(Destination Hmar Hills – Part 2)
By Robert L Sungte [Part 1, Part 3 (coming soon)]
Guwahati airport-a inthok chun ka ruolpa, nulampa ni bok, Accountant General office-a thok Watcyn L. Keivom quarter panin kan tlan phei a. Nisienlakhom, Arunachal Pradesh khawpui Itanagar-a prokram hnot ka ni leiin ka nuhmei le naute chu an kot bulah ka thak a, inah lut hman loin ka suok nghal a.
E-North East Award huoihottuhaiin a fe dinghai intuok khawmna dinga an ruot Khanapara, Assam Veterinary College tieng chun taxi chu ka thruoi ta pei a. Beisei anga Award huoihottuhai an lo inzozap naw leiin zantieng dar 4.30-ah Itanagar panin kan suok thei trawk a.
Guwahati le Itanagar inkar lampui hi a thra hle a, sienkhom a hla khop el. Darkar kuo vel night bus a kan inkui ri vung vung hnungin zing dar 2-ah kan tlungna dinga ruot ‘Hotel Tshangpo’ chu kan tlung a. Receptionist-hai khom an lo in tah leiin an kei tho sung darkar chenve neka tam lampui sirah kan la ngir nawk a. Meibithling kham hnunga hang ngir tlun par chu a lo intak khop el. A ram a lo dei bok leh!
Receptionists-haiin kot an hong fel zo chun room chabi lain a sawng thumna a um, Mizonews.Net (kum 2014 khan hi news website hi zawr a lo ni tah) tadinga double room an lo huol lawk chu ka pan nghal a. Nisienlakhom, Mizoram Taxation Department a mi pathum an ni leiin, an laia mi tlangval pakhat chu ka kawlah hung thrang el dingin kan insiem rem a.
Kan hang insawp fai zo chun zing dar 3.00 vel a lo ni der tah. Zal hmun kan rem hnung chun inhmelhrietna malamin Mizoram politics le sorkar scheme, hril hlaw tak el New Land Use Policy (NLUP) dam hrilin kan titi a. Kan titi a’n hnik hle ning a tih, Lusei le Hmar trongin a dai ta naw pha English-in kan kawmmawi pei a. Ka ring nekin ka ruolpa chun Saptrong a lo thiem khop el a! A lekha inchukna hmun ka hang indon leh, "Delhi-a college lo kai hlak ka nih", a ti a. A khawvel thlir dan a zau ka lo ti kha ramdang suok a ni lei ni ngei a tih. "Mangthra aw leh" vel thum kan inti hnung khom chun hril nuom a lo hau ve ning a tih, ka hriet naw karin ka lo insan der a. Zingkar chun thingpui le fak ding a lo awrdar zo hieu hnungin ka tho ve trawk a. Tui insila kan tuoi fai zo chun zingbu ka fak mpl mol a.
Sawtnawte-ah e-North East Award prokram hmangna hmun ding Arunachal Pradesh Golden Jubilee Hall tieng chun an mi thak a. Hall lutna pheia chun NE a entrepreneur le sorkar department mi le sa hung khawmhai chun an project chit showcase/tarlangna banner le leaflets an lo sie tawl a. Mizo News khomin appreciation award a dong leiin a website logo an lo inchuon sa a. Chang a par sot. Vaihai lai makhat chauha hang inzel hin inzum duka um palh thei a lo nizie dam ka ngaituo a, St. Edumund’s College-a ka kai laia ka ruolhai le kan titina dam kha ka hriet suok vong vong a.
Chuong project hai laia pakhat chun ka ngaituona a lak khop el. Tripura-a NGO enkaitu mi pakhat chun ''agarbati'' siem dan le mi rethei tam takin an trangkaipui thu a lo hril a. Ka’n don chieng nuom hlea chu a mi hril nuom po chu hieng hi a nih: "We use bamboo and some ingredients like saw-dust (Ruo le thingat phit kan hmang)." Anleh, hienga rim inhnik deu chi dang dang a hung suok el thei hi a thing lei a ni? Annawleh a ruo lei? ti'n ka’n don nawk a. "Ni lo. Masala, keini siem fawm ngei kan pol a nih," a ti malam chun thingatna phit le a marumarang an pol sa rim dang dang hai chu an min hnamtir pei a. Ienga inthoka an lak dok chie am a na ti kha a na ka hriet chak tak. Ka hang dawp met leh a mi pel met pei a. Ka hriet nuom tak chu a mi hril nuom chie nawh.
Ka dem chuong nawh. An thilthaw dan kha sumdawng dan a ni tlat an nawm. Thilsiem thra, mipui hmang nuom zing ding, an zor thei ding a ni chun an thuruk kha an thup ve tlat el a nih. An damna a ni ve tlat. Khawvel a cold drink inlar em em Coca-Cola siemtuhai khomin an thil siem inhnikna san tak, an thil chokpol hi mipui le an inelpuihai hriet an phal ve thrak le. An thuruk tawpkhawk, mi dang hriet lo dinga an veng him tlat chu a nih.
Eini lai hin hieng ang hin thaw ve inla, iengtin am aw a thawtu/humhaltu hai ei dem phier ding? Dem theina po po khelah tharumin ei bei rêk el dim?
December, 2013. Destination Hmar Hills-Part 3 (Sunzawm ding)
Post a Comment