Watch and listen to every words spoken in this video (taken in early 2010)… In Patpuihmun village, there seems to be no Independent Church of India (ICI) or it could be just the opposite -- there are only ‘pure ICI’ (ICI Tuipawllo) members in the village who had decided to stay away from the celebrations!
For more videos of Hmar? Gospel Centenary, visit http://hmargospelcentenary.blogspot.com
For more videos visit: Hmar Gospel Centenary
By Joseph Joute, Freelance Journalist
Chanchin Tha na na na chu lawm naw ruol an kuo naw a ni hi! “Mitin ta dinga chanchin tha lawmum bek bek” kha a ni tlata, mitinin lawm a awm reng a nih. Hienglai zing hin hi Chanchin Tha kher hi chu lawm dan chi hni/kawng hni um theiin an lang. Ka tina san chu: khawvelin a hriet a, chatuona Hringna Thu chu mihriemna dana ringawt khawm, taksa thil taka lawm thei a ni a. Mi po po (mankind) sandamna dinga hung chu lawm naw ruol an naw reng a.
Chun, thlarau dan taka Pathienin a hmangaihai kuoma a pek le an hrietirna leia sung tienga inthawka lawmna chi khat a um bawk a. Ka hril umzie chu; Chanchin Tha hi taksa thil taka (lang-a-changa) lawmna le thlarau tieng taka, lungril le thlarau nun po poin a lawmna, taksaa inlang suok khawm a um thei ve ve ka tina a nih.
Chu entirna or fiena pakhat chu; Isu hung pieng laiia lungril tak le thlarau a lawm em em, nei po po maksan ngam khawpa hmu dinga fe hai, Berampuhai le thilpek tha tak tak le lawmna inentir, khawvel lalhai taksa dan taka inlawmpuinaa lawmpui khawsak mivar hai a inthawk khan a tira inthawkin a lo um tah sa a nih.
Ei lawm dan ding hi ieng tak him ni’ng a ta? ti hi mani senga ei inenfiena ding nisen. A that ve ve zing laiin, vawisuna a kawng hnia lawm theituhai chu mi vangnei tak an nih.
Chuonga mi vangnei chu Hmar hai ei nih ka ti tah a nih! Asan chu, thenkhat lungril le thlarau po poa lawm, taksa thil taka khawsak mivarhai anga lawm thei el lo, kum 10 lai zet lo inringlawka lawm thei chau ei um laiin, chawp-le-chila ropui taka lawm thei khawm ei um bawk a. Pathien malsawmna vawng chu a nih.
INPUMKHATNA AWNIN: Kum 2010 kumpui lingletin kohran hran hran, hnam hran hran haiin Gospel Centenary ei lawm sup sup tah a, a ropui a, Pathienin ei ta dingin thil ropui tak a mi thawpekhai ei lawm hle a. Ei lawm tawp nawh a, mani kohran chau dittawk ta lova hnam pumpui kohran po po huopa lawm nuomna chen a la hung ra suok pei a. Chu chu a nih chanchin tha thilthawtheina chu; piengzie, lungril, ngaidan, etc.inanglo vawng, pumkhata mi siem theitu “Chanchin” (Thu) a nina chu!
Mihriem dan taka, thiemna le varna dang dang le lampuihai hmanga impumkhat ei tum khawma thei ta lohai khawm, chanchin tha bawkin lungril hmunkhat putin a mi siem nawk a nih. Chu fiena (evidence) chu Dec.9-12 sunga Saikawta nei ding HMAR GOSPEL CENTENARY CELEBRATION ruohmana um mek hi a nih.
THE CELEBRATION OF THE CENTENARY: Tuta kum zabi (century) sunga ei rama dinga lawmmna la ropuitak ding chu Hmar Gospel Centenary Celebration 2010, Hmar Christian Leaders’ Forum (HCLF) in a buotsai mek hi la ning a tih. HCLF thuoina hnuoia kohran tin thang tlanga buotsai hi; 10,000 Choir buotsai a ni dan dam, program chi hran hran khawm duonglawk a ni zie kha hma khan ka lo hriet tah a. Amiruokchu, official taka confirm na a la um nawh a.
Nov. 14, Pathienni zingkar khan Pu Buonga (of LIA), Information & Public Relation tienga mawphurtu chu a hung leng a, HGCC program print vawng tah hi a mi hung pek a, a thei chun preview lo thaw dingin a mi hung ngen a. Program Booklet ka hang ena, thu ramtin kan hriltlang laia ka lungrila hung lut chu; hnam damna dinga chanchin tha mi hung petu ditdan ang takin Inpumkhatna kawng chu ei hraw mek a hawi a, hi Centenary Celebration hin ram le hnam, kohran inpumkhatna tak tak mi siempek thei a tim aw, ti hi a nih.
A program sung details hang en chun a pui het het hle a, Hmar kohran sunga hotu le thuoitu popo a fun khawm a na. Inkhawmpui danghai le an ang nawna dang pakhat chu Seminar & Discussion a um hi a ni a. A program preview ti lema, a dawt dawta thaw ding item hai zieklanga comment ka tum nawha. Publicity Dept. ditdan chie le thaw dan ding an ti khawm ka hriet chuong nawha, “Tha I ti dan danin,” an ti tho leiin, “as a whole” a enin comment inla ka ti ta lem a nih.
Dec. 9, 2010 zan dar 5:30 pm a tan ding program-a hin Centenary Celebration ei lo hmang tahai, Sielmat-a tanin, program kalhmang; Hall Inauguration, Dedication, Gospel Torch Lighting Ceremony, etc. hai a ni tlangpui vawng a. A thawtu dinghai chu tuipui Ral mi sap hai ni ta lovin ei rama kohran thuoituhai ngei an ni ta lem ti hi a nel a. Program contents hang ena, kohran hran hran thuoituhai hmun khata an hang participate na hin a mi them lem a, Rev. Dr. J.L. Songate, Rev. Dr. J. Huoplien Neitham, Rev. Lalneikhup Hmar, Rev. Ros Infimate, Rev. Dr. Lalhmuoklien, Rev. D. Ruolngul, Rev. Lungawiruol Khawbung, phek hmasataka an hming a hei um tlar duot hin thu tamtak a hril lemin ka hriet a.
“Pathien Thlarau Thienghlim chu Inremna Thlarau a nih” ti hi a fie zuolin an lang a. Tirko Paulan, “Inremna rawngbawl sin a mi pek a (2 Kor.5:18)a ti ang khan, chu rawngbawlna sin chu a tak taka rawngbawltu han an thawna sin niin ka hmu leiin ka lawmna a zuol a nih. Ka mimal taka chu, ei rawngbawltuhai hin ka lawmna an sukfamkim a nih. Pathien mi lawmna khawm famkim ngei sien nuom a um.
Hril talai lai, meeting hi Rev. Lalneikhup Hmar in keithuoi a ta, Rev. Dr. J.L. Songate in Hall hawng a ta. Rev. Jacob Pudaite in inhlan a ta, Rev. Dr. J. Huoplien Hmar in Gospel Torch sitkai a ta, Rev. Ros Infimate in Welcome Address hril a ta, Rev. Dr. Lalhmuoklien in Introduction thawng a ta, Rev. D. Ruolngulin thu hril a tih!
Kum 100 sungin ei ramah hieng neka inthuruolna le inremna neia Pathien biek tlangna (Worship Service) hi a la um ngai nawha, Gospel Centenary lawmna a ni leiin, CELEBRATION of the CENTENARY ka ti el a nih!
Program suk phuisuitu ding pakhat chu; 10,000 Voices Choir, tuta district tina an lo inchuk dup dup mek hi a nih. “Halleluia, Amen,” tia Sielmat a 1,000 voices han an hang rem dup dup hman kha a ropui a na, 10,000 thalai ngawtin Lalpa inpakna hla an hang rem lem chu ropui hleng a tih.
Inkhawm zata hla thuoina hi Music Department inrawi ding a ni bawka, Thlarauin mal a sawm bawk lem chun hla ringawt khawm hlawkpuina khawp tling ngei a tih.
Ni hmasatak Dec.10 zing dar 10 am hin Service um nawk a ta, hi hma hin Centenary Souvenir, ei nghakhla em em kha, Rev. Lalthankhum Sinate-in tlangzar a ta, Centenary dar vuokna le thil dang danghai um a ta, Gospel Message ruok chu um naw nih.
Sun dar 12:30 a inthawkin Seminar a ruol in hmun thum-in Topic pathum nei ning a ta. Men’s Group ah “Kohran le Inpumkhatna” ti ning a ta, Rev. Dr. J.L. Songate-in facilitate a ta, Moderator Rev. Lalrosiem Songate thang a tih.
A dawtah Seminar & Workshop on “Nuhmei Le Hmasawnna” nei ning a ta, Pi Lalthiengzo in facilitate a ta, Pi Ramsiemzo Moderator in thang a tih.
A sawng thumna (pathumna) chu Youth’s Group ta ding ning a ta, Topic: “Thalai le Inchukna” ti niin Facilitator Rev. Rohminglien Pakhuongte le Moderator ah Rev. Edwin Darsanglur thang a tih.
Hi ni zana hin Worship Service um a ta, Rev. Rothanglien Hmar in Pathien thucha hril a tih.
Dec. 11 dar 1:30 pm Seminar and Discussion um nawk a ta, Topic “2010 Khel Tienga Kohran Hai Kalchawi Dan Ding” ti a na, Rev. Ros Infimate Moderator ning a ta, Upa Dr. Lalsiemlien Pulamte facilitator in thang a tih. Secretary haia inthawkin Seminar Report ngaithlak ning a ta, “HMAR GOSPEL CENTENARY CELEBRATION DECLARATION 2010” chu tentative-in approval thaw ning a ta. (Hi CENTENARY DECLARATION hi a tawp zan leh Affirmation thaw ning a tih.)
Program danghaia Thuhriltu dinghai chu, ei rama international speaker suongum tak takhai, Rev. H. Chungthang Thiek, Rev. Dr. H.M. Songate, Pi Lal Rem Siem hai le Rev. Hrilrokhum Thiek hai ning an tih.
Hi celebration program hi Nuoi tel Budget siema buotsai a ni a, inkhawm sung hin HGCC Fund dawlna tum hni nei ni bawk a tih.
COMMENT: A Program fe danhai chu a tluong a, a pui em em bawk a. Tuhin Department tin khawm an inpeifel ang a ni tah a. Program booklet khawm sut zo vawng a ni tah a. Amiruokchu, program leaflet ka hmua ka lungrila hung lut pakhat chu; a publish-tu le print le design tu hming a chuong naw tlat a. Ka hriet thoa chu mipui tam lem chun hrie thei naw ni hai. A suk official naw metin ka hmu a.
Chun, Centenary logo kha chitein phek hmatieng sie a na, Logo a thu ziek hai an tiem thei nawh. Chun, a phek (cover) outside ve ve ah Scenery (nal tak)sie a nia, a nala chu umzie a nei ka ti nawh. Ei tlangram khawm ni chie lo, ei khawpui khawm ni chie lo, kha nek khan Senvon lim dam a back-ground ah um sienla, phek hnung tieng Churachandpur lim (picture map) dam um lem sienla, Senvon a inthawka kum 100 hnunga Tuithaphai (CCpur) tina ang deuin.
Chun, cover sung tieng ve ve blank (a ruoka) sie nekin HGCC Logo lien deuvin, a thuziekhai tiem thei vawng dingin sie ni lem sienla, phek hmataka Fielna a um angin phek hnung tak (inside cover ah) lawmthu Hrilna (note of appreciation) tawite um bawk sien. A sut mant tlawmte in a suksang met el theia chu, phuisui deu a ta, Hmar hnam pum huopa thilthaw ding chun puithu deu a ta, sukfamkim bawk a tih.
Program Booklet sira Hmar puon le Thangsuo puon tiel suk ruok hin chu hnam identity a suklanga, Pathien a chawimawi niin ka hriet.
HGCC hi Hmar hnam pumpuiin Pathien ei chawmawi theina hun remchang tak a ni leiin, Hmar-Kristien ka nih inti taphawt chu thangna chi ning a tih. Tuta tuma thang naw chu, naupang kum khat mi khawm, kum 100 dang hnunga um nawk chau ding a ni leiin, “Lenlai Chân” chu a nepte, “Damlai Chân” an ni ringawt ding a nih! Chatuon Hringna Thu khawm a um a nih! Amen!
Chatuona Inpumkhatna Ra Suok ngei bawk sien nuom a um takzet!
Issued by:
Information and Publicity Department
Hmar Gospel Centenary Celebration Committee.
Editor’s Note: A message of greetings delivered by Mr. L. Keivom at the Gospel Centenary Celebration at Pragjyoti, ITA Centre, M.G.Road, Machknowa, Guwahati on October 18, 2010 organised by Guwahati Hmar Christain Fellowship.
Khawvel hmun hrang hranga khawsa keini sungkuo le Zoram khawvel aiawin Gospel Centenary ditsakna le lawmpuina chibai vochuom ka buk cheu.
Kum za liem tah hma khan ei pi le puhai chu khawvel mongpingah an lo cheng a. Ei tuoltro daktor thiem tak le operation thaw hmasa tak Dr. Sura’n a thiem tawp a’n suo khoma a rizal chu thina chauh a nih.
Ei mithi kotsuo khom mong inlang kûka inthrung, Mizorama dil lien tak, amiruokchu Burma rama um tia fiemthu taka an hril hlak, Ri Dil a nih. Chu taka lut tah chu ramsa khom an suok nawk tah ngai nawh an ti hlak. Thina dil, dil mong ping, tlak hlumna ngei ngei, Lake of No Return a nih.
Ei Pielral hlak chu faisa ringa thangsuohai chauh um theina, nuhmei ta ding lem chun pasala thangsuo an nei ngot naw chun lut le hluo thei lo naw hrim hrim a nih. Faisa ringa khawsak chu an thil inhnar tawpkhawk a ni leiin, chu ngirhmun chu hluo thei dan zongin, dam sungin an inrim hlak. Tu lai sanah, faisa ringot ringa khawsa ding mi zong inla, a nuom ei um ka ring nawh. Bu hmin lo voi khat ei fak hman ei dit tawk hle. Mazu, ar le vate hai chauh naw chuh faisa ring pei an vang hle ka ring.
Ei dawithiem hmingthang Lalruong le Hrangsaipui (Dawikungpu an ti bok) haiin an dawi thiemna an hmang dan ei hriet tawp chu dawi hmanga insoisak le inthat a nih. Sîr tina inthoka ei thlir khomin, ei khawvel kha khawvel mong ping vong a nih.
Chu khawvel, dil mong pinga chun 1894 khan damten Jordan vadung a hung luong lut a, a chim insang tiel tiel a, 1910 khan Manipur sim thlang Senvon khuoah a hung luong lut a. Chu taka inthok chun ei Sinlung Hlui chu Sinlung Thar, Bethlehema intran chun a hung hlà n a; ei Hringlang Tlang chu Kalvari Tlangin; ei dawithiemhai chu gospel meiser chawituhaiin; ei thangsuohai chu piengtharhaiin. Pielral chu thangsuohai ta ding chauh ni tah loin, mi tin ta ding le nuhmeihai ta ding chenin a hung inhong tah duoi el a nih. Chu champha voi zana chu lawmin voisun hin ei inkhawm a nih.
Gospel Zabili hi lawm tlak a ni lai zingin einiah lawm tlakin ei siem am ti hi mani seng ei indon a thra. Kum za sung hin khawpuia cheng mi tlawmte ti naw chu ei fakzong dan a la danglam chuong meu nawh. Intodel nekin ei trà m deu deuh. Taimak nekin ei tha a bo deu deuh. Thiemna tieng hma ei sawn ei ti a, mi hnung ei hnot deu deuh. Eini trong ngei khom ziek dik thei ei um ta naw deuthaw a nih. Eini nekin ei khawsakpui ringnawtuhaiin hma an sawn lem a, a lêt tamin lekha an thiem lem bok. Thu le hla tieng hma ei la sawn naw hle a, A AW B tiem le hmang indik danah ei la buoi phak chauh a hoi. Hawrop ei nei hma le ei nei hlima thu le hla tam tak an mi lo serpek kha ei tluk zo ta nawh. Sermon ei thiem deu deu a, ei sermon a’n sang tiel tiel a, sienkhom Pathien thutak a fun tlawm tiel tiel. Piengthar ei pung a, kawrapson a hluor deu deu. Ei Pathien thu po po deuthaw hi sumah a tawp deuh vong. Ei thu le hla tharhai hi ei natna thu insamna an ni tak a, nat hih Pathien kuoma inseknaa ei hmang khom a hoi tah. “A siet nawna a um nawh” ei ti a, inzaka indom kun nekin ei lampui dup dup el.
Miin “Siet lawmhai” an mi ti a ni khomin theida thei ei ni nawh. Kohran ei indar nasa po leh upa ni thei ei pung leia phûr am ei ni ding, Pathien thu uksak lohai khom kohran buoi a um pha chu an hung inchawm suok truk truk el. Berampuhan an beramhai enkol nekin an beramhaiin anni an chawm lem an beisei tah. Hnam tinin an Centenary a ni inruola an hmang laiin, ieng leia ei thiempuhaiin ni inruola an mi hmangpui thei naw? Chu khom chu mi thawpui thei si loa tlor deua Pathien thu an hril hi miin an fak ta nawh ti dam hi an hriet am aw?
Gospel Zabili hun hi mani indapna hunin hmang ei tiu. A sie a thraa hma ei sawn sun hi gospel phur suok am, an naw leh khawvel hmasawnna boruokin a phur suok hrim hrim lei? Ieng leia kristien ram ni si lo China le India hi tu laia hma an sawn hrat em em? Ieng leia kristien inti, gospel zabili hiel hmang phak hiel ta sia ei hnufuol deu deu? Gospel Zabili hi chawimawi nekin ei ninain a sukhmingsiet lem am? Kohranin ei mamaw tak pakhat chu sum a ni laiin, ieng leia rethei theulawzi hi ei hril mawi?
Ka thucha maksan nuom chu: Pathien thu ei inchuktir dan ki hi her danglam met a ngai. A ram le a felna zong hmasa tak dinga inzirtirna hi ei sunzom pei laiin, iengkim pek belsaa um ding hi autawmika hung ni loin ei thilthaw ang pei a nizie inchuktir a ngai. Mi piengthar chengna ding khawvel chu taima taka ieng lai khoma thil thra thaw a nih. Piengtharna le thabona hi thil inaihal a nih. Piengthar chu mi ringum, fel, taima, hlawtling, intodel, thil thra dit mi le thaw zing mi a ni ding a nih. Retheiin kut a daw ding a ni nawh. Minit tin a hmang hlawk ding a nih. Thil thra thaw ding hre sia thaw naw chu suol a nizie inzirtir zuol sauh ei tiu. Chuonga hma ei lak chun zabili nawka chu a mei ni loin a lu, pûktu ni loin inpûktirtu ning ei ta, var nauhai ei nizie pholeng chu mi tinin hmung an ta, Pathien chawimawi thei ei tih.
Chu ram chu ei tlung theina dingin, in rengin ditsakna chibai ka buk non cheu.
TUITHAPHAI, Oct 25, 2009: A 13 ft. high stone Centenary Monument is being carved which will be erected near Lamka Public Ground. Permission has been obtained from the authorities and a site has been allocated where the monument will be erected. As construction of the monument is to begin very soon a Earth Breaking Ceremony was held on the morning of October 25, 2009 (Sunday).
Rev. Zatanga (86) one of the oldest living ordained ministers performed the Earth Breaking Ceremony as organizing committee members and Christian leaders gathered together. The program was led by the Rt. Rev. Dr. Ginkhamung and was closed in prayer by Rev. Dr. Luaichinthang.
Rev. Zatanga said that he considered it as an honour to be invited for this important ceremony. He further mentioned that he began his ministry under the NEIGM during the time when all the Christians were under the NEIGM Church but ended up being a Presbyterian after the believers regroup themselves according to their respective tribes in order to freely worship God in their own respective dialects.
For further details contact gospelcentenary@gmail.com
Nov 3, 2009: Senvon khawtlang po po inzawmkhawm chun Manipur Simthlanga Chanchintha hung lut kum 100 tlingna chu kum thar January 21-23 khin ropui taka hmang dingin an in singsa mek. 
::By Pu Dr JOHN H PULAMTE::February 5, 1910 v/s May 7, 1910
By Pu Ramthienghlim Varte, Shillong
Courtesy: Sawrtui Monthly
Pipu nunhlui inralrunna, milu laka insel inhal lai nunphung le thingbul, lungbul biea Khawhring, Khawchom, Zasam, Lasi,Nelhau le tiemsenglo huoi biek tlawnna dinga ui-le-ar a inthawi hun le bu-le-bal le ran lua thangsuo leia zu-le-sa hmanga mawl thlak taka chawng chenna khawvel an hmanga. Chuongang inthim sa mupin eiram le khawtlang a bawm zing lai chun sappui nun le sakhuo, Vai le Meitei hai ditnaw tuipui ralram hlataka inthawk chanchintha kum 1910 khan a hungtlunga.
Chuchu Kristien sakhuo eiti hi anih.Hi hin hunthar pawimaw tak ami siempeka; ram le hnam hmasawnna, hieng-Inchukna, fak le dawn zawngna, hriselna, khawtlang nun le kawng hranghranga mel lung pawimaw ani baka, thlarauva damna zalenna ei chang bawka ei vangnei emem.Kum 100 ei tling tepta leiin HMAR KRISTIEN CENTENARY tia lawm dingin sakhuo puithiem le thuoitu kohran pawl hranghrang eiin singsa mupmup taa. Mithiem le sakhuo tienga hrietna kulmut nei haiin chu chanchintha hung lutna hmasatak Senvawn khuo hi a hun le ni an suidan le ngaidan an angnaw deu neinuoia.
Kristien Centenary ei hma ela um tah lawmna dinga hin in ruollo rup in um palh eiti ti inlau a um emem. Ei in khuongruol theina dinga kalo thlirve le Senvawn khuoa chanchintha hung lut dan tlangpui ni ding awma sui le ngaidan ei mithiem le sakhuo puithiem hai ziek ramtin a tawi thei anga dawl khawmin hei bi thuokthuok ei ta, chu insel tuona thu chun a tlangkawmin suktawp tum ei tih.
1. Hranglien Songate 'Hmar chanchin' Pu Tlangval chu February 3,1910 in Senvawn a hunglut tiin a zieka, Pu L.Keivom in 'Hmar Hlasuina' a chun February 3,1910 Pu Tlangval Senvawn a lutni tiin a ziek bawk.
2. Pu Lamzakhai Kolhen in NEIG Mission chanchin a buotsai na a Senvawn a chanchintha lutni chu March 13,1910 tiin Pu (Dr) Laldena chun a lekha ziek 'Manipur simthlanga Chanchintha lut phutna ni' tia a zieka, Pu Darneilal Khawlum ruok chun Pu LamzakhaiVaiphei in mission chanchin a buotsai na Senvawn a chanchintha lutni chu March 3,1910 tiin 'Evangelical Assembly Church Diamond Jubilee Souviner' a chun a ziekve thung.
3. Rev(Dr) Rochunga Pudaite in 'The Glory of the Lord' ti a ziekna a Pu Tlangval le pawlhai December 1910 in Senvawn an hungtlung tiin a ziek.
4. Rev(Dr) Ruolneikhum Pakhuongte in 'The power of the Gospel' ti lekhabu a zieka chun Pu Tlangval chu Senvawn a January 1910 in Senvawn a hunglut tiin a ziek.
5. Rev H.L.Sela in 'Manipur Simthlanga Mission chanchin' a ziekna a Pu Tlangval le a rawihai chu Senvawn a May 7,1910 in an lut tiin a zieka, Rev Darsanglien Ruolngul ruokchun May 7,1910 hi Pu Tlangvalin Senvawn ava sir hnunga a ram mi ngei rawngbawlna tan dinga Aizawl an suoksan ni tiin a lekha ziek 'Chanchintha Kalchawi' a ziekve thung.
6. Rev Darsanglien Ruolngul lekha ziek 'Chanchintha kalchawi' a Pu Tlangval chun February 1910 in Senvawn a suoksan tiin a ziek.
7. Kristien Magazine, February 1960 Vol. III.No I a chun Pu Tlangval Sevawn a alut hun chu kum 1909 tawptieng annawleh kum 1910 bul vel ti ani nawka.
8. Rev Lalthangliana Field Director EFCB a rawia apa R.Dala a chanchin an buotsai na lekhabu a chun Pu Tlangval in Senvawn hung sir a nuoma; November 1914 in Culcut a Pu R.Dala kovin hun iemani chen an chamhnung chu kum December thla in Tuiruong dunga lawnglengin anhung thlunga, lampuia ni tamtak an thang hnungin Senvawn khuo an thlung ta hrama , tiin a ziek.
9. Pu Tlangval a naunu Ruth chun Pu Tlangval chun January 18,1910a Aizawl suoksanin February 10,1910 in Senvawn a tlung ni awmtakin a ring thu a hril ve. Rev Lalthankhum Sinate lekha ziek 'Kohran hring' chun Pu Tlangval ngeiin Aizawla a inthawk Senvawn a sir hun chu February 1910 anih, ti aziek leiin hundang chu ani theinaw. January 31, 1910 (Thawtanni) in Aizawl an suoksana hriet ani leiin February 5, 1910 (Inrinni) hin Senvawn an tlung anih tiin.
10. Pu Thansei a lekha ziek 'Bawlhmun' a chun Pu Tlangval le rawihai chun January 30, 1910 in Aizawl an suoksana, February 5,1910 in Senvawn an lut, a ram leilung en thlitlai a fe anni leiin sawt cham lovin an hung kir nawk nghal, tiin.
A chunga zieklang a um anghin Senvawn khuoa chanchintha a hunglut tan dan le Pu Tlangval le a rawi haiin Senvawn a sirna ala sawtnaw vei leh ziektu tamtak hai hriet dan an angnaw khawp ela. Kum 1984 October 5-8 a Hmar Biel Seminar nei khan kohran tienga thuoitu,mithiem, ram le hnam invawi ei fe tha emem ela, ei thurel tamtak sukpuitling a uma, chulaia pakhat Seminar resolution B (i) Sakhuo na tienga ei rama chanchintha hunglut ram le hnam tadinga mellung pawimaw tak ani leiin a hun le ni fietaka siem ding ti kha ania, chu buoipui tu dingin Dr Laldena ruot ani nghenghe.Chu le inzawmin Dr Laldena chun Pu Tlangval chu February Ni 5,1910 in Senvawna lutin a mansa chu a bang annawleh, a bawmrang chu an nghat ngei ani zie a hmudan ziekin Hmar biel Seminar thuthlukna inzatakin (ahun tiem sungngei) Hmar biel Seminar follow up Committee a a pekluta, Hmar biel Seminar Proceedings tiin THURO Journal June 1985 a khawm insuo anih. A ziek a pawimaw na deudeu hai chu hieng a hnuoi a ang hin:
"Ei rama Missionary hai sulhnung sui dingin kum 1982 khan London Missionary Archives, London University, India office Library, Baptist Missionary Archives le National Library of Welsh, Aberyswyth sirna ka neia.Welsh Library ah Dr Peter Fraser personal file ah Pu Tlangval lekhathawn kuta ziek dam, khawla sut dam tamtak hmu theiin alo uma.Chulaia document pakhat chu OFFICIAL STATEMENT OF THE THADO-KUKI PIONER MISSION ti anih. Hi hi Rev D.Lloyd Jones le Pu Tlangvalin an buotsai anih. Hienghin an ziek – 'Kum 1910 January thla tawp laivel tak chun Mr Roberts le Lushai Christien thenkhat Manipur panin an suokdawka. An suokdawk hma chie Pathienni (Sunday) zantieng biekin an inkhawma, Rev D.E. Jones chun zinga Manipur pana suokdawk ding thu a puonga; lampui a an thilthaw na a Lalpa malsawmna an dawng ngei theina dingin tawngtaina a inhlan ani. A zinga Thawtanni zingkar chun Mr Roberts chun Major Cole, Political Superintendent inah ava lenga, Manipur ram sir phalna Imphala Political Agent kuoma thirhrui lo thawn pek dingin a hni nghala. Hi tuk hin Roberts ruol hin Dr Fraser le Mr Jones hai khawm bawi insuoktir na thua Major Cole an in hmupui ve tiin'.
Atanbaw suta titakzeta Long life Calender meu phara suiin January thla tawptieng taka pathienni chu Tarik Ni 30 ani leiin Tarik Ni 31,1910 Thawntanni a Aizawl suoksana Senvawn khuo pan ani. Pu Tlangval hai chu Senvawn rama Pu Thangneirum le Pu Kaithangin anlo hmuoka Pu Tlangval le a rawihai pathum chu February 5,1910 nisa inher zantieng pang chun an tlungta a, Pu Hrangthangpa in an inruoka chu chun an rieka. February 6,1910 Pathienni chamin Pu Tlangval chun Lailak zawla thuhrilin Johan 3:16 Pathienin khawvel a hmangai bekbeka,chuongchun anau pakhat neisun a pek…..ti a tiem zovin Pathien thu lo ring ta ro aw, atia, February 7,1910 Thawtanni tuk Senvawn an suoksan hmain rulrukut le khawsik damdawi semna anei nghenghe. Chun hi Tarik February 5, 1910 hi innghatna le besan tak chu Official statement of The Thado-Kuki Pioner Mission (written document) uluk taka Pu Tlangval le Pu Lloyd Jones in an buotsai ani leiin pawm tlak anih"tiin.
Chun, Pu Darneila Khawlum in Souvenir of the General Assembly Diamond Jubilee,EAC 2008 a 'Manipur Sima Missionary Day le a Kum Suina ' ti a ziekna a chun Dr Peter Fraser le Watkin R. Roberts haiin Manipur a chanchintha anla hril nawh ti hrein Gospel hrilna hmun ding zawngin enthlakna (survey) an hung neia. Watkin R Roberts ( Pu Tlangval), Thangkai Vaiphei, Bualtang khuo le Lungpau Vaiphei Maite khuo haiin enthlakna an hung nei zo khan Manipur a chanchintha hril dingin tir ngeiin Vanzik, Savawm le Thangchhingpuia an hung tira May 7,1910 ah Senvawn an tlung, tiin a zieka. Hienghai bak nilovin hungni, kum le hun milo sui dan a lak khawm hai chu hiengang hin:
1. Haitar khuo,Lusei rama kan umlai Pu Hauzatawng (Pasungpa) tua kan umlai Pu Savawmhai rawi an hunga, May thlabul chu ani ngeia, bu hna khawm a kur dam tah.Tuilien hma ani ti kahriet chieng. Rev Chawnga Pudaite, Sielmat 31.7.1989
2. Dr P.Fraser chun Senvawn a um ding le mihai zirtir dingin mi pathum Vanzika, Savawma le Thangchhingpuia hai a tira, May 7,1910 ah Senvawn an tlung.Bawlhmun phek 29(1994) by Thanseia.
3. Senvawn Lal Kamkhawlunin Johan-Bumal a hmua hrilfietu ding mi ancha a, Senvawn chu May 7,1910 khan an tlung taa,chanchintha hril an tan taa. Hi hun le ni hi inchikthlak ni sera hmang hiel alo ni tah. Manipur Mission le kohran chanchin phek 25 (1984) by Rev H.L.Sela
4. Chuongchun, Senvawn a chanchintha chu May 7,1910 ah a tlung tah. Manipur rama chanchintha lut dan Ist Edition phek 12(1982) by Upa Lalchhawnzova.
5. Manipur rama Missionary dingin inchuklai mi an zawnga mi pathum anhung inpea, Vanzika, Savawma le Thangchhingpui (Taitea) annih.Hi haihin May 7,1910 ah Senvawn an hungtlung tah.Rangkachak ram chanchintha hunglut dan phek 57 by Malsawmdawngliana.
6. Senvawn zantieng an ta a, May 7, 1910 zantieng anih.Hi ni hi inchik ani. A hun zatin inser anih. Tuipui rala inthawkin var a hung tlung. By P.K Englian page – 20.
7. May 7, 1910 hi Senvawn chanchin Tha lutni le kohran in tanna le inphunna hmasatak anih. Vangaitlanga Chanchintha lutdan Published by Kristien Nuhmei pawl, Vangai Presbytery, EAC 1997, phek-2.
8. Vanzika, Savawma, Thanchhingpuia (Taitea) Senvawna School hawngdingin an fe ta a. May 7, 1910 in Senvawn an tlunga, hi ni hi MISSIONARY DAY tia hmang hlak anih. Hmar chanchin By Hranglien Songate 3rd Edition 1996, phek 64.
Chun, Souvenir of the General Assembly Diamond Jubilee, EAC,2008 a 'NEIG Mission Chanchin Tlangpui A biktakin EAC' ti Rev (Dr) Lalhmuoklien Mission Director,ECCI in a ziek para 6na chun "Senvawn Lal Kamkhawlun a fielna angin Watkin R.Roberts ( Sap Tlangval) chun Thangkai le Lungpau hung thuoiin 1910 February thla in Manipur Simthlang biela Senvawn khuoa an hung in zina. Anni hi Rev Wiliam Wiliams ang bawka Missionary Manipur Simthlang biel hung sir hmasataktu annih.Pathienni zan anni puola in thlana inkhawm hmang ania. January 31, 1910 Thawntanni Aizawl a inthawkn Manipur Simthlang biela Senvawn khuo panin an hung inthawk dawk tana. Lampui hredingin Watkin R. Roberts chun Thangpau le Lungpau a hung thuoi a, thuomhnaw phurtu iemani zat a hung thuoi bawka. Chuongchun February thla in Senvawn an hunglut ta a. Chu tuma Manipur Simthlang biel an hung sir khuo hai chu Parvachawm, Senvawn, Parbung, Taithu, Patpuihmun le Sartuinek hai annih. Senvawn khuoa pathienni hmanga an cham hnungin Mizoram Sartuineka inthawkin an kaia. Hi khuo a an um lai hin Thangkai le Lungpau hai chu Kristien a an inpe nghala.Anni hi Manipur simthlang biela Kristien hmasatak an nih.
Aizawl February thla tawptieng an tlunga.Manipur a pathien thuhrila fe dingin an naupang chawmhai lai mi an zawng ta nghala. Tlangval pathum Savawma, Thangchhingpuia le Vanzika hai an inpe a. Manipur a pathien thuhril theina phalna pe dingin Manipur political Agent kuoma thirhrui an thawn bawka. Chuongchun pathien ringsanin Aizawla inthawk chun an hungsuok tah a. Changzawla ruo a sura Vanzika hai khuo ani bawk leiin ni 9 zet an chama. Hi khuoa an um lai Aizawla khuolzin fe hungkir hai chun lekhathawn an hung hawn peka. Manipur Bawrsap thirhrui Senvawn a rawngbawl phalna ania, chuongchun an lawm ta emem a.Anni chu May 7, 1910 in Senvawn khuo an hungtlunga, pathien thuhril an tan tah a.Chu ni le kum chu NEIG Mission kohran bul in tanna le Manipur simthlang biela pathien thu hunglut tanna ani leiin hun sawttaka inthawkin Missionary day a hmang ani hlak Hi ni hi kum tinin Missionary day a hmangdingin sawrkar khawmin holiday ah a sie ta hiela, lawmum tak anih."tiin a ziekve.
Souvenir of the General Assembly Diamond Jubilee, EAC, 2008 ami bawk 'Pastor rawngbawlna' ti Rev Huolthangsei Thiek a ziekna a chun "Manipur Simthlang Biel (Churachandpur) ahin May 7,1910 khan Watkin R.Roberts hmalakna zarin Senvawn khuo a chanchintha in Bu a khuor tana. Watkin Roberts kha mi huoisen le tumru takel ana, la naupang sienkhawm Welsh rama inthawkin Aizawla Dr Fraser hai nupa hung zuiin mani a ramtang nuomve in January 31,1910 ni tak khan Manipur simthlang Biel , Missionary hai lalut ngai dernaw na ram chu en thlitlai dingin Vaiphei naupang pahni Thangkai le Lungpau, Azawla Missionary Schoola lo kai tan chau hai chu hung thuoiin a hung inthawk suoka.Manipur ram an lut chun Parvachawm khuo an sir hmasataka, chun Senvawn ah, Lungthulien ah, Parbung ah, Taithu ah, Patpuihmun ah, Sartuinek ah chun Mizoram Verveka an rieka hi zan hin Thangkai le Lungpau chun sandam in hrietchiengna an nei nghenghe anih.Anni pahni hi eini mi-le-sa laia christien hmasatak annih.Watkin R Roberts hin a khuo sirna taphawta Chanchintha Johan Bumal a sem pei niawm anih.
Chuleiin, ama Roberts a fe liem hnungin, Johan Bumal chu a umzie an hrietnaw a, Senvawn Lal Pu Kamkhawlun in ama khawnbawl pakhat a tira, lekhabu kawmthuo hnuoia a phekruoka kutziek in hrawl pherphura ziekin 'Nangngei hungla mihung hrilfie raw'tiin. Roberts le Dr Fraser chun Makedonia kona anga ngaiin mi pathum Pu Savawma, Pu Vanzika le Pu Thangchhingpuia (Taitea) hai chuh Senvawn khuo thutchil nghal dingin tawngtaina le antir suoka , asanchu, Roberts ta dingin umchil thei ding anih si nawh. Anni ruok hi chu Manipur simthlang Biel an hunglut hin Senvawn khuo an hung pan nalnal nghala; kohran an phuna, ringtu Kristien an um nghal bawka, chu chu May 7,1910 tuta Missionary day Sorkar thawktu chen khawma an inser ta zing hi anih. Senvawn khuo Chanchintha mansa bangna eiti vet khawm hi hienglei vawnghi ani lem anih" tiin a ziekve.Pu Darneilal chun mansa an bangnaw a Bawmrang an hungphur ani leiin Bawmrang innghat tilem ding ani, atia khawm chu nisien a pawi chuong nawh.Ei thupui takchu chanchintha ani tlat leiin.
Annawleh, Pu Sap Tlangval or Pu Tlangval hieng lawmlawm hming inrim le eilam rawn emem el chu tu amana, khawlai mi rengreng am ani leh? Pu Tlangval chu a hming WATKIN ROBERT ROBERTS ania, kum 1886 September 21 Wales ram hmartieng Carnaevon khuoa pienga, sungkuo neinung tak annih. Apa chu Ukil (Lawyer) eiti hai anghi ana, Parliament member khawm lo nita mi rorum tak le tumru takel anih. A tleirawl lai Dr Reuben A.Torrey sermon alo tiema, alungril a tawk hle a, chutaka piengthar-sandamna chang anih.Kum 1904-1906 laia Welsh rama harna ropui takel a tlunga, thuhriltu ropui Evan Roberts hmanga pathienin sin a thawlai ama khawm khawvela chanchintha hrelo ringnaw tu, thina thimhnuoia , sansuok ngai emem a thunghai kuoma chanchintha hril a tulzie an hriet suokvea. Amiruokchu, Lalpa kona chu khawlai ram tak amani ti a hrietchiengnaw leiin England rama Keswick Convention,1907 a thanga, Dr Peter Fraser in India ram Hmarsak tienga chanchintha hril a tulzie a hril a hrietin India rama Missionary a fe dingin an sukthluka. Dr Peter Fraser hai nupa le aruola hungin October, 14, 1908 khan India Hmarsak ramthim suk eng dingin a hungtlung ta anih.Ama hi chawmtu neilo ama le ama in tuma hung ani nghenghe. Tlangval kum 22 chauva upa, hmeltha le feltak ani bawka leiin SAP TLANGVAL or PU TLANGVAL tia ko a hung nih. Nuhmei hmeltha takel Gladys leh innei in nau pasal Paul (Mizo hming Lalkhawpianga) le nau nuhmei Ruth an nei.Ama hi Lala pa ti khawmin anko hlak.
Leh, a chunga ei hungziek hai baka lekhabu le articles tamtak hmuding a um.Thil liemta hnung sui hi a sawt deu talem chun sa hnung sui ang deu ani leiin hril insiek ding a tam nuom renga. Amiruokchu, a ziektu an tam poleh an diktak chu a a hung inlang hlak. Sel-pawtawk zawnga pawl le pawl siema lamving vung tha theinaw anga in khak tuoa thaw nuom chun tarik in angnaw neuneu hai hril kawi thei tamtak a um. Senvawn a Pu Tlangval hunglut dan chu February 1910 ngei ani ti a chiengtawk hlea. Senvawn Lal Kamkhawlun khawm an hmupui a, alo lawm hlea, a khuoa umding le Skul hai khawm sie dingin alo hril. Pu Tlangval le a rawihai chun thil iengkim an hrietfel a, an khaw sir nuomtak Senvawn anva hmua rawngbawlna dinga bu khuorna thei ngei dinga an hriet hnung chun Aizawl tieng an kirnawka rawngbawlna taktak nei dingin Dr Fraser Skul naupanghai lai Manipur Simthlang ramthima Rawngbawl nuom an zawnga, tlangval pathum Thangchhingpuia(Taite) Chhangte, Phullen, Mizoram; Vanzika, Ratu, Mizoram; Savawma (Vawmkapthanga), Lungthulien, Manipur chu inpe in Senvawn chu anhung pan taa, hilai ramthim suk engna dinga bu an khuor tanni chu May 7,1910 ani.Hi taka hin Pu Tlangval chu a thang tanaw hrim anih.Chuleiin ei rama chanchintha hunglut dan chu February 5,1910 in Pu Tlangval le a rawi a rawngbawl tan danding en thlitlaina neia Senvawn an thlung ni ana; May 7,1910 hi rawngbawl tanni ani tihi mi popovin hreseng eitiu A ienglem him a pawimaw eiti ruokchun, a pawimaw veve, tlangram lo neitu haiin anlo hmun ding inchikna per an zepa, vat dinga an thawksuok angchar anih. Perzep le a vata midang an inrawlnaw chun tukhawm an buoi ngai nawh.
Hmar Student khawmpui lien vawi 67na December 2007 a Vairengte, Mizoram a nei tum khan HSA Constitution siemthat chungchanga thangve pawimaw na a um leiin Assembly rorelna a ka thangve a. Kristien Kum 100 thlingna 2010a lawmna dinga thu putlut a uma. Hmar Kohran popo inkhawma Pathien hmabula lawmthu hril le bawk khupa chibai buk chu Students hai thiltum anih. HSA tukvera hei bi chun Kristien sakhuo a eihung inlet hnunghin thlarau damna chau nilovin taksa khawsakna a inthlak danglamna nasatak a hung rasuok ve a. Mi khawsakdan, changdan, chetdan le nunphung dangdanghai entawn nachang hrein, inchukna le khawsakna misuk hmasawntu le changkangtu ani leiin thaw awmtak ani reng. Amiruokchu, kohran pawl thuringbul (doctrine) le inthuoidan angkhat hai hman ui le kel ang ela hmunkhata um khawm theilova inkal themthum eini tawla; ringna le thuring (doctrine) a ei ringkawl bat hmunkhat pui theilo, thim tak meuva eithim, ei pawlser, naupang in thina taka ei hmanghiel hlakhai chen khawm thangsa a renga hmangtlang ding leklem chu ka huphur ngawtel.
Asanchu, HSA hmalakna a eirama kristien sakhuo kum 75na ei hung chuongkaia Diamond Jubilee year kum 1985 a hmangding tuma kohran pawl hranghranghai keikhawm a harsatzie kha taksa ngeia buontu le in khawkpuitu kani leiin ka hrietchieng ema ka huphur anih. Thimlal kulpui, Setan a buzawl, Nelhau a rawi hai inse khekna hmunpui thiekdar dingang thluka kei chun ka ngai leiin student in rawina hnuoia renga Centenary lawmna programme siem nuom um hle sienkhawm a awlai naw dingzie ka hril vea. 'Kohran pawl iemanizat hai lem chun Centenary fund dam an dawl mupmupna kha a sawt ta a, Senvon a Centenary Building bawl ei tum ferfur tawl ana, ei thil rawt hi anhnu tieng anta' tiin a huphur um thu ka kan zawt ngiel bawka. Ringnekin Assembly palai hai kha an thangru khopel. Kohran pawl a thang nuomnaw le azawm nuomnaw an um leh boycott chen nuom pawl dam an hung um.
A tawptawpa HSA huoihawtna a Kristien Centenary lawm ding chun an mi nawr thluk pui ta nghenghe. Bei am sei rundung. Chuonghai baka, Hmars SMS News, Bangalore a inthawka hungsuok February thla laihawl vel khan, HSA Centenary debate tiin debate subject a hung thawa; a thangnuom an tam khawpel, insuo senglo SMS an hmu thu a hungsuok deu zing.
Thukhar tudinga an mihung ti leiin hi debate a thanghai popo thuziek kalo tiema, a thu thlangkawmna le kharna chu 'HSA in Hmar pumhuopa Centenary lawmna a buotsai tum hi sukpuitling ngei dingin hma la sien, kohran pawl a thang nuomnaw le hel tlata, ring sukngar an um chun boycott lovin suktlun dingin hma la ngam sien, hi huna bek hin ei rengin Pathien hmaa lawmthu hril ei tiu' ti anih. Hmar haihi hnam mak takel eina, thil hrimhrim politics nisien, sakhuo thil nisien, khawtlang thil nisien atak tak thlungphak lova a thluka buoi hnam. Mosie anga tum ram tlungphak silova Nebo tlanga inthawka kanaan ram tlir pawl le vanram inhawi zie hahip le zer far kuongkuongin, thuok tawp vangvanga pulpit a khekpuia, mipui an inrui tawkta maw ti pha a thluk hei suk danglama financial campaign a hnungkhar ngeingei. Hmar students khawma a thupui an chai hma a an khukpui ding le buoipui ding chu a thluk tho anih.
Chuleiin, Centenary annawleh, Ei rama chanchintha hunglut chungchang hril ani pha February 5, 1910 hi Senvawn lal Pu Kamkhawlun fielna anga Pu Tlangval le a rawi haiin chanchintha hrilna dinga um hmun khuorna ding remchang ani le ninaw hre nuoma an tlungni ana; thenkhatin Pu Tlangval in Senvawn nekin Parvachawm a sir hmasa lem dam eiti a, hi selpawtawk anih. Asanchu, Parvachawm khuo sir tum annaw a,a lampui a a hraw, zan riek a tula a riek chau lem anih.Chun, um chil thei dinga chanchin iengkim feltaka an hriet hnungin mi pathum pu hai- Savawma, Thangchhingpuia le Vanzika hai chu missionary sinthaw dinga inpe in Senvawn an hung pana rawngbawlna chu May 7,1910 hin tan ani leiin Missionary day tiin vawisun chenin ei hmang ta anih. Chuleiin,.Hieng ni pawimaw pahni haihih a thethawp dan ngaituo lem ding anih.
Hiengang hin: FEBRUARY 5,1910 CHANCHINTHA LUTNI; MAY 7,1910 RAWNGBAWL TANNI. Saptawngin eiti leh FEBRUARY 5,1910-GOSPEL DAY; MAY 7,1910 - MISSIONARY DAY TIIN.
Lawmna programme chu kum a huom phawt chun hini kherkher a thaw atul nawh.
Missionary haiin krista leia hringna thap ngam hiel khopa ei rama an rawngbawlna abul in tandan hrelo, boruok inher danglam dan hre mumal bawklo, kohran mipui hai lai, ei sakhuo thiempu le ei mithiem haiin February 5, 1910 hi Hmarrama chanchintha lutni ani leiin Centenary chu hini a lawm ding ani an tia, khingtieng panga May 7,1919 missionary hai rawngbawl tanni ani leiin Centenary chu hini ngeia lawmding ti pawl ei um bawk.Kohran tinin ei insung budget inhek raka centenary thawlawm ei thaw hai Centenary biekin bawl dam,centenary lungphun dam, Centenary Souviner dam buotsai ei tumseng bawk. Chunglai zinga a tarik ah ei buoia inthuruollova in khak tuoa in kal nei nuoia centenary ei hmangding ani chun midang haiin an milo tlir danding le tiem danding chu ngai pei a um naw khawpel.Tuta inthawka kum 100 dang hungtlung nawk dinga ei tu le te hai an buoi nawna ding le midang ei Hmar chanchin ei rama chanchintha lutdan sui nuom hai tadinga record buoi derlova sie chuh ei maw anih.
Thil pawimaw taluo, hnam ro, thilhlu bek bekel, ei history, naupang inchuk bu a chuong ding ani si a. A ni ni a chuh,hi thu hung irsuokna chu pawl bawk an reka; chulei tak chun annawm, eini rawi pathien ram suklien tum dan chu - Pawl fethlenga pathien rawngbawl eina, pathien nekin pawl ei ngai pawimaw lema, thlawmna nun rengreng kawllo, pawla thisen insuo ngam, ti ziek hmanga, setanin vartaka a rawngbawl dinga ami dawivet hai eini kati vet hlak. Belzebup ruoltha nina le inthim thilthaw ani ti hre nuom derlo,a thuthlung ei hmufie theinawna dingin pawlin ei thlarau mit ami sukdel pek thlata, in phe ruoiin thil amin hmutira, a tak tlinglo hlimtla a min chen tira, pathien rawngbawl lovin pawl rawng ani ei bawl. Khawvel A AW B lem chun iengtinam eiin thuruol reng ding. Chuleiin, a thluka buoi lovin thutaka hin hmasawnna ding zawng eitiu.
Hi Chanchintha zarin pipu nunhlui dit umlo tamtak mimal le khawtlanga harsatna eilo nei hai inthlaktlengna khawfing a hung chata, chu thlifim hung hranglutin kawng tamtaka eilo tangkai pui emem, taksa le thlarau damna ei changa,la hrenaw hai kuoma chu chanchintha puongdarna palai khaidiet ei chunga innghatin Tripura ramthim,Manipur ramthim,Assam ram tiin ei insung le nauhai khawm invawi hmannaw deuthaw in ei buoi tlang ani hi. Manipur simthlanga chanchintha Mansapui hung inbangna sungkuo eini ang hrimin kawng iengkimah midanghai thuoitu le lampui kawk hmutu eini a tul. Ei kawl-le-kienga unau tamtak chenghai entawn tlak le ami siemtu mit tlungngei dingin, chu dar ri chun puitling ngirhmuna mi vawrkai raw seh. Chuongang peiin ei ram sukrinumtu,thisen insuona,tharum hmanga mi tawkpawi le an thiltha lakpek le pathien neka mihriem ralthuom in hukpuia in huk khumkhum hai sukbo sienla, chu dar ri chun kohran le pawl in siktuona, pawl tam zawnga ei rawngbawlna hai sukbo sienla; ei insung le puotieng khawtlanga insuol le inthiktuo na hai sukbovin um sienla, lungril muong tak le hmangaina a kut insui khawmin ei chengna khawvel hi ransa chitinreng thlamuong taka an chengna hlak buonnel ram dai ang in chang raw se.
AW LALPA, SENVAWN KHUO NGEIA IN THAWKIN
REMNA CHANCHINTHA HUNG INRIK NAWN TIR RAWH.
ti seng thei inla nuom a um ngei.
