Sandamna a bo thei am?

By Pu David Ralsun

John Wesley le John Calvin hai ngaidana inthawka inchuk ding.

(Sandamna hi Pathien thil tlawnpek a nia, nisienlakhawm mani dittlangna ngeia Pathien ang sunga inthawka fe hmang thei a nih)

Sui inthuk taluo lovin John Calvin le John Wesleyhai ngaidanah hang lut nghal el ei tih. Hmar kohran (Hmar sunga kohran) hai a tlangpuia eiin thuruolna chu ‘sandamna hi a bothei ta naw a, chatuon a ding a ni tah. Mi vawikhat a piengthar tah chun a sandamna a bo thei ta nawh’ ti hi a nih. Hi thu hin mi a suktlamuonga, hlimna a mi peka, chu ruol ruolin thabona khawm a mi peksa bawk niin, tulaia ei Kristien nunchang-ah hin hmu theiin an lang. Sandamna a bo thei tanawh ti hmang uor tak laia pakhat chu, theologian ropui, Presbyterianhai hotupa John Calvin a nih.

John Calvin inchuktirna

John Calvin in iengleia hi theology hi an chuktir am ning a tih aw! ti hi I lo ngaituo ve hlak am? Nang le keiin sandamna a bothei tanawh ei ti ringawt hin, hi theology hung in intanna hre si lovin nakie lo huoi taluo pal ei tih ti hi inlau a um hle! Hi theology an chuktir nasan zuk thlir met ei tih.

John Calvin a doctrinehai hi TULIP tia inbuk a nia. T=Total depravity, U=Unconditional election, L=Limited atonement, I=Irresistible grace and P=Perseverance of the saints. A tawp taka ‘perseverance of the saints’ hi, eini haiin sandamna a bo thei ta nawh ei ti tak chu a nih.

John Calvin in ‘perseverance of the saint’ an chuktir nasan tak chu hihi a nih. Adam le Evi suola an tluk khan, mihriem chu sieletder (totally depraved) Pathien tieng kir nawk thei ta lo, a dittlangtheina tak khawm suol hnuoia um tah, suol naw tlang ding nei talo, mani khat a in samdam thei talo a nih. (Hi inchuktir na hi chu a tlangpuiin kohran tinin ei pawm ruol a nih).

Chu mihriemhai chu thina cho naw chu hmabak iengkhawm an nei ta nawh. Nisienlakhawm Pathienin mihriemhai chu a lunginsiet leiin, a then vanram kai din a ruot lawka, a then hremhmuna fe dingin a ruotlawk bawka chu chu ‘predestination’ ei ti kha a nih. (Hi thu hi Pu L.Keivom khawma article a hung ziek ngeh ngeh kha “ruotlawk” ti thupuia hmangin).

Chu a ruotlawkhai chu ieng angin lo suolin lo thanawin Pathien lo ngaisaknawhai sienkhawm, Pathien iengkim thawtheiin a ruotlawk an ni tlat leiin an sandamna a bothei chuong ta nawh (‘once save is always saved’) tiin huoi takin hi theology hi a khekpui tah a nih.

Anleh ieng leia Pathienin mi thenkhat a ruotlawka, thenkhat a ruotlawk naw am a na? tia zawna tamtak an in dawn chun. A dawnna hai laia tha em em chu, ‘Tu in am Pathien thilthaw chu hre suok thei a ta? Tu in am Pathien iengkim siemtu le neitu chu cho ngam a ta?” tiin a dawna.

“Nangteh ruotlawk I ni iengtinam in hriet a?” ti a zawna an pek nawk chun, ama ngei khawm a buoi hle a nih. “Who can question against the act of God?” ti’n a dawnkir thei hram a.

Hi hi lei tak hin a doctrine pahnina ‘Unconditional election’ chu huoi takin a khek suok pui nawk ta a nih. A umzie tak chu a san iengkhawm um lova Pathienin a nuompo a tlang dawka a nuom naw po a tlang nawh tina anih. Hi theology hi lovin dik te reng nisienla chu, Pathien ruotlawk a hin ei thangphak ve dim chu maw! Ei lo thangnaw a ni lem chun chu sandamna chu in hnem ding a um nawh. Ruotlawk pawlah ei thang a ni ruok chun chu ei sandamna chu ieng angin suolin, ama lo theinghil inlakhawm a bo chuong tanaw ding tina a ni chu.

John Wesley inchuktirna

John Calvin tieng dittawk tum ei ta, John Wesley’n iengtinam John Calvin a theology a hung kala ti tieng hang sui nawk met ei tih. John Wesley ve thung chun, “Grace..it’s all about grace,” ti hi a hung uor ve ta em ema.

Ruotlawk theology chungchang ngat lem hin chu, “Ruotlawk hi a loin dik a ni chun, ei Pathien chu lunginsietna a sip Pathien nithei naw nia, hmangaina bo Pathien ning a tih,” tin a hung khek suok ve thung ta a nih. Mihriem suola an tluk chungchang ruoka hin chu, John Calvin leh indanglamna an nei taluo nawh. Mihriem hi selailetder a nih. A khata in sandam nawk thei talo, bo a nih ti chu a pawmve a. Nisienlakhawm, hieng hin a hril ve thung. “Mihriem hi thil pahnia siem a nia, nature le image. Suola an tluk khan an ‘image’ Pathien an angna takhai kha a sie vawng ta a, ana chu ‘nature’ (an taksa le penghai) ruok kha chu Pathien lunginsietna (Grace) lei choin a sie ve nawh,” ti’n an chuktir ve thung. Chu umzie chu mihriem kha taksa le thlaraua thi ve ve thei an ni lai zingin, lunginsietna, Pathien lunginsietna lei chovin an taksa ‘nature’hai kha a siein a thi ve nawh tina a nih.

‘Prevenient grace’ lunginsietna hmahruoi (forerunner) ti hi a hung hmang uor nawk ta em em a. Chu inchuktirna chu hi hi a nih. Hi ‘prevenient grace’ hi mi po po, a chin a lien, a pasi hausa, Muslim, Hindu, Buddhist le mi po po kuomah Thlarau Thienghlim in Pathien tak zawngnachang hre nawk thei dingin sin a thawa. Chu sin thawna ‘grace’ lei chun mi po po in Pathien an hung hriet nawk thei a nih. Prevenient grace chu sandamna a ni nawa, sandamna dinga Pathienin mihai lungril sunga sin a thaw a ni lem. Sandam I ni hma a, nangah sandam ngai I ni ti in hriettirtu kha Thlarau Thienghlim sinthaw mitin kuoma angkhat senga Pathienin a lunginsietna a pek chu a nih. Chu tak chu ‘prevenient grace’ a ti chu a nih.

Hi thu hin ‘predestination’ ruotlawk Calvin in an chuktir kha a hung kal ta hmak a nih. Chu Pathien thlarau sinthaw mihriemin a lo dawng chu zawma Isu Krista tieng a suolhai sima a kir phat chun, Pathienin a lo ngaidam a, a nauah a lovin buk ta lem hlak a nih. Sandamna hi mi po po ta ding a nia, amiruokchu a ring taphawthai ta ding cho a nih ti an chuktir ve ta a nih. Chu sandama umhai chun an sandamna chu hun tawkah an ngai nawa, Pathien ang tumna (Christ likeness) anniah a hung pienga, chu thienghlimna nun chu hraw an tum ta lem hlak.

Amiruokchu, mihriemin ama dittlangna ngeiin Pathien angsunga inthawkin ama le ama a fe hmangthei ti hi an chuktir ve nawk thung. Sandamna a bothei ti chie naw sienkhawm, mani ditlangna leia Pathien ang sunga inthawka fe hmang thei a nizie hi a hril ve thung ta anih. Nisienlakhawm, hi an chuktir lai zinghin hi hi a hril ve thung. Chuonga mi a nuom thu ngeia Pathien ang sunga inthawka a fe hmang khawm nisien, insira, a suolhai sima Isu Krista a hung bel nawk chun, Pathien chu lunginsietna a sip ani leiin ngaidam ngei ning a tih, tiin a hril nawk thung.

John Calvin in sandamna a bo thei ta nawh a ti nasan le John Wesley inchuktir dan hi a dang rum rum khawpel. Calvin khan ruotlawk hai ta ding chun iengpo khawm lo thawhai sienla ruotlawk an ni leiin an sandamna a bothei ta nawh a tia; John Wesley ruok chun ruotlawk an um nawa, a ringnuom taphawthai tading a nih. Chu sandamna chu mihriemin ama dittlangna ngeiin Pathien angsunga inthawkin ama le ama a fe hmang theia ana chu Pathien lunginsietna a zau em leiin insira a hung kir a ni phawt chun Pathienin lo ngaidam nawk em em a tih ti an chuktir dan chu a nih.

Thu kharna

Awleh ei hang tarlang po a khin, thil fe dan chu ei hriet met chu ring a um tah. Abik takin eini North East context a ding chun, sandamna a bo thei ta nawh ti nekin a bo thei ti tieng hin inchuktir lem ta in la tha ngawt dingin ka ring. Ei Kristien nun hi hang en inla, Kristienhai ei umna naah suol a raptlaka, inthatna, fakrukna, uiretna, fornication le suol chitinrenghai hi maksan phal lovin a hnawtin ei hnawt lem tah a hoia.

Hienga Pathien sandamna olsam taluoa ei lak nasan ni dinga ka ring pakhat chu ‘Sandamna a bo thei ta nawh’ ei ti lei hi nita dingin ka ring. Wesley bawkin hieng hin a lo hrila, ‘Kristien I ni chun tum (goal) I nei ding a nih. Iem a na I thil tum?’ Ama in a lo tum chu, Isu Krista anga thienghlimna nun hrawve ngei kha a goal a nih. Pathien nauhai ei ni ta si chun, ei thiltum ding chu ‘Christ likeness’ Isu Krista ang ni tumna a nih; a thilthaw thei na ka ti nawa, a thienghlimna lem kha a nih. Sandamna a bothei ta nawh ti lei ela Bible tiem talova, tawngtai khawm tawngtai talova um ding a ni nawh. Piengthar tak tak eini chun, ei nunah danglamna um ngei a ta, thienghlimna nun hraw tum ngei bawk ei tih. Eini-ah Pathienthu tiem chaknahai, tawngtai nuomnahai, inpakna hlasak nuomna hai a um si nawa, piengthar ka nih eiin ti si chun eiin entha nawk hle ngai a tih. Sandamna inhrechieng tak tak a ni chun Pathienthu chakna leh ama ah hmuthei khawp danglamna a um ngei ding a nih. Sandamna a bothei tanawh tia luongmuong deua ei um lai hin Pathien sandamna ei lo chang naw khawm a ni el thei a nih aw! Annawleh, Wesley in a hril angin Pathien ring pei talovin ei ni dittlangna ngeiin Pathien angsunga inthawka lo suok hmang ve am ei ni tah? Chuong ei lo ni khawmin Pathien lunginsietna azau em leiin iengtiklaikhawm ama kuom tieng insira ei kir a ni phot chun a mi lo ngaidam ngei ding a nih. Pathien Thlarau thuoia umhai po chu Pathien nauhai an ni si a. Lalpan malsawm raw se. Amen.