Hmar Students’ Association (H.S.A.) Day, H.S.A. Campus ah

Mr. Robert L. Hmar Administrator, H.S.A. Tribal-
Hostel in flag keipharna a nei lai.

-LRS Puruolte | Photo: Alan Famhoite

Tuithaphai: Oct. 3, 2014 Zantieng dar 5:25pm khan H.S.A. General Headquarters Campus, Rengkai, Churachandpur (Manipur) hmun ah H.S.A. Tribal Hostel Naupanghaiin puithu le ursun takin H.S.A. in Kum 75 a tlingna ni an inser. Hi hun hi Mr. Robert L. Hmar Administrator, H.S.A. Tribal Hostel le H.S.A. GHQ hnuoia um Hmar Students’ Education Board (HSEB) Member (i/c Manipur) chun H.S.A. Puonzar (Flag) keipharna hun a hmang a. Hi hun a hin H.S.A. PJCC Member, Media hieng Virthli, Facebook Hmar Group (FHG), Inpui.com, Fox Journal Administrator-hai Special Invitees a fiel an nina angin hi hun hi an hmangpui a nih. Hi hun a hin H.S.A. Jt. Hqr., Imphal member thenkhat khawmin an uop bawk. Hostel Naupanghai hin hi ni ropui tak hi insernain mombati sitin an Hostel hi an cheimawia, a mawi hle.

Hi hun a hin Mr. Robert chun Tribal Hostel hi nakie tieng chun H.S.A. member lekha thiem thei si, sum le pai harsatna leia inchuk zawm theilo ding chu H.S.A. hmalaknain hi Hostel a hin chawm le enkawl la hung ning a tih ti a hril a. Hmar Students’ Education Fund khawm Bank A/c hai hawngin India Pawisa Cheng INR 2,00,000/- (Nuoi hni) chuong a um tah thu hai a hrilsa baka Mr. Zarzolien Meritorious Award INR 10,000/- (Sing khat) le Chawimawina Thu Ziek (Citation) khawm Overall Subject haia Higher Secondary Level a thawtha tak, H.S.A. Hmarram a memberhai kuomah kumtina inhlan hlak a ni thuhai a hril. Hi Education a ding hin mi thahnemngai le tlawmngaihai a inthawk sum a lut zinga, thawlawm ve nuom hai tading hin kawt lientak hawng zing a ni thuhai a hrilsa bawk. Hi ni hi India le khawvel hmun tum tum a um, H.S.A. Joint Headquarter, Branch le Unit tum tum haiin puithu le ursun takin an inser a nih.

Chun, H.S.A. Platinum Star Hunt fe mek le inzawmin Oct. 4, 2014 dar 11:00 am hin 2^nd Acoustic Guitar Round chu Pu HL Daka Memorial Hall, H.S.A. Campus, Rengkai hmun a bawk nei nawk ning a tih. Hi hun a hin mi 45 in inruoksietna an nei nawk ding a nih. Hi inruolsiekna hun a thang ding hai chun a hun indiktak a tlung dingin Mr. Immanuel Lalhrietzing Pulamte Event Co-ordinator chun ngenna le inhriettirna a siem. Ko hun a umlo hai chu ko nawn thei ni naw ni haia, Result puongna hun chen inruolsiektuhaiin nghak dingin an hriettir bawk. Hi hun a hin Platinum Jubilee Celebration fe mek thangpuina dingin T-Shirt le Fak-le-dawn hai zawr ni nawk a tih.