Lekhabu Thlirletna: ‘Thuthlung Ram’

By Pu Lawmkunga IAS

Mi thiam pakhat Francis Bacona chuan “ Lehkhabu thenkhat hi chu thlir liam thuak tur a ni a, a dang chu dawlh liam puat puat tur a ni; tlemte erawh hi chu ngun taka ţhial chipa pai ţawih dap tur an ni” a lo ti tawh a. A dik ngawt mai. Keipawh hian lehkhabu leh lehkhaziak dang engemaw zat hi chhiar liam puat puata theihnghilh leh tâk mai hi ka ngah fu tawh mai a. A then tlemte erawh chu en zawh pawha en leh tul reng mai tih ang deuhvin ka chhiar chhuak zingin ka khâl hneh viau thin. Chung lehkhabu zinga, ka chhiar nawn fo thin, ngaihnawm ka tih leh ka thial chip viau chu L.Keivom lehkhabu Thuthlung Ram (1997) hi a ni.

A lehkhabu hming pawh hi mawi ka tiin lung a kuaiin ka hria a. A chhunga thute lah hi Mizo Kristian te tan phei chuan arpui tui lai sa ang maia dawlh zawt zawt chi niin a lang. He lehkhabu hi a ziaktu ngeiiin autographed ngatin kum 1998 khan duhsakna nen min hlan a, thilpek hlu ber pawlah ka dah nghe nghe a ni. Kum engmaw zat liam tawh hnu-a han thlirlet leh hnuhnawh chu maksak pawh a chang thei mai thei a. Mahse he lehkhabu hi a ni leh kumin a thunun lo va, “Thar a la ni engtik pawh” tih hla ang deuh khan englai pawhin a hmantlak reng dawn a. Chuvangin vawiina kan han thlir let chauh pawh hi thilsual tak ti zawng kan ni lo ang chu.

LEHKHABU CHU: A lehkhabu pianzia hi mi hip tak zawng a ni lo. Computer sulhnu chu hmuh theih a ni nain tunlaia offset leh desktop publishing-a chhuah lehkhabu chu a tluk lo hle. Mahse nula ngaihno bei tak chu a chenna in tlawm avangin kan hnualsuat chuang lo va. A in ai chuan a nula khan kan rilru a la zawk thin. Chutiang chuan he lehkhabu pawh hi a lehkhapuan te tle vur lovin a khawl-hâ te fiah kek kawk lo mahse, a chhunga thu awmte hian min hip a, a hlutna a bo chuang hauh lo a ni. Phek 326 zeta chhah a nih avang hian a chipchiar chuan kan en hman dawn hauh lo va. Kan sakhi chul ram fan puat puat dawn a ni ber.

Thuthlung Ram-a hmun luahtu pahnih, Ismaela leh Isaaka te thlah kal zel dan chipchiar taka sawina lehkhabu a ni a, bengvarthlak tak a ni. A hmawrbawk nan Ram Thianghlim chanchin a rawn tarlang leh bawk a. A chhung thu kan chhiar hian a ziaktu hian Thuthlung delh chin ram, tlang, lui leh ruamah min hruai lut a. Amah ngeiin a ruh leh tisa ngeia a fanzia te min han hrilh hian chhiar a tinuam em em a ni. Bible-a lang zing viau si, tunlai khawvela lang ve ta lo Moab leh Edom ram kha Jordan Sawrkar ram chhunga awm thin a nih tih te hi kei chuan ka lo hriat phah a , hlawk ka inti khawp mai. Edom hnam ral lamin Idumai hnam an invuah atanga Heroda te chhungkaw lo chawr chhuah dan a sawite hi a tha hle a ni. Dik chiah chuan kan Bible hi chu Pathian thil tum leh duh dan tlangpui zawr zawr sawinaah a ngaih theih a. Dan (Act) hnuaia Rules (dan tesep) siam leh a ngai ang deuh hian sawi zauna leh hrilhfiahna kan mamawh chang a tam hle a. Chu mi atan chuan Thuthlung Ram lehkhabu hi lehkhabu tangkai leh hlu tak a ni ngei ang.

Tin, mi tam tak chuan Israel fate Pathian hnam thlan bik an nihna hi an pawm thei lo va. Pathianin mi tumah duhsak bik a nei lo, tihah hian tan an khawh a. An sual leh luhlul chang chuan Israel fate hi Pathianin A hrem thin teh meuh mai a. Mahse a tawpah chuan duat takin a pawm leh thin si chu a nih hi. A thlan ve loh hnam, Israel hmelma te chu an ral thûm a nih loh leh nuamin an dam khawchhuak bawk si lo. Vawiin thlenga khawvel hnam tinin he hnam leh ram te tak te Israel kan ngaihthah theih miah loh dan atang hian hnam thlan an ni tih zawng phat rual a ni lo ve. He mi chungchangah hian L. Keivom nen hian kan thu a rual viau mai.(phek 104).

Chhandamna chang tur chuan Pathianin mi tumah duhsak bik a nei hauh lo va. Mahse rinna leh thlarau lama hmahruai tur chuan Israel hnam hi A thlang tlat si a ni. Keiniho thleng pawh hian Israel te hnam thlan an nihna zar zo tum kan ni a. Kan sakhua pawh hi Israel ram atanga rawn zi chhuak a nih si hi.

LEHLAM ZAR ATANGIN: He lehkhabu hi fak ar-ek chu ka tum hauh lo va. Kan Bible leh Kohhran Hla Bu te meuh pawhin sawiselna an pumpelh thei lo ang bawkin he Thuthlung Ram pawh hi mark zaa mark za puttir chu thil theih a ni dawn lo a ni. A bung tin, a phek tin leh a tlar tinte kan bih hman dawn loh avanign a zualpui chauh i lo en thuak thuak teh ang.

Phek 35-naa Israel fate Sinai tlang (hlingbawn sic) kum 40 chambang anga a sawi hi Bible sawi dan nen a inmil thei lo va. Bible chuan Mosia khan Dan lain ni 40 zet Sinai tlangah hian a han thang bo zawkin a sawi a ni. Kum 40 kha chu Aigupta ram atanga Kanaan ram luh nana an hun hmanral a ni zawk ang. Adama atanga Abrahama hun inkar hi kum 4000 zet niin a dah bawk a. Hei hi thil ni thei a ni ang em? Isua pian lai kha BC 4 vel ni-a rin a ni a, chuta tanga chhut let chuan lei leh van siam hun kha BC 4004 niin mi thiam te’n an chhut bawk si. Mahse L.Keivom hi chuan kum 4000 vel kha Adama leh Abrahama inkarah a khung vek mai a. Abrahama leh Isua inkar kum hi a bo dawn tlat mai. Sawi fiah deuh a ngai awm e.

Tin, Mosia’n Kannan ram a thlirna tlang hi Nebo nge Pisgah tih hi romei ang deuhva man tur awm chiah lovin a chhuah a. Deuteronomy Bung 34 kan en chuan, “Tin, Mosia chu Moab phaizawl atang chuan Nebo tlanga Pisgah tlang chhip, Jeriko epah chuan a chho va” tih a ni a. Hmun danga kan hmuh dan chuan Nebo tlang chhip hi, Pisgah tlang chhip zum tam tak zinga a sang ber niin a lang. http//en.wikepedia/win/Mount_Pisgah_(Bible).

Tin, Jeriko kulh Joshua hova an au chim kha lirnghing tihchim ni thei awmin a rawn chhuidawn a.(phek 305) Mahse hetah hian fimkhurna tur kan neiin a lang. Pathian lehkhabu kan ring a nih chuan a ziak ang hian pawm mai ila. Lirnghing pawh lo ni se, Pathianin a hun takah a nghintir a, Israelte tanpui nan a hmang a ni mai a. Pathian hnathawh ni lo ang dawn dawna her kual chu a fel zan lo vang. Pathian thuzir thuk thenkhat chuan Isua thlipui hau reh leh Tuipui Sen vuak chahte pawh an sawi lolam tan der tawh a nih hi.

Tunah chuan a Mizo tawng lam lo thlir tawh ila. L. Keivom hian ziak mi dangte ang bawkin tih dan pakhat a nei ve a. Chu chu tawngkam chher thar leh thluaithlum kual(circumlocution) hi a ni. Mi dangte hnehsawh taka va nekbeh sawi nan hnapzial a hmang fova, hei hi Mizo tawngkauchheha hman ngai loh a ni a. Tin, “Kutphahah chil an phul a” tih te hi Mizo tawngkauchheh dik lo hrim hrim a ni. (phek 51na). Kutah chuan chil kan chhak zawk thin a. “Keite thinrim angin an ngur rum hle a” tih pawh hi Mizo tawng tlabal tak a ni. “Keite thinrim ang maiin an rum ham ham mai a” tih te emaw ni zawk se. Keite ni lovin ui hian mi a ngur thin zawk a ni.

Tin, Mizo tawng kauchheh pakhat “Sêra mu kan thur lo” tih hi a kailek ziah bawk. L.Keivom hian a ngial a ngana (literally)-a hman a tum thin a, a tisual thin a ni. (phek 81na).Tawngkam tlanglawn (figure of speech) pakhat a ni mai a. Sera mu a thur leh thur loh lam sawi tumna a ni lo. Chuvangin kan thiltih tur kan phur ta vak lo a nih chuan “Sêra mu kan thur lo” a ni. Mizo tawng veka “Vanlaia tla ang” tih pawh hi mi rethei leh baihvai sawina mai a ni a. Tumah vanlai atangin an rawn tla tak tak ngai lo.

Phek 56naa a thu rawn hman “Bethlehema kir leh turin a lung a phan a” tih te Hi Mizo tawnga awm ngai lo a ni. Naomi’n Moab ram atanga Bethlehem pan tura a rilru a siam thu sawina mai a ni a. A lung a phan tih chu Mizo tawng thiam pangngaite hriat thiam loh chi a ni ang. Tin, Davida hian sairawkherhin Goliatha kha a perh thlu lo va, virvawmin a vawm thlu a ni zawk e. (phek 63na).

Phek 111na-ah hian khang hun laia India sawrkar leh ram dangin an kawmserh Israel ram luh a khirh dan chu kual kawi fein a rawn sep a. “Aizawl Treasury Square-a mi vanglai bera KS turu-a mi zawng zawng awrden nena inkuangkuaha len ang mai a ni awm e” a rawn ti duah mai a. Hei hian a lehkhabu hlutna literary value a tihniam thelh a ni. A sawi tum pawh a tichiang chuang bawk lo.

Tin, lehlamah chuan L.Keivom hi inti Mizo tak mai, Saptawng pawh Mizo aw phawia ziak duh zel mi a ni a. Benedikson, sekiular, miuziam, telefawn etc ti zel mai a ni a. Mizo tawng chhiar thiam hram hram te tan chuan a tha phian ang. Mahse zirlai leh midang tan a that lohna a awm thei. A saptawng spelling dik tak an hriat dawn loh avangin lehkhabu dang an chhiar hunah an buai fo ang a, dictionary-ah lah an zawng chhuak thei hek lo vang. Chu ai chuan a saptawnga ziakin kualkhung chhungah a lam dan dah mai se a that zawk hmel a ni.

Tin, phek 102naa Chanchin Tha Marka ziak changvawn sawia sawi tluan parh theia a insawi hi pawm loh ngawt theih a ni lo ang a. Mihring rilru a inchak hleih em a. He lehkhabu bung 16, chang 228 zet awmna sawi zo thei L.Keivom hi kan ngaisang tur a nih hmel khawp mai.

Kan sawi zo hauh lo mai. Kan sawi zo thiam bawk nahek lo vang. Hetiang mi thiamte lehkhabu keini angin kan han thai let ve hi chuan a vun chhia pawh kan su pilh zo awm lo ve. Mizo tam tak ang bawkin kei hi Israel ram hmuh chak ve tak thin ka ni a. Vanneihthlak takin kum 1988 July thla khan National Defence College hotu te zarah ka zu tlawh ve a. Chuvangin L.Keivom thusawi tam tak hi ka lo Amen pui thluam thluam thei a ni. Chuvang taka han chhuizui chak pawh ka ni reng â a. He lehkhabu hi rotling a ni a, hriatna a tizau a ni. A fel fai tawk lohna te zawng zawng hi a hlutna hian a buk hneh zawk a, mitin chhiar atan ka rawn recommend e..

P.C.Lawmkunga Imphal

January 06, 2011

KHAWVELA HIN LAL TAM TAK

AN HUNG PIENG TAH A.

Lal Dena, Manipur University.

Ni kum khan ei chanchinbuah hin ei thu le hla kungpui Pu Zaneisang-in hi hla chungthu hi a lo ziek tah a. Ka thlawpna ni fawmin keia thlirna tukvera inthawkin la hei tuihni met ka tih. Krismas a hung tlung zata, biekinah thuhriltu’n hun a lak hmaa hi hla hi ei sak zet naw chun Krismas hmang hi bukim tawk naw hielin ka ngai hlak a. Krismas hla po po hai laia a ropui taka kei chun ka ngai hiel a nih.

Sie le tha hrietna theira ka fak hma chun hi hla hi Pastor Thangngur phuok niin ka lo ngai zing hlak a. Chitea thu le hla tieng ka hung pal inthuk met hnungin hi hla hi Kamlala phuok a ni ti ka hung hriet chauh a. Hi hi Mizoram le Manipur tieng khawm pawm dan tlangpui chu a nih. Ka ngaituona sukbuoitu chu hi hla hi Saptawngin a lo um ve tlat a; English version le Mizo version hi tum hmasa lem a ta ti hi a nih. Hi hla hi Saptawwnga mi Mizo tawnga inlet ni sien, chang khatna ve ve hi an ang thuok a, a dang po po hi an ang naw vawng a. Ei sui fie zuol theina dingin Saptawnga a hla thu hi a rengin zuk tarlang ei tih:

Many worldly kings have been reigned after ‘nother

But there’s none like the King Jesus Christ our Saviuor;

Saviour Lord was born at the manger of Bethlehem,

Oh rejoice in the Lord, He is the King of Kings.

Let the gald alleluia resound far and wide,

Men and angel sing loud and rejoice side by side;

“Glory be to the gracious and Almighty King”,

Glory we now proclaim and forever will sing.

Why should men on the earth be so gloomy and sad,

Since our dear Christ Redeemer made all men so glad;

When from dead and from sin He has set them free,

And has opened to them the gate of liberty.

When all sins now depart and is crushed by His grace,

The true life and true health comes at once in its place;

Then the angels and men filled with joy may sing,

As they see and adore Christ the newly born King.

On the earth out darkness shines now bright light,

Which the angels on high sing with joy on this day;

“Glory, glory to God and God’s peace to men,

May be now and forever, Amen and Amen”.

Saptawnga a hla ziek hi hei bi veng veng la, Mizo le Hmar tawnga mi leh chang khatna tlar thumna chena mi chauh an inang a, a dang po po khi an inang naw vawng. Zosap Mizo tawng thiemha’n Kamlal hlaphuok Saptawngin an inlet ti inla, Mizo/Hmar version leh hin an inang bawk si nawh.

Chuleiin, hieng ang hin thu tlangkawmna siem inla a him takin ka hriet. Hnam nunphung ruongam sunga hla tuolto a hung suok hma khan, ei mi hmasahai khan Sap hla thluk besana hlaphuok an lo ching a. Lalzova, Vankhama le mi dang dang hai khawm khan Sap hla thluk hmangin sai hla tam tak an lo phuok hrim a. Chuong ang bawkin, Kristien hmasahai khan R.Sankey le Alexander-a mi hai inlet an ni hma khan, Kristien hla Saptawnga phuokhai thluk hmang khan Mizo Kristien hla iemani zat an lo phuok a. Tuta ei buoipui mek “Khawvela hin lal tam tak….” ti khawm hi Sap hla thluk hmanga Kamlal-in a lo phuok ring a um.

Ei thu buon ei suktawp hman a Sap hla thu le a Hmar hla thuhai hi a tlangpui chauh la hei khaikhin vak ei tih. A Sap hla hin Isu Krista hung pieng leia hnuoi mihriemhai le angelha’n Iengkim thawthei Lal tak kuoma chawimawina an inhlan dan, Tlantu’n suolna le thina dan inthawka a min tlansuokna dam, chatuon chatuona Pathien kuoma ropuina inhlan thuhai a hril uor deu tak a. Hmar hla ruok hin chu Isu Krista a hung pienga inthawka thil tlunghai po po – van mipuihai lawm hla rem, berampuhai chibai buk dan, khawsak mivarhai chibai buk dan le Herod chibai buk ve tum dan hai a hma tiemin a hung insam a. Ei sak nal sa a ni lei amani ding, a hla thu hrim hrim hi a bula inthawka a tawp chenin a hausain a mawi a. Entirna’n- an rawl mawi thangkhawk vel chu berampu’n an hriet, thangvana arasi’n an hma a hung thuoia, a pheisen ral a khawm Judai ram vela mi - ti hai dam hi a thlarau tieng kher naw khawm, literature hlutna tienga thlir khawmin a duoi nawh. Hieng anga hla tha, inthuk le thluk tha hi ro a tling tak zet a nih

A chang tawp taka tlawm em ema tawngtaina ang deu a, a hei khar hi a mawiin a ropui inthuk a nih. Hei insam nawn ta:

Isu, vawisun hin kan lungril bawng in tlawm a,

Insieng thar nawk la nang kan chatuon lal dingin;

Kan kut inrieng hi Mari kut angin ngai la,

Kumkhawtluonga lawmin hlim kumkhuo tang ka tih-

Hieng lawma inphahnuoia hlaphuoktu’n Siemtu a hang dawr hi, Siemtu lunglai tui ang innem naw thei naw nih. Hi hi tiemtu po po hai tawngtaina ni ve seng sien nuom a um.

(LD-25/12/2010)