Hmar Gospel Centenary Committee Report

Proceedings of the General Body meeting of Hmar Gospel Centenary Celebration Committee, HCLF on August 19, 2009 at PMS Bungalow (12:00 noon).

Recording Secretary: Dr. Lalkhawlien Pulamte

Mi 70 fielhai laia inthawkin mi 40 fe khawm a nih.

Chairman, H.G.C.C.Committee in mi fielhai lawmlutna a nei zova, Rev. Dr. J. Khumain tawngaina a hun a hawng zovin inkhawm an a nih.

Gospel Centenary Celebration chungthua Senior leaders hai, thu hril dinga kohai thuhril ngaithlak a nih.

A. Admonition from Senior Leaders:

1. Rev. Dr. Lalthankhum Sinate

Missionary Day chung thua ngaidan lo in ang naw sienkhawm Centenary Celebration thua chu lungril pumkhata um a tul zie hrilin ngenna a siem.Denomination thua inthe khawm hi indemna thila lak ding an naw a, Centenary thua lem chu lungril hmunkhat put a tul zie a hril a, pawl binga Centenary Celebration nei lova renga lungruol taka hmang tlang a mawi ding thu hrilin a hran hrana lawmna nei hin lungril a sukdar lem thei thu a hril.

Simthlang biela Kohran pawl tum tum in a hrana Centenary hmang nek chun a remchangna hmun pakhata hmang tlang hin in unauna a siem hat ding thu a hril a, Pawl binga lo hmang hin Senvona Centenary Celebration hmang tlang ding hi mi a sukphur naw pha inlau a um thu a hril.

In lawmtuo le indawmtuo a pawimaw zie hrilin tuta Hmar Gospel Centenary Celebration hmun pakhata in thuruol taka hmang ngei dingin fielna a siem.

Centenary Celebration hi hlawtling taka hmang dingin theitawp suo dingin inkhawma thanghai a fiel.

2. Rev. H. K. Khawlkung

Ngaidan tlangpui bawzui dinga a dithai :

1. Church reunification thu hi dit a um thu a hril.

2. Kum zabi pakhat tlung phaka ei um lei hin thupui nei a, thiltum ieng am ei nei a? ti hi ngaituo a tul a: Ei thaw dinga thupui ditum hai chu - Chanchinha le in mila ei ram Kohran haiin nungchanga phursuok dan ding lampui zawng nisien.

(a). Chu ding chun indikna le ringumna hai hi thupui a nei inla

(b). Taimakna le tuorselna

(c). Nun le thilthaw a Chanchinha suklang. A bikin thuawina thuah hmalak ngei nisien.

(d). Centenary resolution siema, Kohran tina the dara infuina siem nisien. Chu chu thuhril thiem le thu ziek thiem haiin hrilin semdar hai sien, ei kalchawi dan ding mumal deuva siem nisien.

(e). Hla phuok thua - Centenary thuah Hla phuok thiemhaiin phuokhai sien, screening thaw a, a thahai chu Kohran tin le khawtinin inchukhai sien. A thei lem chun

Centenary Choir buotsaia hlaw buotsai ni bawk sien.

3. Rev. Fimchawnthang :

Ei rama Chanchinha lut thuah ei vangnei a, chanchin ha in ei ram a hnezie chu chap kang ang hiel a kang a nih. Ei tulai le in mila rawngbawl dan ding ngaituo thiem a ul.

1. Chanchinha lut phut lai khan inchuktir dan thua mawl taka fe tlang a ni a. Revival tlungin a zui a, doctrine thu ah buoina a um nawh . Kohran an in pumkhat.

2. Chu zova chun doctrine thu ni lovin ro thuah buoina a suok a, pawl hran hran a suok pha. Tuta Centenary Celebration ei nei le in zawm hin mi Kohranhai sietna thua mani Kohran hai vai hi sim ding a nih. Chu chu Centenary Celebration Committee hin khap thei sien nuom a um.

3. Gospel Centenary celebration chung thuah hin Manipur South Centenary Celebration nei dingin kohran pawl hrang hrang le awng dang dang 36 haiin program buotsaihai sienkhawm eini Hmar awng hmang haiin a bika hmang hi HCLF ah khawm hril a ni a, chu ang chun vawisun a Gospel Centenary Celebration Committee hi nei a ni a. Chuleiin, inthuruol takin hi Centenary Celebration hi hmang dingin inbuotsai nisien.

4. Amiruokchu, inthuruolna suksie thei ding thil reng reng chu Souvenir a khawm ziek lo nisien. Kohran pawl tumin Magazine ei nei senga, tuta inthawkhin chuongang rawng kai thei thil le thuhai khawm chu insuo lo dingin fimkhur an nisien.

5. Tu chena denomination hran hran haiin inthuruol taka beiruol program, Sunday School Subject pakhat, kum khat thupui pakhat neia ei fe mek ang hin Kohran pawl hran hrana Pastor hai khawm hi rawngbawl a insawrtuo dan lampui dam zawng nisien - chu thil chu hi Centenary Celebration hin ra suok sien nuom a um.

6. Senvona Centenary Celebration lawmna ei nei ding le inzawm hin chu hrietzingna ding chun Senvon rama hin in pakhat (Memorial House) bawl ngei nisien, ti a rawt bawk.

REPORTS

1. Secretary

Secretary a inthawkin hma lo lak tah hai chungthua report ngaithlak a ni a. Committee hran hran le Sub-Committee hran hran hai siem a ni a, hma an lak thu report a ni a. A bikin Souvenir Committee haiin article an lakkhawm thu hriet a nih. Chun, ICI Kohran in Hmar Gospel Centenary hminga zawr ding T Shirt an buoipui thu hril a ni bawk.

- Regional Committee, Musical Committee le Committee hran hran siemin hma an lak a, thaw ding tam tak an la nei.

-ICI Kohranin Centenary building an zo thua Secretary in lawmum a ti thu a hril.

2. Finance Secretary Report

Pi Lalremsiem - Rs. 50,000:00 a pek

Dr. L. Fimate - Rs. 10,000:00 a pek

Pu Sanglur - Rs. 20,000:00 a pek

Dr. Chaltonlien - Rs. 10,000:00 a pek



Tuhin Rs. 20,000:00 sum nei a nih.

3. Finance Department:

Dr. Saidokhum Joute, Secretary Finance Committee in report hiengang hin a pek. Committee vawi 6 lai inhungna nei a ni tah a, Department tina inthawka budget siem dinga nghak a ni a, a la hung in lawi naw leiin Finance Department hin Plan Budget an buotsai a chu chu phawr lang a nih.

- Budget chu pawm dingin General Bady hmaa phar suok a ni a. General Body chun lawmum a tih. Amiruokchu Total Budget amount hi Rs. 40 lakhs nisien ha ti a ni a, siemhat tulhai hung siemhaa, an hmattienga approve thaw dingin inkhawm nawk a put lut hai siem ha ti a nih.

- Chun, tuihaphai biel a dinga Rs. 2 lakhs hi a tlawm a an lang leiin la hung belsa hai sien ha ti a nih.

4. Souvenir Board

- Article hrim hrim, tu Kohran pawl khawm sukna zawnga ziek lo dinga inhriettir an nih.

- Editor haiin hma an lak mek. Article peklut ta po 15 an um tah a, mi dang khawmin an hung ziek mek ding thu an hril bawk.

- Editing thua chu harsa lo deuva zo thei ning a ta. Chun May 2010 ah print zo ngei dinga hma lak mek a nih.

- 2009 tawpa hin article po po Board in en a ta, siem hat ul hai siemhat ning a tih.

- Rs. 1.5 lakh budget siem a ni a, quality hataka buotsai beisei a nih.

- Inkhawm khawm nei deu zing a nih.

- Compatition thua ruok chu hang dinga hming hung pe tuchen hin an la um naw leiin thawnaw ha lem dinga ngai a nih.

5. Women Wing

February 28, 2009 hin inkhawm an a nih. Convenor in inkhawm a la ko naw a chu vawisun hin mi 5 an hung hang.

- Job description feltak buotsai pek dingin an hung ngen.

- Design/Decoration hin ieng chen am huom a ta ?

- Budget thua chu Miscellenous Budget or a dang khawm hmang thei ding a nih.

RESOLUTIONS

1. General Body thurelhai hi Publicity Departmentin a tul anga publish a Department dang dang hai khawma hma an lak thei dan dingin sem dar nisien kan tih.

2. Woman Wing hai hin hrat lema hma an lak theina dingin Convenor Pi D. Vari hi harsatna a nei nia an lang leiin Pi Chongtuozing hi Convenor ni ta sien ha ti a nih.

3. Gospel Centenary Celebration lungruoltaka hmunkhata Senvon khuoa November 2010 a hmang dinga rawtna hi hati tlang a nih.



Sd/-
Dr. Lalkhawlien Pulamte
Recording Secretary

(Rev. Ros Infimate)
Chairman

(Rev. Dr. Lalhmuoklien)
Secretary

Hmar Gospel Centenary Celebration Celebration hi November 2010 hin Senvon khuo a Hmar Hnam pumpui huopa nei tum a ni a. Chu thua Committee hmalakna dan chin hrietna dingin hung in suo a nih.

Rev. Dr. Lalhmuoklien