Suongpi Tlaitlanah

By L.Keivom, Inpui.com Columnist

I'm trying to make a case for those people

who don't have a sense of belonging that they should have,

that there is something really worthwhile in having a sense of

belonging, and recasting and looking at our modern history.

-Billy Bragg

Thlir vêl inla

L. Keivom

Old Churachandpur Mission Compound hlui tlung hmain Suongpi-ah khawthlir inhoi deu el an siem a, chutaka chun kros-a Isu an hemde lai lim insang tak el an phun a. Moreh tieng mi nuhmei pahni inthuruola an hung thaw niin an mi hril. Hi hmun hi trongtraina muol an tih. Hi taka inthok hin Tuithraphai ruom hring dup el, Khuga Dam chen le a huol veltu tlang insi khup el hai chu chieng em emin ei hmaah an inzar a. A mawiin hmu nuom a um a, mit chauh tlai loin thlarau khom inhoi tiin, Siemtu inpakin zai a rem naw thei nawh.

Kan hang chuong kai trum hi 2014 July thla hnukhawi tieng a ni ta a. Sak kawlrawnah trêk tlain kawl an lep zuk zuk a, Khawpuibung chunga Len tlang phei chu sûm tuipaiin a hung baw a. Unauhai tuollengna Tahan, Khampat, Zohmun le Kabaw phai vela um khaw dang danga chu ruopui vanawn sûr ngei dingin lungrilin a suongtuo a. Chu sûm tuipai chun minit sawm panga vela mi hung nang el dinga kan ring laiin, Tuithraphai hung tlung ve loin, Len tlangah a tawp a. Threnkhatin, “Tuithraphaia cheng mihriemhai suolna hi a tongkhong tah leiin ruo khomin a mi hĕl a nih” an ti ri chu na rilah a hung inri a. Ruo a sûr tlawm leiin loneitu tam tak an chi-âi hrim a. A rama chênghaiin ruo hîptu ramngaw um thei lo dinga indoi thrak loa thing le ruo ei suosam leia thil tlung a nih ti ei hriet nuom si nawh. Thil tam tak infŭk nawna san chu eini mihriemhai lei a ni zing laiin, a san dang, intum ding zong hi ei balamna zawng a nih. Neitu le enkoltu dinga ruot ei nina hi pom harsa ei tih. Hlaa “Mihriem chauh naw chu inchuktir an ngai nawh” ti ang khan.

Hmar tienga inthoka sûm leivak inphân tak el hung inzar phei chun sawtnawte a mi hung kan a, ruo tehmer a pingphi seng seng a, hmai a hu chiep hman ti chun a mi’n kiengsan nawk a. Hi hi ‘sûm zun’ ei ti bok niin ka hriet. Thli innem, bal hrim kai lo, semdam thlifim a hung hrang del del a; a dai hrûla jacaranda thing an phun huol, dung chen chau chaua insang, buk mawi tak tak hai chu thlifim chun a thawi hning sel sel a, hlima lâmin an insawi del del a. Kum 1973-a Delhi lum hrâng buon buonin mi hrêk a, thlantuia mi’n sil a, tlangram ngaia ka taksa le thlarau a’n rŭm laia,

Zo tlang sangah va chuong inla,

Singmit lĕnin thlîr vêl inla,

Thrâl hna virthli’n a lĕn angin,

Lĕn hmang a tih, lungkham rĕng hih

tia ka khek suok ni dam kha ngaituonaah a hung lŭt a. Chuong lai chun suongtuona mitthlain tlangram mawizie le inhoizie a thlir a,

Kan tlangram mawi, hring dum dur hi,

Lentu sawl thing tin an vul chiei;

Thlirin a mawi, salung a awi,

Zo thlifimin damten mi thawi

ti hla dam hi Delhi tlanga inthok daihin a hung pieng pha a ni khah.

Suongpi tlaitlana inthoka fur khawthienga Tuithraphai ruom le a se vel insikhupa inhuoltu tlanghai le Hriengkot kawna inthoka ka hmu chak tak Pherzawl tlang hlietu Kailam Zopui zing dur el hai zuk thlir chun, ei thlirna tieng tieng trongkama hril suok thei lo Pathien ropuizie le a thilsiemhai mawizie ‘biethu’ an mi’n hlăn a, hà a dam song song a. March 1993-a Milana ka um laia ka thusep ‘Huonah’ ti-a “Chutaka chun Siemtu ropuizie i hmu naw chun van rama khom zong zong la, hmu chuong naw ti nih” ti ka ziek dam chu ka zuk hriet suok vong vong a.

D.M.College-a kan kai lai, 1962-a Professor Mukherjee-in lung inno taka William Wordsworth hla phuok laia inlâr tak el Ode on Imitations of Immortality kharna a mi’n chuktir,

To me the meanest flower that blows can give

Thoughts that do often lie too deep for tears

Parte tlawm tak biethu chu lunglaiah a châm,

Luoithlia puong ruol lo hmun inthŭk a hluo

ti dam chun trêk tla angin a mi hung dĕng har a. Lungril mit a var naw chun mita ei hmu zing mawina le ropuina chu hmu thei a lo ni nawzie le an ‘biethu’ mi hril khom hriet thei a ni nawzie dam a mi’n ngaituotir a. Sir tinah, nghatna tieng tieng, “Thrâl a hung tlung pha leh mei vapah an mi’n changtir ding a na, santu kan ngai” tia mi hung be rûkin ka hriet a. Leilet hmuna in tlêp tuora an bawlhai chun, “Mi zuk en tu, Pathien thilsiem laia suol tak le rawng tak, mihriemhaiin an mi suosam a ni hi! Bu le thlai chingna dinga Khuonu siem kan ni a, in bawlna dinga siem kan ni nawh. Santu kan ngai” tia rawl tawp insuoa hung khêkin ka hriet bok a. Hmun hring le tui hnăr, a sunga cheng sa le vahai ei sukram vong hnunga an hnung zuitu chu mihriem ei nih. Ram humhal nachang hre loa suosamtu chun hnuoi ro an hluo sawt ngai nawh.

Nun hlui sulhnungah

Chu ruol chun, nun hlui liem hnung an hung tho sung sung a. Tuta car inhoi taka kan tlanna hmunhai hi bawmrang rik tak phur a, hniek tiema a suk le tunga thlan tui le kan lo pal tlang tah hnung vong a nizie dam ka ngaituo chun, ka vangneizie ka zuk hmu chieng zuol a, lungrilin Pathien kuomah lawmthu ka hril mol mol a.

Ka zuk hriet suok vang vang laia pakhat chu, kum 1955 January-a Pawl kuo ka’n chuk ding kum, Saidana Independent Church inkhawmpui hmang dinga kan makpa Pastor Hrangdailo (H.Daia tia a letlinga an ko tlat) rawia kan fe chu a nih. Sawl philia ni thum kan lawn ngat ngat hnungin, zantieng ni nêmah Hriengkot kan chuong kai a. Kan zuk thlir a, Tuithraphai incham duoi el le Churachandpur khawpuia rangva in tlêp tuor el kan zuk hmu chuh, futbawl khelzawl neka lien lem zawl la hmu ngai lo kan ni bok leh, hahîpin ropui kan ti a. Kan tha kham le khûp zoi tlep tah chu insang marin, hmu châkin kan inbir thla a ni tak. Pearsonmun kan khĕl a, leilâk kan kăn hnung sawtnawteah tuta Bungmual an tia hin lam bulah Meitei nupui, thingtlanga inthoka thil zor ding hung phurhai, inman taka lo ban thlak tuma inchăn pawl an lo um a. Bawmrânga kan hmarcha phur chu mi’n chù thlâkpêk trăl tumin an mi lo chel a. Meitei trong mal khat khom inhre lo mè chuh, ka chem ka lâk dok a, chemtum le ka Saptrong hriet suna ka hang hrăwk tawl khan chu, an mit a âr intrâ el a nih.

Hung peiin, sawt naw teah rangva in sei rung el kan hmu a, Churachandpur High School a ni thu an mi hril a, ropui kan ti hle a, hieng ang bildinga hin kai ve phak inla chu, lekha thiem duok dingin kan inring a. Tipaimukh road, Tiddim road le Sugnu road le Imphal-Churachandpur road infinna lamthruom (junction), threnkhatin ‘Lamka’ an tina san kan tlung chun Police Station tuolah Bus an ti, a sena MDU ti inziek chu kan hmu a, chu chu a taka motor/bus ka hmu hmasakna tak a nih. Indopui Pakhatna laia American sipaihaiin thil phurna truck chin Dodge an ti, indo zoa an maksanhai chu bus-in an inlet a nih. A hnung le hmaa a sena MDU an ziek, a bus hming amanih ka ti chu ‘Manipur Drivers’ Union’ tina a lo ni zing! Bus ang bokin, thirsakor khom a taka ka hmu hmasakna tak a nih. Thirsakor chu bicycle, a hnunga a hming lamtawi hmanga ‘saikal’ ei hung ti le ‘bike’ ei hung ti nawk tah pei hi a nih. Mihriemin hma ei hung sawn a, thil thar ei hung ching suok dungzui peiin a hrilna ding trongkam thar a hung pieng a, trong khomin hma a hung sawn pei hlak a nih.

Suongpi-Churachandpur

Thlang tieng Tuila vadunga inthoka sak tieng Tuithrapui chen, hmar tieng Kawite (Kumbipukhri) le sim tieng Mata chen hi Haukip Reserve tia hriet a ni hlak a, Indopui Pakhatna lai vela lal chu Semthong a na, a umna khuo chu Suongpi a nih. Kum 1919-a Manipur tlangram po sub-division thuma an hung thrè khan South sub-division hmunpuia dingin Suongpi hi hmangin, SDO an hung sie a. Kum 1921 kum bula SDO B.C.Gasper-in Indopui Pakhatnaa Labour Corps-a fe hung kirhai lawmna ruoi a buotsaia chun Manipur Reng Maharaja Churachand Singh khom a hung thrang a, chu hriet zingna chun a sub-division hmingah Churachandpur sub-division ti a hung ni a, a hmunpui Suongpi khom Churachandpur tia ko a hung ni ta bok a nih. Rengpa hung tlung hma chun tlangsamin, “Khai e, khai e, lo ngai ro. Zinga inthok hin Suongpi khuo chu Churachandpur tia thlak le ko ni ta’ng a tih. Suongpi tia ko nawk taphot chun salam chawi an tih” tiin tlang a’n sam a, chu chu chuong laia an Official Gazette a ni el a nih.

Kum kuo vel hnunga Imphal tienga Churachandpur Sub-Division hmunpui an son phing leh sorkar hmun rausan chu North East India General Mission (NEIGM) hmunpui innghatna a hung ni a. India independence hnungin Circle Officer siena dingin tuta Churachandpur District Hospital le se vela Compounder Thangzam khaw indin, Hill Town-ah hmun an hung khuor a, New Churachandpur tiin an ko a. Kha hmaa sorkar hmunpui kha Old Churachandpur ti a hung ni a, a hnungah NEIGM hmunpui a ni hnungin Mission Compound ti an hung ti nawk tah pei a. A tawpah old le new chu banin, Churachandpur ti a hung ni tah a nih. Churachandpur khawpui hi 1988-a inthok khan ‘Municipality’ ngirhmuna hlangkai a na, kum 2011 intiem khan Ward (Veng) 28 a um a, chuong venghai laia threnkhat chun ‘Lamka’ ti hming an put a. Chuleiin, Lamka Veng intihai hminga a khaw hming thlak tum dam an um hi, thil an hmu hlat naw lei le an huomhap lei a nih. ‘Imphal’ hi ‘Singjamei’ amanih ‘Keisampat’ tiin thlak tum inla, chuong ang char chu a nih.

Kum 1997-a Kuki-Paite inkarah unau hmêlhai thawa an inbakkei trum khan Mission Compund chun meia baptis a tuok a, kha hma kum tam gospel thè darna hmunpui ni hlak kha iemani chen rausan ramah a‘n chang a, hamthratna pek suok thei a nei po po khom hmun dangah a lo inson tah a nih. Tuoi thar nawk dinga trongtraina tlang an indinna kawl ela hin 1917-19 a Kuki Uprising laia thruoitu, General hming an inchawitir Tintong Haokip Memorial Complex ropui takin an indin a, chu chu kum 2011 May 27 khan hong a ni a. Hi complex-a hin silai thrùna Gen. Tintong ngir lai lim (statue) lien tak le mawi tak el chu an inthrut a, chu chu Kuki National Organisation (KNO) President PS Haokip-in May 27, 2013 khan a hong a. Hi Complex sunga hin Kuki War Memorial Hall, Traditional Kuki house le thil dang dang la bawl pei dinga riruong a nih.

“Kuki” hming hnuoia inhung khawm nawk dinga nor tumna hi mi iemani zat mangphan pawl ei um a, thaw thei a ni chun thil thra tak a ni el thei. Kei ruok chun sakor thi hnung hawl tho tum ang charin ka ngai. A san chu ‘Kuki’ ei ni nawh tina ni loin, ‘Kuki’ hming put nuom lo ei tam tah lei a nih. A nghong suok hmasa tak chu kum 1980-a Hmar-Kuki inkara buoina kha a nih. Chu hma chun ei kawl le kienga tlangmi cheng Naga intihai ei hang inbakkeipui phot a; chu hnungah ei Kuki chanpuia ei ngai po po a hmatiemin ei inbakkeipui bok a. Chu ruol chun eini insungah chawl loin ei inbakkei zing bok. Manipur tlangram khuo zaa sawmruk vel hi eini rawi Kuki intihai inlalna hnuoia um niin ei hril a. Lusei lalhai chun an inlalna hnuoia ram chu bung khat le trong khat hmangin an indin suok a, a hnungah State puitlinga hlangkai a hung ni a. Amiruokchu, Manipur le hmun dang danga lalna ei changna hmunah ram sunhang khat khom ei siem nawh. Ieng lei am?

April, 2010 khan Sinlung Indigenous Peoples’ Human Rights Organisation (SIPHRO) le Kuki Research Forum (KRF) huoihotin Jawaharlal Nehru University (JNU) ah seminar kan nei a, Resource Person-ah an mi hmang a, a thupuia ka hmang chu ‘Ethnic Nation Building: Chin-Kuki-Zo Trail’ ti a nih. Ka hril zoa zawna tam tak kan inhril fie hnung chun, “Pu, zawna personal deuh indon che kan nuom a, chu chu hi hi a nih: Ieng leia mihaiin Kuki ti hming hi put an rin am a na?” tiin an mi’n don a. Kei chun, “Ka personal opinion am, diplomatic answer in hriet nuom?” ka ta. Anni chun, “I mimal hmu dan le ngaidan a nih kan hriet nuom” an ta. Kei chun, “Ei lalhai hmelah Kuki hmel an hmu tlat lei niin ka ngai. Ei lalhai hi dannaranin an tawrot a, an nun a rawng a, lal an hrot a, khuo-le-tui khom an nei pung thei nawh. Khuo-le-tui an hauna khuo chu Hmar le hnam dang tamna khuo a ni zat zat” ka ta. “Pu, i hril indik khop el” an mi tih.

Suongpi hi indin thar nawk dinga thrang ei lak a ni khomin ei fimkhur a va ngai awm de aw! ti dam ka ngaituonaah a hung lut a. Hieng lai hmun hi Coleman Factor-in dit tawka kuo a lo suotna le hnam bing chita Presbytery indina a mi lo hruolna hmun a ni leiin, ieng khom ei thaw hmaa chu hripui trium chu ei inthiel fai hmasak phot a ngai ka ring. Chuong a ni naw chun, kum 2012 July 7-a ei lo tran tah Kuki Nampi Kipumkhatna Maicham hi Baal maichamah hung inchang naw nih ti tu am hril lawk thei? Kros ieng zat khom phunin, trongtrai pawl ieng zat khom fuon khawm inla, 1917-1919 laia mi uoptu British sorkar laka hnam threnkhat helnaa thruoituhai lim leh biek kop ei tum palh a ni chun, ei khuongruol thei ring a um nawh. Helna suok san kha chîk taka ei bi chun, helhai kha ringtu kristien la ni lo an ni a, hel loa roreltuhai thu zawmhai kha ringtu kristien ni tah hai an nih. Hnam thil a ni nawh.

Ka ngaituonaa zawna dang hung lut chu: Mizorama chenghaiin an ram mawi le inhoi an tina le an ngaina hla an phuok kur ngei nguoi laia Mizoram nek daia inhoi le mawi lem, Tuithraphai le a se vel hi mawi le inhoi ei tina le ei ngaina thu hlaa ei phuok ve naw hi ieng lei am ning a ta? A phuok ei um khiet a lo ni khomin, ieng dinga ei sak inlar naw am ning a ta? Kum 1960 lai bawr vel khan ‘Tuithraphai’ inhoizie le mawizie hla ka phuok a, sienkhom sak lăr a hlaw nawh. Thusim anga ei hriet Sinlung ngaina ruok chu ei hlaah a luong lût rawn khop el. Chuong ang bokin a taka la pieng lo ei ram ngaina khom. Tuithraphai ruok chun săm a hlaw ve nawh. A san ni dinga ka ring chu, in le lo neiin khawsa inla khom, taa ngaina le neina lungril put nekin mi rama chêng anga inngaina lungril ei put tlat lei a nih. Israelhai khom kha kum 430 zet Aigupta ram hnienghnărah an khawsa a, sienkhom an thu le hla hluia hin Aigupta ngaina hla ka la hmu dĕr nawh. An ramah an ngai tlat naw lei a nih.

Manipur tlangram khuo zaa sawmruk vela lal chu Kuki lal niin an hril. Anni rawi hin neitu nina le taa ngaina lungril an put naw leia mi rama chêng anga inngaina lungril hi hung suok ning a ti? Suongpi hmêla hin mihaiin ieng hmêl am hmung an ta? Zawna don harsa tak, sienkhom don makmaw a nih. Look East Policy le inzoma ei tuolbawm ramhai le infepawna le indawr tuona lampui lien lem an hung hong ruolin, ei thu le hla ni loin sumdawng le sinthawtu an hung lŭt hum hum ding a na, chu huna chim pila ei um nawna dingin ei inhumhimna ding suol suok a trûl takzet a nih. Chu ding chun hmêl thar nĕlum le lungril thar ditum lem ei put a ngai.

Hieng ka hung phor langhai hi Suongpi tlaitlana ram tin ka dawnkhawl laia ka ngaituonaa inleng vel laia threnkhat a nih. Suongpi chanchin hi kimchang lema bi nuomhai chun Zoram Khawvel-2 (1993) tiem dingin ka’n fui. 

(Delhi, September 29, 2014, Monday )