Sinai Constitution

Ziektu: L.Keivom* Inpui Columnist

Mihriem hi bei chauin a hring naw a, Pathien baua thu tin suokin a hring lem a nih -Deuteronomy 8:3

Sûra favang bu thlir takmeua Sinai Trening Sikul chanchin ziek tah laklaw si chun an Constitution le a poimawzie tlawmte bèk ziek lang chu thaw makmaw niin ka hriet a. Chu tieng rama chun muvanlai anga mit inlènin, mit latú tù chu bir thla veng venga man tumin ei inzin ding a nih.

Tlâng hmingthang pahnih

Baibulah tlâng pahnih poimaw èm ém ei hmu a. Pakhat chu Sinai tlàng, Horeb tlàng amanih Jabel Musa (Mosie Tlang) tia hriet, feet 7363- a insâng, Sinai Peninsula-a um, Pathienin Israelhai Constitution a rochungna tlàng chu a nih. A dang chu Kalvari tlang, Golgotha (Luru Hmun) an ti bok, Jerusalema um, feet 2550 vela insâng, Pathienin thisena mi tin sandamna ding Constitution Thar a ziekna le hongna tlang chu a nih.

Zawna pakhat, lungrila hung inlang chu: Ieng leia Sinai tlang kher kher hi Dan pekna dinga Pathienin a thlang am ning a ta? ti hi a nih. Chu zawna chu don thei naw inla khom, Sinai tlang le Kalvari tlang hi Pathienin a Constitution puongna dinga a lo buotsai lawk dan, Pathien thu ei ti vet suk-Pathienthutu chuh a thren chauh hang thlir vak ei tih.

Aigupta rama inthoka Mosie a tlan hmang hnungin Midian rama thiempu pakhat Jethro an ti naunu Zipora chu nuhmeiah a nei a, a tarpu beram a veng hlak a. Midian ram hi Saudi Arabia hmar thlang, Tuipui Sen hmawr inkhaw lut, Gulf of Agaba kam sak tienga um, 1980-83 a Saudi Arabia-a ka um laia ke ngeia ka sir ve tah ram a nih. Midian rama inthoka Sinai/Horeb tlang, “Pathien Tlâng” tia an ko bok hi kilometer 240 vela hla ni dingin hisap inla. Midian rama inthoka ran ruol le damtea inzin ding chun, ni tin kilometer nga pei fe ding ni inla khom, a tlungna dingin thla hni deuthaw a lak ring a um. A kawl hnaiah ran tlatna ding hmun hring thra lem a tam awm vei leh, Mosien a beramhai khala hi hmun chen chen a zu tlung tlat el hi a nih thil mak chuh! Tu-in am a thruoi ning a ta? Hi hmuna hin kàng si loa chîmbuk chok a hmu a, chu taka chun LALPA vantirko a kuomah a hung inlàr a, Aiguptaa bawia intâng a mihai thruoi suok dingin a tir thu ei hmu a nih (Exodus 3&4). A betu ngeiin a biekna hmun hi hmun thienghlim a ni thu a hril. Hieng lai hmun hi a hmaa inthokin Mosien a lo hmelhriet daih tah a ni thei dan ei la hril pei ding a nih.

“Ni thum lamah” Pathien be dinga a mihai leh infetir dinga Mosien lal Faraw kuoma a hni vet khom khah (3:18) hi tlâng tho hi a ni ka ring tlat chu tie! Dr. E.K. Victor Pearce buotsai lekhabu Evidence for Truth: Archaelogy (OM Books, Secunderabad, 1998) hril dan chun, naua latu, Faraw naunu Queen Hatshepsut khan Mosie-in bawngchal inhlàna a Pathien kuoma hlanbiek a thawna dingin thlaler ni thum lamah tempul a bawlpek a. Aigupta mihai chu bawngchal hi pathien anga be hlak an ni a, an ran biek hlak hlanbieknaa hmang chu an ngai thei naw ding a ni leiin an hmu phak lo thlalerah hlanbiekna hmun ding tempul hi a bawlpek a nih. Chun, Hatshepsut thi hnungin khang laia Faraw-a inthrung Thutmos III chun Mosie chu Aigupta mi a sukhlum leia man tumin a zong a. A humtu tak Hatshepsut a um ta si naw leiin Midian ramah a tlân hmang a nih.

Mosie ta dinga Hatshepsut bawlpek tempul hi Sinai Peninsula hmun pakhat Serabit el-Khadim-a tempul hlui an hmu suok hi ni dingin an ring a. Lina Eckenstein lekhabu A History of Sinai (London, Society for Promoting Knowledge, 1921) a chun hi hmun hi Mosien Dan a lakna Sinai tlang ngei khah ni dingin a ngai. Hi taka lunga lekha inziek, Serabit Inscriptions tia hriet hi Munster University-a Prof. Grime inlet suok dan chun, “Kei, Manasseh, thil cho suokna khurhai enkoltu le tempula lu tak hin Faraw sungkuoa Lalnu Hatshepsut, Nile vadunga inthoka mi la suok a, ngirhmun insang le inzaum taka mi hlangkaitu chungah lawmthu ka hril (I, Manasseh, Captain of the Mines, Chief of the Temple, offer thanks to the Pharohonic Queen Hatshepsut because she drew me out of the Nile and advanced me to high honour) ti a nih. ‘Manasseh’ ti hi Hebrai tronga Mosie hming a ni a, Mosie ti hi Aigupta mihai kona, ‘tuia inthoka lak suok’ tina a nih. Roreltuhai 18:30-a ‘Mosie’ ti hi Masoteric text-a chun ‘Manasseh’ tiin a chuong.

Zêldin thubawlin, sathu hmarchadeng angin changal iemani zat polin zuk chok huom bût bùt inla. Kum sawmli lai zet Mosie chu Midian rama a thang hmang hnungin, Faraw Thutmos III a thi tah bok leiin a ta dingin ral a muong thawkhat ta a. Chu chu remchanga lain, a ran ruolhai thruoiin a tempul hi a hung kan vang vang a ni el thei. Pastor Thangngurin, “Ka hma khalin hnuoi tieng a mi lo dom” a ti anga chîmbuk choka inthoka betu, kum sawmli zet Faraw lal ina trêning lo petu chun a mi Israelhai thruoi suok dingin Mosie chu Aigupta lal inah a tir kir nawk a nih. Ieng anga fe rinin, suonlam tinreng dap khawm sien khom, a tir lui tho tho.

Hi hmuna bok hin Mosie nuhmei le a naupahai, a tarpu Jethro kuoma a maksanhai chu Midian rama inthokin Jethro chun a hung thruoi a, an infin khawm bok a nih (18:5). Aigupta ram Israelhaiin an suoksana inthoka a thla thumna ni takah Sinai tlang hi an hung tlung a (19:1). Hi tlang bula hin thla 11 zet Israelhai chu an inkul a (Nambar 10:11), chu sung chun Mosie fe thlengin an invong dan ding chipchier takin an Pathienin dan a pek a, chu chu Mosien ngun takin a ziek thlak a, a hmatiemin a taka hmang le zawm dan an inchuk pei a. An Danpui tak, Thupek Sawm (Decalogue) lem chu meiling hmawr zum hmanga intrêk chuoi chuoia lungthìr pheka a kerpek ngat a nih. Khawvel histawri-ah Sinai Constitution tluka ursun tak le râpum taka ziek hi Constitution dang a la um ngai nawh.

Tlâng pahnina Kalvari (Latin: calvaria), Luru Hmun, Hebrai tronga Golgotha khom hi tlâng naran el chu a ni naw khop el. Hi tlâng hi Abrahamin a naupa Isak a’n hlanna Moria tlâng ngei kha ni dinga ngai pawl an um. Chu tlâng chu Abraham le a naupa khawsakna hmuna inthoka ni thum lama hlaa um a nih (Gen.22:4). Chu hmun chu Davidan maicham a siemna, Jebu mi Arauna hrizawl a’n chawk (2 Samuel 24:18-25) a na, a hnunga Solomon Tempul ngirna (2 Kronikul 3:1) a ni bok. Jerusalem inhuonna bang hi a hluotu zirin an son ngun leiin, Jerusalem kul bang puo tienga uma ngaihai chun Kalvari le Moria tlang chu thuhmun ni thei dingin an ring nawh. Threnkhat ruok chun, Moria muol hi a tlang chuonhnuoi, feet 1500 vela insânga um, Kalvari ruok chu a tlâng sîpa um niin an hril bok. Tyropeon ruoma um Trapna Bang chung tak hi Tempul Muol a ni a, chu taka inthoka tlâk tienga um Kalvari an ti panna chu intung tak el a ni a, ei tlung chun thuok a lâm el a nih. A ieng ieng khom chu ni sien, Moria tlang le Kalvari tlang chu thuhmun an ni naw a lo ni khomin, inhnai tea um an nih ti chuh ke ngeia 1993-a a hmun sir vetu ka ni leiin, a chieng khop el. Khawvel hmun hrang hranga hin histawri lamthruoma ngîr, a luong khawmna dinga Khuonu ruot ni awm hrim an um a, chuong lai chun Sinai tlang le Kalvari tlang hi an thrang chieng khop el.

‘Ni thum lam’ ti hril taka chun kan khuo Pherzawla inthoka Tuithraphai hlatzie kan hril changa kan inkhìna chu ‘ni thum lam’ ti a nih. Ni thum pum hlum suk le tungah kea inzin ngat ngat a ngai. Chuleiin, hi thil inkhìna trongkam hin ka lung a suklêng rieu tlat: Sinai tlang chu ni thum lam, Moria/Kalvari tlang chu ni thum lam, Tuithraphai chu ni thum lam.

Hi Kalvari tlanga hin a nih Pathienin Abraham le a thlahai kuoma a thuthlung sukdikna dinga Sinai Constitution a pek chu thlak danglam si loa thisena thuthlung thar thlung a, Edena bawsietna thing kha inremna thing inchangtir a, Pathienin chatuon daih Calvary Amendments a hung puong chu nih. Chu Calvary Amendment chu annawm Pastor Thangngurin rawl tawp insuoa hienga a lo insampui kha:

Inremna thinga i tliekna hmuna chun,

Hung inthruom i ta, zalenna ropuiin,

Sä le mihriem dorâl bâng tâng an tih.

Sinai Constitution dangdaina

Constitution hi mi tlawmte thrung khawm a, thingpui amanih zu no doma tlak el thei a ni nawh. Ram le hnam inenkolna dinga a hnukpui a ni leiin, fimkhur taka duong a ngai. Mi var le mi thiem filor, dawnril, hmathlir hla tak nei, a ram le a mi chenghai chanchin le ngirhmun hre chiengtu, thu le hla thiem, abikin inrelbawlna dan hre mihai chu thlang khawmin Drafting Committee an ruot a. Chuonghai thu hung duong suok chu sîr tina lo thlirtu ding Constituent Assembly dam an indin a. India khom 1947-ah zalenna a hmu ringota chu Constitution la nei lo a ni leiin an buoipui chuk chuk a, November 26, 1949 khan Constituent Assembly chun a pom a, chu chu January 26, 1950 khan hmang tran a ni a, chu ni chu kum tina Republic Day tia ei inser hi a nih.

Sinai Constitution dangdaina chu Drafting Committee amanih Constituent Assembly amanih khom ngai loa Sinai tlanga an Pathien Jehovan Mosie kuoma a hril, a lo ziek thlak a nih. Thupek Sawm lem chu lungpheka meichok inhlapa a petu-in a kerpek a nih.

Dannaranin, Constitution hrim hrim chu Thuhmathe (Preamble) a intran a ni hlak. India Constitution chun Preamble bakah March, 2011 chen khan Parts 22, Articles 450, Schedules 12, Appendices 2 le amendments 115 (Wikepedia) a nei. USA Constitution hi khawvel constitution-a tawi pawl tak le hmang tlak pawl taka ngai, September 17, 1787-a an hmang tran tah a ni a, Articles 7 le Amendments 27 (trum 17) chauh a nei. Israel State ruok chu May 1948-a inthok khan lo ngir tah sien khom tu chen hin an Parliament Knesset-in a siem ‘Basic Laws’ ti bak chu ngaidan inang naw leiin tu chen hin Constitution puitling a la nei thei nawh. An harsatna bulpui chu, sakhaw mi inti pawlin an sakhaw dan le inzirtirna, an hnam nunphunga lo luong lut tah, an ni tin khawsaknaa an nun thruoitu danhai chu thlak danglam an remti naw bakah thlak trula an hriet naw lei a nih. Kong danga hril chun, kum 3450 lai liem taa Sinai Constitution khan hmun lien tak a la hluo zing tina a nih.

Chu chun Sinai Constitution tlozie a hril fie. Dimokrasi rorelna hnuoia Constitution po poin besan taka an nei chu Sinai Constitution hi a nih ti inla, khêl ei hril ka ring nawh. Sienkhom, Sinai Constitution khah mihriem felna hmanga zawm zo ruol a ni nawh. Judahaiin dan 613 an nei po po laia 612 zawm a, pakhat chauh bawsiet khoma thiem naw an chang tho leiin, Mosie Dan le a bebawmhai del dèna hnuoiah tu khom fel fai le thiem chang fihlim thei an um nawh. Suol ngaidamna dinga maichama ran thisen inhlàn ringota tlàk seng ruol a ni nawh. Chu ngirhmun chu Kalvari Constitution-in a hung thlak danglam leiin Paulan, “Mosie hmel êng, chuoi nawk el ding hman Israel nauhaiin an en zing ngam naw hiel khopin a ropui a, lunga hawropa ziek, thina intluntu rongbawlna hman khâng khopa ropui a ni chun, Thlarau rongbawlna lem chu nasa takin a ropui zuol naw di’m a ni? Thiemnaw inchangtirna rongbawlna hman a ropui chun, thiem inchangtirna rongbawlna lem chu a va hang ropui ding ngei de!” tiin a lo ziek a nih (2 Kor 3:7-9). Chu chu a nih Isun, dan sukbo ding ni loa sukfamkim lem dinga hung a ni thu a hril khah (Mat 5:17). Chu chu a nih Paula bokin, “Dan hnuoia um in ni ta naw a, lunginsietna hnuoia um in ni ta lem” tia a lo hril (Rom 6:14) Chu ngei chu a nih Calvary Amendment tia a bula ei hril khah.

Sinai Constitution tlangzar ni

Sinai Constitution ropuizie, thratzie, inthukzie, felzie le tlozie ei hril hman naw ding a ni leiin, mi tin ngaituo zui dingin maksan inla. Sinai Constitution a pek ding truma a petu dingin a lak ursunzie le inbuotsai dinga Mosie a hril thu chu Exodus 19 tieng hang thlir vak inla. Chang 4-6 hi Sinai Constitution ‘Preamble’ ti thei a nih. “Nangni ngeiin Aigupta chunga ka thilthawhai in hmu tah a, mupuiin a thlä zâra a tê a chawi anga chawiin, ka ta dingin ka thruoi suok cheu a nih. Tu hin ka thu a rênga zawma ka thuthlunghai in vong zing phot chun hnam po po laia ka ro hlu bik ning in tih. Khawvel pumpui hi ka ta a ni lai zingin, nangni chu ka ta dinga lalram thiempu le hnam ser hran ning in tih” tia Israelhai hril dingin Mosie a tir a. Anni chun, “LALPA hril taphot chu thaw pei kan tih” tiin thu an intiem duol duol a.

Ni thum hnungah Sinai tlangah hung trumin, Mosie a hung biek ding a na, chu chu mipuiin a tak ngeia hre a, Mosie chu an thruoitu dinga Jehova thlang a ni ti an ring theina dingin Sinai tlang bulah an inbiek lai ngaithla dingin hung an ta, an hung theina chin ding ramri khang an ta, tlâng hung tawk taphot chu sa khom, mihriem khom lungin an deng hlum naw leh thalin an kap hlum ding a nih. Ni hni sung insukthienghlimin an silfenhai sawp an ta, nuhmei pasal khom an inpawl ding a ni nawh. Chuong ang chun mipuihai chu Mosien a’n buotsaitir a, an hlàn thienghlim bok a. Nautesen enkolin a enkol tawl a ni tak.

A ni thum nia Sinai tlanga a hung trum lai chanchin ei hang tiem chu sikhlim puorin hmulthi an ding uoi uoi thei a nih. Tlâng chu meikhuin a tuom a, rawtuina meikhu anga intûr ngul el a suok hlut hlut a, tawtawrawt a’n ri ruoi ruoi a, van inrum dur durin kawl a’n lep zuk zuk a, tlâng chu sikinhning thaw ang elin a’n thin bup bup a, mipui chu triin an inthin hawp a, chil lem ri ngam khom an um ring a um nawh. Chu taka inthok chun rawlin Sinai Constitution chu a hung puong suok tah a nih. Exodus 19-a a hril dan chun, hi ni hin kum 80 mi ni tah Mosie chu Sinai tlang, Shillong Peak neka feet 914 zeta insang lem le an riebuk inkarah voi li top ke-in a tlân inlon a na, mihriem pangngai thaw ding chun thil thei lo hulhuolah ka ngai. Sawl phihrit a tih.

Khaw lai hmuna khom Constitution an pom ni le puongzar ni chun a ngaithlatuhaiin lawmin kut an ben dur dur hlak a. Sinai Constitution tlangzarnaa thrang mipuihai ruok chu thlabârin an inthin a. Mosie kuomah, “Nangman kan kuomah thu hril lem ta la, lo ngaithlang kan tih. Pathien ruok chun kan kuomah hril ta naw hràm raw se, kan thi el ding a nih” tiin an ngên hiel a nih. Mosie donna, “Tri naw ro. Pathien trîna nei a, thil suol in thaw nawna dingin Pathienin a hung fie cheu a ni hi” ti hi ngaituo tham a nih. Sinai Constitution a puong lai hretuhai hman chuonga thlabâra an inthin hawp chun, a lungsenna nia a dit naw zawng thawtuhai chungthu rêla a hang hrawk hun ding pangzatumzie lem chu suongtuo ngaina khom a um nawh.

(*Pu Keivom is a retired Indian foreign diplomat and author of ‘ZORAM KHAWVEL” series. March 3, 2012 Delhi)