HSA Platinum Star Hunt 2nd Acoustic Guitar Round

Lalringsan in ama hla phuok "LR San in a ru ru fang ka ti" ti hla a sak lai.

Tuithaphai: HSA Platinum Jubilee kumtluona inser mek le inzawma Star Hunt chu Oct. 4, 2014 dar 11:00 am a inthawk khan Pu HL Daka Memorial Hall, HSA Campus, Rengkai ah nei a nih a. Hi hun a hin mi 45 haiin inruolsiekna hi an nei a nih.

Inruolsiektuhai an thiem deu deu a, entu le ngaiventu an tam deu deu a. TV le Internet hai fethleng a Live a hi hun hi insuo dinga ngentu mipui Manipur State sung le puotienga ngentu an tam hle a. HSA PJCC Media tienga mawphurtuhai chun nakie Top 10 Round tiengpanga chu an la hung thaw tum thuhai an hril. Hi thil thawna ding hin sum-le-pai tam tak a lut ding leiin Sponsor le Technical tienga thangpuitu ding sukfel vat a ni ding thuhai an hril. Hi hun hi Pu H. Samson Social Worker le President, HYA Rengkai Branch nilai zing chun hawngna a nei a. Pu Lalvullien @Vula Social Worker chun Special Invitee a nina angin a uop bawk.

Hi hun a hin Result puong nghal a ni a. Mi 45 laia mi 18 an fetlang a nih. Chuonghai chu hienghai hi an nih. Joshua Lalhuolhim, Priscilla Pudaite, Gloria Lalhlunmawi, Elvina Ramnunmawi, Lalzawmlien Joute, Herbert L. Ralsun, Elizabeth Ngurthangsang, Christina Shakum, Lalzarzo, Obed L. Pulamte, Elish Laldingmawi, Annie Jeff Hrangchal, Vanlalchhunga Joute, Florence Lalbiekrem, Fimchunghnung, Irene Ramdinmawi, Jennifer Hmar le John Lalringsan. Hungtlung ding Oct. 18, 2014 12:00AM khin 1^st & 2^nd Acoustic Guitar Round a fethleng mi 35 in 1^st Music Instrument Round chu a hmun pangngai a bawk hin an hmasuon nawk ding a nih.

Mipui ngenna leiin Results tiem mek ani lai hin Judges laia mi Pu Edward T.C. Hrangate in zoram khawvela a hla lo inlarpui,‘Nunhlui taphla’n an chang’ ti hla’n mipui a hang inawi chu mi a hne hle.

Inputs: LRS Puruolte, Special Correspondent, inpui.com.
Photograph by: Muona Infimate & Alan Famhoite. (Media Department, HSA - PJCC)