Pastor Thangler (1886-1986)

Mizoram Champhai khaw kawla Lungdai khuoah kum 1886-in a pieng a. Naupang chikte a ni laiin Senvon-ah an inpèm a. Kum 1914-in Kristien sakhuoah inpe-in, 1915-in R.Dala kutah baptisma a chang a. Kristien a hung ni hnung chun lekha a’n chûk a, Lower Primary (Pawl hnih) a tling a. 1916-in H.K.Dohnun dawrah dawrkai sin a thaw a. Chu kum
vek chun Sihphir khuoa Krismas an hmang laiin a piengthar a, sandam inhriet chiengna a nei hnung chun a sumdawngna sin chu maksanin ama sumin tirko sin kum hnih a’n chûk a.

A hung zo chun rongbawlna ding zongin a’n zin suok a. Manipur Rangte biela Lailong an ti hmuna chun umhmun khuorin 1920-a inthokin kum kuo zet tirko sin thawin a um a. Kum 1939-a Pastora namnghet a ni hnungin Tinsuongah Pastor sin thawin a um a. Chu hnung chun Senvon bielah kum ruk a thaw nawk hnung kum 1954-in Senvonah a lut nawk a. Chu taka chun kum 14 a um. Kum 1963-in thla tin cheng sawm hlaw dingin a pension. 1968 kumin Lakhipur khuoah a naupa belin a um a, tar tak a ni hnung chenin Pathien rong a la bawl zui pei. A rongbawl sunga a kuta baptisma chang po po chu mi 2315 an na, nupa tuok 237 a kutah an insui bok.

Pastor Thangler hi Hmar hla chawidingtu le sukhmasawntu laia a hming hmai ngai lo ding chu a nih. A thlarau mitmeng a fel leiin Pathien thuruk inthup mawi tak tak hai chu a hmu chieng a, chuonghai chu topui el thei loin hla ropui takin a hung puok dar hlak a nih.

1922 kum tawp tieng, Lailong khuoa rong a bawl laiin Senvon khuoa a farnu Rohnun chu vangduoi thlak takin nau chungah a thi a. Chu thu a hriet chun a beidongin a khuo a sawt èm ém a. Nau puok pumin Biek in tlangah a fe a, Biek in chu a hêl a hèl a. Chuonga khawsawt taka a um lai chun, Pathien thlamuongna ropui tak chu changin, Pathienah chauh lawmna kum hlun a um ti chu a hung hriet thar ta uor uor el a. Chuong chun hi hla, “Rinna thla zar ila, Kalvari mual lam va fang ila’ ti hi mitthli far zoi zoiin Lusei
tongin a hung sak suok tah a nih.

Lailong (Rangte biel)-a a rong a bawl laiin hla a phuok tan a, hi hmuna a um lai hin inkhawmpui an nei a. A tumtiek tuk chun ringnaa a’n thloppuihaiin ramthima ama khat chaua hma dom dinga an hang maksan nawk el chu a ngai tawl a, “Aw ka unau dittak hai, Ei in thre naw thei naw maw!” tiin hi hla hi a phuok hiel a nih. A rongbawlna nunah, khawsawtna, lungphangna, kalna le hnawchêpna mi dangin an tuok ang bokin a tuok nasa hle a. Mission buoiin a hung nangching a, chuong hun lai chun a biel fangnaah sorkarin an man a. Sienkhom Pathien ringsana kal chawi pei a tumna chu a sukbahla chuong nawh.

(“Thûkna Ropui” lekhabua Pu HK Kawllienthang thuziek ‘Mihrang Pasalthahai’-a inthoka lâksawng a nih. – Editor)

Also published on ‘Hrepuitu’ June 2010 Issue, Delhi Hmar Christian Fellowship chanchinbu.