Bangalore, Jan 17: Chennai Hmar Welfare Association hminga Bangalore hai futbol petpui dinga hunghai chuh Bangalore HSA&BHCF Futbol team han hnesaw takin goal 3 in an lo hneban. Bangalore in goal 4 an thun a, Chennai hai in penalty-ah goal 1 an petlut ve.
Bangalore le Chennaihai tadinga insukhlimna hun poimaw le ahmasatakna chu Jeevanahalli futbol groundah mipui thahnem tawk tak in an lo uop mawi a. Futbol inkhelzoin hrui kei inelna neinawk a nia, mipui fekhawm le thanghai a sukphur em em.
Chennai le Bangalore a Hmar nauhai chu an lo hrat hle khom ning a tih, an hruolhrui, inkeina a an hmang khawmin a tuor naw leiin an chat tawp! Vel khat chauh inkei dinga insiem an nia chuh, Bangalore an hratnaw leiin 'Best of Three' in suksei anih.
Chennai han 'Best of Five' in an potsei nawk hnung in hrata puong an nih. Chawp le chila siemfawm 'cup' Sprite bur HSA Bangalore in Chennai hai an pek! Mipui an hlim in inhoi an ti hle.
Inkhelna prokram hai hmangzo hnungin hun sawtnawte hunser nei a nia. "Chennai han in mi hung kan leiin keini lai phurna le inthuruolna a hung chawksuok thar pei a, kan lawm tak zet cheu anih," ti'n Rev Jonathan Pudaite in mikhuolhai chungah lawmthu hrilna a nei. BHCF secretary Pu Jonathan Kungate, HSA secretary Tv Solomon Hmar le mi dang dangin nasatakin Chennai hai chungah lawmthu an hril sa bawk.
HSA Bangalore branch president Tv Rama Khobung chun "hienganga inkantuona hih nei rawp chi a nih" ti'n Inpui a hril. HSA Bangalore hai hril dan chun hun remchang hmasatakah Chennai hai an ram ngeiah va hne ban an tum.
Hun kharna in BHCF chairman Pu R L Sungte in Pathien kuomah lawmthu hrilna tawngtai in hun a khar.
Belsa: Pathieni a Chennai tieng kirnawk tum tlangvalhai chu Bangalore han an thlo hne deu leiin an ticket hai an cancel a, Bangalore Hmar Kristien Fellowship inkhawm thang zovin Thawtani in an vangkhawpuite pan an tum lem tah anih.
More pictures Coming Soon...
Post a Comment
Comments not related to the news or article may be deleted.