Pathienin a nauhai a theinghil ngainawh!

Ziektu: Pu Lalmalsawm Sungte

Khawvel hlimhlawpna, inhawina le hausakna hnawtin nitin sin nasatakin ei thaw a, ei hrietnaw karin a mi siemtu Pathien ei lo theinghil rawp hlak a. Chuongsa khomin, Pathienin a hmangaina tawpintai neilo chun a mi chenchil zing hlaka, a mi theinghil ngainawh.

Taksa ramah harsatna ei hung tuoka Pathien hnai nek hmanin tawngtai takngiel khawm ei pei naw chang a tam hlak. Ringtu inti han hlawsamna lampui ei hang hraw zet chuh, Pathien thilthaw theizie theinghil in, ‘Pathien khawmin a mi hrietfuk ta naw ning a tih,’ ti’n ei chier chang a bo nawh. Lo sinthawtu haiin fak khawp an thlo dawknaw changa mawsiet ding an hau ang bawkin, khawpuia sinthawhai khawm hlangkaina (promotion) le hlaw pung (pay hike) dinga ei lo in ngai lai zing, ei ti naw ang thil ei tawng chun hlawsamah ei in ngai hlak. Ei hotu le chunga roreltu han ei sinthaw thatzie le taimakzie hmunaw hai sienkhom an chunga um Pathien, muvanlai anga mi thlirtu, chun a lo hmu vawng a nih. Hlawsam anga ei in ngai lai hun tak hi ngui le chau a um ding nek hmanin ‘khawhe! muol ka suo tep an tah, la hei thang tal tal ka tih,’ tia thang thar hlak ding ei nih.

Rachel in nau a vawn theinaw lai a unaunu Rea chun Jacob chu nau a nei pek zut zut a. Nisienlakhom, Pathienin Jakob kuoma a thuthlung: ‘Chi tam takin siem ka ti che...’ a ti chu a theinghil naw a; a hun takah Rachel sul chu mal a hung sawm zet chun an thlahai thla chenin rochan tha an hung nei pha hiel a ni kha.

Chuleiin, ringna nghet tak neituhai chu Pathien thatna le thununna an hrietthiema, sawl lovin an tlan hlak. Pathienin ‘ka siehlaw khu dawmkang/malsawm tang ka tih’ a ti hunah chu khawvela thuneitu Pharo anga lungril ngar a ei i hriethai khawmin an dang zo ngai nawh, ti hi ei lungrilah vawng zing pumin thangla hlak ding ei nih.

Zawlbuk, June 13 Issue