RIMAWI RÛN-AH

By Pu L. Keivom*, Inpui Columnist

Thlasik hun a liam mêk a. Kristmas leh kum thar lawmna khuang ri pawh rilru beng atrangin a liam a, hârmei rim pawh hnim phak a ni tawh lo. Thrâl rim a rawn nam tran a, bialnute'n thaw luma min thawk khum leh kut luma min zût ang maiin, min thawk khum dan leh hmeh dan pawh a ni telin a danglam sawt hle. Kan pi leh pute hunah kha chuan chapchar hi hun nawm lai bera an sawi, hlim taka an kût tlut tlut hun leh thu leh hla thar tam tak lo tlâk hun a ni. Hemi hun hi hringnunah pawh tuai tharna hun a ni tih hre rengin, English hla phuah thiam P.B. Shelley-a pawhin a duhsam, ngaihdan thringte thil tharin a rawn thlak hun ni turin a Tlumte thlir a,

O Wind,

If Winter comes, can Spring be far behind?

tiin a lo auh lawm lawm a nih kha!

Kan khawsakna Delhi tlangah pawh hemi hun tluka nuam hi a awm lo. Hawina lam apiangah thlir ninawm lo pangpar chi hrang hrang vul chûk mai hmuh tur a awm a. “Min en teh, ka mawizia hi. Khuanu'n mawi a tih ang taka min duan ka nih hi. Rei lo tê he khawvel hi cheimawi tur leh min Siamtu themthiamzia leh ropuizia puang tura lo kal ka ni. Keimahah hian Siamtu hmêl i hmu em?” tia pangpar tinin min hui ni awm hian kan hmu a. Mit a tlai a, rilru a tihlim a, ngaihtuahna a fah a, dam man a awm hliah hliah a ni. Hemi hunah hian alawm India rama kan pangpar huan chhuan ber Mughal Garden, President kompaun-a awm chu mi tu pawh tlawh theih tura an hawn thrin ni.

Zoramah chawlh hahdam paha chumi thrâl hun nawm lai ber chu chhim leh turin March 8, 2011 khan Delhi atrangin Aizawlah ka thlawk chho a. Ka chuanna tur, zu lal Vijay Malya ta, Kingfisher thlawhna kha Terminal 3 atranga thlawk chhuak tur a ni a. He T-3 hi tun hnaia an hawn thar, zau tak, mawi tak leh ropui tak, khawvela airport terminal thra ber zinga mi a ni a. Chhuahna Kawtpui (Boarding Gate) an tàr zawng chu 64 a ni a. Gate tin-ah thlawhna kawngkaa invuah chi, leilawn fân (tube) a awm a, chu chu thlawhna kawngkaah an vuah a, chuta trang chuan thlawhna chhungah kan lut mai a ni. Ka chuanna tur thlawhna chu Gate 58 atranga chhuak tur a ni a, thui tak kea kal a ngaih bakah chhuk chho hmun hnihah a awm a. Hah hnêpa kan kal hnuin, kailawnah chhoh ngai tawh loin, thlawhna chhungah kan lut mai a ni. La kal ngai lo leh kawng kawhna chhiar thiam lo tan chuan buai leh bo fêna tham a ni.

Zing 6:30-a thlawk chhuak kha, dar 10:30-ah Lengpui ka thleng hman dêr a. Mipui zi nuai nuai hmuh tur awm tawh loin, Zoram khawvela kan êrpawt lian ber leh chhuan ber chu a ngai tèin, hnu chhawn ram ang maiin, a lo reh thriap a; diuti mi tlem tê leh Arrival Lounge leh thlawhna innghahna inkara pangpar mawi tak tak te chu hmuh tur awm chhun a ni mai. Pawnah chhuah hnu erawh chuan, hawina lam apiangah fartruah (erythrina stricta) pâr sen leh vaube (bauhinia variegata) pâr vâr an vul chûk a, Zoram tlang tluanah an lal vanglai a ni. Fartruah emaw vaube emaw hi favang laia pâr thrin chi pawh a awm bawk a, truah favang leh vau favang an ti.

Vaube ni si lo, vaube pâr aia sîn zawk leh a hnah pawh inang lo, neem (nîm) thing nia an sawi, mah se vai ram neem nen an kauzâr pianhmang inang lo, a hnah leh a khâk dan erawh inang si, zun thlum vei tana damdawi thra nia an sawi, a pâr vâr chi hmuh tur a tam hle bawk a. A hming ka zawhin tu mahin a Zo hming an hre lo. C. Lalbiaknema lehkhabu siam ‘Zoram Mawitu’ (p.113) a ‘Nîmpata’ a tih kha a ni mai thei. Zo thing, a ram chhuak ni lo, ram pawn atranga an lak luh a ni ngei ang. A thra duh hle a, zawi zawiin, kan hriat loh hlànin, a ram thingte pawh a chimral hun a lo la thleng lo ang tih tu nge sawi lawk ngam ang? A hnu lawka ka tawnhriat hian a sawi fiah hlein ka hria. Kal zel ila.

Chhangban Vs. Puri

Mizoram ka luh veleha ka tih duh leh tum hmasak ber thrin chu kawnglawng phuta siam ngei Mizo chhang, chhangban kan tih bawk, ei a ni. Chu chu ka tih chuan Zoram thleng tak tak ta-ah ka inngai thrin. Mi rawn hmuaktu, pa ropui L.H. Thanga rawn tirh Zâma nen erpawt bula hotel leh restaurant awm zawng zawng a hmatiamin kan zawt a, mahse pakhat mahin an nei lo tlat! Kan kal chho zel a, kawngpui bula awm thingpui leh chaw dawr inhawng kan hmuh apiang, nîngzu luanna Rangvamual pelh rakin, kan zawt zel a, mahse kan Mizo chhang kha Vai ‘puri’-in a lo luah lan vek tawh si! Ngaihtuah a tisei khawp mai. Kan hriat loh hlànin, chimralin kan awm mek zêl zawng a nih hi! Korean film zùna uai emaw, Kasauti ât chilhtute pawh hian kan dinhmun inhre chiang ngat ila chuan, chawp leh chilha kan sim nghal ka ring.

Aizawl la zin ve lote hriat atan, he Rangvamual kan sawi hi Lengpui/Sairang kawng, Aizawl thlen hmaa khaw pakhat, Kana khuaa Isua thiltih mak rinawm taka an chhunzawm zelna hmun lâr a ni. A khaw hming putu leh a chhunga chengte eizawnna hi a intu lo hle. Mizoramah chuan rangva hi rangva a lo ni vek ngawt lo. In leh rui thei pawh a lo ni! He khua hi Zofate'n lemderna tlang kan chuan sân tawhzia leh lemchan hi zah nachang kan hriat tawh lohzia hmaichhana min hrilhtu leh kawktu a ni. Hemi hmun hi khapna dan siamtu kan pawlitisiante leh an sangawi zawnpuiten an tlan pelh chânga an hlawhchhamzia inngaihtuah a, zah nachang hria a, insiam thrat zai an rèl hma chuan kan Zoram-ah hian khawfing a chat ngai lo ang. Hmasawnna ram pana ke kan chheh dawn tak tak chuan duhthusam ram hi kalsan a, tak ram hmachhawn ngam a ngai. Khap thila kan pawlisi leh Pathian Eden pawlisi kan sawi fo mai hi a intu lo.

Rimawi Rûnah

Chhun pachang, Sardarjiho ‘bara baje’ ah Aizawl Ramhlun North-a ka innghahna tur ‘Rimawi Cabin’ chu ka thleng a. Zoram khawvelah ‘Zalen Cabin’ pakhat chiah a awm angin, he ‘Rimawi Cabin’ pawh hi Zoram khawvela rimawi cabin awm chhun a ni mai thei. Zalen Cabin chu a awmna tur hliah hliah hming pu, Aizawl ‘Republic Veng’ atranga mihrâng R. Vanlawma'n (1915-2006) Zofate tana a hmathlir leh duhsam, zalen tak leh huaisen taka a pau chhuahpuina, râp in tlawm leh ropui, hmuhsitawm leh zahawm a ni. Chumi chanchin chu Zoram Khawvel-3 (p.113-119) ah chipchiar zawkin ka ziak tawh a.

‘Rimawi Cabin’ erawh hi chu pate lian leh huaisen, sumdawng thiam (L.H. Thanga Enterprise neitu), Zopa rilru dik tak pu mi, kawm nuam, thrian leh hnam chhana thih ngam lu pu, sakhaw mi ni lo, mahse Pathian trih mi tak, rimawi ngaina mi, Aizawl tlanga Music Studio hmasa ber (Jeetei Recording Studio, 1979) trantu, Zoram Khawvel-3 a a chanchin tlêm ka ziah tawh (p.92-93) Lianhmingthanga'n (L.H. Thanga) a in châr lama rimawi nena inkawm paha chawlh hahdamna (sanatorium) pindan fâl a siam chu a ni. Mafaa chuan hmu se, î-hê loin, ‘Chawlhna Tuikam’ a tih duh ngei ka ring. ‘Rimawi Tlaitlàn’ emaw ‘Rimawi Paradis’ emaw pawh ti ila, a sual lo ang. Ringtuten thih hnua chatuana kan tih tur nia kan rin leh tih hlân kan nghahhlel êm êm chu tawptai awm loa rimawi rem a ni a. Chumi tehna funga teh chuan, ka thlenna pindan hi hmun thianghlim, van ram tla fual a ni.

December 2008 khan hemi Rimawi Cabin dintu lung dawtah hian harsatna a awm avangin Aizawl tlang atranga Zingvawnzawla pêm turin hawilo par a thliak hman threlh a. Kolkata-ah an thlawk thla thuai a, BM Birla Heart Research Centre-ah an zai a, lung dawt thar an vuahsak a, Hringlang tlang chuana lunglohtui in hman lo chiahin an hnûk kir leh ta a ni. Daktor-in hna hram thawk tawh lo tur leh nuam tak leh hahdam taka hringnun khalh dêm dêm tawh tura an chawh avangin, Manipur chhim thlang biala gospel a luhna zabili (centenary), kum 2010 khan he Rimawi Cabin hi a din chhuak ta a ni. Harsatna hi mi huaisenin an tawh hunah thil thar thra zawk an hrin chhuahtir zêl zawng a lo ni.

He Rimawi Cabin hi in chung chhawrdawh, chhungkaw awmna thama zaua rimawi bûkthlâm fal nalha an sak a ni a. Chhuah lamah zawl zau tawk tak, pangpar khawina tur leh puan phona hmun, thlasik huna ni lum aina tura duhthusam a awm a. Ni a chhuah chiahin nui hiauin nizung mawi chuan mi rawn chibai nghal a. Chhak lam han hawi ila, tlang hrang hrang mu khup maite chu a rawn chhun a, hlim hmel puin an tho sung sung a. A khat tawkin threnawm ârte'n lawmna hla, an kumkhaw Halelujah Chorus chu, an lo rem bawk a. Zing thli fim thaw heuh heuh chuan bialnute trâng vûm mawia min nêl ang hian mi rawn thawi a, nuam ti lutuka trim ur urin kan mur suau suau a. A nì, hetiang hun hi alawm, lungsi taka van leh khawvel a infawh hun chu ni. Kum 1973-a Hmar trawnga ka lehlin, tun thlenga ka la khawih leh hman loh, kum 1913-a Rabindranath Tagore-an Nobel prize a dawnna Gitanjali–a tlar hmasa ber, “Thou hast made me endless, such is thy pleasure. This frail vessel thou emptiest again and again, and fillest it ever with fresh life” tih thu hian hriat loh ram ata mi rawn dêng dawt mai! Chumi khawvela inpawlna chu a chhimtute tan lo chuan hriat thiam mai rual a ni lo. Chumi ram hlimthla chu Rimawi Cabin tukverh atrang hian a lang asin.

Rimawi Cabin-ah hian duh hun huna pindan tihvawhna airconditioner thra tak leh kawlphetha mumal loh chânga chatlak loa hman tur UPS vuah a ni a. Tlâk lamah khum pakhat, a chhuat laiah thingrem-dawhkan lian tak, a sir tuaka hawn theih, rikawt hrang hrang dahna, a awm a, chu chu chhim leh hmar lamah sofa nalh takin a karcheh a. Chhuah lamah almaira leh dawhkan inkawpa siam a awm a, chumi chungah chuan TV, record player leh amplifier chi hrang hrang, hman lai, tun hnai leh tun laia an hman chi leh loudspeaker (ríkä) chi hrang hrang a awm a. Kan naupan laia an hman thrin gramophone, thingremzaithei, ri lo chhuahna dawt pawh tawtawrawt lu anga parh arh, a rikawt phêk tihvirna thirvial (spring) herh ngai chi pawh a awm bawk a. Saptrawnga hla rikawt chi hrang hrang, abîkin 1950-1990 inkâra hla lâr zual, analogue records leh digital records hla sing hnih chuang a awm a. Ka LP (Long-Playing, 33 1/3rpm records) pêk tawh ringawtah pawh hla 1000 chuang daih a awm. Western music zir duh tan chuan he Cabin hi miuziam chhenfakawm leh miuzik ngaihthlak paha chawlh hahdam duhte tan paradis leh tlaitlàn nuam a ni.

Analogue recording leh digital recording sawi takah chuan a awmzia kan hriat theih nan a tawi thei ang berin hrilh fiah tum ila. Aw ri, chhuah leh theih tura lak dan leh khung dan hi chi hnih a awm a. Pakhat chu analogue recording a ni a, a dang chu digital recording an ti. Analogue hi chi hnih a awm a. Pakhat chu shellac emaw vinyl emaw hmanga siam, a phek kual, hriau hmanga ri lo chhuak a ni. Hei hi kum 1940-1950 bawr lai khan a lâr hle. A dang chu magnetic tape, Germanho hmuh chhuah a ni a, 1950-1980 lai khan a lar hle a, chu chu Keset (Cassette Tape) kan tih, Kawl trawnga ‘khui’ an tih hi a ni. Chu chu zawi zawiin Compact Disc (CD) in a rawn thlak a. CD hi Digital Recording an tih tak chu a ni. Hei pawh hi engemaw hnuah a aia thra zawk leh hman awlsam zawkin a rawn thlak zel dawn a ni. Tunah chuan internet hmangin boruak laibrari-ah thu le hlate hi duh hun huna lak chhuah mai theih tura dah a ni tawh asin!

Rimawi Cabin-a Sap hla rikawt awmte hi Vinyl Records (Analogue) leh CD (Digital) vek a ni. Hemi bakah hian VCD tam tak a awm bawk. Mahni in bula sihneh kung awm, duh hun huna lak chawp mai theih ang deuh hian a ngai a ni ngei ang, Rimawi Cabin lumtu hian a library-ah Mizo hla a dah ve tlat lo! Mizo hla, abîkin sakhaw lam hla, ngaithla duhte chuan a intèknu Khûmte-i (Zothankhûmi) tlawn thrat mai tur a ni. Ani hi nu fel, fing leh zaidam, ni tin nuna kristian a nihna ziarang phur chhuak mi, an pa-in ‘Kan KTP nu’ a tih ngam ngat, chhiarkawp leh accounting thiam, an sumdawnna lama buaina a awm apianga an account ching feltu a ni a. An fapa Lallawmkima Zote (a pa-in a pan laia hming lema Sukrama tia a koh thrin) pawh 2011 January Session-a Rashtriya Indian Military College (RIMC), Dehradun-a lehkha zir thei tura thlan chhuah ngat leh tuna zir mêk a ni.

RIMC sawi takah chuan tlêm han sawi belh ila. Hemi campus hi acre 138-a zau, sipai ofisar lian ni tura mi thiam fâla ngaih an buatsaih lawkna hmun a ni. March 13, 1922 khan Prince of Wales-in a rawn hawng a. India zalen hnua Chiefs of Army Staff pali (4) leh Chief of Air Staff pakhat te chu hemi college chhuak hi an ni. Zirlai 250 leng a ni a, teacher-student ratio pawh zirtirtu pakhatin zirlai 12.5 zel a enkawl a ni. Kum tin thla ruk dan, January leh July ah zirlai 25 zel an la a, State lian 6 (UP, Bihar, Andhra Pradesh, Tamil Nadu, West Bengal leh Maharashtra) te'n seat 2 threuh, State dang zawngin seat 1 chauh an chang thei. Class VIII atrangin an la tran a, an lâk hun (01 Jan & 01 July) ah kum 13 aia upa an ni tur a ni lo. Kum nga chhung sorkarin hnianghnâr takin ei leh in leh thiamna lamah a thlawnin an chawm tawp a, mi nihlawh chungchuang an ni. Pawl-12 an zir zawh hunah an tuina lamah threuh an kaltir a, mahse kum nga an zir chhungin an rilru an hmin hneh avangin sipaiah mi tam ber chu an lut chawk. Hemi luhna tur hian a tira State tana chan an ruatsak bâk eng konseson (concession) dang mah a awm lo. Chumi chan luah phâk tura Rimawi Run-in fa a hrin chhuah mai hi Zoram khawvel, ‘Rimawi Ram’ ta'n malsawmna ropui tak, ri mawi hlimawm leh chhuanawm, hnehna hlado a ni.

( *Pu Keivom is a retired Indian foreign diplomat and author of ‘Zoram Khawvel’ series. March 25, 2011, Delhi)