ÂR THIL HMU

By Pu Zarzolien Keivom

Mi var chun Lalpa a tri a, suol a fe hmangsan hlak, Mi invet ruok chu a’n sukhuoi a, a thaw nok nok hlak.

(Thuvarhai.14:16).

Ei thupui, âr thil hmu ti hi la hang hril fie hmasa phot ei tih. Âr hi ran danglam tak le hawdâk tak el an nih. Thil danglam deu an hmu pha leh en chieng tum ni awm fahranin an hnai dèk dék hlak. An ta dinga trium a ni di’m ti khom ngaituo nachang hre lek loin an hawdakna lungrilin a fen peia, sanghar dam an lo ni pal hlauh chun an thi pha hlak a nih. Chuong ang deuh chun mihriem khom ku hi thil danglam deuh ei hmu pha leh ei âr thil hmu ta hlak a, ei hawdakna lungrilin mi fen peiin, taksa ta dinga sietna le thina chen mi’n tlun theitu inrui thei chi hrang hrang suoka dam a mi fen lut hlak. Insukhuoi a, thil ngaithà hi mi invet thaw dan a nih ti hrein, suol tlansan pei dingin Lalpa tri hlak ei tiu, “Lalpa trina leiin m’in suol a pumpel” (Thuvarhai.16;6).

Pu dinga ditum lo tak laia pakhat chu ruihlo hi a nih. Pu-a ruihlo nei taphotin an pu ta dingin ieng thil khom thaw rin an nei naw a, an pu neka hmangai lem khom an nei nawh. An pu ta dingin ring an um a, a hming leiin inrûk le khêlhril an poisa naw a, a sun a zâna chêng hmunkhat an chàk ngawi ngawi hlak.

Mihriem hringnunah tleirawl hun lai hi hun poimaw, nun inthlak thleng hun a na, thä a’n thakin ei hawdak bik. Miin thil danglam deua an ngaihai dam hi insukparâpa thaw a, mi neka chung chuong lem ni dam ei chàk hlak. Thralai tam takin hi hun hi chîk taka ngaituo nachang hre loin an um a, thil danglam deuh an hriet le hmu taphot chu âr thil hmu ang elin an hnai tiel tiel, a tawpah inruithei chi hrang hrang chângah an inawk hlak a nih. An thaw suol ti an hriet pha hlak chun a lo inhnu ta hlak si. Esauin a naulutir nina bu voi khat fâka a zor ang elin, insirin trap ngawi ngawi hai sien khom umzie a nei tak tak thei ta ngai si nawh. Insung suktlarantu le khawtlang ta dinga mi hnoksakum chauh an hung ni ta hlak. Uoiin hi nuizabura mi siemtu a na, zu hrât chu insuol khekna siemtu a ni leiin zu dawi veta um chu a varthlàk nawzie thu Solomon chun a mi hril (Thuvarhai 20:1). Khawvelin a trìsim ruihlo ngolveina khom hi zu laibung bul a ni leiin hieng thila inthoka ei fihlìm theina dinga damdawi thra tak chu Lalpa tria a thupek zawm hi a nih.

Pathien ditzawng ti chauh naw hi chu thil a taluo kaia thaw hi a thra ti ding a um nawh ti inla, ei hril suol ring a um nawh. Chuong ang bokin kohran pawl ei tam taluo khom ku hi a thratna nêk daiin a sietna hril ding a tam lem ti hi a hre naw sam ei um ring a um nawh, Chu lei tak chun Hmar Christian Leaders Forum khom hi ei indin nin a’n lang. Chung tienga inthoka varna hung tla pasarihai laia a pahnina ngirhmun hiel hluo ve phak, inremna a zong a, ti le, remna siemtuhaiin inremna chi an tu chu felnain a pàr suok hlak ti dongtu le changtua inngaihai hin ieng chi hrim am ei tu ni tâng a ta leh?

Ei hnam mi tlawmte lai kohran pawl khaw tinah kutpar thlieka tiem khop zet ei nei hih ei inrem nawna leia inngir vong ni lo am a ni?. Ei pawl tam ku hi do dan thiempa Setanin remchanga hmangin pawl le pawl intaina ralthuomin a mi kap hliem a, chu chu Lal rama ei rongbawlnain nasa takin a konkawpui a nih. Chu bak khom chu ni loin, ei hnam le ei chengna ram ta ding chena thrangmawbawk a’n chang pha bok niin a’n lang. Tu theida lo ding chun pawl inthre hrim hrim chu chunghnung lem inchuna leia suok vong a nih. A kaikuongpa rorel chun Robert le Coleman khan pawl inthre ding kha lo âr thil hmu thaw loin, Lusifar hmel kha lo bi chieng lem hai sien chu, a tu lem lemin amanih Krista inngaitlawmna lungril nein inkei kieng an ta, tuta ei ngirhmun ang em em hi chu ei ni kher da’l thei.

A poi ta ngei, pawl inthrena hrikin ei hnam lai zung a kei inthuk pei a, tam takin pawl ei inruipui a, ringna chen inruipuiin, ringna tum tumin ei kohran le hnam lai ram a lâk lien deu el chu niin a’n lang. Eini lai setanin ram a lâk lien po leh pawl edik le ringna edik pung ei ta, kohran pawl khom ei pung pei el ding chu ani awm hih. Zu le drug edik hai ta ding chauha Rehabilitation camp siem loin pawl edik le ringna edik camp khom siem ta inla, a thra hiel ta naw dim a nih ti khom hi ngaituo tlak nin an lang. Mani mita tlungpum hmu mang loa mi mita hmunhnok chi te lak dawk tum hi bansanin, mani nina seng inen chiengin, mitna hlo inchaw dingin Isu kuom tieng feng ei tiu.

Pathien ram le ei hnam ei ram chena a la konkawpui zuol pei ding awm hai chu ar thil hmu thaw loin fimkhur taka thlir malam peiin, inremna chi tu seng tum ei tiu. “Zirtirna indik an ngaithlak pei naw hun a la hung tlung ding a nih. An nuom zawng ngaithla ding le an na ver zawnga hriltu ding zirtirtu tam tak an fiel khawm hun la tlung a tih. Thutak hre dingin an na sukset an ta, pipu thusim tieng na daw lem an tih. Nang ruok chu iengkimah thluok fîm ta putin um la, harsatna tuor fan fan la, tirko sinah inbûr la, i rongbawlna sin kha hlen rawh”(11 Timothe.4:3-5”.

Ei hnam le kohran lo indar ta hnung hi ei inpumkhat theina ding um sun Local church inngir ding le tungding dinga Krista lungril inngaitlawmna le thuhnuoirolna nei a, Lalpa kuom tieng ei kir nawk chun, kei nawia umin, pawl tam taka thre darin lo um tah ni inla khom, mi sukdamin mi tungding nawk el a tih.

KEIVOM RUN, 4 March 2011.