PAULA PAKHUONGTE ZAWLKHAWPUI PASAL THA’N MUOL A MI LO LIEMSAN TAH!

By Dr. Lal Dena* Regular Contributor.

Mihrang an kim ta nawh,

Khawtlang daingul thing ang an tlu ie

Khawvel ram hnu tieng an sawn a

- Pastor Thangler.

August 28, 2010-ah Hmar Literature Society Executive Committee-in ditsakna thlaithleng Hmar Inpui Office, Rengkai hmuna an lo siem chu kil dingin David K.Zote, Deputy Registrar, Manipur University leh kan hang fe a. Zanah Sielmata ka inah ka zal hadam hnung dar 12 vela, ruol ngai um Paula Pakhuongte-in muol a mi lo liemsan thu hrilin ka um a; kan ro a, khuo a suksawt bawk. Thla inhek metin ka in sawng tukver inhawng kawng elah a hung khaw a; nunhlui ram Zawlkhawpuia kan tuolchaina le Lientinkai sikul (NEIGM)-a kan kai lai dam ka zuk suikir a; lung an leng vawng vawng ngei ie.

Paula leh hin kum khat sunga pieng kan nih a. Pherzawl High School indin a hung ni khan Mizoram le India hmar sak hmun dang danga inthawkin Pherzawl High Schoolah khan an hung kai tawl a. Hostel bawl hma’n High School student khuol ralainthawka hung kai hai kha mi inah an um tawl deu tak. Khanglai khan Lalrimawi Pakhuongte (tuta Pudaite ni ta hi) hung nunghak tan lai vel a ni bawk a, a upa Ruolneikhum leh khan an hung kai ve a, a hmel kha chu a tha hem hem kher el, a bienghai dam kha chu Shimla Theibuot (apple) ang elin a sen ham el a nih. Khang laia nunghak dang hung kai ve hai chu ka u Lalhlupui, Fimneizo, Rolienpui, Phirchawng, Huoli (Kuruvila), Liensung le Rokimi Saituol hai an nih. Hi lai thu ka hung ziek lang kherna san chu Rimawi kha hun iemani chen Paula hai inah a um nghe nghe ti ka hril nuom lei a nih.

Paula hai ureng hi keini ureng ang bawka pieng dan thiem an nih a. Pasal po an dum lul a, nuhmei po an ngo hle thung. Paula’n farnu Famkim (Kimte) tak tak kha, a hun lai khan chu a hmel a thain a duoi ve naw, hril hat hat a tling a nih. An upa Thangkung kha Tamu lai vel sawn a la khawsa niin an hril, iem a chang pei ti ruok chu ka hriet ta nawh. An pa Kapthang kha perkhuong zuta hla insaktir thiem taluo ringawt el kha a ni a; “Jerusalem ka in in nuam” ti dam kha a kutpar inthin help hlepin a hei nawt vel kha chu hmu nuom a umin ngai nuom a um thei ngei.

Lengna tlang an dang ta leiin Paula leh hin chanchin inhre paw lovin kum tam tak kan um a. USA-ah a um hnungin, iengtin tin amani kan inbiek paw nawk thei a. Phone le emaila chanchin inhril tawnin kan inbiek hlak a. Zawlkhawpui (Pherzawl) chanchin ka ziek mek lai a ni leiin, “Keiin a sut man hung tum vawng ka tih” a ti a. Ama thangpuina leiin Zawlkhawpui Chanchin sut theiin a lo um a. Chu baka, a nu le pa, Kapthang le Batchawng hrietzingna dingin khawtlang ta ding rawsawt bel lien a hung thawsa bawk..

Paula kha mi thil phal taluo a ni a. Pherzawla a ruol pawl ngei bik zuol Rothang khawm sum sang nga chuong zet a hung thawn a. Ka sangnu Manthang khawm a tlangval lai khan a lo mel deu a ni awm a, sum iemani zat a hung thawn ve bawk a. An nu thi zo khawsawt lai a ni bawk leiin, tuorpui a um khawp el iengkhawm hlak ei zuk thaw thei si nawh. Chun, a tlangval laia a hmangai em em Hmuizawla um, an sunghai leia a nei thei ta naw chu a la hung hriet vang vang a. Chu nu chu Tuithapaiah a hung inzin hlauva, Imphal-ah ko thlaa phone-a inbiekpui a rawt a. Iengtin tin amani hun remchang a hung inher suok a, chu nu leh chun ka inah(University campusah) tele-bawngte’n an hei inbiek chu a ni kha tie! Sawt fu an inbieka chu an dit khawp naw hmel ngei. An nufaa hmang dingin sum ieng zat am a hung thawn ka hrietpui ta nawh a, a hnung peia an chanchin khawm ka hriet zui tah nawh. Upahaiin ngaizawng hlui le thil inpek chu behna tawm khawm a la hlawng bik an lo ti hlak kha tie!

Zawlkhawpui Who’s Who-ah Paula chanchin hieng ang hin ka lo ziek a:

Paula Pakhuongte hi Kapthang le Batchawng nau pasal pahnina, May 15, 1939-a Pherzawl-a pieng a nih. Naupang chite a ni laia inthawka nu le pain an lo inchuktir anga Kristien nun dan, Kohran thilthawna le Sande sikul-hai thataka kaia, kai tam lawmman le ekzam lawmman kum tina dawng hlak a nih.

Kum 23 a niin Ngurte (Tuithaphai) khuoah M.E.School-a Headmaster sin kum 1963-64-a a thaw laiin Lalpa leh an lo intuoka, a sin chu a chawlsan nghal a, Lalpa rawng bawl ding le a nuom ang anga a hmang dingin an pek nghal a. Lalpa chun a thu inchuk dingin a lo ko zing hi a lo nih a, Madras khawpui panin Hindustan Bible College-ah admission a hmuh a. Amiruokchu, a Halelui ri le tawnghrietlo hi College-a thuneituha’n an pawm thei naw leiin chu College-ah chun an chuk zawm thei tah nawh a. Pathienin hmun remchang lem, a Halelui theina hmun Kerala State-a Adur Bible College-ah hmun a lo ruot pek lema, chutaka chun kum thum an chuk hnungin G.Th dikri chu October 28,1969 khan a lo hmuh tah. Lalpa’n a rawng bawl dinga a kona hmun United Pentecostal Church of Myanmar-a Director-in Rev.George Sham, Canada mi chun appoinment kum 1969 vek chun a lo pek tah. Yangoon khawpuiah ipte bangna ding le member pakhat khawm nei lovin harsatna tiem senglo ner thlengin rawng a bawl tan a. Maktakin Lalpa’n a hmanga, kum khat a tling hma’n khaw sawmpathumah Kohran a phun hmana, member sanghni zet Lalpa’n a pek hman. Mani in lum tieng khawm inlawi hman lek lo le nuhmei khawm nei hman lovin kum thum sung chu ramlak sina a buoi a nih.

March 23,1972-in Liani Khiangte leh Rev.J.Thangthuam-in kut an suitir a; March 29, 1972 vekin Rev.Harry E.Scism chun namdetna a lo pek tah. May 23,1986-in Twin Cities University, U.S.A.-ah B.A.Th dikri a lak a; March 20, 1993-in M.A.Religion dikri chu South Asia Institute of Advanced Christian Studies, Bangalore-ah inthawkin a lo lak nawk tah. March 23, 1999-a General Missions Director a nina chawlsanin, Carolina University of Theology, USA-ah Doctor of Theology an chuk nawk a. Saphai khuma inchuk a tum tlat a; an ekzamna rizal a hung suok chun Mingo sawmriet lai a pakhatna tling thei khawpin Lalpa’n a thangpui. A mak hmu that leiin Ph.D candidate a hmu nawk nghal a; tuhin “The Origin of the Bible” ti thesis ziek dingin an singsa mek.

Pi Liani Khiangte leh nau pasal pahni le nau nuhmei panga hmeltha tak tak an nei a, sin thatak tak an thaw seng. A nau pasalhai James Hminglien le L.H.Thang-hai leh tuhin Frederick, USA-ah mani in ngei hluoin, car khawm an pa renga an changkim bak hiel an nei. A nuhmei le a nau nuhmei thenkhat ruok chu tuhin Yangoon khawpui, Myanmar-ah an la um hri. Zawlkhawpui val ram ropui le inhawi taka um sienkhawm “Ei Zawlkhawpui anga mawi le tha, ka ngainat hi ka la hmu ngai nawh. Lalpa’n Zawlkhawpui hi um pui zing raw se,”a ti chu! Ngaisang a um ngei”.

Bible Studies Doctor of Philosophy (Bs.Ph.D) dikri khawm chu International Theological Seminary, Bradenton, USA, chun September 29, 2009 khan Paula Pakhuongte chu an lo inhlan tah a. Theology an chuk tana inthawka a dikri hmu po po- G.Th;, B.A.Th.,M.A.R, Th.D le Ph.D- Pathien kuoma lawmthu hrilna ruoi November 22, 2009 khan Mizo United Methodist Fellowship chun Faith United Methodist Fellowship, Montrose Road-ah puithu tak le hnienghnar takin an nei a, USA-a Mizo mi un tak takin thutawi hrilna le chawimawina thilpekhai an inhlan hnungin Dr Hmar Malsawma-in hun kharna le ruoi inhlana tawngtaina a nei. Hieng lai huna khawm hin Paula hi kansar natnaa enkawl zing a lo ni tah a. An nu a hmangai tak khawm kansar natnaa thi a ni leiin ama khawm dam sawt an ring kher ta naw awm. Dikri lawm nia hla pahnina chang hnina-

Lungngaihna leh harsatna ten. Ni tinin min chim fo thin 

Thina ten min chimbuai laiin, Ropuina ram mawi ka thlir thin

tiin an nu hmu kar nghakhla em emin mitthli pumin a sak ka ring. A hla chang tawpna an hang sak lem hin chu, inthena khawvel hi suoksan vat vat a nghakhla ta ka ring.

Ropuina ram ka thlen hun chuan, Lungduh ka then tate zawng nen;

Bang lovin Lalpa chu fakin, Lei nun reng kan ngai tawh lawng.

Hei hah! Khawvelah hin iengkhawm ei lutpui si naw a, iengkhawm ei suokpui thei bawk nawh. Ruol ngai um Paula Pakhuongte khawma dikri sei tak a lo lak hai po po chu maksanin rinumna le harsatna tam tak kara a rawng a bawl hlak, a Sandamtu angsungah hadam takin a lo chawl an ta khi! Inhnar a va um de!

Fe hmasa hai kir lovin an liem a, Fe nuhnung chu luoithli leh; Sulhnung suia inrumna.

*About the author: Dr Lal Dena teaches History at Manipur University