Living Sacrifice (Inthawina Hring)

By Pu L.Keivom* Inpui Columnist

Chuleiin unauhai, Pathien lawm tlak

inthawina hring le thienghlima in taksa chu inhlàn

dingin Pathien lunginsietna zarin ka ngen cheu.

-Tirko Paula (Rom 12:1).

Tirko Paula chun Rom mihai kuoma lekha a thonah (Rom 12:1-2) tekhinna trongkam, Saptronga ‘metaphor’ an ti ang chi hih dangdai tak el a hmang a, chu chu ‘Inthawina hring’ ti hi a nih. Thil inletling amanih inkawkal rem khawm, bawm khat sunga inrem taka khum khawm ang a nih. ‘Hot Ice Cream” ti ang deuh hi a nih. Vûr deia siem ni si, a lum ni bok si chu thil ni thei lo a nih. Amiruokchu ‘Hot Ice Cream’ an ti tlat bok si. Saphaiin a lum (hot) le a dei (cool) hi an thlier hrang thei naw lei chu ni kher naw nih. A chang ruok chun inang charin an hmang a hoi. Tleirawl ruolcham pahniin nunghak zeizel deuh an hmu a, pakhat chun, “Oh, she’s damned hot!” a ta, a ruolpa chun, “Yes, she’s really cool!” a ti thung a. An hril le an inkawktir chu thuhmun char, sienkhom an thu mal hmang chu a letling chie a nih.

Chu thil zuk hril taka chun kum 1960 laia ka hla phuok ka zuk hriet suok chu tie! Chu taka chun ‘hmangai nunrawng’ ti trongkam hi ka hmang a. Ka ruolpa, September 25, 2008-a muol liem tah, Lalthanzau Pudaite khan hi trongkam hi thra a lo ti thei hle a ni awm a. A hnung kum 12-ah, Hongkonga a hang um hnungin Delhi-ah kan um tlang nawk a. Ni khat chu a hla rikawt laia a dit bik, Chinese tronga sak hi a hung phor suok a. “Muonga, hi hlaa hin kha hmaa i hla phuoka ‘hmangai nunrawng’ ti i hmang chie kha a um ve a ni aw!” a ta, kan ngaithlak a. Hi hla thluk ang deua a hnunga hla ka phuok chu ‘Ka Chûn Nunnem’ ti kha a nih.

Hril lai nghal, la hang sap sa met inla. Kan hung tleirawl suok ve laia Pherzawl tlanga kan kurinkukpui hlak hla pakhat chu H.Lalringa phuok, a hla hming khom ‘Chatuantawii’ ti a ni top a, chu chu a thunon-ah “Aw ka ngai êm che, Chatuantawii’ tiin a hmang a. Tawptai nei lo chatuon ni si, tawi bok si chu thu letling, sienkhom a phuoktu ngirhmuna chu indik taluo si a nih. A ngaizawngin chatuona dingin ‘hmangaina biethu’ a tiem a, sienkhom sawt naw teah lung a hersan el si leiin, a duotlai, a hmangai nunrawng hmingah ‘Chatuantawii’ ti, tekhinna trongkam pahni inkawkal tak el chu a lo inbuk tah a nih. Chatuon tawi tak tak hi ei um nok a nih. Khawvel hi khawvel a ni si a.

Ei thupui chai ding ‘inthawina hring’ ti lem hi chu metaphor-a khom metaphor naran ni lo, umzie thuo tam nei, a umzie hriet suok zo mei mei ruol lo, thrang la hung thar peiin an ngirhmun pal lai le an thlirna tukvera inthoka an hmu dan anga umzie le zierang hrang hrang an la hung inputtir pei ding thil a nih. Tu hin chu a trong hmang umzie le a hril umzie a hmawr chauh ei phor thuok thuok ding a nih.

Inthawi umzie

Ei thupui takah ei lut hmain ‘inthawi, inthawina’ ti trongkam hi hril fie phot a ngai ka ring. Ei pi le puhai khan anni neka thilthawthei lem, an suklawm naw chun an chunga sietna amanih natna intlun thei umin an ring a. Chuonghai hrilna hming tlanglawn an nei chu ‘huoi’ ti a nih. Tu lai tronga hril chun, thlarau thra lo, thlarau suol (evil spirit) ei ti ang hi a nih. Ram nghaktu huoi an kona hming tlanglawn chu ‘ramhuoi’ (ram+huoi) a nih. Khuo (village) a hri le natna hrim hrim intluntu nia an ngai chu ‘khawhri’ (khuo+hri) a nih. Natna, hri, vangduoina le thil thra lo hrim hrim intluntu chu ramhuoi/khawhri ni dingin an ring a. Thiempu hmangin, ran thatin, ramhuoi chu biek amanih tlon lungawi tumin a kuomah an inthawi hlak. Ramhuoi chu a lungawi pha damnaw khom chu a natna la hmang a ta, dam el dingin an ring a nih.

Thiempuin inthawina ang deuh, ramhuoi laka a hmang dang chu dawi a nih. Dawi chu magic ei ti ang deuh hi a ni laiin, mitdawivai ringot hi ni loin, varna thu hmanga inbeina a nih. Hienga dawi hmangtu hi ‘Dawithiem’ ti a ni a, a thu insam chu ‘Dawi Hla’ ti a nih. Court hmaa ukilin thu indik lem hmanga a khingpui a’n beipui ang deuh hi a nina lai a um. Ramhuoiin a thu hnuoia bawia a sie mihriem kha thuvar hmanga vauh puma a va’n chù thlakpek ang a nih. Chuleiin, dawi hla hrim hrim hi thuvara inbeina a ni a, thu khân hriet a ngai a, chu chu ramhuoiin a lo inzà leiin a’n thla hlak niin an ngai. Dawi hla hi thuvara inchaina a nih. Dawithiem threnkhat chun an dawi hla mi kuomah an hril nuom mei mei naw a, siel pahni pathuma inchawk a ngai.

Ei pi le puhai khan ramhuoi kuomah inthawi hlak hai sien khom ramhuoi an biek ngai naw a, an biek tak chu Pathien a nih. Chu chu hming hrang hrangin an ko: Khuonu, Khawzing, Khuovang, Chung Pathien le a dang dang. Ama chu Pathien thra, mihriemhai ta dinga thil thra thaw hlaktu niin an ngai. A kuomah an inthawi ngai nawh. Mi mal, sungkuo le khawtlang ta dinga veng himna hniin, ran thatin an biek hlak a, chu chu a hmingah ‘Sakhawhmang’ an tih.

Baibul rama khawsa, abikin Juda sakhuo zuitu Israelhai chanchin ei sui chun, ran thata Pathien biek dan mumal tak an nei hun chu Aigupta bawia inthoka Kanaan ram pana an fe lai, Sinai tlang bula an um laia Pathienin Mosie hmanga Ama an biek dan ding a hrila inthok a nih. Chu chu Exodus le Leveticus lekhabuah chieng taka ziekin a um. Eini angin an damnaw chang Baibul rama mihai chu an inthawi ngai nawh. Bu an nghei a, an Pathien kuomah damna hniin an trongtrai a, damdawi hre mi, daktor an um chun an rawn a, damdawi an fak a. Zawlnei amanih trongtrai dam thei dam an um chun an pan bok a. An thiempu hnam Levi chihai khan Tempulah an sin ding an thaw mop mop a, damnaw thawi dinga an fe thu le chuong ang dinga an ko thu ei hmu nawh. Damnaw an dam pha Pathien kuoma lawmthu hrilnain tempulah an fe a, thilhlan ding an chawi a, chu chu a thren a thisen leh maichamah an raw hmang a, a sa dang chu thiempuhaiin an fak hlak. Bu le bal inhlan thua khom tlawmte chauh maichamah an raw hmang a, a dang po chu thiempuhai chan a nih. Ram an insem lai khan Levi chihai chu ram pek an ni naw leiin Pathien chanpuol chu an chana ngai a ni a, Pathien kuoma mi thil hung inhlan kha raw hmang vong loin, an raw bang kha an chang hlak a nih.

Hieng pumraw thilhlan, bu le bal thilhlan le a dang dang baka hin kum khatah a hnam pum ta dinga thil inhlan ni an hmang a, chu Inremna Ni, Tlanna ni (Day of Atonement), Suol thawina ni ropui an nei a, chu chu Yom Kipur an tih. Kel pahnih an hmang a, pakhat chu a lu chungah a hnam pum suolna phur dinga thiempuhan kut an innghat hnungin thlalerah an insuo a. Pakhat dang chu an that a, a thisen chu Thiempu Laltakin Tempul Hmun Thienglimtakah a lutpui a, Thuthlung Bawm sinna, zangaina lalthrungpha chunga chun a the a, an suolhai chu Pathienin lo ngaidam tah dingin an ring a nih. Hienga ser le sang an thaw dan kimchang chu Baibulah ziek a ni leiin hril sei ngai loah sie inla.

Ei hril nuom tak chu, a tawi zawngin, ei pi le puhai kha ramhuoi tlon lungawina le vauh zamna dingin a kuomah an inthawi hlak a, Hebrai mihai ruok chu an inthawi ngai naw a, an suol thupha chawina le ngaidamna ding dam le lawmthu hrilna dingin an Pathien kuomah thilpek an inhlàn hlak. Anni sukna thei ramhuoihai chu eini dawithiemin thuvar hmanga a vauh zam angin an vauh zam lem a nih. An kawl le kienga mihai ruok chu pathien dang dang kuomah inthawiin, pawl threnkhat lem chun mihriem chen an inhlàn hlak ti Baibulah ei hmuh. Chuong an pathienhai laia hming inlar chu Baal a nih. Hebrai mi ni si Baal hmaa inthawihai chu an Pathien uiretsantuhai chauh an nih. Inthawi hi Kanaan mihai thuomhnaw a nih.

An leh, chuong chu ni siin, ieng leia ei Baibula hin ‘inthawi’ ti trongkam hi ei hmang uor èm ém am ning a ta? Kum 1995 khan Rev.(Dr) Zairema artikul ziek ‘Inthawina’ ti, Thu Leh Hla magazine-a an insuo ka tiema chun tuta ei zawna indon lai bawr thu hi a ngaidan a ziek a, tiem a manhla khop el. Ama hril dan chun, hi trongkam ‘inthawina’ ti hung hmang trantu chu D.E.Jones (Zosaphlui) le Edwin Rowlands (Zosapthar) an nih. DE Jones-in Welsh Tune Book 158-a mi Dura Chawngthu hmanga a’n leta chun,

Isu thisen hlu chu inthawina a nih,

Ei suolhai na loin a mi sukdam thei

ti a chuong a. Chun, Zosapthar inleta chun,

Van Beram No zet chuan,

Kan sual zawng a kalpui;

Krista inthawina thisen chuan,

Sual serh a tireh thei

tiin Lusei trong (1988 Edition) ah a la chuong zing a. Kristien Hla Bu (Hmar-2003) a ruok chun,

Van Beramte Kristan,

Ei suolhai a lak hmang;

Krista inthawina thisen chu,

Thisen hlu lem a nih

tiin an hung sie tah a nih. Hi hla inlet hi en vuoi chun Van Beramte Krista le Krista a tekhi a hoi khop el. A Saptronga chun, “A sacrifice of nobler name, And richer blood than they” ti a ni a. A tawpa ‘they’ a ti hi Judahai maichama ran an inhlan po po thisen, chang khatna tlar hmasa tak thu le a hrilkhina a nih. Hmar tronga inleta hin a tlar tawpna hi an thlak danglam a ni law law chun a Saptronga mi anga inletin, “Hming ropui lem inthawina chu, Thisen hlu lem a nih” tihai sien chu, a fel lem el thei.

A ieng ieng khom chu ni sien, misawnarihaiin ‘sacrifice’ ti ‘inthawina’ tia an mi lo inletpek vong kha tu chena ei intangna chu a nih. Damnawna leia ramhuoi kuoma inthawi chu an um ngei. Chun, dawi leia damnaw dam an um chun dawithiem hmangin kha dawi kha sùt a ni hlak a, chu chu inthawi ti a ni ngai naw a, ‘dawi sût’ ti a ni lem. Thla huolna dinga ran an that chu inthawina a ni ngai naw a, Saptrong chun ‘sacrifice’ an ti vong. Thil thawna dinga hun seng khom hi ‘sacrifice’ an ti vong. Mi somdawla ei va thrangpui dam chen khom hi ‘sacrifice’ an tih. Ram amanih pawl ta dinga nun chân khom ‘sacrifice’ an ti bok. Judahaiin Aigupta an suoksan ding zana thil tlung hriet zingna dinga ‘Fekân Kùt’ an hmanga an ran inhlan po po khom ‘sacrifice’ an tipek vong a nih. Eini rawi hlak chun ei sa duzie miin hre nawng an tih ti inlau ni awm hrimin, Saptronga ‘Feast’ amanih ‘Festival’ tia an ziek po po, ‘Kût’ ti el ding khah ‘Ruoi’ el khom ti nuom loin ‘Ruoithre’ ei lo ti vong bok. Vira khom a huntawk hi chu um sien a thrat vei leh, ei zuolkai deuh chu a hoi! Fekan Kùt kha inthawina kùt a ni naw a, an ran thathai khom kha ruoi thrèna dinga an that ringot chu a ni naw chieng khop el.

Feimthu ei zuk rol meta chu Pathien thu a ni leiin fiemthua thlak chi chu a ni naw khop el. Dr. Zairemin a ti angin, ei misawnari hmasahai kha Welsh harna hring suok an ni a. Khang hun laia theology an uor tak chu “Isu ei aiin a thi; Isun ei tuor ai a tuor” ti a nih. Chuong ang chun Lusei Baibul kha inletin, ‘ta dinga thi’ ti ding kha ‘aia thi’ an ti vong a, an ziek suol ang angin ei lo inlet sawng ve a, ei kol-awk dèr a nih. Hi theology fe peiin a hring suok chu ‘Aiaw Theulawzi’ (Substitute Theology) a nih. Chu chun ‘Zawnga tuor ai ngauin a tuor’ ti ang hi a hring thei a, chu chu a thrat nawna lai chu a nih. Chuong ang ring pawl, Mizorama mihai chun ‘Thruthluang Pawl’ an inti a, an phur ding phurpektu an um tah leiin kèl awla awlin an inthrungthluong a, iengkimah an awl dèr el a nih.

‘Sacrifice’ ti po po ‘Inthawina’ tia an mi lo inletpek khom hi ei konkawpui nasa khop el. ‘Inthawina’ tia ei inlet po po deuthaw hi thilhlan, thilpek, ran thata Pathien biek tia thlak vong Rev. Zairemin 1995 laia a lo rot kha thil thaw ngei ngei chi a nizie Baibul inleta ka’n hmang hnungin ka hriet zuol deuh deuh a nih. Thil mak ve deu el chu, tuoltro hla phuok thiem Zo hnathlakhai lai hin Isu trong hmang sandamna, intlanna, thiemchangna, inhlanna ti le a dang dang hai hi an hmang nasa hle a, sienkhom ‘inthawi’ ti trongkam tak hmang hi chuh, ka chîk tawk naw lei am a ni ding, ka la hriet dèr naw chu tie! Ieng leiin am? Ramhuoi kuoma naw chu ei inthawi ngai nawh ti an hriet chieng lei a ni ka ring. Kristien Hla Bu (71) a chun, “Krista’n suol thawina a siem tah” ti a um a. Suol thawina dinga hlan Isu taksa inteltu ding chu Setan a ni dinga ngai chun theology buoithlak tak chu ni phot a tih.

Delhi Version Baibul kan inlet tran lai chun thu her hongna dinga chabi poimaw ni si, sienkhom Hmar trong amanih Zo hnathlak a tu hnam trong khoma um si lo thu mal iemani zat le ei lo hmang suol tah hrim hrim, indik èm ém ni anga ei pom tah, indik tlat si lo iemani zat um chu ieng am law ding ning a ta? ti zawna hi kan buoipui pakhat chu a nih. Chu laia thrang sa chu ‘inthawina’ ti hi a nih. Eini rawi chauh khom ni lo, khawvela kristien thraa inngai tam tak hi a Pathien thu tak neka Baibul an lo inletna trongkam, an lo hmang nàl tah kha Pathien thu indik tak anga ngai le pom tlut an um a. Chuonga lungril hmin zor tah thluok hang sawp fai tum chu Damaska kotsuoa Paula sun thlutu var mak danglam tak hmang naw chun, khawvela ‘surf washing powder’ thra po po hmang khoma thaw ruol lo tluk a ni leiin, ‘inthawina’ ti kher hi chu ni danga la buoipui dingin kan maksan hri el a nih. Amiruokchu, pumpel song thei a ni naw leiin, a trul tongkhawng ni tah ngei ding a na, a khulang khangna dingin ka la hung phù suok tah tho tho a nih.

Inthawina hring

Mi thiemhai chun, tirko Paula’n Rom mihai kuoma lekha a thon le Mosie ziek nia ngai Genesis bu hi a bu mal lieu lieua lak ding khomin lekhabu taktling ve ve niin an ngai hiel a nih. Rom bung 1- 11 chen hin Paulan a tira a thu thruta a hmang, chanchin thra chu a ring taphothai ta dinga Pathien thilthawtheina a nizie le chu chanchin thraa chun Pathien felna chu ringnaa inthoka ringnaah suklangin a hung um pei dan (1:16-17) chi kim chu a hril fie vong hnungin, bung 12 a hung tlung hin a ki a thlak dai a, ringtu nun dan le khawsak dan dingah a lutpui a. Tuta ei thupui buon lai hi chu bung le chang hongna dinga a chabipuia a hmang chu a nih.

Baibul hmun danga tu khomin an la sam suok ngai lo trong thar hung serin, ringtuhai chun an taksa chu “Pathien hring tempul” (2 Kor 6:16) a nizie hre zing a, vong thienghlim a, chu chu Pathien ropuinaa hmang dinga a kuoma inhlan dingin a ngen tawl a nih. Hi thu hi ringtu, tu lai tronga hril chun, piengtharna chang tah hai, kuoma an zawm ngei dinga a ziek a nih. Inthawinaa ran an inhlàn hrim hrim chu an that phot a, a thisen an lak a, an chan dar a, a thren maichamah inhlanin an raw hmang a, a bang po chu thiempuhaiin an fak hlak. Chuong chu ni siin, ieng leia an taksa chu inthawina hringa inhlan dingin a hril am ning a ta? Inthawina hring chu thil um thei a ni? Threnkhat fiemthuin, a hringa inthawi chu maichamah invak sup sup an ta, a lo invak suok pawl um an ta, thiempuhai lu inhai a tih an ti ang chu a ni naw chieng khop el.

Hi lai hrilfiena hi bung 6-ah suol thisana Kristaa hring thu chipchier takin Paulan a lo ziek ta a. Chang 13-a chun, “In taksa penghai khom suol hmangruo dingin suol kuomah pe phal bok naw ro; chuong nek hmanin, mithi laia inthoka hung hring nawk angin Pathien kuomah inhlan lem unla, in taksa penghai khom felna hmangruo dingin Pathien kuomah pe lem ro” a ti a. Chang 3-6 a chun, “Eini Krista Isua baptisma chang tah hai po chu a thinaah baptis-in ei um tah ti in hriet naw am a ni? Chuleiin, Pa-in mithi laia inthoka ropui taka Krista a keitho anga eini khom hringna thara ei leng ve theina dingin, a thinaah baptisma changin, a kuomah phumin ei um ve tah a nih. Ama thi anga eini khom ama leh inzoma ei thi chun, ama a tho nawk ang bokin ama leh inzomin eini khom keithoin um ve ngei ei tih. Suol bawia ei um ta nawna dingin suol put taksa hi sukhlum dingin ei mihriem hlui chu a kuomah hemdein a um tah ti ei hriet” tiin a lo ziek bok a nih. Chu Kristaa hemde, a thinaa phum, a thonawknaa tho nawk, Adam thar chu a nih inthawina hringa inhlan dinga a ti chuh.

Inthawina hring ni loin, inhlanna le inpekna hring le thienghlim, Pathien lawm tlaka ei inhlan dan ding ruok chu ni dang hun remchanga hril dingin la khek ei tih.

(Delhi, August 7, 2010)