LUNG PHÄNG LO LA

[By Pu L. KEIVOM*, INPUI-news&info Exclusive]

The human race’s prospects of survival were considerably
better when we were defenceless against tigers than they are today
when we have become defenceless against ourselves.
-Arnold Toynbee

Malè khawsik hriin January 7-16, 1994 chhung khan temperechar 102-103 F inkarah mi man bet a. Ka taksa vengtu sipaite leh rawn rûntu hmelma sipaite chu ni sawm chhung chhun zan zawmin an indo char char a. Ka daktor chuan thun tlingin, mupui leh musep chi hrang hrang, India siam leh Sap ram siam, a thra ber berte chu hmangin rûntu hmelmate chu min dopui a. Indo tektik hrang hrang hmanga kan beih ngial pawh chuan an hnung tawlh duh mai lo a, a beidawnthlak hle. A tawpah zawng an tawlh kir ta hrâm a. Ka rimtawngin ka chau bawk a ni ang, indo a reh chuan ka zawi hmin der a, ni thum chhung chu ka chechâng peih loh rêng rêng.

Khum beta ka awm lai hian, a theih chhung chuan natna hrehawm ata ngaihtuahna thla zara zin bo ka tum hrâm hrâm a. Ofis hna lam ngaihtuah buai chu a hlawk loh bâkah trûlna leh trangkaina a awm bawk loh avangin, zalen taka ka thlarau a leng vak theih nan, ka dah bo hmiah a. Tichuan, ka taksa chhungah an indo mup mup lai chuan, a theih hun apiangah, ngaihtuahnain kil tin kil tangah ka zin kual a; hniak chhiarin ka lei zin kawngte ka chhui kir a; ka lehkhabu ziak tran tum mek THUTHLUNG RAM leh ZORAM KHAWVEL-4 te ruangam tur ka duang a, ka rem khawm a, ka thriat a, ka rem thra leh a; mitthi leh minung ngaihtuahna thlarau, boruaka lengvelte nen chuan thu leh hlain kan inkawm a, an thurukte min hrilh a.

Chutiang thu le hla mi rawn pawltu zinga pakhat chu Damhauha (1909-1972) hla phuah 51 zinga pakhat, ‘Fiara tui’ thlavang a hauhna thu, LUNG PHANG LO LA’ tih hi a ni. Thil dang ngaihtuah ka tum pawhin a khattawk hian,

Luang ang che aw, damten luang dêl dêl la,
Thlang kawrvai Reng daikawmah,
Hmingthrahluanthang, lung phang lo la

tih thunawn hian siknala indêt ang hian ka ngaihtuahna a rawn kâp leh zawk zawk thrin a. Nem no leh lung kuai taka Siampui Sailo-in he hla a sak hi ka ngaithla fo tawh thrin a. Chumi aw nêm fawn leh a hla ropuina infawh khawm atranga mawina rimtui lo zâm chhuak chuan mi rawn bual leh a, ka zawr tran a, tî a mûr sung sung a.

Ka ngaihtuah zui zel a. Engah nge Damhauhan FIARA TUI chu lung phâng lo tura a thlavang a hauhsak kher le? Chu fiara tui, zo tlang sang ata ‘thlang kawrvai, Rêng daikawm’, hmana Rengpui Ram kan tih thrin, tuna Tripura lo ni ta pana luang chuan tuipui zau zawk fin a, a luang ral mai tur chu thlaphang turin a ring em ni ang? He hla a phuah laia a ngaihtuahna rûk ber kamtu chu enge ni ang? Zawl khaw sira Rokunga ‘CHITE LUI’, Rialtui hmingthang lengngha vangkhua fin tura luang dem dem chu a thlavang a hauhsak em le? Hauhsak ahnêkin, ‘luang dem dem rawh, piallei a ral hma loh chuan’ tiin a thlah liam zawk a ni.

Zaipute hian hringnuna tuarna, lawmna, lunghnurna, hlauhna leh beiseina thu emaw, mawina rûk an hmu emaw, rimtui an hriat emaw leh an thil vei rûk emaw te chu tlang tak le thlum no taka an puan chhuah ngam leh thiam avangin, an tum reng pawh ni kher loin, an mihring nihpuite ngaihtuahna rûk puansaktu aw-ka an ni fo thrin a. Chuvang chuan a ni, hnam tin nunah hla hian hmun a luah thûk êm êm chu ni. Damhauha pawh hian a tum rêng pawh ni kher loin, Zofate lungkhamna leh thlaphanna rûk ber, piputen mi chîmral mai duh loa thlang an lo tlak chhan chu Fiara tui hmang hian a puansak ta a ni.

Lui te tak tê tê inchhun khawmin lui lian zawk, lui lian zawk infin khawmin luipui, luipui luang khawmin tuipui emaw tuifinriat a siam ang hian, chi leh kuang tla khawmin hnam te tak tê tê, hnam te tak tê tê infin khawmin hnam lian zawk, hnam lian zawk fuan khawmin hnampui (nation) a siam thrin a. Hei hi minit tina thil thleng reng chu a ni. Lui te chuan lui lian zawkah a inchhunfin hunah a nihna a hloh a, lui lian pawhin chutiang zêlin. Chu chu khawvel awmphung a ni.

Chutianga chi leh hnam lo chhuak, lui te phul liam ang maia nû leh chak leh bengchheng êm êm, fîm hman loa luang ral leh ta mai chu histawri phekah hian hmuh tur an tam êm êm a. Van ruahtui tla, tuihawka lung ral leh thuai anga van laia tla ang mai hnam, chakna hnâr leh kalchar inthlunna mumal nei lote chu an luang ral hma a, hnâr nei thra erawh luipui chawmtu ber an ni ve thung. Lui te chu lui lianah a inchhunfin hunah kuang zau zawka luang a nih tawh avangin a chim chin a thûk tawh a, a chakna leh hmantlakna pawh nasa takin a pung a ni.

Chi leh hnam thilah pawh chutiang tho chu a ni. Chumi kawng chu Zofate pawhin kan zawh mek a ni. Galili dil leh Jordan lui emaw, Ganges leh Brahmaputra lui te emaw leh Airawdung (Irawwady) leh Chindung (Chindwin) emaw fintute hian kan hnâr neih dan leh kan lui fin azirin kan nihna leh kan mizia zêl tur a la hril dawn a ni. A tawpah chuan, hnâr thra tak nei a, tuipui zau zawk leh thuk zawka infin khawm thiam apiang nihlawhin an dingchang mai niin a lang. Chung zinga tun laia entirna thra tak chu Japan tuipuiin khawthlang tuipui a fin thiam dan hi a ni awm e.

Kan pi leh pute hun atranga kan thil hlauh êm êm chu mi chîm rala awm leh kan nihna hloh a ni awm e. Mi chîm ral maia awm hlauhin kan pêm kan pêm a, Bengal Tuipui thleng rakin kan thlang tla a. Thlang tlak leh zelna tur awm chhun chu Bengal Tuipui mai a nih tawh avangin ram khawkrawkah kan inham tang mai mai a ni. Chumi avang leh Ganges emaw Brahmaputra emaw kan fin hmaa chatuan hawlh tlang Jordan lui kan fin hmasak zawk avanga luang ral lo mai mai kan ni. Chumi avang tak chuan alawm Ganges emaw Brahmaputra emaw Bengal Tuipui emaw fin chu chukchu ben threlh hlauh taka kan hlauh êm êm ni. Chuvang chuan a ni kan awmna ram apiangah kan intih mikhual tlat ni. Chuvang chuan a ni miten min mikhual en. Chumi vang chuan a ni a leh a linga tun thleng kan dam khawchhuah ni. Chuvang bawk chuan alawm trah leh ha thrial pawh dawn chang loa kum sawmhnih lai kan rammut.

Mahse, hemi kawng hi kan pumpelh thei em? A pumpelh awm chhun chu luan ral a ni mai. Luan ral kan duh em? Kan duh si loh chuan hnâr chak tak kan nei a trûl bakah lui lian leh zau zawka Zofate hi kan inchhunfin thiam a ngai a ni. Tunah enge kan dinhmun le? Chi leh kuang luankawr 47 lai hiala pêng darh tawh chu lui lian zawk ZO LUIPUI-ah inchhun khawm leh tumin tran kan la mêk a, kan hnam naupanzia ngaihtuah chuan hma pawh kan sawn chak hle. Kan ke chhah dan erawh a la rual lo hle. Luankawr zau zawka luan tlan tuma a threnin hma kan nawr laiiin, a thren chuan chîm ral hlauhin, mahni luankawr te tak tea awmzia mumal awm loa far fêp fêpa luan trêp tum reng kan la awm bawk. Chutianga mahni thliarkara luan reng tumtute chuan vawi khat pawlitiks leh ekawnawmiks khawkhêng pawh an tuar mawh hle. Mahni chi bil chauha luan tum hi kang chahna leh luan ralna kawng hnai ber chu a ni.

Lehlamah erawh chuan, luankawr te tak tea luan reng tumho rilru put hmang tho chu Mizo Luipuia luangho rilru put hmang a ni a; India Tuipui zau zawk fin a, chuta luan luh chu kan thil hlauhthawn ber a ni ve tho mai. Chutih a nih lai chuan Jordan lui fin a, nihna hloh dêr khawpa luan ral chu kan pawiti lo chang pawh ni loin, kan châk ber ni awmin a lang leh hlauh si a ni. Doordarshan tuipui chu vehbur khawn nan chuan kan duh hle a, mahse fin tura kan duh zawk chu Davida Arsi lui leh Kalvari hnûn atranga luang chhuak, khawthlang tuipui te chu ni zawk tlatin a lang. Kan sakhua a him chuan kan hnam pawh him turin kan ring nghet hle tih a lang. Chu chu Hindu leh Muslim tuipuia chengte pawhin an ring ve tho. Mahse, kan sakhaw innghahna thrut leh ban ei chhetu, a sûlrûl leh tlungpi ber chu keimahni kan ni leh bawk si.

FIARA TUI phuahtu Damhauha hian kan hla phuah thiamte zingah danglamna mak tak a nei a. Zaipu tam tak ang bawka mi lungleng thei êm êm a ni. Mahse a lunglen dan hi lunglen dan pangngai a ni lo. Kan hnam histawri zûna tâng leh uai, lungleng taka kan sulhnu fang fang thrin ni awmin a hla atrangin kan hmu a ni. Zoram tlang tluan leh kan thing le mau leh hnim zawng zawng hian chumi zun chu phurin a hmu a,

Zûn phur thing tin par leh khawtlang lii liai
Hi han hawi vel ila, trah lai min rêltir e;
Ka dawnin suihlung a leng e,
Khuarei ka ngai ngam lo ve!

a ti thlawt mai a ni. Hemi hlaah bawk hian, chumi zûn chu ‘Pipu sulhnu, hnam tin lunglai kuaitu’ a ti hial bawk a.

Zoram khawvel, hmuh theih leh hmuh theih loh mual tinah hian pipu sulhnu chu romei anga zâm kumkhuain a hmu a, “Chatuan romei, pipu zun lêng a zâm, zo daiah” a ti thlawt a ni. A hla phuah thiamna thlarau tinungtu le tichetu pawh histawri zûn niin a lang bawk. Chuvangin, FIARA TUI hmanga Zofate lungkham rûk ber, kan hnam lui luang zel tur dinhmun kan veina thu chu a puang chhuak mai pawh ni loa a thlavang a hauhsak hian ama testimawni mai pawh ni lo Zofate ngaihtuahna ril ber min phawrhsak a ni kan ti thei ang.

Luang ang che aw, damten luang dêl dêl la,
Thlang kawrvai, Reng daikawmah;
Hmingthrahluanthang, LUNGPHANG LO LA.

[*Editor's Note: INPUI-news&info columnist Pu Keivom is a retired Indian foreign diplomat and respected Hmar Mizo litterateur. This article was written by him on April 1, 1994 at Male, Maldives.]