‘BU HMASA’ LE HMAR TAWNG ZIEK DAN

Prof Lal Dena, Manipur University.

Bu Hmasa kha a ziektuhai hming an ziek nawha chu, Dr Thanglung le H.L.Sela ziek niin ei hriet a. Hi Bu Hmasa hi NEIGM sikula Lientinkai (Thanmawipa) ke bulah ka lo suo ve a. Hi lekhabu chitea bul lo tanin Independent M.E.Schoolah lo inchuk zawm peiin, ka duthusam khel ram chen ka lo inchuk a . Kan tanna hi ka ngainaa, hi lekhabu (edition thar) hi ka lan chawk nawk hiel a. Ka tu leh tehai kuomah chen khawm suong takin ka la phar hlak. Ka rohlu pakhat a ni ve leiin, tu chen khawm hin a bu hi ka la kawltha zing a nih.

Bu Hmasa an siem dan hi ei enin a lo scientific khawp el. Hawrawp lien, hawrawp chin, kut ziek hawrawp chin le lien, A AW tlan dar le nambar 1-a inthawka 20 chen a um bawk a. Chu zova hawrawp le thil limhaiin a zui a. Tiem ding 1naa inthawka 70na chen vowel le consonant hmang kawp dan a awl dan le an tak dan indawtin siem a nih a. Hihai zova hin tiem inchukna thupuiin sunzawm a ni nawk a. Thatna dan inchukna moral tha tak tak nei, entirna dingin- Rimsik do inchuk la, thaw fan fan rawh; Mikhuol lawm rawp rawh, dan tha a nih; lak nekin pekin lukhawng a nei lem ti le a dang dang a um a. Thupui tha tak tak naupang tha chanchin le naupang suol chanchin dam a um a. Ei tawnga hapta le thla hming dam an sie a, a bengvar thlak. A tawpa hnam hla tha em em ‘En tu’m mihrang pasal tha’ ti hlain an hei khar nawk a, an lo siem thiem lawm lawm ngei. Hieng anga bul tanna hlu lekhabu tha mi lo siempektuhai hi, chawimawina insang tak a thara pek nawn tlak an nih.

Bu Hmasa ei suo char khan Chanchin Tha Johan ziek kha tiem inchukna’n ei hmang nghal a. Tu khawm hi zirtirbu tha taka zo hai hrim hrim chu Bible le hlabuhai tiem thei nawh an um der nawh. Hi hnung hin Hmar Literature Society huoihawtnain (late) Dr Lalnghawrlien le Revd Thangdailo-ha’n Inchuk tan bu a limhai leh tha takin an hung siem nawk a. Dr Lalnghawrlien ngei khawmin a mi hril a, kha lekhabu inchuk zotuhai khan Bible an tiem thei tlat nawh. Hmang zawm khawm a ni chuong ta nawh ni’n ka hriet.

Bu Hmasa hi dilsut taka ei inchuk chun, thumal siem dan le ziek dan ding ei hriet thei. Chuonghai chu akhelneng akhawlnawnga suih lovin, a tlangpui chauh zuk tarlang ei tih. A hmasa takin Hmar tawnga AW le Sap tawnga O hi zuk suih met inla. Hi hawrawp pahnihai hi ri ang khat neih an nih a. Sap tawnga O (AW) leh Hmar tawnga O (OU) ruok chu an hmel inang sienkhawm, an lamrik a dang daih. Thluk seia ei hmang pha AW chungah thluk sei sinsiena ei sie el a. Entirna dingin: Khawm tho ka ta, ka pa kuomah. Hmar tawnga AW le Sap tawnga O hi hmang kawp a rem am? Entirna: An khaw (ri tawi) ngei (a harsa tina). AW aiin O lo hmang ta inla, ‘An kho ngei’ tia O khelah a chel tangtu H ei sie si naw chun ‘a harsa ’ ti kawk ta lovin, lam inkho a kawk ta lem daih. Hi takah O hin AW ai a aw ding chun, a chel tangtu consonant ‘h’ belh a tul. Entirna dingin, ‘An khoh ngei’ tia ziek a ngai. AW ri tawia Sap tawnga O lo hmang tah inla, Hmar tawnga O kha iengtin am hmang tang ei ta? William Pettigrew, Manipura mingo misawnari hmasa tak khan Meitei, Tangkhul le Thado tawnghai a thiem em em a; an grammar-hai dam a siem pek hiel a. Ei tawnga O ri umna taphawta OU a hmang pei hlak. Entirna dingin, Chouba, Thoudam, Thadou, Doungel le a dang dang. Kabuihai khawmin OU hi an hmang ve, entirna: Haipou, Tousem, etc. Hmar tawnga O hmangna taphawtah OU hi hmang ve a tul ding tina a nih. Mi thenkhat chun an hmang mek hrim. Entirna dingin: Joseph Joute, Timothy Joute, etc.

Thil dang ngai pawimaw um em em chu H hmang dan hi a nih. Lusei tawng ziek diknaah H belhna ding le ding naw a tam em em. Hmar tawng khawm indik taka ziek le lam ding chun H belhna ding a lo tam ve em em. Hi hi mi tam takin ei uksak nawh. Entirna dingin, hieng thumalhai hi zuk en ei tih: bau (mouth), bauh (Mi bauh naw. Ui an bauh). Chau (weak), chauh (only). A hnuoia thumalhai khawm hi zuk en ei tih: beu, cheu, deu, heu, meu, neu, reu,teu le zeu. Hieng thumalhai ri tawi le ri sei hmang hin sentence zuk siem ei tih.

Fe hmang rawh, beuh bou chen.
Ka lawm cheu. A la thaw ta cheuh (rawp) chu.
Dai (fencing), Bawngin dai a ner. Kan daih naw taluo.
Mi deu ngai naw rawh (Mi hmusit naw rawh). Ni tin ka hnaih deuh deuh.
En rawh, a malpui ka tuoi heuh heuh.
A ke an bai leuh leuh.
Thaw ding ka hriet meuh nawh.
Buoipui ding neuh neuh a tam. Nang reuh te hi!.
I kap fuk teuh nawh.
Hme ka zeu thiem el. An khat tawkin ka leng zeuh zeuh.

Khieng sentence-haia inthawk khin vowel pahni inzawma a chel tangtu ding ‘H’ belh le belh naw hin kawk dang daih an neih ti ei hmuh. H belhna dinga ei belh chun a tiem khawm an hawih. Hienghai anga vowel pahni inzawm thumal bei, chei, dei, fei,hei, ngei, kei, lei, mei, nei, pei, rei, sei, tei, vei, zei, an um. Hi thumal lai hin ‘hei’ le ‘ngei’ naw hi chu ri tawia hmang vawng hlak an nih. Entirna: Heih feng ei tih (Let us go forward)- Hei! thaw naw rawh. Hieng ang thumal H belha kawk dang neih hi ei hauh em em. Ziek lang seng naw meih nih. H belhna dinga belh pei inla, ei tawng ziek hi a tiem inhawih zuol a tih. Hi taka ‘inhawih’ ti khawm hi H a cheltangtu sie naw inla chu ‘inhawi,’ mi’n an mi kova, ei inhawi hi a nih.

Ei tawnga J le Z hmangna khawm hi thlier met tulin an lang. Mi thenkhatin J le Z hi ang khatin an hmang a. Entirna dingin, thenkhat chun David Zote ti’n an ziek a, a then dang chun Timothy Joute, Joseph Joute, etc, ti’n an ziek a. Ei sawisel chuong nawh. Pu Nghinglo chun Z.Nghinglo ti’n a ziek el a. J le Z hai hi uniform deuh hleka hmang thei ni ta sien. Dannaranin, J hi hnam dang hming zieknain ei hmang deuh tak. Entirna: James, John, Joshua, Jangkholam, etc.

Ei tawng zieka ei suksuol rawnna tak chu ‘in’, ‘na’ le ‘a’ hmangna hai hi an nih. ‘In’ hi noun (house), pronoun (you), verb (sleep)-a hmang a ni chun, a hrana ziek ding a nih. Entirna: Hi hi in (your/you) in (house) a ni? I mi ko maw, ka lo in meta ni. ‘In’ noun, pronoun le verb-a hmang a ni naw chun, thu zawmnaa hmang a ni hlak. Chuleiin main word le ziek zawm hlak ding a nih. Entirna: inneiin, dingin, inkhawm, inthawkin le a dang dang. Lamkaa inthawkin Rengkai pan rawh. Hieng ang bawk hin ‘na’ khawm noun (na, nakawr), na (pain), adjective (painful) hrilnaa hmang a ni naw chun, thu zawmnaa hmang ding a nih. Entirna: hrilna, zawmna, lawmna le a dang dang. ‘A’ khawm hi pronoun a ni chun a khata ziek ding a nih (a nih). Pronoun a ni nawha, thilthawna hmangruo inentirna (instrumental case) anga hmang a ni pha leh, a hmaa thumal leh ziek kawp el ding a nih. Entirna: Hlo chu tuthlawa thlo ding a nih. Hi lekhathawn hi nguntaka ngaituoa ka ziek a nih.

Hmar tawngah hin preposition a um nawh a, postposition ruok chu ei neih. Postposition chu thumal le ziek kawp el a tha. Entirna: Dawkana, khum chunga, vana mi le a dang dang. Phaia inzin chu a hadam. Thingtlanga inzin ruok chu sawl a um taluo. Ei tawngah hin ‘v’ belhna ding iemani zat a um a. Mi thenkhat chun an belh ngai kher nawh. Ka ngaidan chun tawnga ei lamrik na na na chun ‘v’ chu zieksa ngei ni sien nuom a um. Entirna: Loin ti hi i lam pha, ‘v’ ri i lamsa tei hlak. Entirna: Chawl thang lovin, bei an fak. Tleirawl te chun ka hmingin a mi kova, nu le pa zirtir lova seilien ning a tih.

Chun, ei tawng zieknaah hin thluk sei pekna ding a tam em em. Revd (late) Zairema lem chu Mizo tawng ziek hi a fir em em a. Thluk ri sanga chungtieng thluk sei sinsiena a pek a, thluk sei ri hnuoi tienga thumal vowel hnuoiah thluk sei sinsiena a pei bawk. Mizo tawng ziektu dang hai chun an hmang ve chuong nawh. Vai tawng (Hindi) hi khawvela tawng scientific pawla ngai a nih. Hindi thumal Roman hawrawpa an ziek pha thluk seia aa an ziek tlat. Entirna: aadmi, raat, etc. Ei tawnga khawm thluk tulna hmuna vowel pahni ziek double ve inla, a tha dim. Entirna: Daam khura thlai a tha nuom. Inzaat sengin sem ei tiu. Rawl inring deuhvin kheek ro. Duumah insil ngai naw rawh. Beelbul ding tha ka hauh khawp el, etc.

Tu tieng tieng hin Sap tawng sikula kai ei insukhmu tawl a, mani tawng tiem thei lo le ziek thiem lo tam tak ei um tah. Puitling sande sikula inchuklaihai patling le nutling ngiel ngiel khawm indik taka Bible chang tiem thei ei vang tah. A ziek lem hi chu an tak nawk zuol. Chuleiin, Convent sikula ei nau sei lien hai hi Bu Hmasa hi inah nu le pa’n inchuktir inla, Bible tiem le ziek bek an thiem theina dingin. Ka hriet suol naw chun Bu Hmasa hi EAC Book Room, Rengkai Road-ah hmu ding tam tak la umin ka hriet.

A chunga ei hril tah angin, Bu Hmasaah hin hawrawp 26 ei nei a; chu lai chun consonant (makhata ngir thei lo le umzie nei lo) 21 a um a, vowel (makhata umzie neia ngir thei) 5 leh. Zieka lekha ei hung inchuk tannaa inthawka tiemin kum za a lo tling ve ta zing a. Hawrawp 26 hai hin ei tawng ri le thlukhai hi an hril suok zo tak tak am ti hi thlir nawn a hun ta hlein an lang. Eini lai linguisic tienga research thawa degree insang nei khawm ei um nawk tah ring a um a. Hawrawp 26-hai suktlawm am a tha, belsa am a tha ti dam thlir nawnin hnam dang linguistic expert-hai leh hma lak vat vat tulin an lang tah. Assam, Mizoram le Manipurah Hmar Literature Society (HLS) hran hran dam ei lo nei tah a. University chena Hmar tawng language paper lak a hung ni ta lem hin chu, tawng hmang le ziek dan hi uluk nawk zuol ta inla. Manipura HLS hi a hma thuoitu deuha ngai an ni leiin, hieng state-hai huomin seminar/workshop an khat tawka nei hlak dingin hma hung la hai sien nuom a um. Ei thaw ta hnung hai khawm thlir nawn a tul zing a nih. Tawng hi che chang zing dynamic a ni leiin, thlir nawn a tul zing a nih.

Saphai literature bul thut laia pawimaw tak pakhat chu Holy Bible King James Version hi a nih. Literature hlutna tienga inthawka thlir chun King James Version neka Sap Tawng mawi lem hi English Version dangah hmu ding a um nawh. Entirna dingin Thou, Thee hai dam hin tawng a sukthupuia, We praise you ti satlie ringawt nekin, We praise Thee, Thou art my Rock - heih ti hin a thupui lem daih. King James Bible ang bawkin, ei literature innghatna bul khawm ei Bible hi a nih a. Tu hin version pathum ei nei tah a. Hmar tawng ziek dikna dinga keihruoitu tha tak chu ei Bible version pathum hai hi an nih.

*The author is a Professor in History, Manipur University. Prof Dena has contributed immensely to Inpui.com through many of his highly academic articles.