A hmasa-in remna leh muanna duha lo kal khawm hmar tlangdung mipuite chibai ka buk a che u. Vawiin programme a tel tura min sawm hi ka lawm a, ka lawm rual rualin mak ka ti a, kei Lalremruata Varte, North Khawdungsei tlangval ve mai hian ka u leh naute, ka nu leh pa leh ka pi leh pute bulah hian eng thu ka sawi ang a, kawng kan zawh chhan ber thu-hla-ah phei chuan eng thurawn nge ka au chhuahpui ang tih hi ka rilru-ah a lian hle a. Amaherawhchu he lei chhiar danah kum 30 kan lo kai ve tawh avangin mahni ram hmangaihna rilrute, kan nu leh pa, kan unaute khawsakna hmun leh changkan duhnate ka rilru-ah engtik lai pawhin a cham reng a, chumi tana hmanrua pakhat ka nih theih hun tur leh ka thawhchhuah hun tur chu Pathianin hun remchang min la siam ngei ang tih ka ring tlat a ni. Chuvangin he programme hi remchangah la-in ka rilru vei zawng leh he tlangdung tana ka ngaihtuahnate tlemte han sawi rik ka duh ve a ni.
Vawiin a lokal khawm mipuite hi u leh nau kal khawm, duh thuhmun leh tum thuhmun kan ni. Nitin eizawnna hrang hrang kan nei a ni thei e, political party hrang hrangah kan awm a ni thei e, kohhran hrang hrangah kan lawi a ni thei. Amaherawhchu, kan zavaia min hui khawmtu chu remna leh muanna duhna thinlung a ni, a ropui ka ti tak zet a ni. Vawiina kan kalkhawm ang hian keini tlangdung mipuite hi inthurual thin ila chuan vawiina kan dinhmun ai hian kan tlangdung hi a changkang tawh ngei ang tih hi ka sawi tel duh a ni.
Mihring hi ruh leh taksa bung hrang hrang invuah khawma siam a nih ang bawkin ram leh hnam (country & nation) hi ram bung hrang hrang leh hnam chi hrang hrang vuah khawm atanga din chhuah a ni a. Chung bung hrang hrangte chu an pawimawhna theuhah an pawimawh vek a, bung khat a nat chuan a pumpuiin a tuar thin. Kan awmna India ram pawh hi chutiang chiah chu a ni a. Chuvangin, Unity in Diversity tih thuthlung hi kan insuih khawmna thu leh hla berah kan hmang a ni. Zofate pawh hi chi hnam hrang hrang vuah khawma hnampuia indin chho mek, Saptawnga ‘proto-nation’ an tih chu kan ni ve. Kan hnam siamtu bung hrang hrangte hi an hrisel poh leh kan hnam a hrisel ang a, a hrisel lo an tam apiangin a than a thu mai dawn a ni. Hemi thutak ding reng hi ram leh hnam hruaitute chuan an hre chiang tur a ni.
Hming hrang hrang- Hmar Thimpui emaw Tuisualral emawa an koh, tuna Sinlung Hills Development Council (SHDC) kan tih hi leilung hausakna tinrenga khuanun a vûr, mahse a ram chhung rau rauah pawh bial hnufual ber leh ngaihsak hlawh loh ber zinga mi a ni a. A mi chengten an harsatna leh lungawi lohna awka an chhuah leh dimdawi taka ngaihsak aiin, hmelma ang hiala enin sorkar chuan hrâwm a chhuah a. Chumi avang chuan, an duh thu pawh thlu loin, rammu pawl an chhuak ta hial a ni. A tawpah, an thil dil pawh ni phak loh, mahse an thil dil thlenna tura rahbi pawimawh nia an sawi hmuh chu pek tiamin, Mizoram sawrkar nen thuthlung an siam a, hun lailawka inenkawlna turin rorelna khâwl siam a ni bawk a. Chumi dinhmunah chuan kum 15 zet Interim SHDC chu a ding tawh a ni. Hetiang khawpa mahni mi leh sate sawisak hi inhmuhsitnaah pawh a chuang liam a ni lo tih a har a ni.
Chumi dinhmuna SHDC a la ding reng chhan bul ber chu Mizoram sawrkarin a ngaihsak loh vang a nih laiin, engemaw chenah a biala cheng mihringte inthurual loh vang leh zai khat vuana kal an pèn loh vang a ni thûi hle. Tum ram theihnghilha sum nawi leh nihna thawrawng ûma buai pawl kan awm tih chu tlang hriat a ni. Tawktarh te reuhte nêp harsa kan tihna chhan pawh kan khawsakna dinhmun a hniam lutuk tawh vang pawh a ni thûi hle ang tih ka ring. SHDC dinhmun duh loh pawl chuan hah dawn loin an rammu zui zel tih a hretu vek kan ni. Chungho nena Mizoram sorkar inbiakna tur ruahman a nih lai mekin sorkar ding lai chuan chhuanlam dawrawm te te hmangin rokhawlh a siam tih pawh kan hria. Hei hi fiahna duhawm, hun lawmawm, hnung lama sa inbarh ang, indawrpui tlak kan nih leh nih loh min fiahna angah i ngai ang u. Thu khat vuana tan rual tlat hun a ni. Hetiang hun hlu min hlan hi a leh a linga lawmthu sawina tham a ni. Lawmthu kan sawi dan tha ber leh thawm ring ber chu inthurual a ni.
Vawiina lokal khawmte hi political party hrang hranga awm te kan ni a, a then chu party lama ngaihtuahna seng miah lo kan awm nawk bawk. Hei erawh ka sawi duh ani, Mizorama Political party awm reng rengte hian engvangin nge keini tlangdung mipuite hi min ngaih thah a, duh duh huna hman lawr mai mai theih Playing Card a Joker ang leka min hman thin ni ka ti. A changin min tialtir a, a changin min zumtir a, a changin min ti tawka a, enge kan rawng ber pawh hre thei lo lekin min siam thin a ni lawm ni? Tute thiam loh nge nita le, a hmasa berah kan politiciante an ni a, a dawtah keini mipuite hi kan ni, kan tanrual a ngai ta. Inthlan lo hun leh se, min hmangaih ngai loi te khan thu thlum tak tak min rawn barh leh ang a, chumi tawlhpanalah chuan kan tlu leh ang tih ka hlau a ni.
Hmar ho chu intih hran an tum reng ti pawl an awm, thenkhat lahin mizo nih an duh lo te tiin na tak takin min tawng khum thin. Amaherawhchu, keini zawngiin Chhura thlah kan nihzia kan hre chiang, kan duh leh duh loha zofa ni thei, ni lo thei kan ni lo, kan thisen hi zo hnam thisen a ni a, khawvel awm chhungin a ni reng bawk ang. Vawiina kan kal khawm chhan pawh hi Zoram dung tluanah remna leh muanna awm rawh se tih kan duh avang zawk a ni lawm ni? HPC te hi hel an ti maw, kei chuan hel ka ti lo, kan changkan ve duhna avanga kan aiawha hrehawm tuar ngam, thosi leh vangvat kara kan changkanna tura beitute an ni. Kan ram hruaitute mipuiten kan ko ei zo lo a, beidawnna khura mihring a luh tawh chuan mi hlauhawm ber an ni, chu chu HPC lo pian chhan pawh hi a ni reng a ni. Duhthawh luat avanga kal sual chang nei mahse, an tum ber chu kan hria a ni lawm ni, kan ram hruaitute’n hmar thimpui min ti reng a, keini lamin hmar arsi nih tumin changkan kan duh ve tawh si a, politiciante duh leh kan duh hi a inan loh vang mai a ni. Amaherawhchu vawiina kan kalkhawm chhan ber hi kan unaute HPC (D) te leh sawrkar hi inhmelma lo se, dawhkan khatah Zoram thatna, kan tlangdung hmasawnna turin remna thusawi tlang teh se kan ti a ni.
Hmanni lawka kan Chief Minister-in Assembly House-a a thusawi te kha keini mipuite hi kan ram hruaitute ang leka rilru te ni ila chuan buaina siam tham khawpa tawngkam na a ni lawm ni. “HPC te hi suamhmang anga en tur an ni…” tihte kha kan ram hruaitu ber tawngkam atan chuan a na lua ka ti. Mahse, min diriamtu leh min hmusittute hi i ngaidam zel ang u, buaina siamtu ni lovin Zoram tana remna palai nih i tum zawk ang u.
“Kan ram chu Tahan thleng khi a ni” a ti a, kan lawm em em a, a tuk lawkah “Suamhmang anga ngaih tur an ni e...” a ti leh a, Lungleiah a phei leh a, “ India mi in ti lo chu ration card atanga paih tur” a va ti leh a, Lai Autonomous District huam chhungah va kal leh se eng thu nge a va sawi leh dawn, kei chuan ka hre thiam phak tawh lo e. Lai Autonomous Council awm te saw kan ram leh hnam changkanna atan hian thil pawimawh tak a ni. Council nei lo se, keini ang tho hian an hmelte a la pawr fip fep ang a, tih tur nei loin khawlai an leng ve huai huai ang a, inthlan apiangin a duh duh party-in an bum ve leh mai ang. Council an nei a, tunah chuan lehkhathiam tam tak an chhuak a, tun ai hian kan politiciante hian sum leh pai hmang dik leh zual se chuan namen loin an changkang leh zual ang. Keini tlangdung hi engvangin nge Autonomous Council kan neih kan ram hruaitute hian an hlauh em em ka ti a ni. Council lo piang se, tun ang em hian kan rethei bak berh lo ang a, kan nitin eizawnnate pawhin awmzia a nei deuh tawh ang a, sa râwp avangin ruaitheh hlekah kan pungkhawm dur dur tawh bik lo ang. Zohnahthlak mah ni lo, Chakma ho pawhin anmahni pual Council an nei a, khawvel zawng zawng dap chhuak ila, Mizoram ah chiah Council an nei asin. Engati nge keini tlangdung, ramri hrula awm, ngaihsak ngai bikte hi Chakma tlukah pawh min ngai lo em ni tih hi ka in zawt fo thin.
Autonoumous Council a ni emaw, SHDC a ni emaw, kan duh ber chu he tlangdung hian mite angin changkanna hmu ve tawh rawh se kan ti a ni. He tlangdung hi hmasawnna leh changkanna-in thleng pha ve se, vawiinah hian kan unaute an rammut a ngai lo ang a, eng council mah kan ngiat ka ring bawk lo. Han en teh u, kan chhak lawk Tinghmun khuate hi kum 200 an lawm tawh asin, metal road-in a thleng mumal lo a, electric eng mumal awm theih hun an la nghak asin. Mobile hman dawn lahin awmna hmun thlan thiam viau a la ngai a! Tinghmun chauh ka ti lo, he tlangdung zawng zawng hi mumang rama la cheng vek kan ni. Ka khua ngei N.Khawdungseite khu en teh u, Sakawrdai leh Khawdungsei kawngah motor pawh kan la inpel thei lo a, motor leh motor atang pawhin kan la in bye-bye thei miah hlei nem. SHDC headquarter ngei Sakawrdai pawh hi min han enchiang ta che u, kan ril chauh hi a tâm lo, kan engkim hi a tâm a, kan thaw huam huam a ni.
Remna leh muanna a awm loh chuan hmasawnna a thleng thei lo. Chuvangin Autonomous Council ani emaw, Sinlung Hills Development Council a ni emaw, kan duh ber chu remna leh muanna hnuaia changkanna leh hmasawnna a ni. Kan pi leh puten, luchhum ban chhum huama an lo din tawh, he tlangdung hi thil chhia sawi nana hman reng hi kan rem ti tawh lo. Chuvangin chhuanlam dawrawm te te hmangin HPC(D) leh sawrkar inbiakna hi kan ram hruaituten ti khawtlai tawh suh se, kei chuan he remna leh muanna lo thlenna atan hian mi thahnemngai tupawh lo awm rawh se, Mizorama chhunga cheng a nih leh nih lohah ka buai lo, Tahan thleng kan ram kan pu berin a ti bawk a, remna leh muanna duhtu leh kan hmasawnna duhtu an nih chuan ram ri a awm lo a, zo hnahthlak a nih phawt chuan remna palai atan thlei bik ka nei hauh lo mai. Chuvangin vawiina lokal khawmte leh he tlangdung mipuite hi Zofate tana remna palai nih i tum ang u. Inteitetna thinlung dah tha-in kan awm hmun theuhah kan ram leh hnam tana mi tangkai nih i tum theuh ang u.
Ka lawm e.
Lalremruata Varte
25th August, 2011
Sakawrdai
Post a Comment
Comments not related to the news or article may be deleted.