Jehova Khawnvar

Ziektu: Pu L.Keivom, Inpui.com Columnist

Lal Davida khawnvar mawi tak, Nang ngei Isu, Zing Arasi, Aw, ka lu chung zawna hin Hung var zing rawh. -Pastor Thangngur

Sinai Constitution duongtuin thil a dittui dan hi a namei nawh. Ei bi chieng po leh maktinain ei sip zuol el a nih. Eini rawi angin samphuola thil ei thaw amanih, tru bawlin amanih bekte khawa ei khaw amanih ang hin thil a thaw ve ngai nawh. A dan pek tin hi taksa le thlarau nuna a poimawzie le chu chun thu a hril inthuk thei dan chik taka sui chun lekhabu tam tak cho suok thei chi vong a nih. Sinai Constitution-a hin Thupek Sawm a pek bakah mimal le khawtlang invong dan ding kimchang takin a hril a. Chu zoa a uor tak chu Ama an chawibiek dan ding le chu dinga an inbuotsai dan ding a nih.

Mak deu el chuh, khang khopa a rawl an hriet ringot khoma tria an inthin hawp el Pathien khan Mosie kuomah, “Anni laia ka cheng ve theina ding in thienghlim mi bawlpek rawh. A ruongâm ka’n entir ang che khan biekbuk chu bawlin a sunga hmangruo ding po po khom i siem ding a nih” (Exo. 25:8-9) a ti tlat el! Felna le thienghlimnaa sip Jehova le thlaler trening sikula ni tin hang inhron ding chu thil olsam a ni naw ding chu a chieng sa a nih. Hmangaina le lunginsietnaa sip ni sa bok naw sienla lem chu, cheng hmunkhat chu thil thei lo hulhuol a nih. Eini lai lem chu, thil thra naw thaw hi sinpui taka ei nei a ni tak leiin, “Isu, ka lungrilah hung la” tiin bauin ei fiel hlaka chuh ei inkhorpui tawp a ni a, inthlang lai, vokbu ei pek lai lem chu ei kawl hnaia um ding khomin ei dit naw hulhuol a nih ti a hretu vong ei nih. Ei intham tling hnunga a kuoma lawmthu ei hril dam hi Setan dawha thratzie le tirdakumzie ei puong langna a nih. Hi thil ringot khom hi ni tam zan tam hril ding a um.

Mosie le Pathien an indawrnaa inthokin Jehova nina hi hmai ruol loin a chieng a. Tuta trum chu Dan Petu a nina nekin biekbuk bawl dan ding le a sunga hmangruo sie dinghai a kip a kawia Mosie kuoma a hril le a ziek thlaka inthoka thil rel thiem (designer, architect) a nizie tieng thlur bing inla. Chu taka khom chun, Exodus 25 a biekbuk bawl dan ding le a hmangruo khorsaw lak dan ding dam, Thuthlung Bawm, Zangaina Thrungpha le Hlanbei siena dawkan siem dan ding a hrilhai chu bawkanin, Khawnvar siena siem dan ding a hril chauh ei bitum ding a nih. Chu taka khom chun thlarau nuna a trangkaikna le poimawna tieng sui loin, a rurêl chauh ei thuol thuk thuok hman chauh ding a nih. Hi Khawnvar Siena, khei sari nei hi Hebrai trong chun, ‘Menora’ an tih. Hi hi biekbuk le tempul sung elvartua hmang khawnvar siena hrilna trongkam a ni bik. Ei Baibul inlet hmasaah ‘Sathaukhawnvar siena’ tiin indik lo takin an mi siepek. Biekbuka khawnvar hrieka hmang dinga Pathien awrdar chu sathau ni loin oliv hriek naran khom ni lo, a thra tak chi, thlit fìm a nih.

Sinai Menora

Exodus 25:31-40 le 37:17-24 ei en chun biekbuk elvartu ding khawnvar pasari inthrutna siem dingin Jehova chun Mosie a hril a. A siem dan ding khom a dit uluk hle. A thrut le a ngul chu rangkachak hlîra siem, a sunga sung ni lo, kut ngeia inzom vonga a suta sut amanih a sera ser ding a nih. A ngula inthok chun kâu ruk, chang tieng kâu thum, voi tieng kâu thum ve vein peng suok a ta, a kâu pêng tin zâra chun ruon pâr kumum lai le pâr lai pathum um seng a ta, a ngula chun ruon pâr ang pali a um ding a nih. A ngul le a pêng parukhai lu kipa chun inchen thrâmin ruon par lim, no rei anga parh um a ta, chu taka chun khawnvar pasari inthrut an ta, chu chun biekbuk el var a tih. Hi taka ‘ruon’ tia inlet hi Saptrong chun ‘almond’ an ti a, chu chu Vai tronga ‘badam’ an ti hih a nih. A thren chun ‘theite’ tiin an inlet a, almon tia a Saptrong hming insomtir el khom an um. ‘Ruon’ thing sungkuoa mi a ni leiin, ei rama ‘ruon’ leh inang chie naw sien khom ‘vai-ruon’ ti duot nekin Delhi Version-a chu ‘ruon’ tiin sie a nih.

Hi khawnvar siena hi talen khata rik rangkachak hlîra inthoka inzom vonga sut le ser ding a nih. Talen hi Mesopotamia le Kanan ram vela thil buknaa an hmang a ni a, a rik dan chie ruok chu a hun thu le a rama an bukna lung hmang zirin a danglam. Dannaranin, talent chu an tangka shekel 3000-a rik a ni a, chu chu 34.272 kg (75.6 pounds) a nih. Chambers Dictionary chun kilogram 38-a rik niin a ziek. Chu chu a hmingah Aeginetan talent an tih. Thuthlung Thar huna an talen hmang ruok chu 58.9 kg a rik a ni thung. Kum thum liem tah 2009-a an hisap ka hmu dan chun, rangkachak talen khat man chu a tlawm thei dan taka sut khomin vaibelsie (crore) ruk chuong a nih. A hlutna a’n sang leiin trongnaah theina le hlutna hau hrilnain an hung hmang ta pei a, eini tronga chen khom a luong lut tah a nih.

Hieng thil hi hril chânga ka ngaituona zawna hung inlang hlaktu chu: anni rawi inpèm hi ieng ang lawma inthok burip am ning an ta? ti hi a nih. Iengkim thaw thei an Pathien chun thruoiin, manaa chawmin, tui an mamaw leh lungpuia inthokin inchik suoktir sien khom, anni rawi laka inthoka a thil phût, Baibula inziekhai hi namen lo tak a nih. A chengna ding biekbuk chikte bawlna dinga hmangruo a ngiethai hi a thra tak vong a ni tlat leiin, pêm ruol, thlalera khawsa ta ding chun hang phuhruk el chu thil olsam ni naw top a tih. Sienkhom, biekbuk bawlna dinga an mamaw neka tam hiel an hung pek leiin, tu khomin hung pe sap ta lo dingin an indangkîr hiel a nih. (Ex.36:5-7)

Biekbuk bawlna dinga an hung thawlawm laia thil hlu dang dang chu tiem sa loin, thîr hmangruo hung thaw khawm ringot khom rangkachak (gold) kg 1000, tangkaruo (silver) kg 3433, dâr (bronze) kg 2425 a nih. Hmangruohai kha khaw laia inthoka an lak am ni tang a ta? Thlalerah lo le huon neiin, ran an vai awm top si nawh, hlanbieknaa biekbuk maichama ran, bu le bâl le thil dang dang an inhlàn ding Baibula a hril zozaihai hi an pan Kanan ram an tlung pha chaua an thaw dinga a hril ning a ti? Thiempu Aron le a rawihai khan a tak takin biekbuka rongbawlna kha Sinai thlalera an khawsak lai khan an thaw ngei a nih ti a chieng a. Maichama hlanbieknaa an thil inhlan po pohai khah khaw laia inthoka an lak am ni tang a ta? Tuin am a sapplai ning a ta? Hieng an mamaw po po remruotpektu Pathien, zani, voisun le chatuona danglam ngai lo chu, zawlnei Isai hung inlang hma daih khomin, iengkonga khom Remruottu Mak hming (Isai 9:6) hi hang put naw ruol a lo ni nawh.

Tita Kotpuia Menora

Rome khawpuia inzin chun Rêngpui Kaisarhai sulhnung, abikin Palatine Hill le Capitoline Hill inkara um Roman Forum an ti hi fang a, mitmu koi vanga thlir chu thaw makmawa ngai a nih. Hi Forum simsak tieng kawn, Velian Hill an tia hin Delhi-a India Gate ang deuh, sienkhom a let hni nêka inhnuoi lem, a um a, chu chu Tita Kotpui (Arch of Titus) an tih. India Gate chu 1931-a bawl a ni laiin Arch of Titus ruok hi chu kum 1500-a inhma lem, AD 82 lai daia Roman Kumpinu Domitian-in a bawl a nih.

Kum 1990-93 sunga Italy hmar tieng Milan-a Consul General sin ka thaw laia Rome-a ka’n zin zatin hi lai hmun hi makmawa ka sir hlak chu a nih. Hi thu le inzoma ka ziek san ruok chu Tita Kotpui-a sailungvara an lem ker chu a nih. Lal Nero inlal lai, AD 66-a Judahai an hel nawk khan tukdol dingin a sipai lal laia a suong tak Vespasiana a tir a. Jerusalem a lak hma, AD 68 chapchàr lai Nero a thi a, a thlaktu dingin Vespasiana chu ruot a ni leiin, a sin sunzom dingin a naupa Tita (General Titus) chu a tir a. Babulon lal Nebukadnezzarin BC 586-a Jerusalem Tempul a suksiet ni champha August 28, 70 AD (The Bible Code ziektu Michael Drosnin chun July 25 niin a ziek p.162) chun, zawlnei tam tak le Isu ngeiin an lo hril lawk ang khan, Jerusalem chu sukramin a um tah a nih. Hi hnèna hriet zingna ding hin a nih Rome-a Tita Kotpui (Arch of Titus), tu chena him taka la ngir hih, an bawl chu nih.

Hi le inzoma ei hril nuom tak chu, hi Tita Kotpuia marbul lunga inker, Roman sipaihaiin Jerusalem an nuoi pherh truma an rallak an zawn lai lem chu a nih. Tita Kotpui sim tienga rallak (spoils of war) lem lunga an kerhai laia a langsar tak chu ‘Khawnvar siena’, Sinai tlanga Jehovan a biekbuk elvartu dinga siem dinga Mosie a hril lim kha a nih. Hi khawnvar siena hi Hebrai trong chun ‘Menora’ (Exo.25:31-40) tiin an ko a, Israel ram le hnam aiawa ngir emblem, sinsiena poimaw tak, Israel sorkar-in ‘coat of arms’-a a hung hmang tah pei chu a nih. A dang chu tangkaruoa siem tawtawrawt pahni (Nambar 10:1-10) le sittim thinga siem Hlanbei siena dawkan (Exodus 25:23-30) a nih. Hi lei hin, Juda mi tam tak chun voisun chen hin hi Kotpui hnuoi hi an hraw nuom nawh. Trum khat char, Israel ram a pieng nawk ni 1948 May 14 khan, zângkhuo a bungbu tah ti inentirna dingin, kum 1878 liem taa ropui taka Rome khawpuia General Titus a hung lutna tieng letling chara fein hi Kotpui hi Italy-a um Juda honpuiin an hraw tlang a nih. Naupang laia ei inhnel changa ‘Thiem Insût’ ei thaw hlak ang deuh kha a ang khop el.

New York-a Menora

Hi Arch of Titus-a Menora an zawn lai lim chu plaster-a namkaiin, a lim chu New York khawpuia Metropolitan Museum of Art (The Met)-ah an sie a, chu chu kum 2006-a thla thum le a chenve New York-a kan naupa James Lalropui kana kan nupaa kan inzin trumin ka zu en ngat a nih. Hmun danga lien tak tak an tarhai le Jewish Museum-a an siehai chu dannaranin Hanukkah Menora, kâu 9 nei a nih. Pakhat lem chu 1867-72 laia siem Ukraine-a inthoka an hung hawn a nih. Fifth Avenue-a Hanukkah Menora an phun chu feet 32-a insang a nih. Khawvela Menora lien tak ruok chu Indonesia ram Monado-ah a um a, feet 62-a insang a nih. Hi khuoa Juda mi um zat ruok chu 20 chauh an nih. New York khawpui hi Israel ram ti loa Juda mi an cheng rawnna tak a ni a, sumdawngna le pawlitiks-ah a solfa vaitu an nih. Judahai an insim kek chun New York khawpui hi a hritlang el a nih; an pang a sa met chun khawsikin a’n thin. Chuleiin, an Menora limin an museum a nghak bakah an kotthler elvartua hmun iemani zata an phun el hi thil awm tak hrim a nih.

Knesset-a Menora

September 23, 1993-a Jerusalem ka sir hmasa tak trumin an rorelna inpui ‘Knesset’ ka sir vuot a. An Knesset bilding hi khawvela Juda sungkuo hausa taka inthoka hung James Armand Edmond de Rothschild sum thlawnpeka an bawl a nih. A tuola chun thing kung chen deuthaw hiel, darsen le trin inchokpol bronze-a siem, meter 5 laia insang, Khawnvar Siena (Menora) lim an phun a, chu hmaa chun inza takin ka ngîr a, ngaituona a’n vak hla khop el. Hi Menorah hi British-Jewish sculptor Benno Elkan-in Arch of Titus-a a lim an ziek anga a siem le kum ruk zet a buoipui, April 15, 1956-a British Parliament-in Israel sorkar a rochung a nih. Hi Menora-a hin Israel ram le hnamin a tonhriet inchik tlak thil poimaw 30 an ker a nih.

India khomin BC 250 lai vela Ashoka The Great-in Sarnath (UP)-a sûtpui (pillar) a bawl chunga sakeibaknei pali, sak le thlang, sim le hmar nghaa inhnungton, Ashoka Pillar ti hming put tah chu Indian National Emblem-a January 26, 1950-a inthok khan hmang tran a, ei Parliament le sorkar in ropui le thusuok poimaw tin cheimawitu a hung a ni ang bokin, Israel Parliament chun February 10, 1949 (11 Shevat 5709) a inthok khan Menora hi National Emblem-ah an hmang tran a nih. Emblem-a a lim an hmang tak hi a hmaa ei hril tah, Arch of Titus-a inthoka an kawpi, sienkhom a sîr chang tieng le voi tienga oliv kauhnaa inhuol a nih. Jehova Khawnvar siena Menora hi Pathienin Sinai Constitution a pek hun, BC1440 laia mi a ni leiin Ashoka Pillar nêkin kum 1200 vêlin a upa lem.

Mak takin, tu kum January 9, 2012 khan Israel ram khaw pakhat Akko hmar tienga lamlien an chonaah pil raw chang (ceramic) a siem ‘suoi’ (stamp, seal) an cho suok a, chu suoia lim chuong chu khawnvar siena fong sari, ‘menora’ chie hi a nih. Israel Antiquities Authority, thil hlui suitu pawlhai director Dr. Danny Syon hril dan chun, hi suoi hi kum 1500 vela upa, Christian-Byzantine Period hun laia mi ni ding le hi lai hmuna Juda chenghai bei fak dinga an sakhaw dana siem, fak thieng, ‘kosher’ bu a ni ngei hrietna dinga suoi an nam hlak chu ni dingin a ring. Menora suoi an cho suok hi, an rama inthoka hnot dara um Juda mi iemani zat chu hieng lai rama hin an la um ngei a nih ti sukchiengtu sàkhi (witness) a nih. Chuong ang bok chun, India khomin Ashoka Pillar umna ram taphot, entirnan Thailand le hmun hrang hrang chenin, Buddhist sakhuo le India kalchar thla kiin a hawl phakna ramah an ngai.

‘Christian-Byzantine Period’ ti ei hril hi a umzie hre chieng nawhai ta dingin a bebawm tlawmte hang hril inla. Hnawchepna nasa tak karah, Jerusalema inthoka inpêmin, kristien sakhuo chun Roman lalramah kuo a suot ngat ngat a. Kum 313 AD a kristienhai zalenna Edict of Milan puongtu Roman General Constantine, a hnunga kristien-a hung inpe nia hriet chun Asia le Europe inrina Turkey-ah khawpui thar AD 330 khan a’n din a, ama hming chawiin Constantinople ti a ni a, chu chu a hnunga Istanbul ti hung ni tah hi a nih. Hi taka inthok hin Roman Lalram chu hmun hnia thre a ni ta a. Rome khawpuia inthoka op ram po chu Western Roman Empire ti a ni a, Constantinople-a inthoka op ram po chu Eastern Roman Empire amanih Byzantine Empire ti a nih. ‘Byzantine Empire’ an tina san chu, hi a khawpui indina hin BC 657 khan Grik rama Megara lal Byzas chun khawpui a’n din a, a hmingah Byzantium a’n buk a. Chu hming chu som peiin, Roman lalram sak tieng hi Byzantine Empire an hung ti ta pei a nih. Thu le hla an hril pha ruok chu Grik kalcharin a chìm hnè leiin Hellenism ti a ni daih thung. Israel rama inthoka an hnot darh Judahai inpèm khawmna ram po po deuthaw chu Constantinople-a inthoka op a ni leiin, an chanchin sui pei ding le a hnunga Renaissance le Reformation hung suok dan hriet chieng ding chun hieng lai ram chanchin hi hriet makmaw a ngai. Kristien sakhuo piengna ram a ni el bakah Hmangai Johan-in kohran pasari a op, Thupuongsuoa a hril po po le Tirko Paula rongbawlna ram Asia Minor khom hieng lai ram sunga tla vong a nih.

Menora hi khawla’m a um ta a?

Rallak an hawn laia thrang saa Tita Kotpuia a lim an ziekhai hi an phuokfawm el chu ni naw nih. Menora hi an hung hawn tak tak a ni si chun, khaw lai am a um ta a? Hi Sinai Menora hin Rome chu hril lo, Jerusalem khom a tlung phak hrim hrim am? A chanchin hi Mosie lekhabuhai ti loah hmun dangah ziek a ni hrim hrim am?

1 Lalhai 7:48-50 a chun Solomon Tempul bawlah khawnvar siena fong sawm nei, chang tieng 5, voi tieng 5, rangkachak hlîra siem a um thu ei hmu a, chu chu 2 Kronikul 4:7,20 ah ei hmu bok a. Hi khawnvar siena khei sawm nei hi Sinaia Jehova dizain khei sari nei leh an inang ta nawh. Solomon khan a dizain a thlâk am a ni ding? Thlâk dinga Jehovan a hril thu khaw lai khom ziek a ni nawh. Thuthlung Bawm le a sunga um Thupek Sawm inziekna lung dam, thlalera Israelhai bu ring mana an siena rangkachak bêl dam le Aron hmol inder (Heb.9:4) chu Solomon Tempul sung hmun thienghlim takah an sie lut ngei ti 1 Lalhai 8:6-7-ah a chuong. Sinai Menora ruok chu a rè tah vang vang a nih. Biekbuk chikte, thlalera an um sunga hmang dinga duong a ni leia Solomonin khei sawm neia a thlak khom ni rawi naw nim, sienkhom Baibul-ah ziek a ni nawh.

Zekaria 4:1-6 ei tiem chun Babulon lalin Jerusalema Solomon Tempul a sukram hnung chu Zerubabel-in Thlarau thrangpuinaa a hung indin thar nawk ding le Tempul indin thar a ni ding thu inlarnaa a hmu thu a ziek a. Chu taka chun khawnvar siena, khei sari nei a hmu thu le khawnvar pasarihai chu “Lalpa mit aiawa ngir an na, hnuoi pumpui hi an hmu vong a nih” tiin a hril bakah a hriek chawmtu oliv thing pahnihai chu “hnuoi pumpuia LALPA rong bawl dinga hriek nalhai chu an nih” ti vantirkoin a hril fie thu a ziek bok a. Chu thu le Thupuongsuoa thuhretu pahni a hril (11:1-13) hai rongbawlna chu inzoma hril pawl an um a, sienkhom chieng faka hril an um nawh.

Tlanna sin thaw dinga hriek nala um le a thaw zo hnunga a aiawtu dinga a maksanhai thu a hril hi thiempu laltak Josua le Governor Zerubabela bel el loa Tlantu Isu le a sinthaw ding zoa van tienga a kai hnunga a aiawtu ding Thlamuongtu Thlarau Thienghlim a maksan hrilna a lo ni pal hlauh chun a fuk hlè dingah kei chun ka ngai. Ieng angin hril thiem inla khom, a tawpa a luong lutna chu ei hril tho hi a nih. Logical lo le theological lo deua ngai khom um mei an tih. Pathien hmangaina le lunginsietna hi ‘Logical’ lo deuh a nih. Misuol hmangai tlat chu ieng logic am a ni ta le? Hi lei tak hin ni naw nim, “Nangni hmangaituhai chauh in hmangai hin ieng lawmman am hmung in ta? Sienkhontuhai chen khomin chuong ang chun an thaw ve naw am a ni?” (Mat 5:46) ti Isu ngeiin a hril khah. Khawvel elvartu dinga Jehovan Israel thlahai a thlang ang bok khan, Isu Krista ringtu taphot hi khawvel var, mi elvartu ding Kalvari khawnvar, an var chu mi hmua var suok dinga a beisei an nih (Mat 6:14-16).

A ieng khom chu ni sien la, Judai ram optu Governor Zerubabelin thiempu laltak Josua thrangpuia Persia lal Daria inlal laia Jerusalem Tempul a hung indin thar nawk, Tempul Pahnina tia hrieta khan Solomon siem khawnvar khei sawm nei ni loin, Sinai Consitution-a chuong ngei khei sari nei Menora an hmang nawk tah a nih ti sukchiengtu sàkhi (witness) chu rallak an zawn lai lim Tita Kotpuia sailungvara an ker hi a nih. AD 70-a General Tita kawmanna hnuoia an sukram kha Tempul-2 hi a nih. Rallaka ‘Menora’ hi an hawn ngei a ni naw chun kat treng trenga an zawn lai lim ziek naw ni hai.

Zawna poimaw, ei hmaa ngîr chu, hi ‘Menora’ hi Sinai Constitution-a chuong, Mosie inrawina hnuoia Pathien Thlarauin kut themthiem filor dinga themthiemnaa a sung sip (Ex. 31:3) Bezalal le Oholiab kutsuok kha a la ni ding? ti hi a nih. Israelhaiin Kanan ram an lut khan Pathien Bawm (Thuthlung Bawm) an zawn lut ti le a hnung daiah Jerusalema an lak lut khan a siena ding a hran lieuin Davida’n biekbuk a bawl thu le Solomon Tempul bawl zo a ni khan Tempul-a hmun thienghlim takah an sie lut (1 Lal 8:6-7) ti ei hmu a. Chu hnung chun a chanchin hriet zui a ni ta naw a, zawlnei Jeremia-in “Chu huna chun, nasa taka mi in hung pung pha chun, ‘Lalpa thuthlung bawm’ in kol lai hun khah ngai ta nawng in ta, hre fu ta bok nawng in ta, Thuthlung Bawm siem nawk ngai ta bok naw nih” (Jer 3:16) ti a ziek bak hih zawlnei dang tu khomin an hril ri ta nawh. Sinai menora lem hi chu Kanan ram an lutpui a ni khomin a chanchin ziek a ni ta naw hrim hrim.

Chuong chu a ni lai zingin, zeldin thubawl vuong vêl ruok chu a tam. Nebukadnezzarin Solomon Tempul roka a suksiet trum khan Sinai menora khom hi bûr le bêl le thil dang a lakhai leh Babulon tieng a hawn ni dinga ring pawl an um. A thren ruok chun, Nebukadnezzarin a hung rùn hma khan zawlnei Jeremia-in Tempul hnuoia thil hlu siekhawmnaah a thup ni dingin an ring. Thlaraua a umna hre pawla inhrilhai chun cho suok el thei niin an ngai a, amiruokchu Tempul hmuna hin tu hin Muslim tempul Al Aqsa mosque a ngîr tah leia cho suok thei loa la um hri chauh niin an hril bok. A thren ruok chun, Judahai le an sulhnung nawt bo tumtu Grik lal tawrot Antiochus IV Epiphanes (c.215-164 BC) khan a suksiet a, a laka hel Makabi-hai khan a thar an siem nawk a, sienkhom a tira mi kha chu a tluk teuh ta nawh tiin an hril ve thung. An hril dan pei chun, menora thar an tlangzar ni hin oliv hriek ni khat tla ding chauh an sung khan mak takin ni riet a dai a, chu chu hriek thar an sawrna ding le inhlànna dinga hun a lak sung niin an hril. A thren nawk chun, Solomon Tempul khûm khopa ropuia Zerubabel tempul indin thartu Herod Lien khan Menora thar pui tak el, feet 6-a insâng le a khang feet 3-a lien, a kauhai khom inches 4 hiela lien a siem thar a, chu chu General Tita-in Rome-a a hawn thlak hi ni dingin an ring thung.

Tlangkawmna

Sinai ‘Menora’ chu a taka hmu zo a ni ta le ta naw thuah Isu ringtuhai ta dingin buoina ding a um nawh. Johanin “Thu chu taksain a hung inchang a, eini lai a hung chenga” tia a hril kha ama vekin Var Tak, mi tin sukvartu, hringna bul, mihriemhai var, inthim lai hung var a, inthimin a ngam lo, lunginsietna le thutaka sip, mi famkim, a famkimnaa inthoka mihriemin a dong chu lunginsietna ngot, lunginsietna ngot a ni thu a hril bok a. Chu Var, Kalvaria inthoka mi tin ta dinga kap suoka um Isu Krista chu eini Menora a nih. Kalvari Menora neituhai chun khawnvar dang hrim an mamaw ta nawh. Chu chu a nih Pastor Thangngurin hla ropui taka a lo insam suok khah:

Kan lungril tempul sunga

Hmun insang hi chang la chu,

Ropuina ropui chunga,

Lawmna chunga van lawmna,

Kan ta lo ni tang a tih,

Achu nang ngei chu i nih.

(March 16, 2012 Delhi)