Saptawng kan hman dan

By Pu P.C. Lawmkunga, IAS

“Mizopa zu rui chuan Saptawng hman teh an tum a; midum zu rui erawh chuan Mizo tawng hman tâlh an tum thung” an ti thin a. A dik leh dik loh phei chu ka hre lo. Mahse hei hian Mizo te’n Saptawng kan ngaihsanzia leh Saptawng thiamte kan dah sanzia a entir tlat a ni. Kan hre tam emaw tam lo emaw, Saptawng han chelek hi chu kan châk viau a ni ang. Sikul kal lo leh pawl khat pawh passed lo ka pa te ang pawh khan Lalpa Tawngtaina hi saptawngin an sawi thei a. Samdala was a very lazy man tih te kha chu an mitdel hla vawn hlurh mai a ni. Anni hunah kha chuan Sande Sikulah lehkhaziak leh chhiar an zir thin a. Serkawn atanga Missionary-ho lehkhabu chhuah Robawm te kha chhiarin chuta saptawng tlem tlem lo tel te chu an zir thin ni awm tak a ni.

Tin, kan mi hmasa ho kha chuan Saptawng kha khawlai inbiakna tawngkam (colloquial) ang chi chauh kha thiamin, a bul (roots) an man lem lo va. Chuvangin sentence han parse leh analyse vel chu an thiam hauh lo ni awm a ni. Vawiinah erawh chuan a b catanga tanin, parts of speech leh sentence composition nen naupangin an zir tawh a. College leh University thlengin English subject-a degree lak theih a ni ta. A lawmawm e. Chutih lai erawh chuan lehkhathiam-College leh University zo tawh te zingah Saptawng lama pachhe fe fe a awm theih tho mai a. Chutih laiin College degree pawh nei lem lo, Saptawng ti thei fu fu an awm thei bawk. Saptawng hi kan hre ve lova kan hmang thiam lo a nih chuan tuma’n min dem thei lo vang a. Hre ve-a inngai si-a hman dik si loh erawh chuan miin min dem thei dawn a ni.

He article-ah hian kan sawi kimchang hman dawn lo va. Chuvangin kan saptawng hman dan dik lo langsar zualte i han chhui zung zung teh ang.

CONVEY leh APPROVAL chawhpawlh: Manipur Secretariatah hian saptawng pakhat “convey approval” hi an hmang uar khawp mai a. A Mizo tawng tlukpuia an hman dan chuan “Phalna/remtihna” anga hman a ni. “Ka chhuti dil kha convey approval a la rawn thleng lo tlat mai” an ti mai a ni. A dik loh dan chu sawi thui a ngai awm lo ve. LDC leh an zawlpuite chauh ni lovin officer thenkhat pawh hian hman tehah an neih a ni. Approval hi convey tur a ni.

VERB leh ADJECTIVE hriat pawlh: Sawrkar lehkhaa officer tam takin an hman dik loh fo chu ‘tantamount’ leh ‘commensurate’ hi a ni leh bawk. Heng thumal pahnih te hi verb angin an hmang hmiah hmiah mai a. The progress of the work does not commensurate with the money sanctioned tiin. Mahse he thumal hi verb ni lovin adjective a ni zawk a. Chuvangin …is not commensurate with… tih tur a ni. Tantamount pawh hi Your action tantamounts to insubordination ni lovin ….is tantamount to tih tur a ni. Tin, comprise leh consist tih hi tam takin an ngaih pawlh fo bawk. Consist hi of in a zui laiin comprise hi chuan of a mamawh ve lo a ni.

Khing khi chu High School naupang thiam thei pangngai chuan an hre vek ang. Khing aia khirh deuh hlek khi lo en leh ila.

CORRELATIVES hman sual: Saptawng hmang thinte hman sual thin pakhat chu coordinating conjunction pakhat but hi a ni. Thuhlawm pakhat not so much laichintucorrelative emaw ti-a hmansual a awl khawp mai. Entir nan, My annoyance is not so muchagainst his late arrival but his failure to bring the report tih ang te hi a dik ta lo va. But aiah hian as dah tur a lo ni ta a ni. He thumal but thlemna hi a nasa hle thin reng a ni. Hetianga hman dikna thuziak hi chu vawi hnih chiah ka la hmu a. Telegraph chanchinbu Editorial leh Lalrosem IAS thuziakah te hian.

Lehkhathiamte zinga hman dik loh fo mai bawk chu thuzawhna pakhat Is it not kaihtawinaIsn’t it tih hi a ni. Rentindaih atana hmangin thuzawh letna apianga hmang maite an awm. Entir nan:- It will be appropriate if we call four persons to complete this job, isn’t it? Engnge dik lo ta? A thupui chu It will be a nih avangin zawhna siam let nan chuan won’t it be(will it not be kaihtawina) hman tur a ni ang. Hetianga dik lova hmang hi officer senior pui pui pawh an awm.

How do you do: Hei hi chibai inbukna anga hman chuan zawhna a ni lo. Chuvangin I am fine, thank you, tia chhan chuan awmzia a nei lo va. A chhan letna chu Nice to meet you emaw Pleased to meet you emaw tur a ni. Mahse hei hi chu hman than fe loh chuan tihsual a awl khawp mai.

QUOTATIONS: Mi thusawi ziak chhawn emaw sawi chhawn dawn emaw hian fimkhur a ngai em em bawk. Dik lo tak taka mi thusawi hnu sawi chhawn hi thil sual literary sin a tling thei. Entir nan ST Coleridge-a thuziak ‘Water, water everywhere, Nor a drop to drink” tih te hi “…..And not a drop to drink” ti an awm fo a ni. Tin, Thomas Gray thu leh hla, “Where ignorance is bliss, ‘Tis folly to be wise” tih pawh hi tawngkam tlanglawna hmana “Ignorance is bliss” tih liam ngawt hian a awmzia a buk thelhin a thelh deuh thaw thei. Where ignorance is bliss tih leh Ignorance is bliss tih ringawt chu a tum a dang daih a ni. A hmasa hi thil ni thei, ni lo thei bawk sawina conditional a nih laiin a hnuhnung zawk hi chu thil ni chiang sa sawina affirmation a ni daih tawh a ni.

Thil sawi chhawn dik lo hi a nuihzatthlak theih chang pawh a awm. Nu pakhat hian a fanu hnenah “Mami, i pute inah va kal la. I pa chempui an hawh kha kan hmang ve duh tawh a, va dil tawh. I pa lo vah a har si a, a chem a chhe bawk si nen. Hreipui tal pawh kan nei si lo va. Hetiang te chuan

lo kan invat chhuak nang” a ti a. A fanu chu an pute in a va thleng a, a pu nupui hnenah chuan, “Ka pi, ka nuin i pa lo vah a chhe si a, a chempui a har bawk si a, hetiang te chuan kan vak chhuak ngam nang. I pute’n kan hreipui an hawh kha va la tawh, a ti” a va ti a. A pi chuan a pasal a lo haw chuan “Kha, i tunu khan a pa lo vât a haw har si a. I pute’n kan hreipui an hawh daih bawk nen, vah pawh kan vak chhuak ngam nang a tih kha” a lo ti a.

LEHLIN SUAL: Hmanni khan kan thianpa D.Ruolngulin Delhi atgangin Joba bung 19:20 thu hi mi rawn kawhhmuh a. Hetiang hian a lo inziak a. “Ka vun leh ka tisa hi ka ruhah a bet a, ka ha vun chu ka la chang a” tih hi. A Mizotawng hrim hrim hi a mak viau reng a. “Ha vun” a awm thei ngai teh reng emaw ni. Mahse a saptawng kan han en chuan “by the skin of my teeth” tih a lo ni ngei a, chutah chuan a letlingtute hi an buai ta a ni ber awm e. Saptawnga tawngkauchheh (idioms)- thuhlawma a thumal tin awmzia hian a pumpui thu-ah awmzia a nei fo lo va. Mizotawng upaah pawh “Van laia tla ang” tih a awm a. Mahse tumah ‘van laiah’ an tla ngai lo. Mi rethei leh baihvai sawina mai a ni. Chutiang bawk chuan “by the skin of my teeth” tih chu Saptawnga idiom pakhat a ni a. Skin leh teeth hian awmze hranpa a nei lo va. A thuhlawma kan hman erawh chuan ni ve hram, pal tlang hram (only just) tihna daih a lo ni ang. Chuvangin Joba hi a damlo reiin a cher tawh hle a, a vun leh tisa a sâwng chhe zo tawh a, mahse a la dam ve hram hram a ni, a tihna lam ni zawk tur a ni. A thu tluantling chu I have escaped by the skin of my teeth. Tin, I have passed the exam by the skin of my teeth kan ti thei bawk ang.

Thenkhat chuan thu tluangtlam pangngai (prose) pawh hi hla thu deuh poetic taka leh chhuah an tum thin a, a tul lem lo. My boy, open the door tih pawh hi Ka hrai bung dawntuaite, khartung sawn rawh ti kawi duah kher lovin, Tlangval, kawng kha han hawng teh aw tih mai tur a ni. Kohima a War Cemetry-a an thuziak rilru khawih tak When you go home, Tell them of us and say that, For their tomorrow we gave our today tih pawh tul lo deuhva no leh duah taka let kawi duah an awm fo mai. Damte-a siang in lawi leh hun chuan e, kan chan riangte hi han hrilh ve ula ……tih vel duahin. Chu chu thudang ni se, tam tak chuan Indirect leh Direct speech an chawhpawlh vak bawk a, awmze nei lo tawpin an chhuah thin.

Entir nan, “In lam in thlen leh hun chuan kan chanchin hi rawn hrilh ula in hmakhua atan keinin vawiina kan nun hi kan hlan ta in rawn ti dawn nia”, tiin. Chhiar nawn leh teh a dik loh dan chu I hre mai ang. A Mizo tawng bumboh leh ‘boh loh chu thudang ni sela. A thubul hi hmai hmaa inbiakna direct speech a ni lo va, thu hlanchhawnna indirect speech a nih zawk avangin a Mizo tawng khian a phawk zo lo va. A Mizo tawng ang chiah khian la dawn ila chu an tana nun an hlan saka te chu ina haw thleng thei ho zawk kha an ni daih dawn a ni. Indirect speech an aia direct speech in hman khian a su buai a ni. A saptawngah pawhyour ni lova their a nih khi an hmaih thin. Chuvangin-“In lam in thlen leh hun chuan kan chanchin hi rawn hrih ula, an hmakhua atan kan vawiin hun hi kan pe ta in rawn ti dawn nia” tih mai tur a ni ang.

He thuchah lungrun tak mai hi tu phuah nge? Thuchah sawitu ni-a awma lang mitthi te phuah chu anih hmel lo va. An sawi dan chuan James Edmons (1875-1958) phuah a ni. A chunga kan sawi ang deuh khian their aia your hmanna ni awm tak hmun thenkhatah chuan a awm ve a ni mai thei. Mahse Kohimaa lungphunah chuan your ni lovin their tih a ni zawk.

Mizoram lamlian sira thilziak tar (hoardings) pakhatah chuan For BRO sky is the limittih hnuaiah BRO chu van dumpawl ang a ni an ti ve tlat mai. Heti kan nih si chuan sawi huai vak pawh a ngamawm ta lo awm e. Chuvangin heta kan rawn tarlan te pawh hi rawn hnial duh an awm mai thei e. Mahni hriat chin bak chu sawi theih ni miau hek lo le.

P.C.Lawmkunga Imphal, March 24, 2010.