Hlawtlingna hi iem a na?

By Pu L.Keivom*, Inpui Columnist

Success is a journey- -John Maxwell

Kum sawmthum liem tah, April 10, 1974 khan Room 209, External Affairs Hostel, Curzon Road, New Delhi-a ka um laiin thusep sei deu el, BEISEINA KHAMHRUI ti ka ziek a. Thusep ka ziek lai chu tiem hlaw tak le sermon khom cho suok rawn tak a la ni ka ring. A sunzomna BEISEINA KHAMHRUI-2 khom ziek ka nuomna le tumna a sawt ta hle a, tu chen hin ziek loin ka la um zing a.

BEISEINA KHAMHRUI a ka chang thlang tak chu Robert Louis Stevenson hril, “To travel hopefully is a better thing than to arrive, and the true success is to labour” (Beisei taka inzin hi tum ram tlung hma nekin thil hlimum lem a na, hlawtlingna indik tak chu sinthaw a nih) ti hi a nih. A sunzomna ka ziek tuma ka thu buon ding chu a thu thre nawi pahnina, a chunga thupui ei tar lang hi a nih. Ka paina a sawt ta leiin a thring zawnga ngai nuom chun thring tak a ni tah. Amiruokchu, hi thu hi thu thring thei lo le ngharêk thei lo, suk le tunga mihriem ei inlon sung chu indik zing ding, thu rangkachak a nih. Tuta ka thaw tum tak chu sermon thlak loa a thu tlangpui chauh Sura favang lo ena bi chieng hman loa a thlira thlir thuok a nih.

Hlawtlingna hi ei hrilfie dan inang naw rup a tih. Kum iemani zat liem ta khan mihaiin ‘hlawtling’ tia ei ngai hi iem a na ti le a sana mihriemin ei ngai zong suokna dingin SUCCESS Magazine-ah Gallup Poll an nei a. Chu taka ngaidan thaw khawmhaiin hlawtlingnaa an ngai tlangpui sawmpahni laia chun mi zaa sawmnga parietin (58%) HRISEL hi hlawtlingna sanl poimawah an ngai. A poimawzie chu hril tam khom a ngai nawh. Amiruokchu, hrisel hle lang, iengkhom thaw mumal nei si naw lang, mi hlawtling ka ni thei ding am a ni?

Mi tam takin hlawtling ei inkhina chu HAUSAK a nih. Mi hausa chu mi hlawtlingah ei sie deu vong a nih. Amiruokchu, khawvela mi var tak le hausa taka Baibul-in a hril hiel Solomon chun, “Sum ngainatu chun sum dittawk a nei ngai naw a, hausak ngainatu chun a lungawina tawk a lam suok ngai nawh” (Thuhriltu 5:10) a lo ti a. Amerikaa mi hausa tontaw John D. Rockfeller chu sum ieng zatin am a lungawi ding ti an indon a, ama chun hniek phawi der loin, “A neka tam met” (Just a little bit more) tiin a don. Microsoft lalram neitu Bill Gates khom indon inla, chu tho chu a donna ning a tih.

Khawvela sumdawngna a tlak siet thut hun, Economic Depression an tran hlim, 1923 khan thil siem thrat dan ding ngaituo dingin Chicago khawpuia Edgewater Beach Hotel-ah Amerika rama hausa tontaw mi pasari- Charles Schwab, Arthur Cutten, Richard Witney, Albert Fall, Jess Livermore, Leon Fraser le Ivar Kreuger- hai chu an inkhawm a, chuonghai hausakna bel khawm chu a ram sorkar Treasury-a sum nek daiin a tam lem. Sienkhom, hienghai tawpna chu iem a na? Pathum chu mani an inthat a, pahni chu bat tam tak neiin an thi a, pahni dang chun lungin an nghak. Grik mi hausa Aristotle Onassis chun, “Iemani chen ei phak hnung chun sum hau hi a poimaw tak a ni ta nawh. A poimaw tak chu hlawtling a nih” a tih. An leh, hlawtling a ti chu iem ni tang a ta?

Threnkhat chun mi hlawtlinga ei ngaihai chu THUNEINA (Power) chel a nih. Prime Minister le Minister hai khom hi thuneina cheltu an ni leiin an chel lai chun an ropui bung bung annawm. Sienkhom, ieng anga dictator khom a tawpa chu mi theida an hung kai a, an tla tho tho. Minister tla tahai pheng hmel sietzie hi ei hmu ta seng ka ring. English historian Lord Acton chun, “Power tends to corrupt and absolute power corrupts absolutely” (Thuneina chun mi a sukhlemhle a, thuneina tawpkhawk chun a sukhlemhle tawpkhawk rawt) a lo ti a. America President lo ni tahai laia a hming hmai ngai lo ding Abraham Lincoln khomin, “Nearly all men can stand adversity, but if you want to test a man’s character, give him power” (Mi tin deuthawin harsatna ei hmasuon ngam laiin, mi tu khom a nina tak i fie nuom chun thuneina inchalaitir rawh) a ti bok a nih. Thuneina hi a cheltuin an inruipui deu vong bakah thuneina chun mi a sukkawrap a, a suksiet nuom. A tîrin thuneina chel thei ngirhmuna um hi hlawtlingna angin inlang sienkhom, a tawpa ruok chu sietna khura mi hnuk luttu a ni nuom rop.

Mi an hlim pha hlawtlingah ei ngai. Chuleiin, HLIMNA ei hnot a nih. Ei thil dithai nei thei chu hlimna le hlawtlingnaah ei ngai bok. Sawtnawte sunga ding chun a’n dik el thei. Amiruokchu, ei thil nei ta hnunga hlim nekin ei thil dit, ei la nei si lohai nei chaknain lungril a hluo rawn lem. Chuleiin, hlim hi hlawtlingnaa ngaitu chu a hlim ruolin a hlawsam tran nghal a nih. Kea lawn hlak chun saikal a’n hnar a, a nei charin scooter a’n hnar nawk a, a nei charin car, a nei charin vuongna, a nei charin thil dang. Kong khata chu dit zawng nei hi a letlinga hlawsam intranna bul ti thei a nih. A mak khop el.

Thil tum hlen hi hlawtlingnaah ei ngai deu vong. Lekha inchuktu taphotin Class X amanih Class XII thra taka tling chu inchuk zom pei theina dinga makmaw a nih ti ei hriet. Ei tling pha chu ei lawm hle. Amiruokchu, ei tling charin ei pan ding hma tieng ram hmu phak lo inzar chu ei hmu nghal bok a nih. Ei inchuk zom pei amanih, an naw leh thil dang tieng ei hnot a ni naw chun ei tum ei hlen suok ni, ei hlawtlingna ni kha ei hlawsamna ni intranna a ni nghal a nih. Hlawtlingna chu tum ram pana inzin pei a nih.

Chuleiin, hlawtling ding chun ei thiltumah chieng a ngai. Mi tinin theina zawng le inhnikna zawng ei nei seng. Ei theina tieng zawnga ei inbûr pha pha leh ei theina tawp insuoin ei hmang thei a, mi hlawtling ei ni thei vong. Chu chu hre chieng a, chuong tieng chu pana ei dam lai long khal ding a nih. Tum ram ei hriet naw chun inzin dinga inbuotsai dan ding khom ei hriet mumal thei nawh. Ei tum ram ei hriet chieng ruol peiin chu ram tlungna dinga ei inbuotsai dan ding le ei thil mamawhai chu ei hriet sap pei bok a nih. Chu ruol chun, Hebrai ziektuin a hril angin (12:1) tum ram pana ei tlan lai hin, ei inzinnaa ei hnoksakpui ding le ei kalchawi sukbahla thei thilhai chu ei thè thlak a ngai bok a nih.

Hlawtlingna tak tak chu tum ram pana ni tina inzin pei hi a nih. Hma tieng pana kal voi khat ei chawi zatin kal khatin ei hlawtling a na, kal za ei pen pha kalzain, kal maktaduoi ei pen pha kal maktaduoiin. Ei kal pen a chawl charin ei hlawtlingna khom a chawl ve el a nih. Chu lei chun annawm, THE SUCCESS JOURNEY ti ziektu John Maxwell chun, “Success is a journey” a lo ti bakah R. L. Stevenson-in, “The true success is to labour” a lo ti chu.

Fam tah Pu L.Rokung leh a chanchin ziekna, KA NUN ti kan buotsai lai chun, harsatna pik tak tak a ner thleng dan le vangneina a dong hai a hril hnungin, “Kei hi mi vangnei am ka nih mi vangduoi?” tiin zawna poimaw tak a siem a. August 22, 2003 zan tienga hlim taka kan inpawl tlang laia muol a mi liemsan chenin, chawl la loa hma tieng pana inzin pei mi a ni leiin, keiin ka hmu dan chun, mi vangnei tak le mi hlawtling tawp a nih.

Mani chanchin tlawmte hang zep inla. Ka penson hnunga ka hun hmang rawnna tak chu Baibul inlet a nih. Beipui ka thlak tak tak lai chun dannaranin ni tin darker 12-16 sin ka thaw a, darkar 18 ka thaw chang khom a tam. Kum sawma mi thaw hlak kum khata hlen zo ka tum tlat leiin mi thaw let sawm ka thaw a ngai a. Chu chu mihriem theina le hratna pangngai ringot chun thil thaw ruol loah inlang ni sienkhom Lalpa hratnaa thaw thei ngei inringna le tumna ka nei tlat a, chu ding chun ka’n pek top a, kum thum le thla sari sungin ka hlen ta reng bok a nih. Delhi Version-a thumal um zat hi 865754 a na, chu chu Zoram Khawvel bu 30 neka tam bel khawm ang hu a nih. Chu umzie chu thla khat le a chenve dan peiah Zoram Khawvel bu khat ka ziek zo ang tluk a nih. Chuong anga hrat chun tlan thei dingin a hma khan ka lo inring ngai nawh. Sienkhom, sentence khat ka’n let zatin sentence khatin ka hlawtling a lo ni si. Sekhon le minit tin ei hmang trangkai pha darkarin umzie a nei a, darkar tin ei hmang hlawk pha ni tin ei hlawtling el a lo nih. Ei hmang trangkai naw ruok chun ni tin ei hlawsam a ni nawk thung.

Delhi tlanga khawsa eini rawi a tam lem hi inchuklai an nih. Chuonghai chun hlawtling hi iem a na a umzie ti an hriet chieng ka nuom bek bek a nih. Kum tawpa an lekha inchuknaa hlawtling an tum chun ni tin le darkar tina an thaw ding a hmatiema an hlen pei a ngai. Ni tina an inchuk ding an hlen chun ni tin an hlawtling a na, an inthla dula an hlen naw chun ni tin an hlawsam tina a ni bok. An hlawtling darkar nekin an hlawsam darkar a tam lem leiin nuom angin ruol ei ban zo naw khom a hoi. Chuleiin, ei khawsakzie hi inbi chieng tum ei tiu. Hlawtling chu hma tieng pana ni tina kalchawi le inzin a nih.

*Pu Keivom is a retired Indian foreign diplomat and author of ‘ZORAM KHAWVEL” series.