PUITLING TIENG PAN*

By L.Keivom*, Inpui Columnist

Krista chungchanga inzirtirna thu mawl

tak tak hril zing ta loin puitling tieng pan ei tiu.

-Hebrai 6:1

Hebrai mihai kuoma lekha thontuin a chunga ei thu thur suok a ziek lai hin kum sawm vela upa kristien an ni hman chauh a ni el thei. Tirko Paulan kohran a’n dinhai kha kum khat a um chilh chun kohran puitlingah a siem pei a nih. Eini chun kristien ei nina zabili hiel 2010 khan ei lo hmang ta a. Hi kum za sung hin puitling tieng ieng chen am ei pan hmana ti tukver palia inthok chauhin hang thlir thuok thuok inla.

1. Rongbawlna tieng:

Tuoltro tirko/zirtirtuhai rongbawlna khan a rùn hrât hle a, kum nga vel sung chauin ‘Hmar Biel’ tia hriet hih an lak hman bakah Vaiphei, Rangte, Haokip le Vuite Biel an lut chilh hman a nih. Nor peiin Chin Hills-ah an kai a, Sagaing Division hmar tienga Hukawng phairuoma an khawpui Homalin chen an lut hman a. Kabaw phai Khampata pi le puhai bungpui phun, an thurosiena bûngpui, ‘Khampat Bungpui’ tia hriet hi a kung lienzie inkhi le inchik a, a chanchin Kristian Tlangau a insuo hmasa tak chu Kawlrama rongbawltua ei sie Rev. Dengkunga a nih.

Kum 1917 khan Tripura-ah tla thlain, Jampui tlang le Sakhan tlang bakah Darlong Biel le hmun dang dangah an lut a. A hnungin hmunpuia Lakhipur hmangin, chu taka insaisang chun an luong liem pei a, Chittagong Hills Tract chen an tlung hman a nih. Kum 1923 khan thla sawm tâl top rongbawl peina ding biel thar dapin misawnari ropui Edwin Rowlands chun Chittagong Hills Tract, Arakan Hills, Lakher (Mara) Biel, Chin Hills, Manipur le Naga ram chen a enthlithlai a, Lakhipur bakah Naga ram Henema-ah hmunpui thar indin sap an tum hman a nih. Edwin Rowlands inzinna Tour Diary hi Thilthawhai (Acts) ang ela chanchin ngainuomum le hlu a ni a, a hrana a bua siem dinga buotsai mêk a nih. Lusei tronga a hla phuok inlar tak el,

Thlalera vâk ka lo nih hi,

Ding leh vei bo tawnin;

‘Ka Pa in a lo hnai a ni’

Tiin ka beisei thrin

ti hla khom hi Lakher (Mara) Biela July 20-21, 1923 a Tongkolong le Kaishi inkara lam a’n hmang leia ama chauha trua a riek truma a phuok a nih. A chanchin chieng zuola hre nuom chun Zoram Khawvel-5 tiem ding le Watkin Roberts rongbawlna chanchin le mission buoi thu chîk taka sui nuom chun Zoram Khawvel-6 tiem bok dingin ka ditpui.

Ringtharhai rongbawlna nghong suok poimaw tak el chu Hmar hnathlak pahnam trong hrang hrang le Lusei trong inchokpola trong thar hung pieng, ‘Khawsak Trong’ an ti, a hnunga ‘Hmar trong’ ei ti hih Lusei trong leh fe kopin Chanchin Thra hrilna hmangruoah Pathienin a hmang leiin trong tuolleng le thu le hla ziekna hmangruoah a hung inser tung a, Thangngur le mi hrang hrang bâu hmangin sakhaw literachar thar a hung pieng a, Hmar hnam ti khom hi a hung hring suok tah pei a nih. Hmar tronga hla bu hmasa tak khom Edwin Rowlands inrawina hnuoiah 1923 khan a hung pieng a, chu chu a hnunga Independent Kohran Hla bu tia hriet, Hmar tronga kristien literechar bulthrut hung ni ta pei hi a nih. Chu trong bok chu hmangin inchuklai bu, kum 1946 khan Thuthlung Thar, 1968 khan Baibul pumpui a hung suok a, kum iemani zata inthok lem khan chuh College chena inchuk thei MIL sakzek a hung ni tah pei a nih.

Vangduoi thlak takin kum 1929-a intrana kohrana buoina a hung suok khan rongbawlna nasa takin a hung khak buoi a, chu hnung chun ramthim le kohran sunga rongbawlnain kha hma ang khan ra thra a hring suok thei ta nawh. Tuoltro ringthar hmasahaiin kum 15 sunga ram thar an lak zat kha kum 70-80 sung hin ei lak zo ta nawh niin a’n lang. Kha hmaa rethei tak sia hlawk taka rong an bawl ang khan ieng leia ei bawl hlawk thei ta naw am ning a ta? Ei throk-awrh tranna chu kohran buoia inthok le suma inzawr ei hung trana inthok niin a’n lang. A za ruolin ei biel puo tienga rong bawl dingin misawnari hming put ei intir a; a thren chu mani inhnikna leia pen suok khom ei um a, sienkhom rawl bang baw ang el ei nina chin a um.

Chuonga ram danga pên suokhai laia hmasa tak chu inbuotsai lawkna nei mumal loa a hrum a hriela Bhutan ramthim suttu Rev. Thattinlien Sungte kha a nih. A chanchin ei hang tiem a, a rimsik tuor le a thaw suok ni awma inlang hi thil intu lo tak a nih. Tirko Paula rongbawl dan le hnam var lemhaiin ramthim sut dinga an inbuotsai dan leh chu a danglam khop el. Ui mawl ram suka ramthim baw hi a hlawk ding ang huin a hlawk nuom naw el bakah lampui khartu ni thei a nih. Indo ding chun a nasat thei ang taka inpuocha a ngai. Lungril ram la ding lem chun nasa nawkzuola inpuocha a trûl. Puo tienga ei rongbawlna hi ei hlawtlingna muol tlawmte a lo um a ni khomin a tlangpui chun ei hlawtling tawk naw a hoi khop el. Ei inen fie nuom a um. ‘Statistics does not lie’ ti a ni laiin, ei ‘pulpit statistics’ hi a ‘static’ rak naw a hoi. Van ram rikawt leh ei enkhi pha lem chuh a kar a hla vieu el thei.

Chun, eini sunga ngei khom ei inthrang lien dan hi a mumal chie naw a hoi bok. Kha hmaa Pathien thu awi dinga inpehaiin ringum taka Krista hnung an zui el ang kha ei ni ta nawh. Piengthar ei hung uor a, sienkhom piengthar nekin pienghlui ei tam lem a hoi. Pathien trîna le inzàna thrang loa kristien ni tum, a ram chauh hluo châk, a felna thuom ruok chu minit khat khom inbel pei lo ei ni tlangpui a hoi. Beiruol ei uor a, huou huou boruoka chauh naw chuh Pathien thua piengthar le inthranglien tum ei vang tah. Pathien thu hi intarlarna hmangruoah ei hmang a, sungril tienga insiem thratna hmangruo ding ruok chun ei hmang pei nawh. Ringtu kawrong le lemchang ei pung.

Rongbawltu tam tak hi inhoiti taka nupa inpawl a, nau nei a, sienkhom chawm pei si loa ram tina maksan zel zul ang ei nina chen a um. Lung inno tak takin piengtharna thu ei hril a, sienkhom chawmlienna sin ruok chu mi ei tapek a, chawm lien nuom khom ni inla chawm thei ngirhmunah ei um nawh. Einiah bu tak fak ding ei kol tlawm. Kohran thruoituhaiin Baibul bìna hun an nei tlawm tah. Thu le hlaa puitling tieng pan loa naute trap der anga mi lung sukno zawnga thu ei hlap thei phot chun ei lung a awi tawk. Kum za mi kristien ei nina, mi puitling nina zierang einiah hmu ding a tlawm. Thil pakhat inchûk thiem ei tum tak chu kutdaw hlawk dan ni sien a hoi. Mani kea ngir tumna lungril put nêka mi somdawla ngir tum hi kum za kristien intihai lungrilah a lien khop el. Berampuhaiin an beramhai chawm loin, an beramhaiin an chawm lem an ngiet tah.

Zabili darthlalanga ei nina chieng êm êma ei hmu thei chu a ni inruola ei lawm thei naw khah a nih. Kawmaw bawl hrât hràt chu kohrana rongbawltuhai an nih. An trî le vèng tak khom Pathien mitmei ni loin an sin le nina chàn palh niin a’n lang. Pawl le thoktu ei pung deu deu a, Pathien rongbawltu ei tlawm tiel tiel. A tawpa a ruola ei hmang thei chu Krista Gospel Centenary ni loin ‘Hmar Gospel Centenary’ a ni daih. Ieng tik huna inthok khan am Baibula um lo ‘Hmar Gospel’ hi a lo pieng ning a ta? ‘Hmar Gospel’ chu ieng tina hrim hrim am a na? Thlaraua 1910-a Senvona tran siin ieng leia tisaa kum 2010 December-a Saikotah ei tawp? Kum za kristien intihai khawsak dan ding chun a mak deuh a nih. A tisain a hnam thil a, a Pathien thu nawh.

2. Lekha inchukna tieng:

Kristien sakhuo a hung lut ruolin Baibul tiem theina ding tawk lekha an min chuktir. Ei lungril mit a hung inhong met a, inchuk nuom peina lungril ei hung put. Sienkhom, thiemna ei ti tak, zalen taka mani lungril hmanga mani dit dana khawsa dinga lungril ei put phak ruok chu mi optu mingohai khan an dit naw a, inchukna in insang ei nei khom an phal bok nawh. Khawvel paw phak khopa thiemna kotsuo ei lut phakna chu India ramin zalenna a hmu hnung vong a nih. Kristien ei ni leia thiemna tienga hma sawn bik anga ei inhril vet khom hi thudik chenve a nih. Isu Krista ei ringna leia Pathien nau nina ei chang ti bak chuh taksa thilah kristien ei ni lei ringota ngirhmun changkang lem hluo dinga inngai le inhril hi mani inhlemna chauh a nih. Ei kawl le kienga ei tluk naw le el phak lo, eini lêt tama sungkuo le khawtlang inenkolna tienga khom inthununna nei thra lemhai hi ban sawm betu vong an nih. Kristien ei inti lei seka ei insukkhauphâr thawveng hi zalenna zîk bùl a nih.

Kha hma khan chu kristienhai enkol sikul amanih hospital hrim hrim chu thra bik dinga ngaina a um. Tu ruok hin chu a ni ta nawh. Abikin eini lai a ni zuol. Graduate le Post-Graduate ei hung pung a, sienkhom sikul ei enkol taphot deuthaw chuh a ni têlin a hmon thla el a nih. Daktor ei pung deu deu a, ei damdawi inhai a se deu deu. Chuong ang ngirhmuna um si chun ieng leia gospel zabili dam ei hmang ngam? Ieng leia puitling tieng pan loa siet tieng ei pan lem? Chuong mihai chun ieng leia kristien ei inti ngam? Pastor Thangngurin, “Ringtu laia suolna lei khomin ei Lalpa hming an hril-pawi zo ie” a ti kha sukpuitling ngei tuma ramtrang ei hoi khop el. A hrim hrim thuin, kum za kristien nia insâl siin, ieng leia mi kutdaw intling khawm suma ei nauhai lekha inchuktir ei tum? Khawvela hril inzakum pawl tak ni awm, “Kan nauhai an mi chawmpek” ti dam hi insuktheina angah ei ngai tah. Ei nauhai ei hmangai a ni chun, kutdaw dan thiem inchuktir nêkin mani kea ngir dan, nga pek nêkin nga man dan, sa pek nêkin ran vâi dan ei inchuktir ding a nih.

3. Thu le hla tieng:

A ziekna hawrop khom an nei hmain ei pi le puhai khan trong hmangruo mawi tak tak serin, thu le hla mawi tak tak an mi maksanpek a. Bulthrut an lo rem chunga chun Suotlang Thara ei chuong kai hnungin Pastor Thangngur le mi dang dangin hla mawi tak tak an hung phuok a. Chuonghai chu Hmar literechar innghatna ban poimaw chauh khom ni loin, ei kawl le kienga ei unauhaiin mani trong senga inletin, thu le hlaa châk an lakna hnâr poimaw pakhat a nih. Hla tienga chuh, tu chen khom hin, a’n khat tawkin a la pût suok zing a, sienkhom ei trongkam le thu hmang ruok chu a da tiel tiel.

Thu ziek tieng hma ei sawn naw el khom ni loin, Hmar trong hmang thuah lem chu hnung ei tol lem amanih aw! ti dingin a um. Mi lung suktui hlep hlep khopa sermon rem thiem ei tama chu mani awm thusuok, lekhabu tiem tlak ziek ruok chu ei la um naw khom a ni el thei. A san iem ning a ta? Baua hril le zieka sie hi discipline dang daih a ni lei khom a ni el thei. Zieka sie ding chun a sî le a tak thlier a, thlit fim a, a tak tling chauh lak hlak a ni leiin darkar khat sermon hi parakraf tawitea ziek thei a tam. Chuleiin, sermon hi zieka insuo tlâka buotsai ding chun a thu muhlum khel suok khopa bi chieng a ngai a, chu chun thâ a lâk rawn leiin ei thaw pei naw tlangpui. Ei rongbawltu, thu hril thiema ei nei a tam lem hi baua don pawl ngirhmuna la chambâng an nih. Tuoltro rongbawltu hmasahai kha chuh an sermon hai zieka sie an lo insukhmu leiin muol an liem hnung khomin mi tam takin an dam lai ang thoin rong an la bawl zui pei thei a nih.

Hi an thil ching thra tak el hi gospel zabili hmang phak chin chun tharthaw a, insukhmu nawk dingin dit a um takzet a nih. Chuong sermon-hai chu la khawm inla, Pathien thua ei hmasawn dan hrietna a ni bakah insuo tlak hai chu kum tin a bua sutin insuo inla, kohran chawmna thra tak a ni bakah thu le hla sukhausatu hung ning a tih. Hienga ei inbituk chun mei meia namnul um thei naw ni a, thoktuhaiin an beramhai ieng tin am an chawm ti le thuring indik lo inchuktir palh an lo um a ni khomin hre thei ei ta, ei baksamna hruk bit le siem thrat sin thaw khom olsam a ta, ei rongbawlna khom a hrat sot ring a um. Daktor thiem le thiem naw hriet theina olsam tak pakhat chu an damdawi inchaw (prescription)-ah a nih. Thiempu thra hriet theina khom an beram enkolhai thratna dinga an thil inchaw-ah a nih.

Ei lungkham le invoi ding pakhat chu trong hmang indik le uluk a nih. Ei pulpit hi trongthatzawl ti inbûk hiel khopa trong ei suosamna hmun a hung ni tah. Hi thua hin Mizo-Lusei trong hmanghai le Mizo-Hmar trong hmanghai inkarah mel tam a tla tah ti ei hriet a thra. Trong ei hmang indik ta nawna san tak chu Baibul hrawa trong hmang dan indik lo ei khawtlanga ei lak lut lei a nih. George Orwell chun, “Ei ngaituonain ei trong hmang a sukporche chun, ei trong hmang khomin ei ngaituona a sukporche ve thei tina a nih” (If thought corrupts language, language can also corrupt thought) tia a lo hril hi ngaituo chet tham a nih.

Lusei trong Baibula trong indik lo, a ngiel a ngana ei lo kawpi sawnghai khan ei lungril a fen a, ei hrila ei ngaihai kha hril loin, ei hril loa ei ngaihai dam ei hril a, ei hril khah ei hril chie a nih ti khom mi tam lem chun ei hriet nawh. Entirnan, thil suol thaw aiah thil thaw suol, ta dingin ti neka aiin, hlànbiek ti aia inthawi, chawibiek aia chibai buk etc. ti ei hmang dam hi indik thluomin ei ngai a, sienkhom ei hang ngaituo chieng ruok chun a lo indik teuh si nawh. A lo indik nawh ti ngaituo nachang ei hriet nawna tak hi Diebol changa ngaingam taka ei inawkna san a nih. Judahai chun Pathien an biek a, a hmaah thil an inhlàn a, hnam dang, abikin Kanan mihai ruok chu an pathien kuomah an inthawi hlak. Amiruokchu, ei Baibul inletah Judahai hi ei inthawitir ngat ngat a nih. Ei pi le puhai khom ramhuoi suklungawi tumin a kuomah an inthawi a, Pathien kuoma ruok chu an inthawi ngai naw a, an biek lem. Chu chu sakhawhmang an tih. Thing le lung be mi an ni naw a, lu la hnam an ni ngai bok nawh. Sienkhom, ei thiempuhaiin Pathien kuomah an inthawitir a, thing le lung an inbiektir a, lu la hnamah an inchangtir. Chu chun Pathien nina ei ngairuot dan nasa takin a thruoi suol a nih. Chu thu ei hril leia ngaituona ril hmanga mani indap suok tum neka thangtlawm zawnga la ei um lem chun ei lungril mi bawituin suok thei ta lo dinga a mi bawi nghet tah khom a ni thei.

Hieng thilhai hi a thu ringota hril loa a tak ngeia siem thrat sin tran a ngai leiin Delhi Version Baibul hi a hran hlaka Hmar trong fe dan kalhmang indik lema hrieta inlet thrat le hnam dang kuoma kut va daw loa Pathien thrangpuinaa mani sum ngeia Gospel zabili tlung hma ngeia inpei dinga buotsai a ni a, zabili tlung hma kum thuma sut le tlangzar a nih. Ieng leiin am hnam dang amanih Bible Society of India amanih sum thaw khawm hmanga ei tronga Baibul inlet le sut chu kum za kristien inti ve si haiin ei la thaw zing ding? Pathien ei ring ngam a ni chun mi kut chunga rûl man tum loin mani kut ngeiin ei man ngam ding a nih. Ieng leiin am eini tronga Baibul chu mi dang sum thaw khawma ei sut ding? Chuong ang thil thaw chu puitling nungchang a ni nawh.

Hmar Christian Fellowship Delhi (HCFD) hin thaw ngei ngei ding hmabak ei hauh. A hmasa takin, naupanghai hi ei bulthrut remna, zinga thruoitu ding an ni leiin Sunday School-a an inchuk ding sabzek po po Delhi tlanga khawsahai thil hmu le thlir dan le inzûla mani trong ngeia siem a ngai. Hi hi sakhuo, hnam le trong himna ding a nih. Hieng naupanghai hi ei ngaithà chun zinga an thlahai le vai tronga an biek ding chu ban sawm nei a nih. A hmasa lem hi chuh an hmang dèr ta a, a nuhnung khom hin an lungrilah hmun a chang inthuk el tah hle thei. Inhmaw a thra. Trong le hnam a dam khawsuok naw chun sakhuo a dam khawsuok ngai nawh.

Kohrana rongbawltuhai po po hi a lien a chin, a upa a naupang tu khom hmai um loa biek in sunga bek trong indik taka ei hmang theina dinga inchuktir ei ngai a, chu chu thaw nghal makmaw a nih. Entirnan, hoihawmna thila ngai a, thu ei puong zata thu rotna (proposal) ‘ni sien’ tia ei suktawp vong el dam hi ei pi le puhai khan an lo thaw ngai naw a, ei pulpit kalchar hring suok lieu lieu a ni leiin thlak vat chi a nih. Ei pulpit hi trongthatzawla inchangtir zing loin zabili khel tieng hin chuh trong damna zawlah inchangtir lem tang ei tiu.

4. Fak le dawn zongna tieng:

Kohranin ei buoipui tak chu sum a nih. Pathien nêk khoma ei sie inlal chang a tam. Thil thawna iengkimah a poimaw hrim a, sum boin ei chàng thei nawh. Sum boin ruol thra khom siem a harsa. Isu ngei khomin sum hmanga ruol siem dingin a min fui a nih. Sienkhom ei thu hril le titi tam takah sum hi suol tinreng bul, hausak chu Pathien hlatna, rethei chu Pathien hnaina ni awm hiela hril ei ching. Taimak hi chawisang nêk hmanin mani ta ding chaua thrahnem ngai, Pathien ‘ram’ ruok chu thlada anga hril ei ching bok. Matthai 5:3 a Isu thu hril, Lusei tronga an lo inlet dan anga “Lungrila retheihai (rimsihai) chu an eng a’n thawl (ham a thra), van ram an ta a ni si a” tia ei inlet hi a umzie ei man fuk naw lei a nih. Lungrila rethei le rimsi tu khom mi hamthra an um ngai nawh. Thlaraua pasie le tlasam an nizie hretuhai ruok chun Pathien an zong a, an bèl a, mi hamthra an nih.

Hi hi ei hriet dinga thil poimaw chu a nih: fak le dawna intodel lo tu sungkuo le hnam khomin Pathien chawimawi nekin an sukmuolpho a nih. Intodel nun hi tlâng chunga khaw um ang a nih; a langsàr a, malsawmtu Pathien a chawimawi. Pathien nauhai le a thu zawmtu ei ni chun mi nêka var lem, chunghnung lem, thilthawthei lem, changkang lem, hmangaina, indikna, tumruna le taimakna hau lem ni ei tum ding a nih. Hi thuruk hi Reformation hun laia an man fuka inthokin Europe chu nasa takin a hung inthrang a, chu chun Industrial Revolution a hring suok a, iengkim deuthawah ram dang tluk lo an hung nih. A man fu zuoltu Britain, thlierkar chikte chun hun sawtnawte sungin khawvel hmun thuma threa hmun hni deuthaw ramper-ah a siem hman a nih. Chu ra dongtu laia mi chu ei nih. Pathien thu awitu ei ni chun Deuteronomy 28-a thu awina ra a hrilhai (1-14) dongtu, a thu zawm nawtu ei ni ruok chun thu awi nawna ra pangzatum tak el (15-68) dongtu ei ni ding a nih.

Kum tin tràm chauh khom ni lo, sietna chi hrang hrangin a tlak buok Hmar Biel, gospel lutna kotsuo tia ei inhukpui rak dam hi ei bi chieng chun, thu awi nawna ra dongtu ei ni nawh ti ngam a harsa khop el. Ei nungchang le khawsakzie enin, kum za kristien intihai ngirhmun chuh hauh ngam chi ei ni nawh. Ei hlimthla hi eini siem a ni a, mi dang intum thei a ni nawh. Chu siem thrat sin chuh ei liengkoa innghat a nih. A châng po leh beiruola inhawr khawm a, hawhawa nora siem thrat thei chi a ni nawh. Sung tin le sungril tina inthoka ei tran a ngai.

Tlang kawmna

Tukver palia inthoka ei tlang thlirna hi a thu hongna ang chauh a nih. Tukver hrang hranga inthoka ei ngirhmun ei bi chieng nuom a um. A ieng tukvera inthok khomin a pik deuh churh vong a nih. Mak le poi ka ti chuh, kum khat tâl top inchat loin zabili ei lawm a, kei ngei khomin hmun hrang hrang- Delhi, Guwahati, Shillong, Sielmat & Saikot-ah voi ruk zet ka tong fuk a, Guwahati ti naw chuh a zierang a’n ang thrumin ka hriet. Ei natna dap a, a damna zong nekin, huou huouin a liem a; ei ruoi kil ei inhnawm suok nêka inrang daiin ei thu ngaithlakhai khom na khing tieng a lut a, khing tieng a suok nawk nghal a hoi khop el. Ei thaw dan pangngaiin, a ngaithla ngun deuhai khomin, a hriltuhai ang bokin, mani ta ding le zawm ding ni loin mi dang ta ding le zawm dingin ei ngaithlak a, ei lemchang dan a’n ang tlâng deuh vong a nih.

Kristien intihai hin ei nina ei inbi chieng a trûl. Kha hma khan chuh, kristienhaiin an tawk taphot chu rangkachakin an inchangtir a ni tak a, khawvel ngaisang khom an hlaw. Tu ruok hin chuh a ni bik ta nawh. Sikul, hospital, thilsiemna khawl thra thra hi kohran inrol nawna, thiemna hmanga an indin le enkol a nih. Kristien ram, hmasawn le changkanga ei hrila biek in tam tak chu rausanin a um a, hluotu ding an um ta naw leiin a hung trawp a, aium rîl naw chuh bawmtu dang an um ta si naw leiin thil danga hmang thei dan zong a ngai a. Hmang hlawk thei dinghai kuoma zor ding chun biek in a nina leia sorkarin humhimna le ditsakna chanvo bik a pek kha hlip a trûl a. Chuonga biek in a nina an hlìp chu Saptrongin ‘decommissioned church’ an tih. Ditsakna chanvo sorkarin a pek laia pakhat chu, kohrana pek thawlawm hrim hrim leiman an lak naw hih a nih. Sorkara leiman pek nêka kohrana pe lemtu khan Pathien laka thiemchangna le malsawmna hnar tong buokna ding nia ngaina leiin kompani lien le mi hausa tam takin kohranah an pek a, kohran ta dinga sum hnâr thra tak a nih. Hienga sum petuhai hin kohran an hmangai lei le Pathien ram lienna ding an invoi hlè leia an thaw ni loin, Pathien le kohran laka hmaimanna ding le malsawmna tam lem dong an inbeisei leia mani trâng hma ngai taka an pek a nih. Pathien thutak a thrang tlawm.

Eini lai khom chu zierang chu a danglam chuong nawh. Ei ngirhmun ei inbi chieng a poimaw. Zabili lawm dinga ei insingsat laia ei hril rawn tak chu sum le pai le fak le dawn a ni a, Pathien thu chuh sehmea ei hmang mei mei a nih. Zabili khel tieng hin chuh iengkimah puitling tieng pan tumin thrang lang ei tiu. Kutdaw bànin, mani intodelin, pûktu ni loa inpûktirtu, a mei ni loa a lu, kohran zeng ni loa kohran thatho ni tum ei tiu. Naute thuomhnaw, ‘mammam sermon’ ringot thlak hi bansanin, buchangrumin kohran chawm ei tiu. Chu chu puitling zierang a nih. (January 16, 2010 Delhi)

---

* January 16, 2011 a Hmar Christian Fellowship, Delhi-a Pu Keivom thu hril threnkhat lak khawm a nih.