Love and Sex: Living Together

By Lalremlien Neitham*

Nupa hril lo, thalai thisen lum lai, tha inza zok zokhai ta ding chun mingo hai style “Living Together” a um ve chu nuom a um ve hle ring a um. Tlangval ta ding lem chun tlaisuong a awl nghal a, puonsawp a awl bok a (hieng hai pahni hi nunghak/ nuhmei hai mawphurna bik a nih ka ti leia ka hung ziek ani chuong kher nawh), hang kuo lum tawt tawt ding a hang um nawk nghal, Red Cow hlak tlasam lo ding. Karei! karei! Anhawi hmel lawm lawm! Ei hang ngaituo ringot khomin zer a far tum el a!

Ka vangduoi ka ti di'm, ka vangnei ka ti di'm, ka room 8 feet by 8 feet te hi, AC hril lo, Cooler umlo na hmun, Fan hlak van tong vanga hang inkhai, an vir dan hlak chu nunghak hai le ei hang inpel phat a, an perfume rim inhnik ei hnarin a lo intem hman liet ang cho. Nunghak hai thawveng deu a hung umna chi an naw ning a tih, a lum bok, a ap bar el a nih.

A ieng iengkhom chu nisien, kei chun ka phak tawkah khawvel rinum hang tuor hi inhoi ka ti a, insuksekna le khawvel hrietthiem pha na'n ka hmang lem a, ka khat khomin inhoi ka ti em em. Mani khat a um hi anhawi ma ma chu a nih. Ei thawveng bok, mi mit meng veng ding hlak um bek bek lo, ei nuom chen chen ei meng a, ei nuom chen chen ei zal a, ei nuom chen chen sin ei thaw a, ei nuom chen chen khawlai ei leng a, tho inhmat a ngai leh, alarm clock (mobile phone le inkop) ei set a, fak le dawn hlak ei inruol, indemtuona le mit sir a inmelna hlak um lo. A kar chang harsat chang khom um sienkhom, huihah! heihah! ri a tlawm bawk. Khawvel hi ka roksai, tia faifuk hleu hleu puma hla sak heu heu chang a tam nuom hle!

Ei hnam khom a hung changkang pei a, khawpui a hai tam tawk tak ei um fur tawl tah a. TV, Movie le ei khawvel tong thar mek haia inthoka ei lak sawng pei le ei hringnun hung inthlak danglam peiin LIVING TOGETHER a um dam ei um nuol taa. Kongkhatah ei changkang deu deu tah, ti inkhinaa lo hmang nuom hai ta ding chun lo hmang thei ning a tih. Hienglai zing hin, a mimal khomin ei mimal thiemna le nina, ei zalenna hai chu ei hung hriet deu deu a, lawm a um khop el. Ka mimal le ei khawvel inhlum letdan tukver a inthoka kalo thlirdan chun LIVING TOGETHER chu a pawi ka ti bek bek chuong nawh. An hringnun kalchawi dan chu a living-together hai mawphurnaa innghat ani tlat si a. An hringnun va rel khum pek tumna hi an fuk rak nawna a umin ka hriet lem.

Chuonglaizing chun, zawna mania indon dinga ka dit chu – ei society (a pum huopin) hi LIVING TOGETHER pom thei dingin a um ta'm? ti hi a nih. Delhi le khawpui dang a hai chun lo OK nisienkhawm, veng nei ei ni seng leiin, veng tienga mihai chen khom ngaituo a hung ngaiin ka hriet tak meu. Ei khuo le veng tienga mi hai ta ding chun (a bikin ei nu le pa hai) thil rapthlak tak tling a tih. Veng tienga ei thalai hai chu an fel bik ei tina ani nawk der nawh. 'Morality' inkhina hmol um sien, khawpui a mi hai nek hman hmanin an tla hnuoi ring khom a um hiel. Inthak khom an inthak ol a, kum tlinglo a innei khom an tam a, XPerience khom an nei tam lem rawi mawh! Pu Dr. FT Hminga thuvar “Thingtum anga” um chut chu ani kher di'm chu leh! Proof ei nei sinaw leiin ei hriet ta nawh.

A ieng iengkhom ni nawk sien, 'morality' tha le thanaw inkhina chu 'society' thil lo thlirdan hi ani deu tak hlak. “Living Together” khom ei umna society le khawvel inmil a, ei cheng ngai mei a tih.

*Dated: New Delhi, Fri, 20 May, 2005