Split-level Christianity!

Pu David Ralsun

Thenkhat ta ding chun hi phrase “split-level Christianity” ti hi in hriet vawikhatna a ni el theia. Thenkhat chun ei lo hriet ta khawm a ni thei bawk. Hi umzie Fr.Jaime Bulatao’n a hril dan chun “Split-level Christianity may be described as the coexistence within the same person of two or more thought-and-behavior systems which are inconsistent with each other.” Hieng hin tawite’n hang hril in la; thuhril le khawsak in anglo ti’n. Chun ei hriet fie nawk zuol theina dingin thumal pahni “orthodoxy” ti le “orthopraxy” ti hai hi hang hmangsa bawk in la. “Orthodoxy” ti chu “ringna indik” or “right belief” tina a ni a, chun “Orthopraxy” ti chu “nundan indik” or “right behavior” tina a nih. Hriet le ring cho ni loin hringnuna hmang ngei ding tina anih.

Split-level Christianity ti hi Kristien INTI hai laia thil tlung a ni a. Entirna’n Sundaya gospel vieu sie, Monday-Saturdayhai ah Pathien neilo ang khawpa Pathien biek na chang hreloa hun hmang hai dam a kawka. Hi hin a buoipui tak chu hieng ang mihai hi “KRISTIEN” ei ti thei ding am? Annawleh “Kristien an ni nawh” ti hai a nih. Hi hi hriefie nawk zuolna dingin story thenkhat an hmanghai hang tarlang inla, chun ei ni khawm loin sut bawk in la thang a tih!

Philippines rama kristien khuo pakhat Malitbog an ti a chun zudawn hi an uor em ema. An ni hi a tlangpuiin Kristien an nia. Pastor’n a va kana thuhrilna a nei changin hieng hin an lo hril khum hlak. “Pastor nangin zudawn hi suola i ngai ang hin keini chun zudawn hi suol bek bekah kan ngai naw ie. Hienghai hi chu mihriem, mi puitlinghai hringnuna um angin kan ngia. Naupang kan ni lai khan kan nuhan zu chie hrim hrim dawn lo dingin an min chuktir hlaka. Turuok hin chu puitling kan ni ta a, zudawnhai hi chu mipuitlinghai dawn dingin kan sie el. Chun thuindiktak hril ka ti che, zu hi ka sinthawtuhai, ka lo (Field) enkai tuhai ka pek naw chun tuiinam mi thangpui tang an ta?” (Culture le tradition hmang hrilfie tum)

Restaurant pakhata hin Pastor le Kohran thuoituhai lunch fa dingin an fea. An hang lut chie chun, restaurant sunga entertain thawa hla mawi em em saka lo khuong vawng vawng hai kha an tawp cheta. Pastor le kohran thuoitu hai chu lunch fa zova an suok dawk char chun, hlasaktu hai chun mawi em em in an hla sak chu an sunzawm nawk a. (Pastor hai mithmua fel tum)

Pastor pakhat hin a thuhrilnaah ruk in ruk a thatnawzie, Pathien ditzawng an nawzie a hril mawl mawla. Inkhawm tin chun ‘ar’(chicken) that dinga a lo sie tha kha a hmuzo ta nawa. A nuhmei a zukin dawna “khawlam a um leh”ti’n a nuhmei chun nangin ruk in ruk a thatnawzie I hrila ka loin suo dei a ni kha” a ti peka. A lungsen chun “a poi de aw! Ei ta dinga ei hril ni lova mihai ta dinga ei hril a ni kha tie!” tiin a nuhmei a hal. (Mani zawm ding ni lova midanghai ta dinga hril)

Philippines rama politician hai hi election campaign an nei lai hin an gospel thei em ema. An thilthaw pakhat chu sacrament an fak lai tak hi picture an lo laka chu chu mipui hmu dingin an tarlanga. Amiruokchu a ruokte’n poisa sum hmangin indiknaw takin thil tam tak an thaw zing bawk. (Chanchintha hmai kawra hmang)

Leh a chunga story thenkhat hai a inthawk khin spli-level Christianity a umzie a tlawm a zawng ei hriet thei tah ka ring. Mani baua Isu chanchin, Pathienthu hril hrila nundana ruokchu thuhril letling deia khawsa tina a ni deu tak. Inkhawm, Sunday ni vela gospel tak ni awm taka in vir lap lapa, in tlung hunah leh, a zinga inthawk Pathienthu reng reng uoksak talo. Hlapawl saka thanga, hlim em ema ban phara, in tlung hunah zu bur dawm nawk hieu dam. Hlathuoitu, tantu, tawngtaitu, thawlawm dawltu, kohrana poimaw em em nisie, in tlung hunah nunghak tlangval inhoi chenna, zu le drugs, sex, pornography tienga in hnel nawk loi sie!

Kohrana thuhriltu, mihai inchuktiru nisie office kai huna mani sina ringumlo dam, mani kawppuihai um nawna hmuna ringumlo dam. Pulpit tlangah thuthatak tak hrila mani insungah sung inkhawmnatak ngiel khawm nei dinga rawt ngam lo dam. Sawmapakhat le thawlawm pe hrat tak nisie mani sum laklutna indik bawk si lo dam. Kohranpui, Thalai, Nuhmei, Naupang thuoitu poimaw em em nisie, inkhawm tawm a cho Bible keu ti dam. Hieng hai hi ei ni laia split-level Christianity inbuk thei dinga thil umhai niin ka hriet. Hieng ang thaw mi ei ni chun kristien indiktak ka nih eiin ti ngam am le? Hieng ang thaw mi hai hin an niah inthiemnawna an nei ngai nawa. An thilthawhai chu hrilmawi dan ding an zawnga, culture dam, tradition dam hmangin an in hril mawi tum hlak.

Iengleia hieng thilhai hi Kristienhai lai a nasa em em el am ning tang a ta? Iengtinam hi hi sukbo thei ei ta? “Orthodoxy” ringna indik cho ni loin “ Orthopraxy” nundan indik ei poimaw hle. Dr. Mcwan a thuhril ka la hriet zing chu “ei ringdan andiknaw chun ei thilthaw khawm indik ngai naw nih” ti hi a nih. Entirna’n Zudawn suola ngailohai chun zudawn chu poi ti ngai naw ni hai. Pornography suola ngailohai chun en rawp hlak an tih. Thenkhat chun Bible verse pakhat pahni phawr dawk in defense an thaw hlaka. Hi hi thil poi em em mani le mani in hlemna a nih. Dr. Floyd in a thuhrilnaah a hril chu “movie khawm nisien, ieng ieng khawm thaw in la, ei thil en le ei thilthawhai khan Pathien a choimawi ngei ding a nih” ti hi. Zudawn, zielhawp hai suol am suol naw ti tieng ni lovin “zu, zil, inruthei le thil dang dang ka thaw hin Pathien a ropuiam?” ti tieng a ni lem. Pathien ropuina ding an naw chun chutakchu a nih Pathien nau han ei tawpsan hmak ding chu!

Ringna indik le nundan indik hi iengtinam hmetkawp thei ei ta? A dawnna dingin Tabuena thuhril hang la in la,‘integrity’ nei a tul. Hieng hin hang hrilfie in la, integrity ti chu, ei thuhril le ei nunchang an hme ding a nih. Tawiten, indikna ei poimaw. Split-level Christianity tlung nasan tak chu ‘integrity’ indikna ei ngai poimawnaw lei a nih. Ei bauin ei hrila, ei thilthaw a dang dei sie. Mihai eiin chuktira mani’n zawm bawk si lo. Mihai mithmua tha em em in ei uma, hmel hriethai um nawna hmuna Pathien neinaw ang khawpa hun hmang zo el dam. Chu umzie chu mihriem pakhat sunga thil pahni inanglo fe kawp tlat hi anih a poi chu! Pathienthu ei hriethai ei hmang ngai naw lei hin ei ram, ei hnam, ei kohranhai , ei insung, ei ni ngei Pathien hnai nekin Pathien ei hlat deu deu an ta hi. Hieng thil ei thaw sung chu Pathien hming choimawi nekin Pathien hming suk hmingsiettu ni rawp hlak ei tih. A tawpnatak a dingin hi hi lo ngaituo sin rawh , Pathiennau inti si a, Pathien hming sukse rawp hlaktu ei ni chun Pathiennau ka nih eiin ti thei chie am le? Pathien nauhai chun Pathien ei pa ei choimawi ran ding a nih.