Indian Army: Women Special Entry Scheme (Officer)

Nuhmei (nughak) hai Indian Army Officer lut dan
By Pu V L Renga Hriler*
INPUI Exculsive from Sawrtui Monthly

Hmar nau hai hi Indian Army/Navy/Air Force ah hin permanent commissioned officer (NDA, IMA) hi hrilding meu ei la um nawh a, Short Service Commission (OTA) officer ruok chu ka hrietsuol naw chun pahni vel ei um ve tah.

Written tlinga interview pe chu ei ei um zeu zeu a, amiruok chu personality test fetlang hi harsa ei ti deu ni in anlang. Ei unau Kuki, Paite le Gangte hai chun short service commissioned officer el chou ni lovin permanent commissioned officer thahnem tawktak Army, Navy le Airforce ah hai an nei thlup tah. Hmar tlangval/nunghak commissioned officer ni thei ding lekhathiem, fel leh piengtha tak tak ei tam a, amiruok chu Army/Navy/Air Force Officer ni hi ei nuomnaw lei amanih? Ei pei naw lei ? Ei ngaisang naw lei ? annaw leh ei hriet naw lei ?

Indian Army/Navy/Air Force hi rank inhnuoi (other ranks le Junior Commission Officer) le rank insang (commission officer) lut dan hi chi tamtak a um a, chuonghai lai chun Short Service Commission Women Special Entry Scheme (WSES) Officer Course (nunghak hai tading bik) hi an lar thar hle. WSES (O) course hi kum 1992 Oct anthawk khan tan alo ni tah a, kum khat ah course vawihnih pei lak a nih a, tuhin course 29 na a fe mek. Course 30 na chu July 15, 2006 khan notification National Newspaper leh Employment News ah hai insuo ani tah. Hi bak ah hin Army Medical Corps ah thangding MBBS leh B Sc Nursing tadin a hranin lutna a um bawk. Ei nunghak sungum em em le Army officer ei nei sun Lt Ramhlunmawi d/o Thangliensang, Rengkai hi B Sc Nursing degree zova Army Medical Corps a lut anih.

Nuhmei (nunghak) Army Officer (WSES) lutdan hi chithum a then ani a, pakhatna chu Technical Entry ani a, pahnina chu Non-Technical Entry ani a, pathumna chu Specialist Entry a ni. Technical Entry ah hin nunghak kum 19-25 mi, thiemna tieng B Tech/B.E in Info Tech, Mechanical, Electrical, Electronics & Telecommunication, Civil, Production, Computer, etc., passed nih a ngai a, commissioned an ni hin kum hnih a senior (ante-date seniority) pek nghal an nih. Hieng bak ah hin B Sc (PCM 60% chung) le Msc in Computer Sc (50% chung) degree nei tadin Tech Entry ah an lut thei bawk. Non-Tech Entry ah hin nunghak kum 19-25 mi B Sc (any Science Subj), BCA, BA/B Com, BBA ah 60% chung mark hmu han an apply thei a. NCC ‘C’ Certificate Grade ‘B’ leh ‘A’ neitadingin graduation ah 50% chou a ngai thung. Nunghak kum 21-27 mi M Sc in Organic, Bio-Chemistry, Micro Biology, Food Technology, Post Graduate Diploma in Hotel Mgmt & Catering Technology, MCA, MA in Psychology, History, Geography, Pol Sc, Education, English, Sociology, etc, M Sc Maths, Physics, Chemistry, Biology, Zoology, etc, leh LLB mark 50% chung hmu hai tadin Specialist Entry an apply thei bawk. Amiruok chu hieng achunga subject tarlanga um hai khi course tinah sin ruok a um vawng ngai kher nawh.

Nuhmei Army Commisioned Officer ni ding hin eini North East India tieng hai hi dung insang tieng 5 cms le buk rit tieng chu ang phutawk concession pek ei ni a. Chu umzi chu dung insang tieng 147 cms neka inhnuoilo; buk rik an hnuoi taka 40 Kg ani ding anih. Hriselna leh taksa pien indik hi an dit uluk em em bawk. Asan chu pienzie a ruolbanlo le lungril a mi phak rak lo hai hi an sinthawna tieng a suk bahla hlak lei in. Hieng bak ah hin Lady Cadets hai hi training zohma chu pasal neih phal ani naw a, pasal nei amani nau lo pai dam an um anih chun ban an ni nghal hlak anih.

Application po po hi Addl Director General Recruiting, Integrated Hq., Min of Def (Army) ah thawn an ni a. Hieng applications hai hi endik vawng an ni hnungin, Special Selection Board (SSB) interview thei ding hai thlang suok an ni a. Hieng thlanga um hai hi Selection Centre pathum hieng Allahabad, Bhopal leh Bangalore ah hai thawn suok an nih. Written Exam a um ve nawh a, SSB interview a marks hmu that a pawimaw em em. SSB Interview hi stage pathum a then anih a, stage pakhatna a fetlang hai chou stage hnina a interview an nih. Stage hnina le pathumna ah hai hin Pscychologist, Group Testing Officer (GTO) leh Interviewing Officer (IO), candidate hai interview tu ding an um vawng anih. SSB interview a thlang tling hai hi Medical Test an fit a, chun merit list ah sinruok umzat ah an thang phak bawk chun thla ruk (6 months) sung Officers’ Training Academy (OTA), Chennai ah Lady Cadets training dingin Joining Instruction, Addl Dte Gen Recruiting (Army) chuan a pek suok hlak. Training thataka an zou phat Leutenant (Lt) nidingin commissioned pek an nih a. Hieng Army Corps: Army Ordnance Service (AOC), Army Service Corps (ASC), Army Signal Corps (Signals), Engineer Corps, Electrical & Mechanical Engineering Corps (EME), Army Air Defence (AAD) leh Army Education Corps (AEC) ah hai hin Lt rank niin Arasi pahnih belin an tan hlak. Pay scale Rs. 8,250-300-10,500 bak ah DA, CCA, HRA, Transport Allowance, Outfit Allowance and Kit Maintenance Allowance, etc dawng anta. An hlawh intanna ding chu thlakhat ah Rs 14,000/ bawr vel anih. Hieng bak ah hin 60 day Annual Leave, 20 days Casual Leave, Canteen, Ration, le vuongna chuongman 50% concession an hmu bakah an training sung stipend Rs 8000/- vel hmung anta Army Group Insurance Rs 10 Lakh siekham pek an ni bawk.

Nuhmei Commissioned Officers hai hi short service commission an ni lei in kum 5 sung thang anta, chu sunga fel nawna le tlin lona an nei anih an naw chun kum 14 chen an service suksei thei anih. Kum 2005 anthawk khan Commissioned Officer promotion hi Leutenant rank anthawk Colonel rank chen hi time scale (time bound) promotion pek an nih a. Chu umzie chu Lt rank ah kum hnih an thawk hnungin Captain an hung nih a, an service kum 4 a nih in Major rank pek an nih a, kum 11 an service zovin Lt Col rank pek an nih a, kum 24 an service in Colonel rank ah promotion an ni ding anih. Nuhmei commissioned officer kum 14 chen thawk hai chu Lt Col rank chen an promotion ve thei tina anih chu.

Short Service Commission nuhmei hai hi kum 5 amanih kum 14 commission officer an thawk hnung meuh chun an fel in leadership quality an nei tha em em a, Army anthawk a an bang hnung khawmin sawrkar el chou ni lovin MNC/private company/public sector ah hai Manager, Institution Director, Company Executive le a dang dang mawhphurna chel dingin an dit thei hle. Chun Army Placement Agency (APA) ah in registered in, APA hian an thiemna leh an tawnhriet (experience) azirin sin a zawng pek hlak bawk.

*This article was written the author when he was Deputy Director, Ministry of Defence, Recruitment(Army), New Delhi.