Kawlva Angin Inleng Thiem Lang Aw: Pu V.T.Kappu le a Hlahai

Lekhabu Hming: Lekhabu Hming: Kawlva Angin Inleng Thiem Lang Aw: Pu V.T.Kappu le a Hlahai

Lekhabu Ziektu: Lallungawi, Bethel.

Thlirlawkna Ziektu: By Prof Lal Dena

Ei lekhabubu thlirlawk hi tuta Novemver, 2014 sunga suok hman dinga sut mek a nih. Pu V.T.Kappu (Vaiphei Thangneng Kappu) chanchin tlawmte Pu H.Thuomte lekhabu “Hranghluihai Chanchin”ah khan ei lo tiem tah a. Hi hnung hin Pu K.Lalkhawthang Infimate lekhabu “Mihrang Pasaltha Thenkhathai Chanchin”ah khan Pu Kappu chanchin ei hmu nawk a. Tuta tum hin Pu Lallungawi iziek Pu Kappu chanchin bik lieu lieu phek zahni chuong zet ei hmuh tep tah. Nghakhla a um khawp el. A ziektupa hin kum tam tak research thawin Pu Kappu chanchin zieka um tah le a nauhai, mohai le a tu-le-tehai inhmupuia thu a lakkhawmhaia inthawka a ziek a nih a. A hmaa Pu kappu chanchin ei hriet naw tam tak hriet belsain a um a, pawm tlak lekhabu a tling.

Ei rama Independent Kohran intan tir laia mani hringna chan ngam le hlaw tam lem khawm thlakhla loa, Pu Sap Tlangval lo zui fan fantu, thu le hla tienga thaw hlawk ve em em chu Pu Kappu hi a nih. Hla sawmli chuong zet a lo phuok a, a hlaphuokhai a purinzur thei a, Isu Krista inriengna le tuorna tieng hi a uor bik. Senvawna an tuol lai herawt a tuk laiin, Pu Thanher le Thangler-in an thungnghaa, Pu Thanher-in, “Tawna pa (Thangler a kona), Lawma pa (Kappu) hi kan va han ban pha lo em, ani hi chu Vankhawpui pur doin a tap thlawk thlawk a; keini zawng Vankhawpui pur doin kan la tap ve hlei nem,” tiin a hril (p.145). Hi hla Kappu’n a phuok ti Thangngur-in a lo hriet chun, “Kappu, ieng dinga ka hlaphuok ding i lo phuok? ‘Vankhawpui pur doin tap naw ruol hrim ka’n nawh’ i tih a; ‘kan ni nawh bek ti ta la” tiin a suosal nghe nghe. (p.146). Thlarau mihai insuosalna hi chu theida a va um naw de aw! A la thlum tho tho.

Hnama Vaiphei ni sienkhawm Keivomnu nuhmeiin a neia, Senvawn le Pherzawl laia khawsa a ni leiin Hmar tawng ruokin hla a lo phuok a nih. Lusei tawngin pakhat pahni vel chu a lo phuok awm. A chipuiha’n Vaiphei tawnga hla phuok ta dinga an nawr khawmin, hieng hin a dawn a: “Hmar tawng hi ka hla phuokna dinga a (Pathien) mi pek a na, Pathien mi pek dan chu ka thu’n ka thleng thei nawh” a ti tawp el a nih (p.108). Ngaisang a um veng veng kher el. Ei thu le hla (literature) sukhausakna kawnga khawm Thangngur, Thangler, Ngama, Thanher-hai leh thungna hmatawnga inthung hmunkhat lo thei lo a nih. Lusun in le Kristmas lawmnahaia Pu Kappu hlaphuokhai hi khawvel um sung phawta mi’n awitu an ni zing a nih.

Pu Kappu hlaphuok laia sawisel hlaw met a um a. Chu chu, “Ka va ngai ngei ei chatuon ram” tia mi “ A sira lengkir leiin boral kan lau” ti kha a nih. Independent Kohran Hlabu (IKH) 6th edition-a khan an pei a ni awm a, sandamna bo thei a kawk tiin. Pu Kappu lungsenin “Nangni’n dit le dit naw in nei chun, ka hlaphuok po mi hung pe dawk vawng ro” a ti hiel a nih. Amiruokchu, tuhin chu IKH 227-ah inchuon sa nawk a ni tah (p.108). Mi hlaphuok sa edit dam ei thaw ding chun, a phuoktu, an nawleh an sunghai phalna lak hmasa ding a nih. Doctrine thu ni lem lovin, Pu Kappu hlaphuoka ka lung khei mettu pakhat chu Ringin Kalvari tlang chunga chun, (IKH.235) tia changthumna “Rammawia ka hang leng ve pha chun, Khawvel rinum hi zuk thlir hlak ka ta, Kan vakvaina ram hi”ti hi a nih. Thlarau khawvela chu hnung tieng ngaina le thlirlet theina um ta awm naw tak a nih a. ‘Zuk thlir hlak ka ta’ ti aia “Zuk thlir ta naw ning’ ti ni lem sien a va tha lem awm de! Ei mihrang hmasahai kha lekhathiem lo, ziek thei tiem thei tawka lekha inchuk an lo ni a, hieng po po hlaro an mi lo maksanpek hai hlusakin duot zuol ei tiu.

Hi lekhabu kawmah hin Pu Kappu thlaklak a um a, a bu sunga bung sawmhni pahni zet a um bawk; chuonghai chu: A pieng le murna; Senvawnah chanchin tha a hung lut; Pathien thu a awi ve tah; Baptisma le nuhmei; Harna le Kappu; Pherzawl a zuon; Senvawna bawk; An chukna le rawngbawlna; Vangduoina; Kohran buoi le Kappu; Sei, Mihrang an liem zo tah; Chatuon lungpuia innghatin; Thilmak; Tuikuk khuoa; Kawlva angin inleng thiem lang; Pu Kappu UPC-ah; A sira lengkir leiin; A nuhmeiin a thisan; Kappu hun nuhnung; Kappu hlahai thlirna; Tlang kawmna le A Hlaphuokhai.

Hi lekhabu hi Chanchin Tha lei le Independent Kohran hnawchepna’n a tuomvel lai khawma, a hringna neka a rawngbawlna ngai pawimaw lemtu Pu Kappu inrimna le a hlaphuokhai suihchiengna a ni tak a. Pu Kappu le mihrang pasalthahai IKH-a hlaphuoktuhai khan ei nunphung ruongam sunga inthawkin Pathien thu an lo awi a; Pathien chawimawina hlaro ropui tak tak ei hnam hla thluk hmangin an mi lo maksanpeka, uong thu loa ei kawi vel hnam danghai thu le hlaa pur phurna ei lo ni pha a ni hi. Ei hla tuoltohai thua, Pu Dr (Upa) Lalnghawrlien chun hieng hin a lo ziek chu tie: “Hmar nun fe thlenga Pathien hung inlarna ka ti ringawt el.” A va hei ti dik lawm lawm de!

A ziektupa hi mihriem dana chu ka farnu pathumna naupa, ka tupa a nih a. Pawlsawm pasi chauh nisienkhawm a kamsuok le a thuvai dan enin, a pu Hrangluoi (a pa Paukhathang pa) tieng a lak ni’n ka hriet. Pu Hrangluoi, Khawmawi le a upa Raltawn (Zara pa) Saidan, hai kha pa tawng kam thiem tawp, mi mawl ni si, thu an hang hril ta chun inbuotsai lawkna nei der lo khawmin darkar khat neka sawt pei ding um thak loin thu an hril thei. An titi ei ngaithlak ta chun, ei fesan el thei ta ngai nawh. Lallungawi hin a puhai kam thiem a lak a; a thusep le a thu hang sawinawi dan vel hi puitling ka ti ngawt el. Lekha an chuksang nawha chu, thu le hla kungpui tling ve phak dingin ka hmuh. Entirna dingin a kam suok hi zuk tarlang vak ei tih, ”Kristien ni hma khan minaranin pielrala inhawih taka khawsa dinga beisei ngam an nawh. Kristien sakhuo ei chel hnung ruok chun, thangsuo thuring namthluin, a aiah Kraws ei tungding a. Ramhuoi hnawl hmangin Thlarau Thiuenghlim ei inchengtir a. Ridil tieng ngha hlak khan Jordan ral ei thlir a. Hringlang tlanga inthawka khawvel thlirtu khan Kalvari tlang ei chuongkai tah a. ‘Pielral ka ngai ka Lal lengna’ ei hung ti ve thei tah a ni,”tiin (p.149). A mawi hem hem ngawt el.

Hi lekhabu hin zawna tam tak dawn ding a siem a. Chu hai laia pakhat chu hi hi a nih: Khang lawma Independent Koihran lo inrimpuitu kha iengleia Gospel Centenary lawm tum khan a tu-le-tehai bekin chawimawina an dawng ve naw? Independent Kohran lo suoksan khawm nisien, a hlahai le suokdawk ni lo a. A hlahai hlak chu vawisun chena ei kumkhaw ro an ni si. Hi hla pakhat “Kawlva angin leng thiem lang aw” ti ringawt lei khawm hin award hmuna khawp a tling veih leh. Mihriemin chawimawina pe naw inla khawm, ringum taka thi chena a rawng a ibawlpek a Lalpa chun “Suok tha le ringum i thaw tha “ ti tho tho a tih.

Ei Editor-in-Chief, Thuro Magazine, Pu H.Zaneisang-in Thuhma mawi taka a ziek tawmpuiin, zuk khar el tang ei tih: “A bak chu, a lekhabu sung thu ngei hi ngun takin tiem la; nang tiemtu hrietna le thlarau hringna a dawmsang el bak a, ziektu Pu Lallungawi ngei khawm thua a lo hausak zie hre thei i tih.” Hi lekhabu hung suok kar nghakhla a va um de!