Kan Zinna Part IV (Traffic rule Vrs Mizoram)

Pu Ramthienghlim Varte, Senior Anthropologist, Shillong

Ofis sinthawna le inzawmin  Tarik Ni 11.Nov.2011 khan Shillong suoksanin Mizoram ka pan a. Kolasib ah kar hni zet umin a khawpui sung hmun hrang hrangah kan vak kuol a. Kolasib khawpui a hin mi 24094 le In 5000  neka tam umna a ni a, private School inlar deu deu Happy Heart’s Acedamy, Diakkon, Kolasib ah Pi Varmawi Varte, Shillonga inthawka hunglutin an din student 380-400 vel le Kolasib venglai ah Brighter Faith Acedamy Pi  Lienhmingthangin (ama hih Rengkai khawsuok a nih) an din student 360-400-vel kaina a um a. A milien lien eini mi Hmar twang biek thei vawng anni leiin ka pieng le murna Manipur nekin ka tlangnelin chang a parh-hak nghal thei chu tie. Hi iengleiam ning ata ti eila hung ziek pei ding a nih.

Kolasib hi chipchier deuva mit inlen le fangkuolna kala nei ngai naw a. Ka tlungin Tourist Lodge, hih Kolasib Vengthar a um ani a. Hilai hmun a hin Manipur (Vangaitlang le Hmarbiel), Cachar le N.C.Hills, Assam a inthawk a inpemluthai indeng bumna hmun deu a nih. Salvation Army, EFCI kohran pawl pahni inhnai deuvin a ngir a, ICI kohran an um bawk. Tarik Ni 20^th November 2011 khan Rengtekawn Bial Zaipawl haiin rawngbawlna Gilgal EFCI biekin Kolasib Vengthar ah an hung nei a. An hlasak a hringin an thiem em em a, hun an mi pekve leiin thu tawite hrilna ka nei a. Bial zaipawl nuhmeihai uniform man ding le Bilkhawtlir a inthawk a hunghai kalman ding ka pek nghe nghe.

Sawrkar sinthawna le inzawma state sawrkar le indawr le thawktlang ding chun North East state 6 (Tripura le Sikkim thanglovin) kan enkawlhai lai hin Mizoram le Arunachal Pradesh State sawrkar Officer le an thawkpuihai hih an felin an kut le ke a zang taka kan ngai ani leiin tu tum khawm national project – DNA Polymorphism of the contemporary Indian population and Phylogeny le inzawm a blood sample collection chungchangah Dr Sangthuama Ngente CMO, Kolasib le a thawkpuihai an fel em em a, hun tawite sungin ka target ka zo thei nghal a. A ma le a thawkpuihai chungah lawmthu ka hril.

Tarik Ni 25^th November 2011-in Kolasib suoksanin Aizawl tieng kahung pan nawk tah a. Buarpui a Pu H.Thangluoi AIR a Director a pension tah farm neiin a pension nun a phamna hmun a kan hei chawl hadam a. Inhnar ava hei veng veng de aw. Ama hi a pilepu a inthawka huon siema pawisa tam tak tak inchaw hlak mi anni leiin a hming khawm Huon Thangluoi ( H.Thangluoi) ti a ni nghe nghe. A huon rasuok Jerusalem serthlum le thei her-awt hai kan hei bak (fak) hmatiem a, a farm kan hei fang chuh nun hi a hlimin a muk a nih. A lekhabi ziek ‘ MIZO KAN NI’ ti Mizoram sawrkarin sut pek ding a a sukfel sa final proof alo thawlai a ni nghe nghe. Phek 390 vel a sa a nih.Kan ram, kan hnam tia a ri sie zawng le Chawngkawr khawtlir thawa, hma tawk tawk hril a, a ka-khawk ding ngaituo lova inhram- inper ka-lang nekin a tangkai lem ka ring. Asanchuh, Pathienin hnam pakhata ami siem eini zie le, khawlai a inthawka hung suok am ti hrilfie tu le hnam mumal lo, hnuoi le van kara inleng mei mei ei ninaw ziek ngei a suklangna ani tlat leiin. Chubakah, Mizohai del ram le ei hungsuokna Sinlung hi tienthu hrieta hriet ringawt nilo hmu thei dingin Reader Digest Atlas ami hai a um sa bawk.Hmar tawngin hi lekhabu hih publish ni thei sien nuom a um khawp el.

.

: Ofis motor buoi neknuka chawi nekin tuta tum chuh Shillong Taxi Pu Hrilthanghlun ( Hrila ) Maruti-800 All India Taxi rawng pangai a dum le eng chawkpawl ngei khah ka chawi a. Hi Taxi rawng (a dum le eng ) hih kum iemani chen liem ta a Mizoram khawmin alo hmangve hlak kha tlakin khawtlang rambung (western country) thenkhathai Taxi rawng copy-a a var le eng chawkpawl a ani ve thung. A changkangin a mawi a, chuong khawm chak um hlie hlie’n an lang. En nuom mak tak ang elin kan tlanna tieng tieng ka motor hmang chuh an tlir vawng vawnga, thenkhatin “ A van lunglen tlak mange aw, chu Taxi rawng tak chuh’ ti pawl, ‘ Hei hih Eng Taxi ngei’ ti pawl, ‘Shillong Taxi a ni hih’ annawleh ‘Kan Taxi rawnghlui a ni hih’ ti pawl, Mizoram Taxi rawnghlui ani lei a tawng chuong leng deu hmang pawlin ‘Aw ! Khublei, Alu kudam’ ti pawl khawm an bo nawh. Chuonganga mi mit fuk theina motor ka chawi chuh an manhla hle’n ka hriet.

Motor chungchang hril taka chun Aizawl khawpui sunga Motor hai reng reng rawng var naw hmu ding a vang. A umsun khawm a tlang puiin a neitu chuh state puotieng mi an nih. Lamlien le kawttler a sukmawi a , hmu khawm ha damin mit khawm a tlei.Ni e, thil var reng reng ngaina mi chuh insukfai le thienghlim taka fak le dawn kawnga khawm insuk fihlim nuom mi an ni tlangpui awm ie. Thienghlimna hi taksa hriselna a ni bakah Pathien khawma a ngai pawimaw em em ani reng a. Chu nih, Saphaiin ‘Cleanliness is next to Godliness’ an ti reng chuh.

Chuongangin Aizawl khawpui sunga mipui chenghai khawm an rawng ditdan enin khawpui thienghlim le changkang ni tuma thang la mek le sakhuo thila khawm mihriem felna le varna hmanga fak le dawn a khawm State sawrkarin zu zawr chen khapin total prohibition state a puong a ni nghe nghe. Mi hausa an tam a, sawrkar sinthawhai khawm an hlaw le inmil em em lova Pucca building ropui tak tak nei an ni deu vawnga, an ofis buildinghai a ropuiin rawngvar tiengpang an uor hle bawk. Inchei kawnga khawm an changkangin, Bangkok khawpui anga piengnal le inhme zawng hrea inchei,hmeltha tak tak le mawngbawr tha el-awl en liem vawng vawng ding an umve nuol a. Pu Laltuoklien (Pistol Puokruk)-in ‘ Aizawl khawpui kahang fanga, Nu nghak hmeltha an tam ngei ie, an polite thei si; Step intung deu er-awr ah a an hei lawn a, an malpui a ngovin mit a tleiin a tlei thei ngei…’ ti hla a siem kha ei hrietsuok rum rum el. Khingtieng pang a ruok chun mani piengphung iengang am ti ngaituo em em lova thuomhnaw man tam taka inbel ‘Ama nekin a thuomhnaw ka ditlem’ ti ding khawm an tamve bawk.

Chun, motor hnungtienga inziek ka thil hmu mak kati chuh ‘NO HORN PLIZ’ ti dam ‘STOP HORN PLIZ’ ti hai hih a nih. A reng rengin Stop horn pliz ti an ziek hih a san ding awm ka hriet thei hlawl nawh. Khawtlang ram (Western country) lamlien tlun em em international standard a siem London, New york khawpui hai dam chuh Six lane a siem a ni bakah a sir ah feet 5 ( nga) a lien emergency parking space a um bawk a. Speed angkhat vawnga tlan an ni leiin Motor reng reng City Police, ambulane annawleh emergency thil tinaw chuh horn ri hriet ding a um naw ang tluk a ni reng a. Mizoram hi tlangrama khawm tlang kawrhnawk tamna, khawvel lienlem chuh hrillo, India rama khawm tlun rawnga kilometer khat khawm lam um theinawna. National highway standard ang khawm a lamlien siemthei khawm ni derlo State ah STOP HORN PL. (Horn hmetnaw) ti chuh insuk changkangna a hmang ding chi ani ding am aw ti le mi dang puotieng a inthawka hunghaiin an ngaisang ve dim chu tihi ka ngaituo a nih. Kei chun ka hrietthiem/ngaisang theinaw phawt chuh a nih. Chun, Saphai thilthaw hi a tha tam sienkhawm ei niphungin a zirnaw le theilo tam tak a um tihi hriet a tha.Ka motor khaltu pan’n “Pu, Motor horn hmet kuhi Driver thing anti a sawn naw ” ala ti ta deu deu.

Chubakah, khawlai le mipui pungkhawmna ah zie hawp khu vut vut, kamcherek hieng Kuva fak le Sada hmuom kawngah nuhmei a pasalin an pawisak an hrawl hle’n an lang a. Mizoram hi India rama mipui nambar enin Cancer tamna tak a nih tihi thil awm tak ani awm de aw ka tih.Dry state tia puong nisi, zana hung inthim a lamlien sukmawitu chuh a tlangpuiin nunghak-tlangval nun-chena Bike a hrattak taka tlankuol le invak vel anni deu vawng hi a mak.Hi Aizawl khawpui le a sevel a insuk changkangna dinga dit umlo pawl tak a ni ka ring. Za ah za Kristien state ei inti nuomna leh an hme naw em el.

Pu L.Hrangchal IPS Aizawl SP inah Tarik Ni 26^th November 2011 zan khan bufak tlangna kan nei a. Mizoram state a MPS direct a lo lut hmasa pawl, kum 2003 khan IPS inhlan ani a, Hmar nau a tuoltohai thanglo chun IPS hmasatak a ni awm.Pa inngaitlawm takel Aizawl Ramrikawn a hmun lien takel inchaw’n farm siemin a um chil nghal a, Bawng, kel, Ar vaiin an nu Mathiangi ( Ramthianghlimi) leh darkar tiem a hun indai naw takin thlan suok zawi zawi a sinthaw an nih ti ka mit ngeiin ka hmu a, entawn tlak mi taima tak a nih.Ka ruoltha, ka makpa nibawk Pu (Er)Zothangsang Intoate khawm EE (Executive Engineer)-a lo kaisang ve tah lawmna chibai buk malamin a inah bufak tlangna kan nei a, Aizawl, Ramhlun North ah Building ropui tak neiin alo umve tah a lawmpui a um ngawt el.