Chawlkar Poimaw Tak

Ziektu: Pu L.Keivom

Those who cannot remember the past are condemned to repeat it -George Santayana

Kum khat sunga Judahai kùt poimaw tak le ropui tak ‘Pesach’ chu an Tempula ngei hmang dingin Roman lalram hmun tina Juda mi indar tahai le Palestina rama la khawsa zinghai chu Jerusalemah an fuon khawm hlak a. Chu Kût chu Israel ram sunga chu ni sari sung, an thla tiema Nisan 15-21 inkar an hmang a, hmun hrang hranga indar Orthodox Jews hai ruok chun ni riet sung an hmang thung. A ni hmasa ni hni le a tawp tieng ni hni chu ‘holy days’ anga an hmang a nih. Chu hun chu kum 2012 hin April 1-April 7 inkarah a tla a, Isu a thi kum AD 30 ruok khan chu April 2-8 sungah a tla ve thung niin thil sui chik mihai chun an hril. Hi Kùt hi Fekan Kùt amanih Chol thrang lo Bei Kùt ti a ni bok. Eini rawi hi sa ei du bik deuh bok ning a ta, ‘Fekan Ruoi Thre’ tiin ei Baibul hmasatuhai chun an mi siepek.

Pathienin hnuoi le van a siem hun hapta kar sung ti loa histawria chawlkar po po laia chawlkar poimaw tak chu April 2-8, 30 AD kha a ni ka ring. Kût intran ni April 2 chun kha hma kum za tam taka hril lawka lo um tahai chu sukkim dingin Isu chu ropui takin, remna siem dinga fe lalhai an chuongna hlak sabengtung chungah ngei chuongin, Pathien le mihriem, van le hnuoi inkara inremna siem dinga hung Messia a nizie tlangzar dingin, Lal angin Jerusalemah thu nei takin a lut a, an chawimawi lut lut a, a hrohrang khawm a sukna hle a, Tempul neitu indik tak a nizie suklangin, vuokna hruol meu hmangin, tempul khom an thiel fai a, sipai lungsenin mi an khal khawm ruol an zei zot zot ang elin, tempul kompaun sunga thil zortuhai chu inri pop popin a hlap suok vong a nih. A chepui rep rep khop el. Kha ni khan Juda Iskariot lem kha chu a lawm hlum vang ring a um.

Lal a ninaa ropui taka Jerusalem a lut ni hi Tûmkâu Ni ei ti a, Saphai chun Palm Sunday an tih. Sunday (Latin: Dies Solis, Day of the Sun) hi mithi laia inthoka Isu a thonawkna ni a nih. Sunday hi Kristien hmasahai khan chawlkar ni hmasa taka an lo hmang hlak a ni leiin Baibul ziektu threnkhat chun hi ni hi chawlkar ni hmasa tak tiin an lo ziek hrim a nih. Tu ruok hin chu Thawtrannia intran anga chawlkar (week) hmangtuhai chun Judahai Chawlni (Sabbat) kha Inrinni ei tipek a, Pathienniin ei inhlantir dai a nih. ‘Sunday’ ti hi Romanhaiin pathiena an biek laia thrang sa ‘Nisa’ (Sun) betuhaiin an inser hlak ni a ni leia a hming hi a put a nih. Chu chu Kristien hmasahai khan kristien sakhuo leh her remin, ‘Felna Ni’ tiin an inlet hlauh a, a hung pomum tah êm êm a nih.

Hi taka ei hriet dinga poimaw chu, ‘Chawlni’ (Inrinni) chu Judahai ni inser Sabbat a na, chu ni chu Pathienin hnuoi le van le a sunga thil umhai a siem zoa a chawlna ni, an chawlkar/hapta tiem dana ni sarina a nih. Ringnaa Israel thar, Isu Krista zuituhai ruok chun thinaa inthoka a thonawkna ni chu ‘Pathienni’ (Day of the Lord) ei ti ve ta thung a nih. Kha hma khan Chawlni le Pathienni hi thuhmun anga an lo hmang pol hlak leiin ei hlaa chen khom “Chawlni Lalpa mi ngaithla la” tiin ei sak hlak. Sienkhom ‘Chawlni’ ei ti hi Sabbat a na, ‘Pathienni’ ei ti ruok hi chu Sunday a nih. Chuleiin, thil thuhmun a ni nawzie hrein hmang pol ta naw hram inla nuom a um.

Hi thu ei hril laia ngaituonaa thil hung lut chu ei ramah kristien sakhuo a hung lut hmaa ei khawvel kha a nih. Ei pi le puhai khan thla hming an nei a, chu hun chu thla dêt tir le a mang hun inkar a na, chu chu thla khat peiah an tiem. Hi hi Saptronga ‘lunar calendar’ an ti hi a nih. Ni (day) hin hming a nei naw a, ieng ni khom ni a ni top el a nih. Tiem dan an nei a, nisa suok le tlak inkar hi ni khat a na, an thim hun, zan hun po hi zan (night) khat a nih. Chawlkar amanih hapta kar (week) ei ti hi an nei ve nawh. Thawtranni-Inrinni a um nawh; an chawl ni nei sun chu sin an nei naw huna an awllen ni le umni khama thilthaw an nei ni a nih. Hang ngaituo ringot khomin nghok a um hlie hlie a, ning a’n tel put put el a nih. Kristien ei hung ni leia chawlkar ei hung nei ta le chu kara ni khat chawlna hun ei hang nei ringot khom hi a sandamna chang nawtu ta ding khomin a vangneithlak tah hrim hrim.

Ei thupuiah lut nawk tah inla. Hi chawlkar poimaw tak, April 2-8, 30 A.D hin khawvel le a sunga chenghai ngirhmun a thlak danglam top a, van le hnuoi inzomna intan tah chu kalvari thisenin fevicol let sang tam taka nghet lemin a hung chàr khawm nawk tah a nih. April 2 a ropui taka Lal a nina anga Jerusalem luttu ngei le mipui chawimawi huoi huoi kha April 6 Ningani zan chun, ruoi lungsietum a rawihai a fakpui zoin an man a, zankhawvarin a hrum a hrielin an soisak a, a chungthu an rêl a, April 7 Zirtawpni tuk dar kuoin kros-ah an hemde hman dèr tah a nih. Zan tieng dar thumah a thi a, ama tieng, Pathien Naupa le Mihriem Naupa a ninaa a sin hlen ding chu hlen muolsuoin, mihriemhai intlanna dingin a hnuoi taksa hringna chu a’n hlan tah a nih. Hi nia kros lera “A kin tah” a tia hnèna hlado a’n sam khan chatuona dingin mihriem intlanna sin chu a thaw zo tah a nih. Kros pangzatum, mi suol an hemdena thing râpum tak kha chatuona damna thing le inremna thing, van le khawvel insuizomna thing a hung inchang tah a nih. Chu ngei chu a nih Pastor Thangngurin,

Inremna thinga i tliekna hmuna chun,

Hung inthruom i ta, zalenna ropuiin,

Sa le mihriem doral bâng tâng an tih

tia hla mawi taka a lo khekpui kha.

Zirtawpni zantieng nisa a tlak charin Judahai ni tiem danah Sabbat an tran tah ding a ni leiin le Sabbat nia kros lera ruong a um chu Mosie Danin a phal naw leiin Sabbat intran hmaa lak thlak ding a nih. La thi hmin lo an um khomin an ru le châng vuok tlieka sukhlum ding an ni bok. Kros-a hemde hi inhremnaa chu a tawpkhawk a nih. A thren lem chu ni kuo zet dam khom an um ti mi thiem Merrill F.Unger, hmang hlaw tak el Bible Dictionary siemtu chun a hril. Isu ruok kha chu chawhnung dar thumah a thi hman der a. An hang en fel khan a thi tah tlat leiin, hril lawka a lo um ang hrimin, a ru le châng vuok tliek a ni naw a, sienkhom a thi chie inchiengna dingin le hril lawka a lo um tah angin a nakah feiin an sun a, thisen le tui a hung luong suok a nih. Hieng thil neu neu hai hi ringna mita ei hang bi chieng chun, Pathien Lekha thu indikzie le ring tlak a nizie tlanginsamtu vong an lo nih.

Chuong chu a lo ni leiin, inrang takin Isu ruong chu kros-a inthok chun an lak thlak a, Sabbat intran hma ngeiin dan ang thlapin thlanah an vui a, a zirtirhaiin a ruong chu an inruk hmang nawna dingin tiin thuneituhaiin sipai an invengtir hiel a ni kha. Sienkhom, Pathien thilthawtheinaa keitho a ni dingzie hril lawka a um angin, a ni thum ni tuk chun a mithi taksa ngei chu somin, ropui takin a tho nawk tah a nih. Khawvela hin sakhaw thruoitu le hmusuoktu tam tak an um a, chuonghai chu an thi a, an tho nawk ti hriet a ni ngai nawh. Isu ruok chu Pathien thilthawtheinaa keithoin a um a, thina hnetu a ni leiin mithi la tho dinghai po po hma thruoitu a hung ni tah a nih. Chu chauh khom chu ni loin, ama ringtu taphot chungthu hrilpuitu UKIL ropui le Pathien hmaa thiem inchangtirtu Chatuon Thiempu Laltak a hung ni tah a nih.

Chîk takin hang ngaituo ta. Thuthlung Thar hunah hi chawlkar, 2-8 April, 30 A.D neka poimaw lem le ropui lem hi khawvel chanchina hin chawlkar dang a um ta hlak hrim hrim am? Um naw ni a, um thei tah ngai bok naw nih. Chawlkar poimaw hmasa tak chu hnuoi le van, thilsiem hun hapta a na, a pahnihna chu Isu thina le thonawkna chawlkar a nih. A pathumna ei tlung pha chu chatuon chawlnaah ni tang a ta, pipu hun lai ang bok khan chawlkar boah ei lut ding a nih. Chu chu a nih Hmangai Johanin, “Zan um nawk ta naw ni a, khawnvar var le nisa var ngai ta naw ni hai. Lalpa Pathien chun anni chu a èn ding a ni si a. Chatuon chatuonin inlal an tih” (Thup 22:5) tia hahîpa a lo hril khah. (Delhi, March 31, 2012)