AIZAWL: Tipaimukh Multipurpose Hydel Project khuah chungchangah North Eastern Electric Power Corporation (NEEPCO) chuan Mizoram sawrkar hnen atangin forest clearance lak a ngaih avangin ruahman lawk dan chuan vawiin hian NEEPCO leh sawrkar hi an inbe dawn a, he project-ah hian Bangladesh sawrkar pawh a inhnamhnawih tel dawn niin hriat a ni bawk.
Tipaimukh project hi Union ministry of Environment and Forest chuan Manipur sawrkar ruahmannain clearance a pe tawh a, Mizoram sawrkar atangin forest clearance hi June ni 30 khian NEEPCO hian a lak theih beisei a ni a, naktuka Mizoram sawrkar leh NEEPCO inbiakna turah hian tihfel theih beisei a nih thu media report-ah tarlan a ni.
He tuikhuahna man tur hi a sang tawh hle a, tunah hian thil chi hrang hrang chhut tel lovin cheng vaibelchhe 8138.79 lai mai chu sen a ngai dawn tawh a, Union ministry of Shipping Road Transportation and Highway chuan NH-53 hruaikawi nan cheng vaibelchhe 202.63 lai sen ngai tur chu a pawm tawh a, Manipur sawrkar chuan he tuikhuah hi Manipur, Mizoram leh Assam ram tana a tangkai dawn avangin thawhhona tur Special Purpose Vehicle (SPV) din a rawt tawh nghe nghe a, he tuikhuah hian kawlphetha megawatt 1500 lai a pechhuak thei dawn a ni.
Tipaimukh hi Mizoram hmar lam Sakawrdai bul lawk Manipur ram chhunga khuah tur a ni a, Mizoram hi a chim chhe nasa vak dawn lo niin mithiamte chuan an sawi a, forest clearance an lak tur chungchangah hian Mizoram Forest minister H Rohluna chuan engmah a hriatpui loh thu Evening Post a hrilh thung.
Source: emizoram.com
Post a Comment
Comments not related to the news or article may be deleted.