Gospel Centenary Celebration (Guwahati) Phur a Um Nawh

By Pu L.K. Varte, Guwahati, Assam
Gospel Chanchintha Centenary lawmnaw ei ni naw a, Guwahati Gospel Centenary programme namnul programme hi lawmluithei annawlei lem a nih.


Asan tlangpuihai:-

Hmar nauhai mihai lai ah suong ding iengkhawm einei ve naw lai khawma unauhai mi hmusit theinawna chu Kum 100 liemtah hnunga khan, Senvawn Hmarkhawpui ah Gospel Chanchintha hung chawk lutin Chanchintha Mansapui bangna eini ve tlat lei hi anih. Hi Chanchintha thilthawtheina lei hin, ei phak teulo ding, ei ban phak teulo dinghai ban phakin, eium ve theilona dinghaia bu` khuorin Guwahati Brahmaputra Valley laiahai chen hin umhmun det neiin eilo chengve hiel el an ta hih.

1) Nisielakhawm, Gospel Centenary Celebration, Guwahati programme GHCF hminga siema um hi hang bi vuot khawmin, Hmar nauhai a huoihawttu nibawk, Gospel Chanchintha khuoletui hmasa nibawk, Hmar hming inlangna hrim a um nawh. Ei I suong ve dinga Lalpa Pathien in hnam ami pek hi eiinzapui am a nih?.

2) Ei Hmangna ding State Assam le a hmun Guwahati hi Gospel Centenary an hmangna asawt takhawp`el; 200 years an phak vang an tah. A programme hming – Gospel Centenary Celebration, Guwahati ti hin mipui an buoi anih. Guwahati Hmar Worship Service/Hmar Christian Fellowship, Guwahati Centenary hlak chu ala ni bawk si nawh. Iengleia Hmar hming ei zepsa ngam naw am nig ata?, annaw leh, kum 100 ei ilawmve tum tak; Manipur South Gospel Chanchintha Centenary Celebration ei ziek el nawm ana?

3) Chanchintha lungphun eilo tumve a khawm hin, hi Gospel Chanchintha Centenary andik takpa hi ei ziek naw chun, alungphuntu leh, a hawngtu leh, ala hung tiempeihai ta dingin, buoina lungphun la hung ni lem a tih.Ei inchawm hma a ei tlakna ding enfel tha hleng a tih.

4) A programme hi Saptawng (English) programme ani awma, a changkang rura hmel khawp`el. Lalpa Isu Krista thlatubul, Lal David chun, tar- lezurhai, nau-nuhmei le nau-pasalhai nuhmeihai thang lovin a Lalram a hluo nuom naw a, A Lalpa kuomah, “Hnawt lang hnawt phak ka ti ?”, tiin Lalpa a insukhratin, Lalpa hnena in a kuom tieng a thouikir vawng a ni kha!. Ei programme a hin chu numawl le pamawlhai, naupang school/college hung kai thei tawktawk hai ta dingin lalpa thlarauva hlim an taka wm ngawt`el.

5) Ei hmangna ding Hall hlak chu a changkang rura, ei Fellowship khawma Concert na a ei hmang hnung a ni kha, Stage a Performerhai chau naw chu, inhmu ngaina khawm umlo, I hung le I hungnaw ka hriet naw ang bawkin, ka hung thang le ka hung than gnaw hrie naw ti nih.Pawisa indeinaw zinglaia ding chun per day Rs.25,000/- x2 =50,000/- + 10,000 to 20,000/-chu a tam taluo naw am anih?. Gospel Chanchintha mi hung elvartu, Thlarauthienghlim hung tlunga, Halelui dupdup chu tumtak khaw nisien a hawi naw ngei. Ei Inkhawmna Biekin GBC hai dam hi ei lunga tlu thei hlawl nawl a ni?

6) Chanchintha Ruoi ropuitaka the ding eiin sawnlaiin, Political leader le Hindu kulmut Vai Minister in ami hung Chief Guest khum ding nawk nghal, Hon`ble Minister hin ieng thlarau am hung phurlut tang ata, ngaituo tham tak a nih. Annaw leh, ei hotuhai hin mani hmasieltaka anlo fiel ellem ama nih.

Programme Page 2

7) GHCF hai ei vangnei emem a, Pastor 04 ringumtawk thelthawl, Hmar lai chau nilovin NE States Christian community laia khawm hming neithei thal, thlaraua dangcharhai, phingtamhai sukkhawp hlaktu, thlarau inhmanghai sansuoka, mi-tluhai keitho hlaktu ei neia, kohran Upa ordination chang tah 03 le Upa thlangthar 01 einei bawka, Local Committee ( Executive Committee ti a kove ngat) mi 08 dang eium bawk. Executive Chairman, Executive Vice-Chairman, Executive Secretary, Mission Board Chairman, Evangelism Chairman, Treasurer, Finance Secretary, Property Secretary; Thalai Leaders; Nuhmeipawl Leaders hai a ko kha ei nia. Amiruokchu, ei Program enin Dr.(Rev.) H.M. Songate in Day-I Leader First Session le II Seesion Leader an hlawma, Day II Leader I Session ah Leader : unau Kukihai Mr. L.L.Khongsai, Kuki Worship Service, Guwahati le II Session ah Dr. C. Chonzik hai an nih. A programme details hi bi chieng taktak chun hmelhrietnaw-karhla mihai an tam ngei; Serampore Bible College chen ei suk phak a nih.

8) Guwahati Hmar Worship Service (now Guwahati Hmar Christian Fellowship) lo indintuhai Gospel Cenetenary Celebration Committee a hin ro`lerangah theinghilin an uma, Committee Black-Board list ah an hming zieksa anni ve nawh. A salam tlak le vai hnung-rama an hming committee member a inchuonve nihai sienkhawm an thu a fe ta naw a, Gospel Centenary Platform ah ngaidan tha hrilna ding chance pek anni ve ngai naw bawka, “ruot ta chu ruot tah, ti ta chuh ti tah,” tiin, namnu`l program a hung inching an ta hih. For example; ei zo tawk ding program a ngaidan, mi-fielna thuah, lungdaw-thu ah, a hmangna Hall ding thu ah le a dang dang ah Celebration Chairman le Secretary (the then, Executive Chairman & Secretary, GHCF) ngaidan naw chu a fe thei hlawl nawh. Souvenir– article thu ah lem chu iengkhawm ei hriet hma`in a cover ding iengtin am, a dang po chu zo vawng an tah, an zo vawng ta hnung hai hi ngaituo thar thei an ta ngai nawh.

9) Finance thu ah eiin chek emem el – Annual General Meeting a Budget chengkhat khawm belsa theilo, Executive in tul le pawimaw ati hlea, lo theilo thila ngawtnaw chuh suk danglam lo ding ti hlak kha, ei baw-pel ta vawng. Programme siemna dinga Rs.10,000/- limit chu Rs.17,000/- a bul tanna a hmang nghal a hung ni ta a, Uniform Rs. 1 lac chuong nita a hriet anih, Hla inchukna Rs.30,000/- khawma deilovin, Thalai Founding Day (12/09/2010) ni khan envelope semin, thlaihai inkhawmna ah donation dawl nawk hiel a nih.

10) Invitees : mi fiela umhai hospitality inruoltakin (uniformly) ei pek thei dim!, a then Bus ah, a then Vuongna ah, a then train ah, duot bik le duot lobik um ta ngei an tih. Umna thu ah ei fielhai popo intlungtirna ding le an fak le dawn dinghai hi, huphur aum ta baka!. Ei Fellowship Hall, Lungphunna ding hmun le ei hmangna ding ITA Centre inkar ringawt kkhawm hi Guwahati khawtawp le tawp, transport a buoi thlak awm khawp`el; banphar dinga Altar-Call ei thaw laia hlimlo banpharhai khawm thangtlanga, theitawp eisuo ve angai an ta hih.

Conclusion: Hi Gauhati Hmar Worship Service (GHCF) hi Mizo Service le Zomi Service a inkhawm zinglaia, sel tung-selhla a, ei tlangvalhai anmi phurpui ei nuom luotluota, Tv. Thanghlun inhluo ah 6^th September,1992 (Sunday) a khan tan chawtin, Upa L.T. Hmar, FAO, Govt. of Assam Guwahati a hung training lai Chairman a lo hmang le Family a inhluo hmasa Pu L.K. Varte, Secretary le Pi Lalromawi Varte, Treasurer a hmangin lo tan a nih. Pathienni vawihnina Thanghlun a umnaw leiin, Pu L.K. Varte Inn Kharguli ah in sawn tungin, chutaka inthawk Satribari Church ah, kum 2 hnungah Christ Church, CBCNEI Auditorium Hall, chuongang peiin, GBC ah insawn tungin tu chen hin GBC a hin inkhawm ei ni a, intheinghil rumrum khawpin ei hung pung ta ani hih. Ei in dinna santak chu Hmar nauhai le Hmar tawng hmang ve le hmang theihai ta dinga Plat-form ni fawmin, mani tawng ngeia Gospel Chanchintha ei kuoma peka um hi Van nghawr phak ding khawpa Pa Pathien hang Worhip ve hi anih. Students Guwahati a hung thlang-thla hai ta ding bik tak khawm a indin a nih. Tuhin, hung lien peiin, Guwahati Hmar Welfare khai khawmtu niin, HSA Joint Hqrs. le Guwahati Hmar Christian Felloship chen hung indin suokin, tlinle tlinlovin unauhai ta dingin thei ang le tlintawka thale`zung eilo seng ve hlak anih.. Hieng pathumhai hi Guwahati Hmar mipuihai inkhai khawmna ani leiin ei Hmar nina Identity hi humhal a tul hle a nih.


*About the author: Pu Varte is the founder member of GHCF and Chairman of GHWA