Khuongpuithlurh

By L.Keivom, Inpui.com Columnist

Imagination is the beginning of creation. You imagine what you desire, you will what you imagine and al last you create what you will. - George Bernard Shaw

L. Keivom

Hranglien Songate buotsaih ‘Hmar History’ sut hmasa tak (1958) a chun mimal 20 hieng Vanso, Nelachal, Sura, Lersi, Luopui, Hrangkhup le Thawnglai, Khuongpuithlurh, Saiva le Chunthang, Neirawi, Truoni le Neilal, Hniengi, Ngamtawn, Ralngam (Lalruong) le Hrangsaipui, Darsuozem, Zampuilal Tusing le Bapui nu hai chanchin a ziek a (p.8-34). Hienghai laia threnkhat hi um tak tak ni loa tienami, an chanchin an hril sawng zata an phuok sap pei, iemani chen hnungah mihaiin um tak tak anga an hung pom le hril a ni le ni naw thua inselna ruok chun tawpintai nei nawh. A san chu pipu tienami (stories), thusim (myths) le thurachi (legends) hai hi hnam aidentiti hung indin suokna dinga bawlhlo poimaw an ni tlat leiin tu hnam khomin an hlut a, a nêka ropui lem le suongum lem a hung suok hma chun an inthla el nuom nawh.

Hranglien Songate ziek dan chun, Khuongpuithlurh hi Pakhuonghai lal hmasa tak, Laimihai le indo laia tlangval a nih (Laimi a tihai hi Pawia khom Fanai Pawi nekin Lusei lalhai le innêk nasa Zahau Pawihai an nih. Pawihai hi Hrumsawm tia hriet an ni bok). Laimi (Hrumsawm) rûn dingin a khaw tlangvalhai chun fai-alh an zeu a, an inphe mur mur a. Ama ruok chun nunghak elpui a kham a, a zâl ngul a. Nunghak chun pasal ding huol a nei a, râl rama a thang sung lo neisan a tum leiin,

Pasal taka râl rêl ngam lo a,

Lanu pheiphung khamlua i neih

tiin, thiem takin a zuk chophawk a. Chu phingleh,

Chuti taka zawnsielnu trong chu!

Pasal ka’n thang, mi lo ngai ve rawh

a ta, a’n chawm tho thur a, râl rûna fe dingin a’n siem ve tah a.

Râl rûn dinga a suok tawm chun nunghak kuomah, “Râl ka that chun nisa’n lu kawm ngei ngei a tih” a ta. A rawi naupang kuoma khom, “Ei nunghak leng hin pasal a lo nei chun i lu sukthir la, puon triek silin mi hung tuok la, a lo nei naw chun i lu khui tler la, puon thar silin mi hung tuok rawh” tiin a’n cha a. Khuongpuithlurh rawi ral run chu an hlawtling hle a, ama khomin râl a that a. Râl a that ni chun a ti ang ngeiin nisa’n lu a kawm bŭr el a. Chu chu nunghakin a lo hmu chun hieng hin an sam suok a:

Chung sima ni’n hrângsam a ziel a,

Ka lungdi’n laimi a man tah ie.

An ral run hung kir chu kotsuo-ah mipuiin an zu thrâ thrà chawiin, khuong le dar leh an lo tuok a, lâmin an inri bung bung a. Khuongpuithlurhin a rawipa inchei dan a hmu chun a lâm nuom ve ta naw a, hnuoiah a zâl a, tonlairang an intontir tum khomin a ton nuom naw a, zu indawntir an tum khomin a dawn nuom bok nawh. A farnu beidong chun,

Zuong tho ta rawh, ka chin Khuongpuithlurh,

I lenruol hransar an lam zo a

tiin a zuk kei tho a tum a. Ama chun,

Lâm ta raw se, ka len a ruolhai,

Ka lungdi’n khieng dang a awi tah ie

tiin a don a, a la lâm nuom chuong nawh. A rawipain,

Awi ta raw se, hmâna lunghnemnu,

A par sokhlei ei lawr ta hnung kha

a zuk ti khomin a lâm nuom chuong nawh.

A farnu lungzing chu khuo tieng a tlân a, a nunghak kuoma chun, “Ruolnu, hung tam ie, nanga leiin ka sangpa’n zu hlak dawn nuom loin, a luah tonlairang ziel ding hlak phal lo, a khup a thalin an deng zâk el a nih” a ta. An pahniin tinhmun tieng an fe a. A nunghak chun,

An lal hrai chawi vantraitro inzâr,

Sieli’n buon ang ka pom ngam naw che

tiin Khuongpuithlurh chu a zuk hril a. Chu phingleh, “Inhma hma khan ti ta la, zawngtindong!” a ta, a tho hlut a, tonlairang an intontir a, zu a dawn a, a lâm ve tah a.

A nunghak kha a pasal neinaah rimsi takin a khawsa a, Khuongpuithlurh a nei naw kha poitiin a’n sir em em a. Ni khat chu chawr kot bulah a’n thrung a, poitia a’n chek a’n chek leh uiin a ko a sawn a a va pan a. Ui kuoma chun,

Chek chek ka tih, uia hung naw rawh,

Thradang rauthla ka kona a nih

a lo tih, an ti chuh.

Hi po hih Hranglien ‘Hmar History’ a inthoka ei hriet thei chin chu a nih. A thu le hla bi chiengna chu Hmar Hla Suina (1980) a khan phek 8 zet a um a, thu le hla inchuk tham tling laia mi a ni hrim a nih. Chuong chu ni sien khom, hmun dangah Khuongpuithlurh chanchin ziekna hi a vang khop el. Tuta ei hril tah po hi inrŭnna le inkeizap a ni leiin ei pi le puhai khan Hranglam Hla hnuoiah sie awm tak an ni vei leh, nunghak-tlangval inlaichinna hla, tu laia ‘Sai Hla’ ei ti ang Semruk Hla hnuoiah an sie lem. Chun, bu chil nia sak hlak ‘Hau Hla’ le Sikpui Lam hlaa ‘Hla Ser’ ti-ah Khuongpuithlurh ti hming hi ei hmu vuoi bok a. Chuonghai chu Hmar Hla suina bung 9-ah hieng ang hin ka ziek a:

“Semruk hlaa a an sak lar le tlanglawn pawl tak pakhat chu Khuongpuithlurh le a nunghak chanchin hrilna hla a nih. An hril dan chun Khuongpuithlur hi Pakhuonghai lai hming inthang hmasa tak a nih. Khuongpuithlurh hming inlangna hla pahnih a um a. Pakhatna chu buchil nia an sak hlak Hau hlaah,

Dari chûn le Dari zuon,

Rilthrang laiah ser ang ni som;

Hrai lam siel ang a sal e,

"Pa khuo lam zong rawh" mi tih.

Hrai lam siel ang lo sal naw ning,

Khaw zo ril ang la ching naw ning;

Ei chawitir Khuongpuithlurhai,

Chem lo zawlah la ngam a ta.

tiin a um a.

Hi hla phuoktunu pasal nu le pa hi an nau upa tak hming 'Dari hmangin an ko hlak a nih ti an hriet. An naupa nuhmei, hi hla phuoktunu hin nau a nei vak naw leiin a ching an ring a, măk an rot a nih ti an hriet bok. Ama nu chun a ching nawzie le Khuongpuithlurh hai anga mi ropui a sulah an la hung insieng ding a nih ti a hrilna a nih. A hla thu fe dana inthokin "Ei chawitir Khuongpuithlurhai" a ti hi Khuongpuithlurh hi a naulutir a nizie hrilna ni loin ama ang nau a la hung nei ve dingzie a hrilna ni lemin an lang. A chunga hla thu umzie chu hieng ang hin a nih. Chang khatna -Dari nu la pain zanril lai a ni lo loin an mi hril. Nau tieng pangah (hrai lam) siel cing anga chingin an mi hril a (sal e), kan in tienga kir nawk dingin an mi tih. Chang hnina - Nau neina tieng siel angin ka la ching naw a, tlang insanga pil tak thra um nawna, thing le thlai a mawng thei nawna ang ka ni bok nawh. Naulutir Khuongpuithlurhai ang ka sulah (chem lo zawlah) la’n sieng ngei a tih.

Chun, Khuongpuithlurh hming an langna hla pakhat chu Sikpui Lam hlaa an HLA SER, ei hril taah khan a nih. Chu takah chun,

Thila Khuongpuithlurin lam a panna lamah,

Palfung va tong pam luo raw ie,

tiin a chuong. Hi Khuongpuithlur hi mi dang a ni naw chun a chanchin ei sui pa hi mi fung kam a pal chim leiin a thi a nih ti hriet thei a nih. A pam thu hlaah chen phuok a, Sikpui Lamna chenna an lo hmang ta hiel leiin pa mei mei chu a’n nawh ti a’n hriet a. Chuleiin, a chanchin ei sui pa Khuongpuithlurh hi a ni ring a um” tiin. P.76-77)

An chanchin hril hlaw khopa mi ropui le hmingthang ei neihai hi Zo hnathlakhaiin ei intrawm, ei hriet dan ang anga ei hril sawng seng le phuok belsa pei a ni a. Sura ei ti hi a thren chun Benglam/Penglam an ti a; Lalruong ei ti hih Ralngam/Galgam an ti bok. Unau tienami hril khom a’n ang ngai nawh ti angin, ei hriet dan le hril dan khom a’n vong ang nawh. Mi hrang hrang hril ei hrieta inthoka ei hril sawng pei a ni leiin chokpol chanchin le tienami a tam. Chu chu hnam tin nunah an hraw hun a tlung naw thei nawh. Hienghai hi ziek ngeia lekhabua hlu lut a ni ding pha leh mithiemhan a ni dan dinga an ngai angin an hung rem khawm a, tienami le tienthu mumal lem ei hung nei thei tah hlak a nih.

Tu chena Zoram khawvela ei tienthuhai zieka lekhabua hlu lût rawn tak chu Mizorama chenghai an nih. Hieng thilhai hi ei suidon ding le ziek ding pha khom chuong lekhabuhai chu Zo hnathlak hmun tina chenghai thu lakna hnârpui tak a hung ni tah. Chun, ei thu le hla neihai hi ei hang sui chet chet chun, upa deua ei hriet le hrilhai hi Kawlphai (Kabaw Valley) ei suoksan hnung, Chin Hills le a se vela ei khawsak sung le chu taka inthoka thlang ei tlak hnunga hung pieng chauh, mong inlang kûka inthrung la ni deu vongin a’n lang. Khuongpuithlurh chanchin ei hril khom hi ei histawri rurel (historical framework) sunga ei thun ding chun, ei lo ring upat ang khan a upa naw el thei. Chu tieng ngha chun mit hang inlen inla.

Tu chena Zo hnathlakhai thu le hla hlui suina lekhabu hi ei hnam naupangzie inphu chun ei kawl le kienga khawsa tlangmi danghai nek daiin ei hau lem ti hih sĕl ruol a ni nawh. Chuong lekhabuhai chu Mizo-Lusei tronga ziek deu vong a nih. Khuongpuithlurh chanchin ruok hi chu an ziekna ka hmu sun chu Dr. R. Doliana buotsaih Mizo Nunhlui Leh Hlate (1988) chauh a la nih. Chu khom chu tlanbahrika a ziek sa, a hla thu thrang sa ve lo a nih.

Dr. Doliana ziek dan chun, Khuongpuithlurh hi tlangval huoisen le hmingthang, chawimawi hlaw, Vanhnuoilien naupa Sailo lal Lienkham pasalthra laia pakhat a nih. Lungpher khuo-ah a um hlak a. British sorkar hung lien hma char, kum 1890 lai vel kha a vanglai a ni awm. Thlangtla pawla thrang ve a nih. Hieng hun lai hin Sailo lal Lienkham chun ropui a’n ti hle a, a nêka chunghnung lem tu khom an velah umin an ring naw hiel a nih.

Trum khat chu Lienkham le a rawihai chu an ramriek a, Aizawl bul Muthi khuo chen an tlung a. Chu khuoa chun Chenkuol hnama mi nunghak hmel thra tak el, Tuoli an ti hih a um a. Lienkham chun hmel thra a ti ĕm leiin nuhmei dingin a lak a. Tuoli pa chun, “In mi dit tak tak a ni chun in khuoah kir phot unla, a hranin la hung nawk unla, innei chu ei buotsai ding annawm” a ta. Hienga a ti san chu an lal, Sailo lal bok Kalkhamin nuhmeia nei dinga a hmaa a hung beisei leiin, an hung nor tlat chun an lal chu lo sel ngam a ring naw lei a nih. Lienkham rawihai chun, “Muvanlaiin sawl ei băng tah annawm, tuin am tawk ngam an ta?” tiin thruoi loin an maksan phot a.

Tuoli pa inlau ang ngei chun an lal Kalkham chun nei dinga a hung nor vet leiin, sêl ngam loin a naunu chu a’n neitir el ta a. Chuonga Kalkhamin a lo nei khal el chu Lienkham le a rawihai chun an theida em em a, hla an phuok el a, chuong lai chu ‘Darthlalang Zai’ a suok lai a nih. Lienkham rawi thangtlawm chun an tam suongin palzut fe an tum a, indo an sukthluk der el ta a. Muthi khuo chu an zu rŭn a, Khuongpuithlurh chu an pasalthra a nih. (p28-29)

Hieng lai hun hi Sailo lalhai anni le anni an indo lai, Sak le Thlang Indo (1877-1880) lai hun kha a nih. Khawsak tienga thrang lalhai chu Lalsavung thlahai po po le a naupa Vanhnuoilien nauhai an ni a; Khawthlang tienga thrang chu Mangpawrha le a sang Vuta thlahai an nih. An indona san laia pakhat chu nunghak inchu lei a nih. Mizo Chanchin (India, Burma & Bangladesh-2001) buotsaitu B.Lalthangliana hril dan chun, Lungdupa Vanhnuoilien a um laiin a naupa pahnina Lienkham nuhmei dingin Chenkuol lal naunu Tuoli, Nisapuia um chu an zu biek a, an lo remti a, a man ding lam dinga an kir nawk lain Suokpuilal naupa Kalkham-in a lo nei el ta a. Hi thil hi Vanhnuoilien chun a theida hle a, a naupa Lienkham kuomah, “Hi thil hi hung theinghil palh hlauh rawi in tih aw” tiin thu a’n cha a. A naupa chun a hriet zing a, Muthi chu Chinhleia rawi tirin an zu run a. Sienkhom an lo hriet lawk leiin an lo inring nasa hle a, an lo kap let a, tuikhur mong ruom ramngaw-ah an dang bet tlat a, an mangang hle a. Iemani chen hnungah mi huoisen pakhat hin thi huomin an silai a pal per a, an silai an kap ruok vong hnungah an tlan suok thei tah a nih. Hi truma hin a rûntu Khawsak tieng chan a chau lem (p.262-263).

Thi huoma an silai pal pertu kha, zeldin thubawlah Khuongpuithlurh lo ni ta sien, Vanhnuoilien naupa Lienkham tienga thrang tina ning a tih. Vanhnuoilien hi ei hriet thei dan pakhat chu Tuolte Vanglai ei ti vet, uor deua nuizatum taka thu phuok insiek hi Tuolte-a a um laia intran a nih. Kum 1871-72 a Mizoram rûn dinga Cachar-a inthoka Tipaimukh fe thlenga British sipai hung, Vai Lien Voikhatna tia hriet kha Vanhnuoilien le a nauhai hrem ding le tukdol dinga hung hrang tung an nih. 1872 February-a Champhaia Vanhnuoilien hmun hlui an tlung hma khom khan ama chu kum 1871-ah a lo thi tah ti thu an dong a, a thlan hmun khom an sir nghe nghe a nih. Vai Lien Voihnina 1890 hnung khan British sorkarin Mizoram an hung op a, indo le inrun an sukbo tah leiin, Khuongpuithlurh hun lai hi 1850-1870 bawr vel sunga inleng dinga khum a ngai ding a nih.

Khuongpuithlurh chanchin le inzoma hla an phuok hi chik takin hang bi inla, Chin Hills ei hung kai hnung daih, Mizoram ei lut thlak hnung daia phuok ni sien a hoi khop el. A thu hi a fie el bakah a trongkam inrilin a mawi. Tlar hni peia tlar tin lam kuo vonga siem a nih. Chang khat lem hi chuh Sortuirakam Neilal le Truoni chanchin le inzoma hla an phuok, an hmang sawng ni sien a hoi khop el. Khang hun laia an khawsakna, khawtlang nun, puithuna le thil dang dang hlimthla chieng takin ei hmu thei. Chun, hlakama nisa lukawm thu, “Chung sima ni’n hrangsam a ziel a” tia a hang hril dam hi themthiemna inril tak a nih. Sârthi an um pha amanih, pasalthrain râl lu an lak pha chu nisa-in lu a kawm hlak niin an ngai a. Chu thu chu tekhia hmangin, mi huoisen, mi hrâng Khuongpuithlurin râl lu a lak nia nisa lu kawm chu ‘hrângsam ziel’ tiin a hril a nih.

Hi thu char hi kei danglamin, Pastor Thangngur chun, “A hmelmahan hransar lâmin an awi” tiin a hlaah a lo hmang a. Kum 1960-a Sinlung Thar hlapui dinga ka phuok, ‘Sinlungmawi’ ti-a chun,

Sak le thlang, sim le hmarin thei ang inhnar,

Hrangsam ziel, thlunglua tonlairang chu:

Hranlu ang kan lăm che zai tina chawiin,

Lung lawm kim, hning Sorlai li ang thûk leh

ti-in, ei hla thur suok laia an trongkam hmanghai chu ka lo hmang ve bakah, “Hmar hraichawi vantraitro ang inzarna hmun” ti khom ka hmang sa a, Khuongpuithlurh hlaa trongkam mawi po po hi ‘Sinlungmawia’ hin ka lo hlù lût vong a nih.

Chu chu a nih literechar tling thu le hlain huvang a nei dan le thu a hril dan chu ni. Hi hla ka phuok lai hin D.M.College-ah Intermediate of Arts (IA) kum hnina ka thaw lai a na, chu chu tu lai le hrilkhi chun 12th Grade (Pawlsawmpahnih) chauh a nih. Ka phuok lai hin Hmar trong chu inchukna sikulah ieng level-a khom hmang theia pom a la ni nawa chuh Hmar tronga vernacular M.A chen-a ei la hung nei ve phaa an inchuk level le standat phak dinga insanga ka siem a ni leiin a thu le trongkam hmanghai hi a takin a khir a nih. Chu thu chu ruol threnkhat ka hril leh awm naw an ti taluo a, invĕt bilingah an mi ngai hiel a nih. Sienkhom, chu chu a nih hmathlir neia ringnaa kalchawi ei ti hih. Hmu thei lo hmu phak a ngai. Chutaka inthoka kum sawmnga hnunga chu B.A chen Hmar MIL ei lo nei der ta a; kot hung nok mektu chu M.A level a ni tah. Chuleiin, P.B.Shelley dungthula,

O Wind,

If Winter comes, can Spring be far beyond?

hang ti ve khom inphalam a um ta bek nawh.

Tlangkawmna

Hmar Hla Suina lekhabu ziek dinga hma ka lak tran tak tak hun kha ka zuk sui kir chun kum sawmnga a lo tling ta a, a bu-a a hung suok meu khan chu kum sawmhni a lo invoi der tah. Thu le hla hluihai iemani zat bek lekhabua hlu lût a, a hmawr phor lang a, chutaka inthoka thrangtharhan research nasa lem hung thaw a, lekhabu tam tak a cho suok ka lo beisei a. Chuonghai laia pakhat chu tuta ka thu hung thur suok, Khuongpuithlurh chanchin hi a nih. Hmar Hla Suina a suok hnungin kum 35 a lo liem nawk dĕr tah a, sienkhom ka thil lo beisei kha beiseina thlawn el a la ni zui pei bakah, thu le hla hlu lut suna umhai khom ei ngaisak naw leiin thrangtharhan hrieta muol an nei ta nawh. Iengtin am thaw tang ei ta?

A bawzuitu dinga dandea um le mawphurna latuhai hin ieng chen am an mi tlungpui ta a? Research thaw pei si loa thosilen hnuoia ei ngaituona inlêng vêl thu dik hrila hril le inhûkpui amanih, seminar nikhuoa bel chieng dawl lo, phuokfawm histawri inzawt a, resolution maksak tak tak thlâk a, awrdenna dinga kut phar khum zuk hi ei sunzom pei ding am a ni? Ka tupa Dr. Lal Dena-in Reader’s Digest Great World Atlas-ah ‘Sinlung’ ti hming a chuong thu a hril leia chu hmun chu pipu thusima Sinlung an hril leh thuhmuna ngaia bu tak khûka khŭkpui dam ei um sung chun ei mawlna le thlăna liem ding vong ei nih. Hi Atlas hi kei ngei khoma a suok hlima inthoka a kawpi ka laibrari-a ka kol ve a ni a, Sinlung ti chuong khom hi ka hmu ve tho a, sienkhom ei histawri le inzomna a nei naw leiin ka khukpui ve naw chauh lem a nih.

Thil dang chu maksanin, Khuongpuithlurh chanchin bek hi sukchieng dingin hma lang ei tiu. Pakhuonghai lal hmasa tak anga ei hril chun, khaw laia inthoka inlal tran am ning a ta? A tu Laimi (Pawi) khuo am a na va rûna ei hril hi? Sailo lal pahni nunghak inchŭna karah ei zep ding a ni chun, a ngaizawng le an chanchin ei hril tak hi iengtin am zep lut thei ei ta? Hieng le zawna dang tam tak umhai chu don dingin research thaw a ngai. Taptebulah inthrung biel a, hnam upa tak ni inchu rikngot hi ieng tina khom a ni nawh. (Inrinni, October 18, 2014 Delhi)