INTHAWINA HRING-2 (Living Sacrifice)

By L.Keivom, Inpui Columnist

Chuleiin unauhai, Pathien lawm tlak

inthawina hring le thienghlima in taksa chu inhlàn

dingin Pathien lunginsietna zarin ka ngen cheu.

-Tirko Paula (Rom 12:1).

Inthawi Vs. Hlànbiek

‘Inthawina Hring’ thusep hmasaa khan Baibula ‘inthawi, inthawina’ ti trongkam Pathien le inzoma ei hmang hi trongkam indik lo a nizie ei hril ta a. A san chu ‘inthawi’ hi ramhuoi biekna chaua ei hmang hlak lei a nih. Judahai chun thil amanih ran amanih Pathien kuomah inhlànin an biek hlak a; ramhuoi chu vauh zàma hnot suok an tum hlak. Eini khom Pathien kuomah ran inhlanin sakhawhmang ei thaw hlak. Vangduoina le natna intluntu nia ei ngai ramhuoi ruok chu tlon lungawi tumin a kuomah ran inhlanin ei inthawi hlak bakah dawithiemna hmangin vauh zâm ei tum hlak bok. ‘Inthawi’ chu ramhuoi biekna thil hrilna trongkam a ni leiin Pathien ei biekna thu hrilnaa hmang chu Pathien hrilsietna a ni thei a, Pathien thu inchuktirna leh an inmil thei bok nawh. Hrâng hlui hla phuoktuhai khan trongkam indik lo a nih ti an hriet chieng lei ni mei a ta, an hla phuokah ‘inthawi’ ti trongkam hi an hmang ti kei chun ka hriet dèr nawh.

Tu lai hnaia ei hlaa ei hmu sun chu Thangzarlien phuok “Aron Inthawina” tia a thunon, “Aron inthawina chu a ngai ta nawh, Lal Krista thisen chu ka suol thawina a nih” ti hi a ni el thei. A thu a tluong, a hril tum khom a chieng. Amiruokchu, hang bi inthuk deu inla, suol thawina dinga inhlàn thisen dongtu chu suol neitu le intluntu nia ngai Setan a ni chun, chu inthawina thisen lo dongtu khom chu ama bok ni ding a na, thil buoithlak tak ning a tih. Suol man intêltu chu Setan ni loa Pathien ei innitir ding khom ni sien, Pathien nina le thil inhmè lo tawp hung ni bok a ta, theulawzi dangdai le tribaium tak hung ni thei a tih. Chuleiin, Pathien biekna le inzoma ‘inthawina’ ti hmang hi a lo infùk naw khop el. Ei ngaituo inthuk po leh a poizie ei hriet deu deu a nih.

Pathien biekna thil a ni leiin ‘inhlàn, inhlànna, inpêk, inpêkna’ tia sie a thrat lem thu a hma khan ei hril ta a. Chu nêk hmana thraa ka ngai chu, ‘worship’ ti trongkam ei nei naw leia ‘chawibiek’ ti trongkam thar ser a ni ang khan, Pathien bieknaa maichama thil inhlan hrim hrim hrilna dingin ‘inthawi’ ti nêkin ‘hlànbiek’ (thil inhlàna Pathien biek) hmang inla, a fûk lem daih ring a um. Hieng ang deuh, biekbuka bei 12 an sie, Sabat zata a thara an thlak hlak, Saptronga ‘shewbread, bread of the Presence, consecrated bread’ tia an inlet, eini tronga ‘entirna bei’ tia indik lo deua an lo sie kha Delhi Version-a chu ‘hlànbei’ tiin kan sie a nih (Ex.25:30). Chuonga ei sie chun, a chunga hla ei tarlang khom hi, “Aron hlànbieknahai chu a ngai ta nawh, Lal Krista thisen ka suol sawpfaina a nih” ti hung ni tang a ta, Pathien thu inchuktirna leh khom hung inkhuongruol tàng a tih.

Hlànbiekna hring & thienghlim

A hmaa ei thu zai zuiin ‘inthawina hring le thienghlim’ ti kha ‘inhlànna hring le thienghlim’ amanih ‘hlànbiekna hring le thienghlim’ tiin ei thlak tah ding a nih. Ei hrilna ki (context) le inzom chun ‘inhlànna’ ti hmang hi a fûk lem el thei. Hi taka inhlàn dinga a ti hi lungril le thlarau ni loin taksa a nih. Hlànbieknaa maichama ran an inhlàn hrim hrim chu suol phurtu dinga thlalera a hringa kel (azazel) an insuo ti chauh naw chu that sa le chan nawi sa a ni vong. Tuta Paula hril ruok hi chu Pathien sin thaw dinga taksa a hringa inhlàn a nih. An leh, suol put mihriem taksa, Edena bawsietna leia suol lailet dèra ngai chu thienghlimna le felna Pathien, Pathien Indik, suol le tirdakum hrim hrim ngai thei lo kuoma chun ieng tin am inhlàn dingin Paula hin a hril am ning a ta? Chu taksa chu ieng leiin am thienghlimna le felna Pathien chun a lo pom hrim hrim ding? Pathien chu Thlarau a ni a, ama chawibiektuhai chun thlarau le thutakin an chawibiek ding a ni thu Isu ngeiin a hril a (John 4:23-24). Chuong chu a ni si chun, taksa chun ieng am poimawna a nei a?

Paula chun Isu Krista thina le thonawkna ringtu chu a thinaa hemde, ama le phùma um, ama ruola thilthawtheinaa keithoa um, Adam thar niin a ngai a. Chu chu Rom 6-ah chieng takin, “In taksa nuom zawng thil suolhai zawm dingin in taksa thi theia chun suolnain ro rêl ta naw raw se. In taksa penghai khom chu suol hmangruo dingin suol kuomah pe phal ta bok naw ro; chuong nek hmanin, mithi laia inthoka hung hring nawk angin Pathien kuomah inhlàn lem unla, in taksa penghai chu felna hmangruo dingin Pathien kuomah pe lem ta ro” (12-13) tiin a lo ziek bakah 2 Korinth 6:16-a chun ringtuhai taksa chu ‘Pathien hring tempul’ a ni leia vong thienghlim dingin a’n fui a nih. Kolosa 3:3-a chun, “In thi tah a, in hringna chu tu hin Pathien kuomah Kristaa chun thupin a um ta si a” a ti bakah “Tu hin chu mihriem tharin in inthuom tah a, chu chu Siemtu hrietna hau ding le ama angna nei dinga siem tharin a um pei a nih (3:10) a lo ti bok a. Chuong anga Isu Kristaa hringna nei chauh chu Pathien ngaia fel, thienghlim le pom tlak an nih. Chuong ang taka hring le khawsak chu thlaraua Pathien chawibiek dan ding tak niin Paula chun a ngai.

Tu lai trong hmangin hril inla, inhlànna hringa taksa inhlàn ding thu a hril hin sandamna chang dinga mani ditthlangna hmanga Lal le Sandamtua Isu pom dinga inhlan thu ei hril vet hi a kawk nawh; Isu ring le pom tah, Pathien nau ni tah, Pathienin a hriethai thaw ding Paulan a hril a ni lem. A tawi zawngin, piengtharhai thaw dinga a ziek a nih. Chuonghai chu Pathien nau an ni tah leiin, khawvel nauhai thlèk dan le khawsak dan zui ta lo a, lungril thar put a, inthlakthleng dingin a hril a nih. Inthlakthleng thu a hril hin mihriem sung tieng le puo tieng nun, ngaituona, chang dan le chet dan iengkim a huop vong a nih. Chuonga an insiem thar pei chun a hmatiemin Pathien ditzawng thil thra, khawvel thra ti zawng ni lo, Pathien thra tizawng hung hrieng an ta, chu chu hrea an zawm chun a lawm tlak hung ning an ta, Pathien famkimna chu ringna lampuia thilthawa kal a chawi hrat dan angin damten a hung hriet fie pei thei ding a ni thu a hril a nih. Hi thil hi thawk le khata thil tlung thut, A AW B a inthoka MA kai thut ang ni loin ahmatiema hmasawnna insersuon pei chu a nih. Chu chu “Siemtu hrietna hau ding le ama angna nei dinga siem thara an um pei” thu Paulan Kolosa mihai kuoma a hril khah a nih. Chu bok chu a nih Paulan Rom 1:17-a ringnaa inthoka ringnaah Pathien felna suklanga a um thu a hril khah.

“Siemtu hrietna hau ding le ama angna nei dinga siem thara um pei” ti hi la hang tuihni met ei tih. Eini rawi hin sakhuona thil hrim hrim hi taksa thrang loa thlarau thil nguka làk tum pawl ei um a, sienkhom hi hi Pathien thu lak dan khingbai a nih. Taksa le thlarau hi thil inzom le inmat tlat a ni leiin ui le kel anga thre hrang thei a ni nawh. Pakhat ngaisaka pakhat ngaithà chun nun a siksawi naw thei nawh. Nun siksawi chu nun hrisel a ni ngai nawh. Mihriema theina Pathienin a sie hi dannaranin zaa sawmkhat vel chauh ei hmang phak a, mi chungchuonga ngaihai hin zaa sawmpanga vel an hmang el thei. Siemtuin hi khawvela hin iengkim a sie sa vong a ni a, chu chu a hmu suok rawn rawnin hma an sawn hrat el a nih. Siemtu hrietna tieng hung hau pei a, a thuruk le inthup hai hung hre sap pei a, ei thluok zaa sawmnga vel ei hmang thei pha chun vuongna khom ngai loin ei nuomna hmun hmunah ngaituona thläin a mi’n thrut el ka ring. Boruok zai anga hrata ei vuong lem chun sekhon khatah hnuoi hi voi sari ei hêl suok hman ding a nih. Chu chu var fe hrat dan khom a nih. Paula khom van thumnaah a hang inzin daih a ni khah ( 2 Kor 12:2-4). A thil hmu le hriet ropui tak chu inngaihlut phànaa a hmang nawna dingin a taksaah hling siein a um a, hang hril châkna a nei pha leh hling chun a sun zok hlak ni awm tak a nih. Chu hling chu ama chun Setan tirtawn a ti daih a nih. Zawlnei inti, eini laia inlarna hmuhai hlak van ram le meidil an hmu thu hril vat vat châkin an mongin a zat el bok si. Thlarau chang seng seng, ei inang naw thei khop el. Mani nina nêka ropuia inhril hi a lo inhoi khom ni mei a tih.

Chu lei tak chun, inhlànna hringa inhlànhai chu mani nina bak inngai sang lo ding le lungril fim puta mani nina inbi chieng dingin Paulan a’n fui a nih. A san chu, kohran chu taksa pum khata bung hrang hrang a um anga inpêng tuo vong le thilpek tum tum nei seng, mani theina muol senga thrahnemngai taka pu ding, lemderna thrang loa inhmangai le inlainat tuo a, inchawimawi ton a, theitawpa Lalpa rong chu bawl a, beiseinaa kal chawi a, sukdùdàna sel taka tuor a, ieng lai khom trongtrai a, tlasamhai somdawl a, mikhuol lawm a, mi suknomnatuhai malsawm a, lawmhai lawmpui a, traphai trappui a, inrem taka um diel diel a, chapo loa mi hnuoihnunghai pawl a, indu ngai lo a, suol chu suola thungrul lo a, mi po po ngaia mawi thaw a, mani tienga bek mi po po leh inrema um a, phuba la loa Pathien thungrul dinga sie a, hmelmahai phing a trâm leh bu pe a, an dang a châr leh tui pe a, suol chu suola thungrul lo a, thratnaa hnè lem chu ringtuhai thaw dan ding tak nia a hriet lei a nih (12:3-21).

Inhlàn nun neituhai

Paulan ringtu nun dan ding a hrilnaah thil a hril uor pahnih a um a, pakhat chu iengkim hi Pathien lunginsietna zâr vong a ni thu le mihriem thaw ding tak chu Pathien dit zawng hriet le thaw a nih. Chu ding chun suol thisana Kristaa hring, felna bawi ni dinga taksa inhlan le thienghlim taka khawsak a trul thu a uor. Taksa penghai chu felna hmangruo dinga Pathien kuoma inhlàntuhai chu an chungah suolin thu a nei ta naw leiin mi zalen an ni a, iengkimah an thratna dingin Pathienin a thawpek a, thiem a’n changtir a, a chawimawi bok. Anni chu Pathien lunginsietna bêl, a ropuina changtu dinga buotsai an nih. A dit zawng thaw nawtuhai ruok chu Pathien lungsenna bêl leh a tekhi thung a nih.

Pathien pom tlaka thienghlima taksa inhlàntu chun ieng tin am nun a khal a? A puma inhlàn thienghlim a ni leiin felna Pathien chu ieng lai khomin a hnai thei a, a pawl thei bok. A kè chu inhlàn thienghlim a ni leiin thil thra thaw dingin a pên a, misuolhai remruot a zui naw a, an lampui a hraw naw a, hmusittu lai a thrung ve naw a, Lalpa lawm zawng chauh sun le zan a dawnkhawl hlak. A kut chu inhlàn thienghlim a ni leiin thil suol thawna dingin a sukporche nuom naw a, tuolthatna le mi suksietna dingin a lek ngai naw a, thamna la dingin a phar ngai bok naw a, thil thra iengkim thawna dingin a hmang lem hlak. A bau le lei chu inhlan thienghlim a ni leiin khêl, thu thra lo le porche nekin thudik le thutak hrilnain, Pathien hrilsietna nekin inpaknain a hmang. A nä chu inhlàn thienghlim a ni leiin thu thra ngaithlakna tieng chauh a daw. A mit chu inhlàn thienghlim a ni leiin Pathien dit zawng tieng chauh nghain a meng. A hnâr chu inhlàn thienghlim a ni leiin Pathien lawm zawng rim inhnik chauh inhnamna dingin a hmang a, thil rimse dang a ngai thei nawh.

Pathien lawm zawng le pom tlaka mi po po ta dinga inhlànna hringa inhlàn hmasa tak chu hemde Isu, thia tho nawk chu a nih. Ama zuituhaiin Pathien an chawibiek dan ding tak chu inhlànna hringa inhlàn a, an ringna bulpui le sukfamkimtu Isu chu ringum taka zui a, an mihriem chanpuihai lai an theina le thilpek dong dan ang senga rongbawl a nih.

(August 20, 2010 Delhi)