Ram le Hnam damna

Ziektu: Pu Zarzolien Keivom.

Tu khom i rong bawl nuom lo ram le hnamhai hrim hrim chu siein bohmang letder an tih. (Isai 60:12).

Ram le hnam tlaksiet tranna hi thawk le khata hung um phut ni loin taksa bung hmun khat lai chite a intran cancer zung kei angin Pathien ngaisak nawna suolin mi pakhat pahni lai zung hung kei tranin damte tein hriet naw karin hnam le ram chen a hung phur tluk hlak a nih. Eini lai khom sakhuona le khawvel thilah hotu ni nuomna le tangka sum ngainatnain zung hung kei tran peiin tuta ei ngirhmun chie-a lem hin chu ami phùr rêm trèp tah niin an lang tah. Ei suol sima Lalpa kuom tieng ei ngha kir vat naw lem chun bohmangna kotsuo ei lut zing an tah, Ka unau dittak Hmarhai, ei siet letder hma hin in ngaituo chieng ei tiu. Khawvel ropuina le mawina invêt chil el loin lungril thar puta inthlak thlengin Pathien ditzawnga thra lawm tlak le thra famkim chu hriet fie tum ei tiu.

Ram le hnam dam khawsuokna dinga bulthrut poimaw tak chu Lalpa Pathien rong bawl hi a nih ti a chunga ei Bible chang tar lang khin chieng tawk takin a mi hril a. Ama Isu ngei khom khan “Ka thrang loin ieng khom in thaw thei si naw a” a ti a nih. (Johan 15:5). Eini khâta thaw thei nei lo ei ni tlat leiin iengkim thaw thei Pathien rong bawla a thupek zawm chu ei thaw makmaw a na, chu chuh ei ram ei hnam damna ding a nih ti theinghil ngai nawng ei tiu. Leihnuoi le a sunga umhai, khawvel le a sunga chenghai arênga neitu Lalpa chu ei suklungawi phot chun ei ram le ei hnam chu a dam khawsuok el ding a nih. Tuta ei ram le hnam ngirhmun chie hi chu thlaler depa hlo mawng ang chauh ei nih; ei hmabak chu nisa lum le thli lum mut hlum el chauh ni ta niin a’n lang.

Ei ram ei hnam damna ding chun inhmangai tuona le inremna neia Lalpa rawng bawl hi a nih. Mani unau ei hmu zing hman hmangai lo chun ei hmu lo Pathien chu iengtin am hmangai thei ei ta tiin ei Pathien thu chun a mi hril a. Chi khat hnam khat Pathien hring bie inti seng seng lai bawm khata ei inlawi khawm thei naw el dam hi chanchin thra leh an inhme chie dim chu aw! Hmar hnam hmangaia ramsuok inti seng thil tum le dit khom inang ve ve ni bok, sazuk pèla ei inpêl el dam hi chu hmangaina Pathien lung a dum chie dim chu maw! ti khom hi ngaituo um tak chu a nih. Hmarhai ta dingin Pathien hi hmangaina le inremna Pathien a ni ve ta naw hiel am an ta ding chu maw! Lung inruol taka unau chêng khawm diel diel thratzie le chutaka chun malsawmna Lalpan intlungtirin, kumkhuoa hringna ding a ni thu Sam 133-a ei hmu angin ei ram ei hnam le ei kohran lai hin chuong ang Lalpa malsawmna a tlung theina dingin ei Pathien thuah insiem thar ei tiu.

Mani sin senga ringum taka Lalpa rongbawl hi ram le hnam damna ding a nih. Pen hmora fak zongtuin a sinah taima tak le ringum taka a thaw hin Lalpa rongbawl a ni zing a nih. A sin thaw thrat min hmung an ta, Pathien an chawimawi ding a nih. Kut sinthawtu khoma a sûr a sâ dawn loa taima tak le ringum taka a sinah an bùr chun a lohma suok thratin Pathien a chawimawi ding a nih. Sin thaw pei lo chun a fak khom fa lo dingin ei Pathien thu khoma a min chuktir hrim a nih. Upahai khoma “ Ei thaw dol leh dol fang ei ta, ei thaw rak leh marak fang ei ta” khom an lo ti hlak. Lekha inchuktu khoma an inchukna ngai poimawa taima taka an inchuk chun hla inchukah lo thrang ngai kher naw sien khom, lo inkhawm kher kher ngai naw sien khom, exam result a thra chun Pathien rongbawl a ni zing a nih. Inkhawm zata thrang kim, hla inchuk pel ngai lo, exam rizal a suok phaa fail rop mi chu a sakhuo biek chun umzie a nei der nawh tina a nih. Inkhawm a thra nawh ka tina a ni nawh; mani sina ringum hi Pathien rongbawl a ni thu ka hril a ni lem. Chuong ang bokin Pathien rongbawltu le hnam rongbawltu khom an nih. Pathien rongbawltu chun a rong a bawlpek ta dinga thrahnem ngai taka ka sawl ka kham ti loin thawin, a kotu suklawm khopin rong a bawl ding a nih. Hnam rongbawltu khoma thlier bik nei loa a hnam le a ram hmasawnna ding ngaituoa sin a thaw chun Lalpa rong a bawl a nih. Mani sina ringum lo le tha dûp inhrùla sin thawtu chu misuol le Pathien hming sukpawitu a nih. Mani sin sengah taima tak le ringum taka ei thaw seng chun Pathien hming ei ni lai hung mawi a ta, ei ram le ei hnam khom a hung changkang duok duok ding a ni si a.

KEIVOM RUN (Geater NOIDA)

29 February 2012.