TIME MANAGEMENT

By L.Keivom*, Inpui columnist

Each morning puts a man on trial and each evening passes judgement.

-Roy L.Smith

HSA, Delhi Joint Headquarters huoihot Seminar-ah thu hril dingin an mi ruot a, ka thupui chai dinga an tuk chu ‘Time Management’ a nih. Mi pali dang- Tv. David Joute (Legal Awareness), Pu Lalthanglien Ruolngul (Challenge), Pi Judith Hmar (DU Experience) le Pu C.Thant Khobung (Community Service)- thu hril dinga ruot an ni bok a. Hi Seminar hi August 14, 2010 chawhnung dar 1-a tran ding ti a na, ieng chen am a aw ding ruok chu prokram-ah ziek sa a ni nawh. Trum khat inthrunga topic hran vong panga chai dinga prokram buotsai chu hun hmang hlawk dan inchukna dinga thaw a ni ngot naw chun huphur a um ang reng khop el. December 10, 2004 -a Nuhmei Magazine Editorial Board huoihota Young Learners’ High School, Churachandpur-ah HMAR TROBUL SEMINAR HMASA TAK 2004 an nei truma, “Darkar ruk sung chaua Seminar paper pariet tiem le hril tlangna an nei el bakah mi pali thuhrilna hun le a bebawmhai thawna hun an nei el thei hi, an paper buotsaihai a thra taluo leia hril sap ding an nei naw lei a ni ngot naw chun, ngaisang an umin Seminar dang buotsai nuomtuhai chun an thaw dan hi indon chieng a, inchuk tlak ni dingin ka ring chu tie!” ti ka ziek khah ka zuk hriet suok vang vang chu tie!

Ka thu buon ding hi olsam deua inlang, sienkhom thu harsa deu el a nih. A hmasa takin ‘Hun’ ei ti ieng am a na? ti zawna hi don hmasak phot a ngai. Pahnina, hun chu nuom nuoma her kawi le thunun thei a ni? ti zawna hi don a ngai bok. Chîk taka ei sui chun, chawl loa hung le fe zing anga hun ei ngai hi a lo ni dèr nawh. Hun hi chatuon, bêl rei inkuol anga intranna le tawp nei lo ang a nih. Hun sunga chun thil siem po po hi ei um a, ei inthlak danglam zing a, hun ruok chu a pangngai zing. Sakhuo taka hril chun hun hi Pathien a nih ti thei khom a nih.

Hun hi vong thei a ni nawh. Ieng anga invong fel khom ni inla, ni khatah darkar 24 neka tlawm amanih tam lem amanih nei thei a ni nawh. A chîn taka inthoka a lien tak chenin ei dong zat thuhmun char a nih. Inkhawma ‘hun vongtu’ ei ruot hin hun vong loin ei prokram siem angin inkhawm a thruoi lem a nih. Chuleiin, ei thupuia ‘Time Management’ ei ti hi trongkam indik lo, sienkhom khawvelin ei hmang làr èm ém si chu a nih. Keima topic thlang chu ni sien, ‘Time Investment’ tiin sie lem ka tih. Hun hi sum angin ei hmang hlawk thei a, sienkhom vongin ei thunun thei nawh. Hun vong dan thu ei hril hin a hmangtu mihriemin ei hmang hlawk theina dinga eini ei invong fel dan ding le inthunun dan ding thu ei hril lem a nih. Hun inzât senga ei nei hi ei ngirhmun le hun tong zirin ieng tin am hmang hlawk ei ta? ti zawna chu don ei tum a nih.

Hun hmang thaina san zong suok

Mi tam takin hun hi hmang hlawk nekin ei inchèk a, ei hmang thai. A san chu a hlutzie ei hriet chieng naw lei a nih. Hun hlutzie hre chieng taphotin hlawk tak le daizai taka hmang dan an inchuk a, daizai takin an hmang a, thil tam tak an thaw bok. Ieng leia pakhatin a hmang thai a, pakhatin a hmang zai thei bik am a na?

Hun hmang hlawk dan inchuk ding chun a hmaa ei lo hmang hlawk nawna san bi chieng a ngai. I hun fa hektu le inrutu chu ieng tak am a na? Thabona, ieng khom thaw pei loa inzam mei mei nuomna lungril a ni? Inleng nei dam, trûl loa inpan mei mei dam, invâk khawhrawla titi bawraw sepa gawp mei mei dam, inkhel dam, puipungna le inkhawm chi hrang hranga thrang kim tum dam, pawl thilthawna tinrenga inhmang rai dam, thil thaw ding a thuphung chaua ngaituo chamchia, boruokah in ropui tak tak bawl a, a taka ruok chu thaw tran um si loa hun khawral le tran khom tran hmaa pamtrul ching dam, telefawn le mobile khel le rok ringota inhmang dam, thil thra le hlawk ding iengkhom thaw si loa computer le inhmai tuoka thrung, internet leh inlenga game khel, video en, music ngaithlak, surfing thawa kil le kap hrut kuol, chatting thawa inpan le inleng, facebook-a twit twit twit ringot dam, hmaimanna dinga Pathien rongbawl anga inhrila kohran pawl thilthawna taphota a kûl a taia inhmang kim tum dam le thil dang dang a ni thei. A poimaw tak chu ei hun inrutu zong suok a, inru ta lo dinga a kut le ke khuop a, ei hun nei chu thil hlawk lem thawnaa hmang trangkai a nih.

Chun, sun le zan buoi zinga inlang, buoi inti ém èm bok, sienkhom thaw kuok hril ding bar um si loa hun khawral thei a nih. A ruola sin tam tak thaw kop a, thaw phuol seng a, ring tlak le hmang tlaka thraa thaw aruong um si lo hi thil um thei el khom ni loin thil um rop hlak a nih. Thra tak le fel taka thaw zo thei si lo ding le thaw seng lo ding sin amanih mawphurna lak hi hmang loa hun khawralna le hlawsamna intluntu a ni nuom rop. Chuleiin a hmatiema ei hma dom ding hriet hmasak a ngai. Ngai poimaw ding le thaw hmasak ding le ding naw thlier thiem hi hun hmang thratna dinga sirbi poimaw a nih. Chu chu Saptrongin Prioritization an tih.

Prioritization

A hmatiema ngai poimaw hmasak ding le thaw hmasak ding thlierna hi Prioritization an ti chu a nih. Ieng am thaw hmasak ding ti hriet ding chun mani tum hriet chieng hmasa phot a ngai. Lampui rel ang a nih. Ka lampui rel khan a tawpah ka tlung tumna a sun a ngai. Ka tum ka hriet hnunga ka thaw ding hmasa tak chu, ka tum chu hlen thei chi a ni le ni naw le a hlenna dingin ieng am a hmatiema ka thaw pei ding ti hriet a nih. Mihriemin chemkalna zawng ei nei seng. Mani theina zawng le inhnikna zawng hriet chieng a ngai. Chu chu hlawtlingna lampui intranna a nih. Chuong naw chun mani kuong lo ding nora sawt tak buoi thei a nih. Chu thila chieng hnung chun mani thaw dinga inbùr tlat le tum ram hnota tlan char char a nih.

Thaw ding indot (task list/to-do list) siem changa mi tam tak method hmang chu Alan Lakein vor lar ABC Method a nih. ‘A’ chu thil poimaw le inhmaw, a ni lá laa thaw chi; ‘B’ chu thil poimaw, sienkhom inhmaw rak ngai lo, kar khat sunga thaw chi; ‘C’ chu thil inhmaw lo, poimaw rak lo bok, thla khat sunga thaw chi a nih. British author Mark Forster ruok chun a lekhabu ‘Do it Tomorrow and Other Secrets of Time Management’ a chun thaw ding list ziek tlar duot nekin ni tina thaw zo lo list siem a, thaw zo a ni nawna san le thaw zo a ni theina dinga thlakthleng ngaihai list siem (Closed to-do list Method) chu thil hlawk lem daih niin a ngai thung. Eisenhower Method an ti, USA President hlui Eisenhower hmang chu: poimaw le inhmaw (important & urgent) chu mani ngeia thaw nghal, poimaw rak lo le inhmaw si le poimaw, inhmaw rak ngai lohai chu a thawtu ding mi dande a, a thaw zo hun ding ruotpek a, chuonghai chu thawpui le en felpui a nih. Ama trongbau nia an hril chu, “What is important is seldom urgent and what is urgent is seldom important” (Thil poimaw hi thil inhmaw hehu a ni ngai meuh naw a, thil inhmaw hehu hi thil poimaw tak a ni ngai meuh bok nawh) ti hi a nih. Hi trongbau hin umzie inthuk tak a pai. Ram le hnam le insung ta dinga thil hlun le poimaw hrim hrim hi inhmaw thut thuta rel le indin thei a ni nawh. Rome khawpui chu ni khat thilthua bawl a ni nawh.

A chunga ei hrilhai hi a thuphunga mi thaw dan tlangpui a nih. Amiruokchu, mi thaw dan kha an ngirhmun pal lai le ei pal lai an inang si naw chun entona thaw ve tum kher khan hlawkna nekin kiemna, lawmna nekin beidongna a hring thei. Ei ngirhmun zira khawvel hi ei pal seng a ni leiin, chu le inmila hun hmang dan ding khom rel a ngai. Inchukhai lai seng seng khom insung khawsakna ngirhmun zirin ei hun hmang dan inang naw nih. Rethei sungkuoa inthoka hung chun a hun awlah insung sin tam tak thaw ding a nei laiin neinung sungkuoa inthoka hung chun a nei naw el thei. A hmasain hun awl tlawmte a nei sun chu lekha tiemnaa a hmang laiin, a nuhnung ruok chun Tv enna, Computer Games inkhelna, music ngaithlakna, futbawl le thil hrang hrang inkhelna le leng khawthangnain a hmangral lem el thei bok. A rizal chu inang kher naw nih: mi rethei kha mi hlawtling, mi neinung kha mi hlawsam a hung ni lem dai thei. A chik chu hun hmang thrat a nih.

Chuong ang pei chun loneitu, kamdingtu, zirtirtu, faktawri neitu, khawtlang le ram le hnam ta dinga sinthawtu, kohran rongbawltu le sin dang dang thawtuhai hun hmang dan inang naw rup a tih. A poimaw tak ruok chu hun hmang hlawk a nih. Ngirhmun thra rem tuma hma ei lakna sengah ei sirbi tin rem kha a nghetin a tlo ding a nih. A dawrawm vai chun hun tam tak ei sengna kha innghatna tlak ni loin a tawpah chim thla ruop a ta, hmangna um naw ni a, thâ le zung, sum le pai le hun hlu ei seng thlawn ning a tih. Thiemna dikri nei, hmang tlak ni si lo ei tam hi entirna thra tak a nih.

Inchuklaihai mawphurna

Tuta truma ei target chu inchuklaihai an nih. Nu le pa tam takin nei thing-lung khawngin, ei nauhaiin mi nauhai thiemna hung hnot phak a, ruol an hung ban ve thei dan ngaituoin, lekha inchuk dingin Vairampur hmun hrang hrangah ei tir thlak a. Chuonghai chun pasalthra ramsuok anga sapui sahrâng lu tam tak hung hawn dingin nu le pain lo beiseiin, hnèna hlado leh thiemna lu hawna an hung kir chu lo hmuok a, silai thun tlinga tlang an tlir dum dum ni ding chu Tlumte thlirin an lo thlir a. An mit chu Vairampur tieng fuin,

En tu’m, mihrâng pasalthrahai,

An Sinlung ram chu maksanin,

Thlang tieng kawlrawnah an liem a,

Ei ram sanin rinum an do

tiin an inthla liem a. A nih, anni lakah an beisei a’n sang a, insang ding khom a ni hrim a nih. An hung puitling hun ding chu tui kang nghaka nghakin, beiseina tui far fep fep chu nisapui hnuoiah tuorsel takin an nghak a. Nelvai maktaduoi tam kara leng an ni leiin an ram hung theinghil palh hlauh an tih ti an inlau ngawi ngawi bok a.

Nangni mi hrâng pasalthrahai,

Hmar tlangpui ei ram khi en tu’m;

Zopui sawl ang par kar nghakhla’n,

Daw-lai siktui ang an nghak cheu

tiin beiseina hlapui chu, hi hla an phuoka inthoka kum 80 hnunga khom hin, ei mipuihaiin chawl loin, mitthli sur hnuoiah, an la rem zing a nih.

Chuong chu a ni leiin, Vairampura inchuklai umhai hin ei mawphurna hi theinghil nawng ei tiu. Ei hun ei hmang thra am? Sahrang sapui lu pâr bunga hawn dinga ei nu le pa le ei mipuihaiin an mi beisei lai hin, ei ramsuokna ni sapui le ruopui hnuoi, ram khokrok le lengkir hmun, invot le thrangthrâm inlalna hmuna hin, mani theina le remhrietna po po hmanga ni tin sâ pèla ramtrang nekin, riebukah sawlhna innem phaa zal tlep ringot ei thaw a ni chun, Solomon Thuvar (6:9-11) a,

Mi thabo, ieng chen am i zâl ding?

I zâl chu ieng tik am i tho ding?

‘La hang zâl met ka tih,

La hang inhnâr met ka tih,

Kut hmasuiin, hadam takin,

La’n zam met ka tih’ i ti sung khan,

Pasietna chun rûkru angin,

Hung nang thut a ti che a,

Tlâksamna khomin râl angin,

Hung nang chîng thut a ti che

a ti kha a mi lo beiseitu ei ram le hnam, ei nu le pa le ei ni ngei chunga trongsie hung tlung ding chu a nih.

Mani tonhriet

Uong thu chang naw sien, Pathien lunginsietna zarin keini rawi huna khan chu, sikul thraa kai phak chu vangkhat tê ni hai sien khom, India ram puma khom hming ser khopin Zo hnathlakhai khan sapui sahrang lu kip, IAS, IFS, IPS le Central Services Class1 chi hrang hrang kan hung hawn a, kum tinin Zoram khawvel tlang tinah hnèna hlado insam ri a rè ngai nawh. India rama ei tlangmi chanpui tu khomin khang lai khan chu an mi el phak ngai nawh. Vairampur khawpui hmun hrang hranga Zo hnathlak mi hieng zozaiin hmun ei khuor ve el tah khom hi a sulsutu chu keini hun laia mihai kan nih. Tu hin chu kan tril zo ding a ni tah.

Keini hun laia inhrol phura suok ang kha suok tlawm tah inla khom, kan hnung daltu ding mi an la hung suok pei a, lawm a um tak zet. Anni hi second generation an ni a, kum hni kum thum sungin an tril ve a hun ta a, an tril ruolin mani in ang ela an hluo lum sorkar inhai hi an suoksan ding a na, nuom nuoma a chin a lien ei lut ei suokna inhai hi a hluotu ei um naw hnung chun ei ral thlir phak trawk ding a nih. Intlansiekna khawvela hin, mani in luma ei ngaia khom sawt nawteah a mikhuol le nawkora thrang thei a nih. Chuong ang bokin, ei mikhuolna rama ei ngaia khom a chongpu ei hung ni thei bok. A ru no no suokna, a ru chang chang dingchangna khawvel a nih. Chu khawvela chun a pisi ta dingin dam khawsuok a olsam nawh. Anni hung thlaktu ding, pum inhrol lem ei la hung suok nawk pei beiseiin thlir inla. Chu beiseina chu a taka hlen suok ngei dinga tha le zung seng a, zaper thâ inchat throt khop le taikuong inkhup thrak khopa ruol ela thrang la dingin thrangtharhai hi inbuotsai hai sien ei nuom takzet a nih.

Chu beiseina chu tak rama a hung inchang ding chun ei thupui ‘Time Management’ a inphûm, ‘Self Management’ amanih ‘Time Investment’ ti hi a her hongna chabi poimaw ni rop zing a tih. Inchuklaihai hin ieng leia sum tam tak senga vairampurah an um am a na, iem a na an thiltum, an thil tum hlenna dingin ieng am an thaw a ngai a, chuonga an thaw trulhai chu ni tinin an hlen suok am, an hlen suok naw chun a san ieng am a na? tihai hih sun le zana anni le anni an indon rop ding chu a nih. An hung san le an thil hlen ding an hriet fie ruolin an mawphurna hung hre fieng an ta, thil trangkai thawna dinga hun hmang thrat poimawzie hung hre zuol bok an ta, chu chun an hun baw buoitu, inrutu le fa hektu le chuonghai dang dan ding chu hung hre pei bok an tih. A poimaw tak chu, thil thaw tum neka thaw, ei hun baw buoitu le inrutu hnawl tum neka hnawl hmang a nih. Tum nei a thra. Chu neka thra lem chu tum kha a tak ngeia thaw a nih. Tumruna hi thilthaw thrang lo chun thil thi a nih.

Hlawtlingna le hlawsamna hi Pathienin hnuoia a phùm sa vong a nih. Chu chu mi taima le huot dok rawn rawnin an chang rawn el a nih. Intlansiekna khawvel a ni leiin a tlan hrât hràtin lawmman an chang. Tlân ve loa inthrung thluonga lawmman dong thei a ni nawh. Mi nêka muonga ei tlàn chun lawmman thra dong thei a ni bok nawh. Lawmman pakhatna dong ding chun mi po po nêka tlàn hrat a ngai. Chu ding chun sekhon tin hmang hlawk a trûl. Sekhon tin hmang hlawktu chun minit khatah voi 60, darkar tin voi 360, ni tin voi 8640 a hlawtling a nih. Hmang thaitu chu ni tin voi 8640 a hlawsam thung a nih. Chuong ang khop chun hun hmang thra le thra naw inkar chu a hlâ a nih.

Kum 2002 May khan kum 35 zet India sorkarah sin ka thaw hnungin ka penson a. Ka penson charin a hran hlaka Baibul inlet ka tran a. Ka tran hmain mi tam tak ka rawn a. Mi thiem ruol tam tak an ruoi hmana inlet zona dingin kum 10-20/30 an buoipui hlak a ni leiin ka dam sunga ka zo thei an mi ringpui naw thu chu mi tam lem baua inthoka ka dong a nih. Kei ruok chun sierkop dang, a chunga ka hril tah khi hmangin, ka hisap thung a. Ni tin a tlawm takah darkar 12 sin ka thaw a, minit tin ka hmang hlawk chun kum 4-5 inkarah ka zo thei ka ring a. Chun, mi thiem tam tak ruoi nekin ka khat chun inthuruol olsam lem dingin ka ring bok a. A thawa thaw chu ka chan, thrangpuina ka mamaw hrang hrang phuhruk chu Pathien chanah ka sie top a. Tûk tin dar 7-ah ka thrung tran a, zan dar 1 chen ka thaw a. Delhi Version phek 1686-a saa hin thu mal 8, 65,754 a um a, kum thum le thla sari sungin inlet sin tak chu ka zo hman a nih. H.K.Kawllienthangin editing le proof reading a mi thawpui char char a. 2010 Gospel Centenary hma ngeia zo tumin hma kan lak a, kum 2007 October khan kan tlangzar hman dèr tah a nih. Chu chu a tak taka sekhon tin le minit tin hmang hlawk umzie ka hriet ve dan chu a nih.

Baibul inlet kan bei ngùk anga ngûka sinthaw tu khom an hlawsam thei ka ring nawh. Inchuklaihai khomin tum nei a, an inchuk ding ngûk taka an inchûk phot chun ieng ekzama khom ruol an ban nawna san ding ka hriet bok nawh. Pathienin hun lawmum a mi pek hi thil thra thawna dinga a mi pek a ni leiin, minit khat khom a thlawna hmang loa inliemtir chu suol a nih. Inchuklai ni si, zing dar 7 hnunga lekha tiem loa zal an la uma, lungrila inthiem nawna an nei dèr naw chun, ieng angin insuk-kristienhai sien khom, mani le mani inhlem chauah kei chun ka ngai. Zing tho ka theinghil changa dar 7-a khumah ka la zal chun, ka sungrila khêl hril thei lo rawlin, “Keivom, thaw ding i hau vei leh, ieng leia i la zâl zing am na?” tiin a mi hung hril a, ka tho naw chun minit tinin suol ka thaw a nih ti ka hriet leiin ka tho naw thei nawh. Minit tin inzaa hmang thratu inchuklai chun hun hlutzie a hriet leiin malsawmna tam taka vurin um a ta, a hmang thra nawtu chun pasietna puontriek sil a tih. Hun inza le hmang thrat hi malsawmna hnàr a nih.

A tawpa inchuklaihai kuoma ka thurawn pek nuom chu hi hi a nih: Invong Bu nei la, ni tina i thaw ding ziek thla la, zanah i zal hmain i thaw zo thei po thai bo la, i thaw zo naw le zinga i thaw dinghai chu ziek thla nawk la, i thaw zo thei po chungah Pathien kuomah lawmthu hril la, i thaw zo naw po lakah ngaidam hniin a tuka i thaw zo theina dingin thrangpuina hni rawh. I thaw ding tak thaw mumal thei loa i hun fa hektu po po chu i ta dingin rukru trium an nih ti hrein, “Setan, ka hnungah fe rawh” tiin hnawl ngam rawh.

(Delhi, August 14, 2010)