Kaladan Multi Modal Transport Project

By Zosanglien Zote*
Exclusively for Inpui from Sawrtui Monthly

Hun sawt tak a inthawk khan India hmarsak a state umhai ei kilkhawrzie (India ram pumpui ngaituo in ) le ei changkang nawzie hi mi tamtakin an lo invawi em em ta hlak a. A san tamtak laia hang hril thei langsar zuol chu : tlangram deu vawng ani leia infepawna lampui ei nei that tawknaw lei leh lawngchawlna hmun lien ( major seaport) ei hlat taluot lei hi ni deu takin an lang.

Kolkata lawngchawlna hmun hlak chu a boruoka hnai angin ( a biktakin Mizoram tadingin) inlang sienkhawm Siliguri tienga fe kuol a ngai a, a hnai thei ang zawngtaka fe ding chun Bangladesh fethleng a ngai leiin a thei si nawh. Boruok mel a inhnai ringawt hi chu Aizawl anthawka Kolkata vuongna a inzinhai tading chun awlsam pha vieu sienkhawm vuongna lampui ringawt hi chu thuomhnaw phurna le sumdangnan an hmang tak tak thei si naw. India hmarsak state haiin motor lampui / rel lampui / tui lampui bek in amani lawngchawlna hmun lien tham deu hlek an va paw theina ding lampui hi chu mithiem haiin an lo dap rawp ta reng hlak ani.

Vangneithlaktakin Mizoram a vadung pakhat Kaladan (Chhimtuipui) vadung hin Myanmar (tuta hma a Burma) rama Sittwe (a hming hlui Akyab) hmuna Bay of Bengal tuipui hi a lo paw hlau el a. Kaladan vadung chu Mizoram hin a hnar tieng ei chang a , Myanmar in a mawngtieng an chang tina ani. Mizoram a inthawkin Chhimtuipui ( Kaladan) vadunga intawlsuk peiin Sittwe kha ei paw thei ding tina a lo ni zing ani.

Sittwe paw hi a pawimaw em em nasan chu lawngchawlna hmun lien khawpui ani a, Mizoram le India hmarsak state danghai hin lawngchawlna hmun khawpui hnaivai paw hi ei pawimaw hle bawk si a. Vadungsuk chu hla deu hlek sienkhawm man tlawm lem a thuomhnaw an phur / tawl zung zung thei ding tho chun enchieng le belchieng a ngai ta ani.

Sittwe chu Myanmar ram sung nisienlakhawm India sawrkarin tulai hnaia ramri hrula lampui siempek , electric siem le thil chi hran hrana Myanmar sawrkar a lo thangpui ta hlak leiin Myanmar sawrkar biek le dawr chu thil harsa rak ni dingin anlang nawh. A lampui sawrtu dinghai hi India mi deu vawng anni leiin khunkhan taka endik ( survey & investigation) nadingin India sawrkarin pawisa a phal hle ani.

Team hran hranin khunkhantaka an endik hnunga an thil hmusuokhai chu:
(a) Vangduoithlaktakin, Chhimtuipui vadung hnar tieng Mizoram sung chin le Myanmar ram sung Kaletwa ( Setpyitpyin) chen hi suor sie a tam leiin a siem man a tam hle ding a nia , lawng fe theina dinga tui lampui siem chu awlai niin anlang nawh. ( non – navigable).
(b) Chhimtuipui vadung mawng tieng, Myanmar ram sung, Kaletwa a inthawka Sittwe chen ( km 200 vel ) hi a se lai siem tha zeu zeuvin vadung lampui a hmang thei ding ani a (navigable), lawng lien deu hlek khawm fe thei dinga ngai ani.

Mithiem haiin an endikna dungzui hin India leh Myanmar sawrkarhai chun inremna fel tak an lo siem thei ta a. An inremna point pawimaw deu deu hai ( anziek ang diek diek chu ani nawh) chu :-
(a) Hi remruotna sukpuitling dinga pawisa seng tul popo hi India sawrkarin tum a ti.
(b) Myanmar sawrkarin a kawng sawrtu, ram dang mihai a inthawkin sie (tax) la’ng atih.
(c) Sittwe lawngchawlna hmun chu chei that ni’ng atih.
(d) Sittwe a inthawka Kaletwa chen Kaladan vadung ( km 200 vel) hi lawng fe thei dinga siem that ni’ng a tih.
(e) Kaletwa, Myanmar a inthawk a Lawngtlai, Mizoram chu motor lampui lien a thlung zawm ni’ng atih.

Motor lampui hi hmun hni a the ni’ng ata: (i) Myanmar ram sung, Kaletwa a inthawka Mizoram ramri Zochalui chen ( km 62 vel) hi BRTF( India) / ieng Agency tak in amani haiin a sin hi an thaw ding anih. (ii) India ram sung, Mizoram ramri , Zochalui a inthawka Lawngtlai chen ( km 110 vel ) hi Mizoram PWD haiin a sin hi an thaw dinga sukfel ani tah.

Hi remruotna hin vadunga lawng lampui le motor lampui hai a hmangkawp ding ani leiin infepawna chi ( modes of transportation) hran hran alo ni ta a, ‘ Multi Modal Transport Route ’ ti hming hi alo pieng ta ani.
(a) Lampui hi zo fel ani huna chun Kolkata – Sittwe – Kaletwa – Lawngtlai – Aizawl hi tuta ei hmang mek lampui Kolkata – Siliguri – Guwahati – Silchar – Aizawl nek hin mel za tamtak in a tawi lem.
(b) Lampui hi a sawr zuol bik dinghai chu : Mizoram, Tripura, Manipur le Assam simtieng ( Barak valley) ni’ng antih..
(c) Mizoram le hi lampui sawrtu state dang hai tading chun India ram khawpui lien viz. Kolkata, Chennai bakah Singapore le khawsaktieng khawpui lienhai le sumdawngna lampui anhawng ding tina ani.

Mizoram chin :- Mizoram chin lampui, Lawngtlai a inthawka Zochalui chen ( Km 110 vel) hi double - lane highway ( lampui lien zawng metre 12.00) dinga riruong ani a. ( Mizoram sunga double – lane lampui khawm hi ei lo nei mumal meu naw a, Meghalaya state a Jowai le Shillong inkar ang khu a angpui hnai tak ani). A blacktop lien zawng hi metre 7.00 dinga riruong ani bawk. A lampui hi MOSRT& H specification dungzuia siem dinga riruong ani bawk.

Lawngtlai a inthawkin simtieng panin India le Myanmar inrina Zochalui a Myanmar ram lut atih.Lampui cho bakah Retaining Wall, Culvert tam tak siem a ngai ding anih. Leilak chin deu hlek chi ( minor bridge) 20 / 30 vel bakah leilak lien ( major bridge ) hi 6/7 vel um dinga riruong ani. Metre 7.00 a lien sukdum (blacktop) bakah a sir tawn tawn a sukdum ( paved shoulder) sa dinga riruong ani bawk. Sin hi kum 3 / kum 4 vel sunga thaw zo dinga ngaituo mek ani. Tuhin detailed project report (DPR) buotsai mek niin sengso ding hi cheng vaibelsie 600 chuong ni’ng ati. Sengso popo hi Central sawrkarin a tum ding anih.

A sin thawtu ding hin Mizoram sawrkarin PWD hnuoia Multi Modal Project Circle ( SE, PWD Office tina) chu Lawngtlaia inbun nghet dingin a siem (create) nghal a. Hi ruol hin, Lawngtlai hmuna um bawk dingin, Multi Modal Project Division ( EE, PWD Office tina) pahni le Multi Modal Project Sub – Division pali a siem thar nghal bawk ani. Pathien zara tluong taka a fe pei chun kumnawk 2009 kumbul tieng khin lampui cho sin hi tan hman beisei ani.

*Hi article ziektu hi Mizoram PWD hnuoia Executive Engineer sin thaw ani a, hi project hi a enkawl tan mek ani.