiruokchu, ‘tukhawmin Thlarau thienghlim In chu a suk khawlo chun Pathien in ama chu sukkhawlo vêng a tih’ ti hi a nih. Pathien In sukkhawlo tu chu a theida hle a ni ti chieng takin ei hang hriet thei a nih.
 
Pathien Thlarau chêngna tlâkin ei um am le? Pathien Thlarau chengna lo nita a khawvel lawmna le hlimna nun khawhlona suol chênna um hlaktu ei lo ni chun Pathien In sukkhawlo tu ei ni ang bawkin, Pathien ngaiah hmunhnawk peihawnna hmun tirdakumtak ang chu ni ngei ei tih. Chuong ani chun Pathien thlarau thienghlim chu eini ah chêng harsa a ti ngei ding a ni ti chu an lang a nih. Chu nun sukfaina ding chun Pathienin ieng ang kawng zawngin am, iengtik hun am a nauhai chungah a hung thaw ding ti ei hriet si naw a.
 
Pathien chu zaidam le ngilnei a ni leiin ei suolhai chu mi ngaidam nawk el a tih tiin a ditnaw zawng thil hai chu vawi iengzât am ei thaw ding a na?  Annawleh   “...Lunginsietna chu a pung nawk zuolna dingin suolah ei um zing ding am ani? Teu love! Eini suol tienga thi ta hnunghai ieng tin am suolah la hring zing thei ei ta?” (Rom 6:1,2).  Amiruokchu, suolah ei lo hring zing hlak ani chun ei chungah Pathien lungsenna mei nikhat chu a la chawk ngei ding a nih ti chu an lang a nih. Pathien lunginsietna le a zangaina chun vawitam tak ei suolhai chu mi ngaidam nuomin mi lo ngaidam hlak sienkhawm, suola ei um zing zing ding chu a dit naw a. Suol tienga thi tah hai suola ei hring zing ding chu a remti naw tawp a nih.
 
Isu Jerusalem temple inhuonna sung tuollai a tangka thlengtu hai thrung le sebâwng hai, berâm hai, pârva zawrtu hai an chawtu hai chenin temple inhuonna sung tuol a chun a hnawtdawk a, tangka thlengtu hai tangka chu a bunthlâk a, an dâwkân hai chu a nam thlûk pêk bawk a; chun pârva zawrtu hai kuoma chun, “hieng thilhai hi hitaka inthawk hin fepui ro, “Ka pa In sumdawngna in in siemnaw ro” tiin a hril a nih(Johan 2:14-16).
 
“Ka In chu trawngtraina in tîng an tih,” tiin ziek a ni a; nangni ruok chun suomhmanghai pûkah in siem lem ta a nih” (Matthai 21:13); ti le “Ka Pa In sumdawngna in in siemnaw ro” (Johan 2:16) tiin Isu chun a ti a nih. Isu’n temple tuollai a thil zawrtuhai le tangka thlengtuhai thilthaw chun Pathien biekna insunga Pathien rawngbâwltuhai le thiempuhai rawngbâwlna chu an la tâwkbuoi thei ngei ding a nih ti chu Isu’n ringna a nei ngei ning a tih, a lungsenna mei nasataka a chawkna chun inlauna nasatak a nei a nih ti chu ei hang hmu thei a nih. Isu’n hi temple hi trawngtraina in a hmang ding chauin a dit a, khawvel lawm zawng suolna le khawlona in a tawkbuoi an lau hle a nih.
 
Jerusalem a Temple chu khawvela hmingthang tak el, Rom mithiem lekhaziektuhai chen khawmin khawvel in po po laiah in danglam tak el, in chîte nisienlakhawm hmun thienghlim tak el chu Jerusalem temple hi a nih. A sûnga chun hmun thienghlimtak tia inbukin a um a, chutaka chun thiempu laltakin intlanna ni ropuia chun rawngbawlna a nei hlak a, chu hmuna chun thiempu laltak cho lutin rawng a bâwl hlak a nih tiin an hril a nih.
 
Ei lungril sung temple thienghlimna chu khawvel sum le pai rothila duâmnahai hin tawk buoi a ta Pathien inphatsan hlau ei tih ti chu inlau a um hle a nih. Mitam tak chu hi dûamna tawkbuoi le Peter anga Isu inphatsantu tamtak ei um ta hrim bawk. Duâmna chun khêl hrilna dâm, inkhingna dam, itsîkna dâm, insêlna dâm, in elrelna suol dâm hi a um nuom hlak si a. Pathien chun ringtu nuna um hlak, inhmangaituona, inlunginsietuona, zangaina, hlimna, ngilneina, thratna, ringumna, inremna, dawtheina le thuhnuoirawlna umhai chu sie ding le inhmang ding a phal naw a nih.
 
INRUITHEI THIL IN TAKSA A SUKHLIEM
 
Inruithei thil ei hang ti hin dân narânin hieng zû, drugs ti hai hi an nih ei ti nuom bik deu hlaka; an ni ngei bawk. Inruithei thil hrim hrim chu puotienga inthawka sungtienga lût puotienga râ thranaw insuoktir hai chu an nih. Hieng cigarettes, dumziel dang dang le tuibûr hâwp, khaini, zarda chi tum tum, dum hmuom, kuva fakhai hi chu inrui bur bur a um ve nawa ‘lei cho hmuoma um nêk chun ruol pâwlna a hang thaw ve zeu zeu khawm a poi chuong lêm ie’ ti a kam cherek fâk ang chau a ngaiin inruithei thilah khawm ngai lova hmang hlak mi tamtak ei um bawk a nih. Sienkhawm, hieng thilhai hi inrui thei thilah ei ngai a nih. Asanchu, inruithei thil tûr an pâi a, natna thranaw tak tak thina khawp tûr an pai seng a nih. Chuong chun hi inruithei thil intemhai châkna chu an thrang deu deu a, zawngsakna an hung nei a, suok angin an intâng phâ hlak a nih. Chuleiin taksa thawhla khawpa inrui le chîngin bân theilovin harsatna tawpkhawk an tlung pha hlak bawk a nih. Chu pha chun taksa ta dinga pawimaw êm êm fâk le dâwn thilhai châkna nêkin chu thilhai châkna chun a thruoi lem hlak.
 
Hi thilhai hin mihriem nun le taksa a siem thra naw a, tûr trium tak tak mihriem taksa suk chau theina thil an pai a, tri an um em em.  Hi lei hin mi tamtak in an hringna an chân pha tah a nih.
 
Damlai ni popo trawngtrai bân thei lo khawp hiela trawngtrai inrui mi tu am ei um ta a, ei la hmu nawh. Suok hnuoiah a pu in suok thu thuin a kûn hlak ti ei la hmu bawk nawh. Sienkhawm inrui thei thil chîngtuhai ruok chu an damsung ni popo chu inruithei thilhai suok ah an intâng hlak a, chuongchun hi inruithei thilhai suoka intang hi mî a nuoi telin an um ta bawk a nih. Chuleiin, hi châkna suoka intâng hai chu Pathien thrangpuina chau naw chun an hnêbân thei ta ngai naw a nih. Suk vara umtahai le thlarau mi deu hai chun hi inruithei thaw hi suol a nih ti an pawm chienga chuong chun hi suolna a inthawk hin Pathien thrangpuina lei chauin an inkieng thei hlak a nih.
 
CIGARETTES HÂWP A THRATNAW ZIE
 
Cigarettes a inthawka sietna Robert S Fries in a hrildân chun, Cigarettes hi a hâwptuhai chun zawngsakna an nei ta leiin an tâwpsan el thei ngai naw a; lungphu natna, inkhul, hnukna, thahrui natna, phingpui natna dâm an hung nei hlak. Chun, a khû hnâr tieng an hiplut pha lem chun an chuopah a lut a, an thisen zâm sung po po chu minute thum peiin a fangsuok hlak. Chuleiin an blood pressure tieng a tawk buoi a, inthuok harsatna dam an nei tir hlak. A khu hin tûr (poison) 19 a pai a, hi tûr hin a suksiet ta hai chu awlsam taka sukdam thei a ni ngai nawh. Hi dum khu hip lut tu chun a thisen ah tûr trium tak a thun lut a nih. Taksa ta dinga trium tak, dam te te a mani inthatna (slow suicide) tûr chu a nih ti chu chieng deu elin a hril a nih.
 
Dr. Hutchinson khawmin a hrila, cigarette hawptuhai chun an hawp pha leh an hnuk a suk thak a an inkhul hlak, thahrui natna, phingpui inpânna, thuok suk chauna, fâk inhnik nawna le lungphu chauna tieng an nei hlak a, dam khawm an suk rinum tir pha a, an hringnun khawm a suktawi thei pha hlak a nih tiin a hril bawk a nih.
 
Doctor tamtak hrildân hrietnaa chun, dumziel hâwp, tuibûr hâwp le dum bêla hâwptu threnkhat chu, an lei, an bau le an hnuk cancer dâm a um nuom hlak. Naupang inthrang lien lai hai khawm, hi thil hi an chîng chun an taksa nasatakin a suksiet a, an thluok tieng chen khawm a sukbuoi phâ thei hiel hlak, tiin.
 
Pathien rawngbawltu threnkhatin ka dumziel hawp, ka dum hmuom amani le ka kuva fakhai hin ka rawngbawlna hi a mi chawkbuoi hle in ka hriet a, ka bân chun Pathienin mi lâwm ngei a tih ti chu an hriet a bânsantu tam tak khawm an um ta hrim a nih. Sienkhawm chuong lai zing chun Pathien ringtu nita si threnkhat chun Pathien ta dinga sumhai pêk nêkin cigarettes a rawhmang amani le  kuva inchawkna a hmang lem mi tam tak ei la um zing. Dum in taksa a suksiet ang bawka taksa suksietu thil dang inrui thei thilhai khawm ei lo thaw hlak a ni chun Thlarau thienghlim In dinga siemtu chu a suk lungngai ngei ding a nih ti chu an lang fel a nih.
Chuongchun i dumziel hawp le i hmuom haia chun inruina i nei naw a, mi chungah thilsuol khawm i va thaw naw a, nunchang mawinaw takin i lo va um kher naw khawm a ni el thei, chun i ngaituona le i thlarau hringna khawm a lo sukbuoi kher naw khawm a ni el thei. Sienkhawm, ei zuk hril ta angin hi thilhai hi taksa suksietu, sukhmelhemtu, damte te a thina a mi thruoilut hlaktu tûr trium tak an nih ti ei hriet tah. “Chuongchun tûkhawm  thilthra thaw ding ti hre si a thaw naw chu a ta dingin suol a nih” (Jakob 4:17).
 
Pathien sandamna i chang ta a, Pathien nau nina i changta a ni chun, i taksa chu thlarau thienghlim chêngna ‘In’ a ni ta leiin inzâ ngei ding a nih. I taksa suksietna thil i thaw a ni chun, Pathien theida zâwng thil i thaw a ni ti chu chieng tak elin an lang a nih. Chuongchun “Thil suksuoltu chu Diebol a suok a nih; Diebol chun a tîra inthawkin thil a suksuol si a. Pathien naupa hung inlangna san tak chu Diebol sinthawhai a sukbohmang theina dingin a nih” (1 Johan 3:8).
Chuongchun mî tukhawmin Pathien rawngbawlna dinga a taksa inhlânnuomna tak tak a nei chun a dum hâwp le a dum hmuom chîngna chu an khawkpui zie hung hmûng a ta, a rawngbâwlna le Thlarau thienghlim amaa um chu a suk buoi zing zing hlak a nih ti hung hrie suok ngei a tih. Korinth thawnkhatna 6:19,20 a chun, “Anleh in taksa chu in sunga um Pathien kuoma inthawka in hmu, Thlarau thienghlim In a nih ti in hriet naw am a ni? Mani ta khawm in nita naw a; mana inchawk in nita in sawnnaw; chuleiin in taksa a chun Pathien chawimawi ro” tiin tirko Paula chun a hril. Thlarau thienghlim In lo ni tah ringtu chu Isu thisena inchawk tasa a ni leiin Pathien chawimawi ding le a ditzawnga inhmang ngei dinga inhriettir a nih. Ringtu chu thlarau thienghlim thil thawtheina leh hringna a nei pha chun a nun a chun puo tiengah a ra chu hmu theiin an lang ngei hlak.
 
Pathienin khawvela thil a siemhai popo laia achunghnung tak, Ama angpuia a siem, a ditzawng le thra a ti ang taka a siem chu mihriem hi a nih. Thil dang le kawng danga hai Pathien suklâwm hlaktu ei ni lai zingin hi taksa suksietna thil hi ei lo thaw hlak a ni chun einiah Pathien lawmna chu a la famkim naw rawp ding a nih ti chu an lang a nih.
 
 
ZÛ DAWN A THRATNAW ZIE
 
Zû hmuna hlim hai le Zûruia umhai chun Pathien ditzawng lampui hraw tieng nekin Setan lampui hrawna tieng an pan deu zie hlak ti i sui ve ta hlak am? Thuvar 20:1 ah Lal Solomon chun, “Zû hin huoina tehlem a siema, rak zû hin insuolna a siem. Chun tukhawm zû rui chu a var naw a nih.” Zû  dâwntu hai chun Zû hmun hlimnaa um le Zû inruia um an chîng rawp hlak.
 Zû inruia inthawkin suolna tamtak an sienga chêtsuolna mi tamtakin an nei rawp hlak bawk. A chîngtuhai nungchanga inthawkin suolna hung inlang hai ei hmu a, inthimna thilthawhai hur le indithmangna dam, tuol thatna dam, insuolna dam, inrukna dam, chapona dam, ikthikna dam, le khel hrilna dam hi. Chun sungkuo inthuruol nawna, nau hai ta dinga nû le pâ thu awinawna le inzâ nawna dâm a um a, chun miin motor a khal pha zû a dâwn chun zû rui leia motor accident in, mi thi, hliem, kut bawng, ke bawng, mitdel, kebai, ha bo, nitin thutharah (daily news) ei hmu hlak. Chuleiin ‘Do not drink and drive’ (motor i khal pha zû dawn naw raw) ti lampuiah mi popo tiem dinga târ a nih. Zû tûr leia natna a thî khawm an um zing a; mi a nuoi têlin thina chang an um pha ta bawk. Threnkhat chu insung tlâk balna tieng dâmin a zui nawk nghâl. Chuongchun zû tûra inthawkin thilsuol tam tak a suok ti ei hriet a nih.
 
Kaldai lal, Belsazzar chun a nuhmeihai, a thaikêmhai le a rama thruoitu lien sângkhat hai ta dinga ruoi ropuitak a thre ni chun a pa Nebukanezzar in Jerusalem temple a, Lalpa In a rângkachak le tangkaruo bûr le bêl a siehai chu inlak tirin chuonghai a chun uoin an dâwn a. Uoin chu an hang dâwn chun rângkachak dâm, tangkâ dâm, dârsen dâm, thir dâm, thing dâm, lung dâm pathien khaw hmu theilo le khaw hretheilo le hrietna neilo hai chu an inpâk a. Chuleiin chu darkar la la chun lal in bang nalvâr a inthawk chun lalin mihriem kutpârhai hung suok chu a hmu a, chutaka inthawk chun a kâwngru insuktuoknahai chu a hung inthawt a, a khûp le a khûp hai chu an vuoktuo ta a. Chun chu kutpara lekha hung inzieka chun MENE, MENE, TEKEL UPHARSIN chu umzie chu: Pathienin i rorelna ni chu a tiem zo tah, bûknahai a bûkin i um a i tling zo ta naw a nih. Chuong chun i ram chu Media le Persia hai kuomah pêk a ni tah, tiin Daniel chun fel deuin a hrilfie pek a. Chu zân lala chun Kaldâi lal Belsazzar chu thatin a um ta a nih (Daniel 5:1-6, 23-30). Jerusalem temple a bûr le bêl thienghlimhai uoin dawnna an hmang chu Pathienin a theida hle a ni ti chu an lang a nih. Hi taka hin insukhlimna indiknaw, Pathien theida zâwng thil an thaw ngei a ning a tih. Lalin a hringna a chân pha hiel na a hin.
 
Ringtu taksa chu bêl thienghlim, Pathienin a rama rawngbawltu dinga hmang a nuomhai chu an nih. Zûhai dâwna inrui le zû hmun hlimnaa khawvel nun hlimna chêna um dingin Pathienin a phal dêr naw a nih. Chuleiin chuong ang hringnun a dâm ei lo um pal a ni chun Pathien kuomah kirin ngaidam inhnîng ei tiu! Pathien lungsenna chu tu dang ruol a ni nawh.
 
Tirko Paula’n, “Chun uoin inruiin um naw ro, chutaka chun insûm nawna a um si a, Thlarauah sipin um lem ro” tiin a lo hril (Ephesi 5:18).
 
William Barclay chun, trumkhat chu A C Welch in thu a hrilna ah ‘Thlaraua sipin um lem ro’ ti thu hi hmangin thu a hril a, ‘mihriem chu thil iengamani bêka suksipin a um hlak’. Chuongchun Pathien ringnawtuhai chun zû le khawvel ropuina thilhai a sukkhawpa an um phâ chun an hlimin an lâwm hlak a, sienkhawm Pathien ringtuhai ruok chu Thlaraua sipa an um phâ leh an hlimin an lâwm hlak. Chuleiin zû le khawvel ropuina thilhaia insuk khawpna le insukhlimna chu Setan inlalna ram lampui a nih tiin a hril bawk a nih.
 
DAMDAWI (DRUGS) INRUI THRATNAW ZIE
 
Damdawi inrui chi hi inrui thei thil ieng dang nêk khawmin a tûr a hrât lem tia hril a ni hlak. Damdawi chu dânnarânin taksa damna dinga hmang a ni a, mitinin ei damnaw pha chun damdawi hi ei inhnêmna tak a ni hlak, doctor in trûl le mamaw a ti anga a mi pêk damdawi chu ei fâka, ei dâwna, ei taksa a ei inkâplut a ni chun ei dampui ngei hlak. Amiruokchu doctor in trûl a ti leia pêk khawm ni lo damdawi inrui chi fâ le dâwn, inkâplut le hîplût mi tam tak ei um, chu chun taksa le lungril nasatakin a suksiet hlaka, a hun naw taka hringna chân mi tamtak ei um ta hiel a nih.
 
Damlai hringnun harsatna, rinumna, beidawngna le lungawinawnahai chu hun tawite bêk theinghilna dingin damdawi annawleh zû ei inrui hlak maw? Chu thil inruina chu a bo pha leh  lungril sawlna beidawngna chun a hung bawzui nawk nghal hlak si. Chu chau chu nilovin mi tamtak chu Pathien thu phawa hmang khawm ei pawisa ta bawk nawh. Chu ngei chu a nih Pathienin a theidâ zâwng tak chu. Damlai hringnuna inhawi tina le lungril zâng nei nuomna chu setanin hmangruoa hmangin nasatakin mihriem lungrilah sin a thaw hlak. Harsatna le beidawngna hun chu tawite bêk theinghil a ni theina dingin zû le damdawi inruia ei um hlak hi setan dit dân le lâwm zâwngtak a nih. Chuleiin damdawi le zû inruihai inhawitina le lungril sukzângna chu Pathien Thlarau a inthawk ni lovin Setan a inthawk lieu lieu a nih. Hieng lai zing hin ringtuhai chen khawm hi suolna hi thaw dingin Setanin a thlêm a, chuleiin hi suolna hringnuna inhlieu ringtu mi tam tak ei um ve ta a nih.
 
Ei damsung hun tawite a hin a kâr châng chun lungngâina hlimruom dung ei hraw châng um a ta, a kârchâng chun suorsietna hmuna ei um châng dâm um a ta, ei tuor ding hrima Pathienin a ruot a nih.  Zû le damdawi inruiin damlai ni rinumnahai chu mi hnem thei ngai naw ni, Krista Isu chau hi a nih thlamuongna famkim le mi hnem tu indiktakn chu. Chuleiin mi tamtakin Krista Isua hlimna le lawmna an zawnga an hmu pha chun, an lungril a sukzângin an hlim a an thla a muong a khawvel hlimna, lawmna, hausakna le ropuina inhnarnahai chu an theinghil hlak. Chuleiin unau dittak, lungril zângna nei i nuom tak tak a ni chun Lal Isu kuom pan la ama’n lo pêng a ti che. Hi inrui thei thil thaw hi Setan inlalna ram lampui hrawtna a nih. Setan lampui chu a liena a hrawtu khawm mi tam tak an nih. Chu lampui chu hremhmun lampui chatuon hremna lampui chu a nih.
 
Ei ramah Chanchin Thra hrila a um tira inthawk Pathien thu hriltu tam takin inrui thei thil thaw hi a thratnaw zie le suol a ni zie tuchen hin an la khêk pui zing. Thlarau mi deu lem chun inrui thei
thil thawhai thlarau invawiin thuhrilna le trawngtraina iengkimah mitthli far zawi zawi khawpin hun an hmang hlak. Vawi tamtak thuhril ei ngaithlak ta hai ngaituo chun ei tulai Kristien sungkuo a hai dâm hin chu hi thil thawtu hi hmu in um ta hrim hrim naw awm tak. Sienkhawm
ei la pung deu deu.
 
“Chuleiin in taksa nuomzawng ang in zawmna dingin, in taksa thi thei a chun suolnain ro rêl naw raw se” in taksa pênghai khawm suol hmangruo dingin suol kuomah pe phal bok naw ro; nisienlakhawm mithi laia inthoka hung hring nawk angin Pathien kuomah inhlân unla, in taksa pênghai khom felna hmangruo dingin Pathien kuomah pe lem ta ro” tiin tirko Paula chun a lo hril a nih (Rom 6:12,13).
 
Pathien In i lo nita a, inrui thei thil hai leia sukkhawlo dâm i lo ni ta a ni chun, suol thaw ah inngai la, Pathien kuomah thupha chawiin ngaidam in hni rawh. Inthimna thil thawhai zû hmun hlimna le zû inruia umna chu suol tirdakum, Pathien theida zawng a nih ti hung hrie suokin Pathien hmaah i suolhai bunthlain simla, suol thupha chawina nei rawh (Rom 13:11-14). Chuong chun “Nangma mithmua chun var naw la, Lalpa chu tri la, ritlona chu maksan rawh. I taksa ta dingin hriselna ning a ta, I ruhai ta dingin damna ni bawk a tih” (Thuvarhai 3: 7,8). Chuong ang lawma taksa suksie theitu thil chu bânsan el rawh. Ringna chu thuawina a thrang chun hlawkna ropuitak a nih.
Tlangvâl Daniel chun lal bû fâk le lal uoin dâwn theina remchâng thratak a hmu lai khawm khan, lal ina uoin a dâwn chun Pathien ngaiah thienghlim lo tirdakum tak a ni ding a ti a hriet leiin lal bu le uoin chu kîl naw dân ding remchâng chu nasatakin a zawng a, lal in a bu fâk le uoin dâwn chun a hmêlput dânhai le a sa put dânhai khawm hrisêl hmêl taka lal hmaa a hung inlang ding nêk chun Pathien dit zawnga um lem chu a thlang ta lem a. Lal kuoma thlai chau fâ dinga a ngênna chu lalin a phal pêk ta anih. Chuong chun a ruolhai Sadrak (Hanania), Mesak (Misael) le Abednago (Azaria) hai le chun lal ina bû chu fa ta lovin thlai cho chu an fâk ta lem a. Sienkhawm ni sâwm hnunga chun tleirawl dang lal bu fatuhai popo nek chun an hmêlput dânhai chu a hung inlang thra ta lem a, an saput dân hai khawm hrisêltak hmel an hung put lem a. Chun Pathien in Daniel, Sadrak, Mesak le Abednago hai chu varna le thiemna popova bengvârna le hrietna a pek a; chun Daniel chun inlârna le manghai chung popo a chun hriet thiemna a nei ta a. Chuong chun lal hma ah an va ngîr a, lalin an dawn hai popo an dawn ta hrim hrim a chun a rama aisan thiemhai le mitvaidawi thiemhai popo neka a let sâwma var lem in anni chu a hmu ta a nih (Daniel 1:8-20). Chuong chun Daniel, Sadrak, Mesak le Abednago haiah ang bawka thlêmna chu fesan dân lampui zawnga ei tlân suoksan chun Pathienin taksa le thlarauah malsawmna tamtakin mi vur ngei a tih.
 
Ringtu nun a chun sungril tienga inthawkin puotieng a takin a hung inlang suok hlak a, nundân mawi, Krista Chanchin Thra le inmawina, thuawina, indikna, Pathien inzâna le tritna a um hlak. A lâwmna chu Lalpa dânah a um a, Pathien a hmangai leiin a ditzâwnga um le a ditzâwng thaw chu an hâwk zâwng tak a ni hlak. Nun thienghlim nawna, muolphona, Pathien dit naw zawng thaw chu a tri a, tlânsan dân lampui a zawng ngei hlak (Philip. 1:27).
 
Amiruokchu, Pathien tri lo le inzâna um lova tisa ditzawng PATHIEN dona ‘suol’ chu vawi tamtak ei lo pal tlang hlak a ni ruok chun, ringnaa chun ei um le umnaw mani in enfelin infieng ei tiu! (2 Korinth 13:5).
 
TISA NUN LE THLARAU NUN AN DANG
 
Chuong chun “Tisa dâna umhai chun tisa tieng thilhai an dit hlak; thlarau dâna umhai ruok chun thlarau tieng thilhai an dit hlak. Tisa tieng thil dit chu thina a ni si a; Thlarau tieng thil dit ruok chu hringna le lungmuongna a nih; Tisa ditzawng chu PATHIEN dona a ni si a. Chu chu Pathien dânah a um nghâl sinaw a, um khawm a um thei bawk nawh. Chuleiin tisaa umhai chun Pathien an suk lâwm thei nawh” (Rom 8:5-8). Tirko Paula chun, tisa nun le thlarau nun, ringtu nun le ringnawtu nun dânhai inang nawna lientak tak a mi hril a, Tisa ditzawng chu Pathien dona le thina chun, Thlarau tieng thil dit ruokchu hringna le lungmuongna a nih tiin. Tisa nuom zawng thina le thlarau nuom zawng hringnachu an thlau hle. Chuong chun Belial le Krista khawmin inremna an nei hrim hrim naw a, thlarau le tisa khawmin inremna an nei thei hrim hrim bawk nawh. Milem biekna in le Pathien biekna in khawmin inzawmna iengkhawm an nei nawh (2 korinth 6:15). Chuleiin thlaraua hringna chang tahai hringnun nuom zâwng le hringna la chang lo hai hringnun nuom zâwng chu an ang thei ngai naw a, an inrem thei ngai bawk nawh. Chuong ang bawkin inruithei thil thawhai le thaw nawtuhai nuom dân khawmin inremna an nei thei hrim hrim ngai bawk nawh.
 
Chuleiin unau, inrui thei thil thaw chu thilthra an naw a, tisa ditzawng, Pathien dona a ni ti chu chieng deuin i hriet ta a, i nauhai, i unauhai, i pasal, i nuhmei, i nu le pa le i ruolthrahai thaw ding khawma i dit ta naw chu suol a ni lei a nih ti i hrietfel ta a nih. Amiruokchu hi thil i thaw lai hin i ruol inpawl pui hai chen khawm inchûktir a, i ruolhai chun an ruol dang hai khawm an inchûktir sâwng pei ta a, thil thranaw thawtu cho nilovin thil thranaw inchûktirtu lientak, thina chî thêtu i lo nita a nih. A poi takzet el!
 
Tirko Paula chun Galati mihai kuomah, “Mani tisa tienga thêtu chun tisaa sietna chu sîk a tih; Thlarau tienga thêtu ruok chun Thlarauva chatuona hringna a sîk ding a nih” tiin a hril (Galati 6: 8).  Ei tû ang amani annawleh ei thê ang chu ei sîk ngei ding a ni chun fîmkhur ei tiu. Ei nauhai, ei unauhai, ei ruolhai, ei pasal, ei nuhmei, ei nu le pa hai kuomah chatuona thîna chî thê lovin chatuona hringna chî thêng ei tiu!
 
A mi hmangaitu Lalpa Isu Krista chu ei suolna hai leiin Krosslerah thisen kai neng nungin khaikangin a um, a lu a hlinglukhum le, a naka thisen hung luong suok chu nang le kei a suolna lei a nih. I lungrilin Krista Kross tieng hang inlênkîr la chu, i tisa châkna suol popo hai chu teplo el a nih ti hung hrie suokin, hmangaina leiin i siekieng vawng thei a nih. I suolhai i sima a, Isu hmaah thupha i chawi chun i chungah Lalpa chu lâwm a ta, taksa le thlarau ah malsawmna tamtakin vur ngei a ti che! Hnena petu Lalpa chu pan la, amân lo pêng a ti che!
 
Tiemtu ditak, thlarau thienghlim chêngna ‘In’ nia in hriet ta ani chun, Chanchin Thra infuina thu hrilhai pawm la, i thil suol chîng hai chu bânsan rawh, inrui le nun khaw phâma tirdakum taka hringnun i hmang lai hin Pathien tawtawrâwt hung inri sien, annawleh i hringna lâkhmangin hung um ta thut sien, Pathien hma ah ieng am hril i ta? Chu pha chun sim tâng ka tih ti lakhawm hun pêkin i um ta naw ding a ni si a. An hnu taluo nghak naw rawh.
 
Annawleh nang unau, Isu chu Lal le Sandamtu dingin i la pawm nawa, chuong ang thil thranaw inruithei thilhai thaw hlaktu i lo ni chun, inngaituo rawh Isu chu ni hni, ni thum hnungah A tawtawrawt ri leh lo hung thut ta sien annawleh i hringna lâkhmang hung ni ta thut sien,iem chang i ta? I chatuon hmun ding chu hremhmun meidîl ning a ta, Chanchin Thra hriltuhai hlak Krista kuomah châwl vawng tâng an ta, an râwlhai ngaithlâk ding hlak um ta naw ni a. Pathien chawibiekna hmun le hun hai hlak chu ieng anga hmang in am a um ta ding ti ei hriet si nawh. Trawngtrai pêktu ding che tukhawm um ta bawk naw nihai a, ringtu popo um ta bawk naw ni hai, chun tukhawm Krista Chanchin Thra hriltu ding che um ta bawk naw hai a, Thlarau thienghlim chanchin ei hril zing zing hlak hai hi um ta bawk naw ni. Chuleiin unau, an hnu hle hma hin Isu chu ring la ama chu pan vat rawh! I Lal le Sandamtu dingin pawm nghal rawh. Zingah tiin nghak naw rawh.
 
Tiemtuhai popo Pathienin malsawm raw se!
 
 
Ziektu: Pi Hringchawngsung hi Pastor Ngurthangvel, Tuisen, a naunu a ni a. Ama hi BBBC & Seminary ah Theological training kumhni a nei a, chu hnunga chun ‘Tortured for Christ’ New Delhi ah office assistant sin kum 7 lai thawin a um a. Tuhin an nupa in Bangalore ah Pathien rawngbawlna an nei. Ama hi BBBC & Seminary (Bangalore) a Professor sin thaw lai zing Dev Kumar nuhmei a nih.
 
Ama hin ‘Thlamuongna’ megazine New Delhi a a umlai a ziek ta a. Tuhin ‘Pathien In i ni am’ ti megazine hi Pathien inhriettirna ni ngeia a hriet leiin a buoitsai nawk a nih.