Zou Defence Volunteer (ZDV) A kum-17-na Tangpijol ah ursun taka inser.

- LRS Puruolte | Photo: Alan Famhoite.(inpui.com)

Tuithaphai/CCPur: Oct. 11, 2014 khan zing dar 11:00am a inthawka hunser thupui taka hmangin umnikhamin ZDV in an pawl an indin a ainthawka a kum 17 Tling Lawmna chu ursun takin Tangpijol, Singat Sub-Division, CCpur hmun ah hmang a nih. Hi hun a hin UPF hnuoia um pawl hran hran a thuoitu le aiaw hai, hnam thuoitu ZMA, UZO, STC le Social Worker haiin an uop a. Thuhrilna hun an hmang tawl.

Hun karlak a hai hlasak thiem tak tak haia inthawk ngaithlak a ni a. ZDV member ram le hnam tadinga an hringna lo inhlan a, fam lo chang tah hai inzanain Minute 1 (Khat) sung totawk a hun hmang a nih. Hi hunser hmangna hun a hin Retd. Rev. Nengzatun Zou Presbyterian Church Synod (ZPCS) chun Pathien thu a in fuina le UPF hnuoia thang hai chu an aiawhai mipui hmaa ko suok a inngir tirin malsawmna tawngtai pekna hun a nei a. ZDV hi Pu Thangkhanlal President nina hnuoia kum 1997 kum a indin kha a ni a. Tukum hi a kum 17-na a nih.

Zomi Mothers’ Association (ZMA) hai chun hnam pasaltha hai chu inzana le chawimawinain hi hun a thang UPF member, Pawl aiaw a thanghai chu Par patsum a siem an  luhaia an intawn tir baka, Zou hnam Puon an insiltir tawl.

Hi hun a Khuollien ding a fiel, Pu Thanglianpau President, ZRO chu taksa hrisel nawna leiin a thang thei naw a. Ama aiawin Pu Keneth Muana Secretary, Ministry of Info., & Public Relation, ZRO in hun a hmanga. Hi huna thuhrilna a nei hun ah Mani hmasielna thanglovin, zogam a parvul theina dingin mipui fekhawmhai thangtlang dingin a fiel.

Hi hun a hlasaktu (Artistes’) mi 9 le Fiemthu thaw thiem mi 1 kuom ah thilpek an hlan. HPC-D aiawin Pu Sanga Hmar Social Worker le JMG Member, UPF chun hi hun hi a uop ve a. Thuhrilna a nei hun a chun, ZDV in Kum 17 a tling lawmna hunser hmang dinga hung khawm mipuihai chu HPC-D hmingin chibai bukna a nei a. ZDV hi mipui Support-na leia hieng chen dam hi a ni a, mipui chungah lawmthu a hril. Pu Kamkhanpau President, ZDV chun hun sawtnawte a ei thiltum chu ei hmu vat ding a ni a, lunghnuol nawng ei tiu, tiin mipui fe khawmhai lai a hril.

Hi hun a hin Bawng 6 le Vawk 2 lai thatin zantieng hun ah khawsung mipui hai le fekhawmhaiin ruoi an kiltlang a nih.