Delhi Thurawn Kum 25 Lawmna

:::From Lalremlien Neitham:::
NEW DELHI, MARCH 21, 2009 khan Hmar Student’s Association (HSA), Joint Headquarters, Delhi chun an kartin chanchinbu kum 25 na (Silver Jubilee) lawmna Bethesda Social Service Centre (BSSC), Mahipalpur, New Delhi ah an hmang a. An programme nei a puitlingin an hoi hle niin chanchin ei dong.

Hi Silver Jubilee lawmna a hin nupui, papui, thralai, le naupang 100 vel an thrang a, Tv. Zakariah Varte le Esther Lalsanhim hai chun an thruoi a, hun hongna Pastor J. Thanglur in trongtraina neiin a hong.

Hi huna hin thuhrilna mi 5 haia inthokin ngaitlak a ni a, an thuhril ngai an hoi a, hung khawm haiin an ngaitlak an hlawkpui ngei beisei a nih. Thuhrilna hun nei hai chu – Pu RH Hminglien (Social Gospel), Tv. David Buhril (Reading and Writing Culture), Pu Dr. Lalsiemlien Pulamte (Inchuklai Nun), Pu L. Keivom (Hmarram Ka Hmu Dan) le Pu C. Thant Khawbung (Social Duties) hai an nih. An thuhrilnaa inthokin fak ding tam tak a um a, hnam ta dinga hmasawnna ding le hartharna ding tamtak an hril a, hieng ang programme hi nei uor dinga nih, tiin HSA thruoituhai chun thurawn tamtak an dong.

Hi ni hin Delhi Thurawn Silver Jubilee Souvenir Magazine - THURAWN tia inbuk chu Pu Benjamin Khawbung in tlangzar bok. Hi Magazine hi ni 29 March, 2009 a inthokin zor tran ning a tih. A man ding chu Rs. 100 a nih. Hi Magazine a hin article thar 10 le ti vel le Delhi Thurawn chanchinbu article hlui 25 thlang suok hai inchuon a nih.

Silver Jubilee lawmna ni hin ei hlasak thiem Tv. Vanlalmuon Joute, Nk. Ruth Ruoltinsing, Nk. Jocelyn Joute, Nk. Rebecca le The Jesse Band haiin hla tieng a fekhawm hai an inhoi hne hle. Insukhlimna/ Entertainment khawvel tieng ‘Kohran Inthuruollo’ inti pawl haiin hun an hmang a, mipui an sukhlim hle. Youtube.com a khom an ‘show’ en thei dingin a um. Hun kharna Pastor Lalditsak Inbuon in a nei hnungin, Bawngsa Chartang le Uisa Chartang hme in ‘ruoi’ thre a nih.


Video courtesy: Sinleng News