INPUI: Hmar News & Info

By Lienthanglur Khawzawl

Ei hme hlak thil thenkhat hai scientific name le hrietdan inlarhai ei lo hriet ve dingin ka hung thawlawm ve:

Thangjing: (Euryale ferox) foxnut 

Bachikhawm: (Eryngium foetidum) culantro, mexican coriander, long coriander

Zawngta: (Parkia speciosa) bitter bean, twisted cluster bean, or stink bean

Bal: (Colocasia esculenta) taro 

Mantakha: (Solanum aethiopicum) scarlet eggplant. Morro redondo variety hi a kha.

Khanghmuk: (Senegalia pennata) climbing wattle

Aithang: (Houttuynia cordata) lizard tail, chameleon plant, heartleaf, fishwort, bishop's weed, fish mint

Thingthupui: (dysoxylem gabora)

Anphui: (Clerodendrum colebrookianum) East Indian Glory Bower

Lengmaser hi basil ei ti tawl a chu basil a ni hmel nawh. Basil hi india a inthawka suok a na chi thum a the an ni deu tak- sweet basil or thai basil, lemon basil, holy basil (tulsi). 

Lengmaser le a hnai deu in ziek ka hmu sun chu Chitrita Banerji in 'Eating India: Exploring the Food and Culture of the Land of Spices' ti lekhabu a ziek ah hieng hin a mention- "Among the unique products are a basil-like herb called lengmaser...". 

Basil le a varieties dang dang a hin lengmaser ang chu hmu ding a um nawh, a rim ruok chu an hnai met. Basil hi a mu (seeds) khawm fak hlak an nih a ice cream, sherbet a hai pawl hlak an nih. Basil mu hi tui ah inchie a ni pha chun gel ang deuin a hung um hlak.

By L.Keivom, Inpui.com Columnist

HUPOSTASIS

Kum 400 vel liem taa King James Version an inlet lai chun Hebrai 11:1 hi “Faith is the substance of things hoped for, the evidence of things not seen” tiin an inlet a. Hi taka ‘substance’ tia an inlet hi a Grik trong chun ‘Hupostasis’ ti a na. Hi Grik thumal umzie tak hi an hriet naw leiin an buoipui hle a. Grik tronga lekha ziek hluihaia inthoka a umzie hmu suok tumin an zong ngiel a, an hmu zo si naw a. Mihriem indawrna le sumdawngnaa thupui fûn tak nia an hriet leiin ‘substance’ tiin an inlet top niin an hril.

Revised Standard Version (RSV) chun hi chang hi, “Now faith is the assurance of things hoped for, the conviction of things not seen” tiin a sie ve thung a. NIV chun, “ Now faith is being sure of what we hope for and certain of what we do not see” a ti laiin, Jerusalem Bible (Roman Catholic Bible) chun, “Only faith can guarantee the blessings that we hope for, or prove the existence of the realities that at present remain unseen” a ti ve thung a. New English Bible (NEB) chun, “Faith gives substance (assurance) to our hopes, and makes us certain of realities we do not see” a ti bok.

Ei Baibul hmang lai chun, Lusei tronga mi a ngiel a ngana inletin, “Ringna chu thil beiseihai um ngeia hrietna, thil hmu lohai hrietchiengna a nih” tiin sie a na. Delhi Version-a chu “Ringna hi ei beiseihai hriet chiengna le ei la hmu naw hai hriet fiena a nih” tia sie a nih. Chik taka a Grik thumal umzie ei bi chun, Saptronga inlet le eini tronga inlet a ieng ieng khomin a ang chie a kawk phak naw vong. Hi hi thu inlet a khirkhanna le buoithlakna tak chu a nih.

KJV an inleta inthoka kum 300 hnung daiah Israel ram hmar tieng tien laia khuolbuk hlui, pilvutin a nel khum vong tah chu hnuoia inphum thil hlui dapa cho suoktu pawl arkhialawzis (archealogists) haiin an hmu suok a. Chu khuolbuka chun thir thingrem chikte an cho suok a. Hi thingrem sunga hin lekha poimaw tam tak a um a, chuonghai chu Roman mi, nu hausa le neinung pakhat ta a nih. Ama nu hin Israel ramah in le lo, hmun le hma tam tak a nei a, chuong lekhahai chu a thil neihai chu a neitu ngei a nizie hriltu le sukchiengtu a nih. Lekha phek tina chun a phek tontir lu tieng ‘Hupostasis” ti an ziek vong a. Hi hi Saptrongin ‘title deed’ an ti a. India rama ruok chu, Jamabandi ei ti a, chu lekhaa ‘PP’ ti inziek a um chun ‘Pukka Patta’ tina a nih Chu lekha neitu chu a ram neitu a ni a, kum hluna a ram neitu tak tak ruok chu Sorkar a ni dai thung a nih. Khaw lai rama khom a ram leilung po po neitu le chu chunga thuneitu tak chu Sorkar a nih. Kong danga hril chun, Jamabandi chu sorkarin a ram hluo thei dinga mi tu khom phalna a pekna lekha a nih. Chu lekha chu a nih Grik tronga ‘Hupostasis’ an ti chu.

Chu tak chu Hebrai ziektu hin ringna hrilfiena dingin a hmang a nih. Chuleiin, ngun thlukin hang bi inla, a hmaa ei hril tah ang khan, Saptrong le eini tronga ei inlethai hin a umzie an phur suok nawzie chu hre chieng thei ei tih. Hi hi a nih, thil inlet harsatna êm êm chu. A umzie ei hriet si, ei tronga thu mal intlukpui um si lo a um treu a, chuonghai chu a umzie kawk hnai tak dinga inlet a ngai hlak. Chuleiin, sorkar trongkam hmangin inlet inla chu, “Ringna hi beisei ram hluo theina pukka patta (jamabandi) a nih” ti ni mei a tih. Sorkar chu a ram sunga ram po po neitu a ni angin, Pathien ram/van ram neitu chu Pathien a na, chu ram ei hluo theina patta um sun chu RINGNA a nih.

Kum 2003 khan kum sawmhni liem taa ka in hmun inchawkah dawr hmun ding kan bawl a. Ka um sungin a ram khom a tharin kan inkhitir nawk a, patta pahnia lo um chu a tharin patta pakhatin ka’n siemtir bok a. Hi hmun neitu nina patta chu ka hminga um a ni leiin, kum sawmhni zet ka um naw sung khomin tu khomin an mi hung inchupui naw a, dawr hmun ding kan bawl khom an mi khap thei bok nawh. A san chu “Hupostasis” neitu ka ni tlat annawm. Chu thil le ringna leia van ram hluo thei a ni thu Hebrai ziektun a tekhi hi a fuk top a nih. Ringna neitu chun matheiloin van ram a hluo ngei ding a ni si a.

Hi ei thil hrila inthoka inchuk ding dang pakhat chu, a kawkzie anga Baibul hi inlet thrat pei a trulzie a nih. Eini rawi, abikin thrang hlui tieng, Baibula sunhang pakhat khom inhmang lo dinga a hril kha, a tira Baibul an lo inlet kha thlak thei lo ding anga ngai nuom pawl ei um bakah, ei lo baihat ta sa naw ang deua inlet a a um chun Setan kut inrolna ang hiela hril nuom el pawl ei um a, a poi ngot el. Hi lungril hi bansan ei tiu. Baibul hi ei bi chieng po leh, tuta ei thil chai ang hi a tamzie ei hmu suok deu deu a, inlet thrat le siem phuisui pei a trulzie an lang deu deu bok. Chuong laia pakhat chu Thuhriltu bua a thu chîk, voi 37 zet a hmang, thu inlar deu, Saptrong khoma an inlet fuk chie lo, eini tronga ‘teplohai teplo’ tia ei inlet, Hebrai tronga ‘Hebel’ ti hi a nih. Chu chu a hnuoia hin a hranin hang chai nawk ei tih.

HEBEL

Genesis bung khatna ei tiem chun, Pathienin ni ruk sunga a thil siem tinrenghai chu a en a, thra a ti hle thu voi sari top a chuong a. Thra ei ti thil chu ei lung sukawitu a ni hlak. Ei lung sukawitu thil rêng rêng chu ei ngaizawng amanih ditzawng a ni ngei hlak. Krista ngaizawngtu Pastor Thangngur chun,

‘I hmelah lawmna kim a um’ an ta,

I trongbau suok khom chu a thlum khuoi angin;

I mi hîpna i hmel ditum,

I trongbau suok thlum tak leh chun,

Aw hmu le hre ve dingin ka hung a nih

tiin hla mawi takin a khek suok hiel a ni kha. Pathien khomin a thil siemhai kha mawi a ti hle a nih. Chuong ni naw sien, Genesis ziektu nia hriet Mosien bung khat sungah thu pangngai ngot voi sari top a hril non ring a um nawh.

Ei Baibul hmang laia bu 21-na ei hang tlung ruok chun, Thuhriltuin ni hnuoia thil po po hi, eini tronga ei inlet dan chun, “teplo, teplohai teplo” a mi ti faipek vong bakah voi 37 top a hril non a nih. An leh, ni hnuoia thil um po po, Pathienin malsawmna tinrenga a’n khum le mawi a ti êm êm hai le chuonghai po po chunga thuneitu dinga a siem mihriemhai, Davida ngeiin,

I kut suok thangvan sanga,

Sorthla siar i’n nghathai,

Thlira ka dawnkhawl changin,

Hringmi hi iem ni hrim a,

I hriet fuk lop lop el ni?

Hriem nauhai khom iem an na,

I ngaisak em em el ni?

Angel hnuoi thetah siein,

Ropuina le chawimawina,

Tonlairang i’n tontir a.

I kut suok po po chungah

Lalin anni i siem a,

An ke hnuoiah i sie vong:

Beram le bawng ruol po po,

Ramsa le chungleng vahai,

Tuipuia nga chi tinreng,

Thilhring chi tinrenghai leh

(Sam 8:3-8) ti hiela a lo insampui le mihriem hringnuna a thilthawhai po po chu “teplo mei mei” a ni el thei ding am a ni?

Teu lo e! Teplo mei mei khom ni lo, teplohai teplo dingin Pathienin khawvel le a sunga thil umhai hi a siem ring a um nawh. Ni khom ni bok naw nih. Chun, chuonga teplo mei mei hai ta ding chun Pathienin a Naupa tir naw top a tih. Mihriem hi Pathienin ama angpuia a siem a ni leiin a mi ngai poimaw a, a lung lairil kham zingtu chu ei nih. Mihriem hringna hi a hlu a, thil teplo mei mei a ni naw leiin a Siemtu thu loa lak el a phal naw a, Dan Sawm a pek khomin, “Tuolthat naw rawh” ti hi a chuong ngat a nih. Hringnun hi thil teplo mei mei a ni nawh; thil tep (?) po po laia tep(?) tak a nih.

‘Teplohai teplo” tia ei inlet hi Hebrai trong chun “Hebel” ti a ni a, a umzie tak chu “thuok, sûm, romei” tina a nih. Tui a hung so a, a khu a hung suok a, boruokah a’n zam ral nghal el ang hi a nih. Jakob lekhathona (4:14), “In hringna chu iem a na? Sûm sawt naw te hung inlang a, bo nawk el ang hi a ni si a” a ti ang le, Davida inpakna hla (Sam 144:4) a,

Mihriem hi thuok ang chauh a na,

A dam sung khom hlimthla anga

Ral nawk el hlak ang hi a nih (Delhi Version)

a ti ang kha a nih. “Mihriem hi thuok ang chauh a na” ti hi ei Baibul hmang lai chun, “Mihriem hi ieng khom ni lo ang a na” tiin sie a na, “ieng khom ni lo ang” ti umzie ruok chu a hrie ei vang hle ka ring. Hausa si, hausa lo anga um ti ang deua poimaw si, ieng khom ni lo anga um tina hlak chu niin a’n lang bok si nawh. Hieng ang trongkam hmang hi ei Baibul lo buoipui hmasatuhai chemkalna zawng am a ni ding, an hmang rawn em em a, an hmang a nih ti hrie khom an um naw a ni el thei.

A ieng khom chu ni sien, thu inlet hi a hautakin a buoithlak a, fimkhur le inring zing a ngai. Trong pakhata inthoka trong danga Baibul inlettuhaiin thaw dan an hmang tlangpui chu Saptrongin, functional equivalence (FE) an ti a, chu chu a thu kawk phur suok dinga inlet tina a ni tak. Chuong ang chun a umzie kawk dinga an ngai tak hmangin, King James Version (KJV) buotsaituhai chun ‘hebel’ ti hi ‘vanity of vanities’ tiin an inlet a, chuong ang chun Revised Standard Version (RSV) chun an hmang ve el a. New International Version (NIV) ruok chun, “utterly meaningless” ti a hmang a, Jerusalem Bible (JB) chun “sheer futility” a ti ve thung a, New English Bible chun “emptiness of emptiness” tiin a’n let. Hmar tronga a umzie tlangpui chu ‘teplo, umzie bo der, thil thlawn hulhuol, thil kawrong, fûn bo, a ruok’ tina a ni deu tak. Tu lai tronga “I boruok top” ti hin a hrilfie takin ka hriet hmán hmàn.

Chîk taka ei bi ruok chun, Saptronga atu inlet khom hin ‘hebel’ umzie tak a phok phak naw a, a umzie an hriet anga an hrilfiena ni tak lemin a’n lang. Thuhriltu hin mihriem hringna chu ‘thuok’ leh a tekhi a, chu chu Saptronga ‘metaphor’ an ti hi a nih. Hnam tinin thil ei hril pha mani tronglamkei ei nei a, chu chu ei kalchar le inthlung tlat a ni leiin, chuong ang trongkam ei hmang pha chun ei thil hril tum kha a ngaithlatu le tiemtu ngaituona mitah a chieng êm êm el a nih. Israelhai chun an ram inhoizie hrilna dingin, ‘nenetui le khuoizu luongna ram’ ti tronglamkei an hmang a. A ngiel a ngana lak ruok chun, nenetui le khuoizu luongna ram chu tho le thilhring dang dangin bawm lut lut an ta, a rim sein thu vut vut a ta, por inthluok a ta, an lampui khom innâl bok a ta, chengna tlak hrim ni naw nih. Amiruokchu, ‘nenetui le khuoizu luongna’ ti chu metaphor a ni leiin ram le hmun ‘hnienghnar’ le inhoi tina el a nih.

Thuhriltu hin hringnun hi teplo le umzie nei lo a ni thu a hril naw a, ni khom a ni bok nawh. Hringnun hi a hlu a, thlakhla lo anga inpawt inpawthai khom hi thi rin pawla mi an ni nuom khop el. Hringnun anga hlu a um nawh. Damna ding chun nei po po khom seng ei inhuom deu vong a nih. Chuleiin, hringnun hi ‘teplo mei mei’ amanih, ‘teplohai teplo’ ei ti zat hin khêl ei hril a nih. Thuhriltu hin hringnun tawizie, ‘thuok’ ang chauh a ni thu, thil ieng khom hin an dai sawt nawzie le nisa hnuoia thilhai hrim hrim hi kum hlun tling zo hrim an um naw thu a hril lem a nih. Ei inthuok zo chara ei inthuok suok thli chu eini thua chel thei loa boruokah a’n zam ral nghal angin, hringnun khom hi eini thu ni loin, sawt naw teah a tawp a, chatuon boruokah ei inzam ral hlak a nih.

Hringnun hi ‘thuok’ ang chauh a ni thu hrilfiena dinga Jakob (4:14) le Sam (144:4) ei tar lang tah bakah Job (7:7), Isai (40:6-8) le Isu Krista thu hril (Mathai 6:25-34) leh khom tuta ei hril hi pawi kawm thin ang an nih. Hringnun hi hlu hle sienkhom hnuoia a cham sung dinga ruot chu thuok (hebel) ang chaua tawi a nih.

By L.Keivom, Inpui.com Columnist

Lalpa, rul ka nuom che,

Ka nun le êng pûk chu.

-Upa Ngama

Saidan khaw mi Upa Ngama chun Lalpa thrang loa a hun a lo hmang ral tah po po chu a sui kir a, poiti le insîrin a awm a dom vong vong a. ‘Takchapa’ tia thrang khomin sekhon khat khom a kei kir thei ta nawh ti a hriet a,

Hun fe peihai, Lalpa loin,

Khaw lai am an tlung ta a ?

Kìr ruol loin muol an liem tah,

Hun la umhai iengtin am hmang ka ta?

tiin hla mawi le ropui takin kum 1945 khan a khêk suok a. Hi hla hi kum sawmruk nêka upa ni tah sien khom sak a la hlaw zing chauh khom ni loin, hnama ei dam khawsuoka, ei sakhuo khom ei la chel zing phot chun, a la ropui deu deu ding a nih.

A nih, mi tu khom Krista leh an intuok phaa an nuna thil hung tlung laia pakhat chu hun hlutzie le hun an lo hmangthai mei meihai kha zuk inpâma insîr ngawi ngawina lungril put a ni chu tie! Kong dang zawnga hril chun, hringnun tawizie dawnkhawl nachang an hung hriet a, thil thra thawna ding hun lawmum peka an um an lo hmang riral mei meihai kha an inpàm a, thil thra thaw dinga inhawmthawna lungril an hung put nghal hlak a nih. Pathien leh inzomna nei taphotin hun hlutzie le inpâmumzie an hriet chieng hlak. Chuleiin Upa Ngama khomin, “Lalpa rul ka nuom che, ka nun le êng pùk chu” tiin a khêk suok a nih. Isu intuokpuitu dang Zakai khomin, “Ngai ta, Lalpa, tuta inthok chu ka sum zâtve pasiehai sem ka ta, tu thil khom indik lo taka ka lakpek chun a lêt liin rul ka tih” a ti hrim a ni kha. Pa dung tawi le chèmbe ni sien khom Isu a’n tuokpui hnung khan chu a dung tawina hrimin thû a phur ta nawh.

Kan makpa Upa Ngama hming zuk sàm tâka chun lung hlui a sukleng vong vong a. Chuleiin, a chanchin tlawmte hang tar lang vak ei tih. Saidana kan in hmar tienga um, huon dai intrawm kan ni a. Pa zâng inkùl khauh, rawl thâm chât el, dumziel hè, chêr khen khon, fiemthu thiem le trongkam thiemna tieng chu ‘Ka pu tuk’ ti ang khopa a piengpui hrim a nih. Dier khom ama hi a kei sawt pawl tak niin ka hriet. Thuhril a thiemin a thu a hring a, mi sermon haw ve loa ama awma inthoka suok thu tharlâm phu suok hlak mi a ni leiin sawt tak a hril khomin nghok tik a um thei nawh. Hmar Hla Suina ka buotsai lai a chanchin indon dinga ka pan hlak bakah ama ngeia ziek dinga ka phût angin kimchang takin a hung ziek a. Chu le kum 1960-70 bawr vela hrang hlui la damhai chanchin anni kut ngeia ka’n ziektirhai chu hnam ro hlu an nih ti hrein indoi takin tu chen hin ka la kol thra a. Hieng hla phuoktu, mi hmasahai laia hun hlutzie le pamhmaizie hlaa hril rawn tak chu Upa Ngama niin ka hriet.

Upa Ngama hin a hming tak nekin a nau lutir hming chawia ‘Singhleipa’ tia hriet le ko duot a hlaw lem a. Ama hi Watkin Roberts-in Senvona gospel meiser a hung sit lut kum 1910-a Taithu khuoa pieng le a hnunga a’n pèmna Parbung khuoa a naupang laia lekha inchuk a nih. Ziek le tiem dan a’n chuk hnungin sikul a chawlsan a. Parbunga a’n pèm hnungin kristienah a’n pek a, sienkhom sawt riel loin a tluksan a. Pipu dana thangsuo tumin bu le sa ineina ding tiin siel a vai a. Hausak tumin Thanlon-ah dawr dam a siem a, sienkhom a thaw zom pei naw leiin Parbungah a kir nawk a. Butukhuonglawm dam thaw tharin, a thuneitu tak ‘Lawmlaisa’ an tia dam a thrang a, sùn le zàn zu inruiin a khawsa hlak a.

Kum 1939 khan a nauhai pathum le a nuhmei leh Pastor Thangler kutah baptisma an inchang a. Chu hnung kar khatah a naupa Singhlei, Taithua a puhai ina um chu thruoi dingin a fe a. Sunbu fak khopa Parbung tieng a hung kir chun lampuiah rawlin mi suol a nizie le Pathien ta a nizie a hung hril a, hlimna hril thei loa thuomin a um a, mitthli pumin Parbung a hung tlung a. Chu hnung chun a thil nuom zawng po po a hung inthlak danglam a, mi pieng thar a lo ni tah a nih. A kum nawk 1940-in hla a phuok tran a, KAN SIENGNA THIM LAL KULPUI ti chu a hla phuok hmasa tak a nih. Hi kum bok, patve hun laiin Hmarchamuolah a riek a. A hun liem tahai hmang loa a lo hmang ralhai chu a sui kir a, a’n pàm êm êm a,

Hun liem tah hnung chu a pâm an ta maw Lalpa!

I hmangaina leiin ko kîr thei ka ti’m?

‘Ko kîr thei lo e, ka nau, hun liem hnung chu’

tiin poi a tizie hlain a phuok a. Hi hlaa hin kha hmaa Diebol hmangruoa a lo thrang leia a’n sîrna thu le Pathienin a hung thlamuongna thu chieng takin ei hmu a. Chu hmangaitu ditsakna kut chu chel dingin thu an tiem tah hrim a nih.

Thina thim hnuoia a’n thrung laia a lungrila ‘pielral khawfing hung chat’ chu hla chaua puong suok loin khaw hrang hrangah puong dar dingin a’n zin suok a. Trongtraia mi sukdam theina khom 1942 khan a chang a, sienkhom sawtnawte hnungah lakpekin a um nawk a. Kum 1943 chawhmain mang mak tak a nei a. Mi pahni hin kelchalte keiin a tuolpuka an hung thlung a hmu a. A hei indon chun, “Lalthangpain, ‘Kei hlak ka um ta naw ding a ni si a, hi kelchalte hi Singhleipain hung kol ta lem raw se, hang pe ro’ a ti a nih” tiin an hril a. A zan nawk chun a bauah hmul tam deu el a lo mawng a, inhmaw takin a hang pot leh a tam lem a hung mawng nawk pei a. A mang lawk ang hrim hin Pastor Thangngur (Lalthangpa) chu kum tawp December 20, 1943-ah a thi a, hla tienga a kalbi lo rem tah chu Ngama chun hung sunzomin, a baua inthokin hla tam tak a hung put suok hrim a nih.

Kum 1944-45 khan Lungthulien ram Kawnpuiah a va’n bawk a. Ama ngeiin, “Hi kum hni bawka ka um sung hi hnuoi ka hluo kum sung po poa chu hi sunga ka sipna le ka lawmna hi a hma khom khan a hnung khomin a um ta naw hrim hrim a nih; vanchanglang khuo an ti ang pawl a nih. ‘I hnung tienga i umna hlui po poa khan i um nuomna lai takah um nawk thei la, khaw lai tak am um i nuom a?’ mi ti hai sien, ‘Kawnpui bawka khan um nawk ka nuom’ ting ka tih. Ka bawkte chu a dung hlam thum le kiuthle, a khang hlam hni le kiuthle, a lieng chu inji thinga ka khit de a ni a, a ropui naw hle a. A mi umpuipa a thra a, in ka hluo lai po poa chu in inhoi pakhatna a tling tak a nih” tiin a hril. Hi kum hin a nun hluihai sui kirin, hmang loa a lo khaw ralhai chu a ngaituo a, a’n pàm a,

Hun fe peihai, Lalpa loin,

Khaw lai am an tlung ta a ?

ti hla ropui tak hi a phuok hiel a nih.

Hi hlaa hin a hun sei lem a hmang ral hnung, a hun lèr tieng nia a hriet hnunga hringna thar amaa par anga hung vul chu lawma a hlim thu a hril laiin, hun liem ta hnung hmang loa a lo hmang ral mei meihai chu a’n pàm êm êm thu a hril bok a. A ‘nun le êng pùk’ chu thlarau thrangpuina zarin a hmun lia rul a nuom a, inhawmthawna lungrilin a sip a. Hieng ang lei hin rongbawlin hmun tinah a’n zin suok a, hla ropui tak taka thuomin a um pei bok a nih.

Hi hla a phuok hin kum 35 mi chauh a la nih. Sienkhom, a hun sei lem a hmang zo hnung, a hun lèr tieng niin a ngai a, chu chu a hlaah chieng takin ei hmuh. Hieng hun laia India rama mihriem dam kum pangngai chu kum 30-35 vel a ni hrim a a nih. Tlangrama rimsi taka thosi, thrangthrâm le invot kara natna tinreng tlakbuok hnuoia kum tluona hling le hrâm bul insuolpuihai lem chu an hringnun a tawi zuol a. Khaw hrang hranga thlan muol hang fang inla, lungphuna an kum zat an ziekhai hi hang bi inla, kum 30- 40 inkara muol liem deu vong an lo nih. Chuleiin, a hun lèr tieng tlung taa a’n ngai hi thil awm hrim a nih.

Chu thu, ‘hun lèr tieng’ zuk hril tâka chun kum sawmnga deuthaw liem taa D.M.College-a ka kai laia English hla phuok thiem P.B.Shelley hla A Lament ti ka baihat ka zuk hriet suok chu tie! Shelley chu kum 30 chauh (1792-1822) a dam a, sienkhom English literature a hring sung chun a hming le a hniekhnung maksanhai hi bo ngai naw nih. Kum sawmthum a tling hma khomin a hun lèr tienga chuong a ni tah ti a hriet leiin,

O World! O Life! O Time!

On whose last step I climb,

Trembling at that where I had stood before;

When will return the glory of your prime?

No more-Oh, never more!

Out of the day and night

A joy has taken flight:

Fresh spring, and summer,and winter hoar

Move my faint heart with grief, but with delight

No more-Oh, never more!

tiin, lawmnain an trinsan tak thu dam, sik le sa inthlak danglam chun hlimna neka lungngaina an hung phur lem takzie dam le a vanglai hunhai chu an hung kir tah naw ding thu dam mawi le rienginko takin hlain a lo insam suok a ni khah. Hi hla hi ka tiem zatin ka lung a sukno naw thei nawh.

Sienkhom, Upa Ngama-in a hun sei lem a hmang zo hnunga hun lèr tienga a nuna Krista a hung vul thu a hril ruok hi chu P.B Shelley hla anga sùnna thu ni loin lawmna thu le inhawmthawna thua sip a ni lem. A nun le êng pùk chu lawm taka a let lia rul dinga a’n tiemna chu Pathienin a don a, hi hla a phuok hnung hin kum 37 zetin a dam kum a la sukseipek a nih. Parbunga inthokin Rengkaiah a’n pèm a, Rengkaia inthokin Saidanah a’n pèm nawk a. Leilet thra a bengbel hnung chun fak le dawnah a hung phuisui ve ta a, lo sin thaw tienga inhmang loin a hun awl tam lem chu Kailamhnuoi le Kailamchung biel hrang hrangah thuhrila inzinin a hmang thei tah a nih. Chu ruol chun hla thra tak tak amaa inthokin a luong suok a, chuonghai chu voisun chena ei sak nghok thei lo hla an la ni zing. Hla a phuok tam tak hi a thu le thluk a ruola hung inlang an ni leiin, a phuoktu ni loin a ziek thlaktuah an ngai a, ama ngeiin, “Secretary-a thrangin kan ngai lem” tiin a hril.

A rongbawlna a hlawtling vanglai takin, Lal Davida ang khan Phulpui khuoah ngalri phêngphet an ti angin nunghak lakah a tlu a, kohran phuorna chen a tuok pha a. Mani insukhlum hiel nuom khopin suolna tinreng khurah iemani chen lutin a’n tàl buoi a. Khanga inhawmthawa a hun sei lem hmang zoa inngai tah khan a kum tlawmzie suonlamin,

Theina ieng khom ka nei nawh,

Ka kum khomin a dai nawh;

Hmingsietnahai tuor zo

Hmel khom ka la put nawh;

Ka phur a rik taluo, ka Lalpa!

tiin a key a thlak danglam nawk dai el a nih. Ringtu fel le suongum tak tak khom an sir inphet a, suol bawiah an tlu lut pha chun an hmel siet le hemna inkhumna dinga an dap hmasa tak chu suonlam a nih. Adam khomin Eden huona ama inhril hlîpna dinga hmangruo a dap hmasa tak chu suonlam a ni kha. A hming khom hi pangzatum ka ti tlat chu tie!

Hienga a khawsak hnung hin 1953 kristmas tuk khawfing chat ruolin a lungrilah harna khawfing a hung chat a, “Misuol dum tak a varna chu, Kalvari thisen hlu a nih” ti hla hin a kei tho nawk tah a nih. Har tharna hung dong zui peiin Kohran Upaa namnghetna khom February 7, 1971 khan a chang tah a nih. Ama hi pa huoisen le lêmderna nei lo, a tlak nawna khom ip dêr loa hlaa inzawt ngam a ni a, a hming a put indik khop el.

Kan inhmu nuhnung tak chu kum 1981 kum bul khan a nih. Chuong lai chun Saudi Arabia-a kan um lai a nih. Kum 1980 kristmas hmangin Churachandpur-ah kan suok a, Sielmat PMS Bungalow-ah kan innghat a. Ka lekhabu buotsai ‘Hmar Hla Suina’ khom sut zo a ni tah leiin January 31, 1982 khan Sielmat Christian High School-ah chuong laia Manipur sorkara Minister (Agriculture) Pu Ngurdinglien chun a tlangzar a. Hi trum hin Tuithraphai Hmar khuo tina inthoka mi poimaw le challang chu an kim vong ti thei khopin an hung thra a. Upa Ngama khom phûr êm êmin a hung thrang ve a. Ka lekhabua hin Pastor Thangngur ti loa chu mi mala hmun hluo rawn tak a ni leiin a lawm a. “Ka thlan chunga lungdaw neka lungdaw poimaw lem le hlun lem ding i mi dawpek leiin hamthra ka’n ti takzet a, ka lawm bêk bêk a, Pathien hmingin lawmthu ka hril che. Lal ram ta ding le ei ram le hnam ta dinga thil nasa tak thaw pei dingin Pathienin vengin malsawmnan vur pei raw se che” tiin lawmthu le malsawmna thu a mi’n hlàn a. Kan inhmu nawk hma, November 22, 1982 khan muol a mi lo liemsan tah a nih.

Sienkhom, hla thra tak tak a mi maksanpekhai leiin hnama ei dam khawsuok sung chu a hming le a hlutna rè ngai naw nih. A bula inthoka ei hla thur suok hi lungril taka sak a, kum thar phek ei phok trana inthoka mi tinin, “Lalpa rul ka nuom che, ka nun le êng pùk chu” tia ni tina a tak taka ei nun ngeia Lalpa thratna hi a lêt lia rul dinga hma ei lak seng chun, Gospel Centenary kum khel tieng hi kum vangnei le hlawk tawpkhawkah inchangtir ei tih. A lêt lia thil thra thawa Lalpa thratna rultu chunga chun Lalpan a tlawm takah a lêt rietin rul ngei a tih. Inchuklaihai khom, Lalpan thil thra thawna dinga hun hlu a pek tawl hi kum dang anga hmangthai mei mei loa Ama chawimawina le ropuina dinga a lêt lia rul tuma lekha an tiem lêt li an tiem phot chun, kum hmasa nekin a lêt liin hlawtling lem an tih. Chu nêka New Year Resolution thra lem le ropui lem chu um naw nih.

Tiemtuhai po po kum thar 2014 chibai vochuom ka buk cheu.

(Zalen-Gam Politics, Zogam Politics, Sinlung Politics)

By Lalthangsang Intoate

Siemtu Pathien chun, Leilung le a sunga thil um popohai a siem ding khan khawvel tawp chena a kutsuokhai um dan ding chu alo riruong sa diem a nih, ti chu Bible thu chik taka bi tuhai chun an hmusuok thei ang bawkin, vawisunnia Sinlung-Khul suok Zohnathlak Chin, Kuki, Mizo, Zomi le Hmar hai hin ieng ang thil khawm lo tuok inla, ei chunga thiltlung ding renga Pathien ruot a nih, tia ngai theitu chu mi-vangnei ei ni pei ding chu a ni ta hi. Chuleiin, Delhi mipui hmangaituhai le Sinlung-Khul suok mipui hmangaituhai chetdan in ang lo na lei hin, Delhi mipuihai chu inhnarna ding san ei nei bik chuong naw a nih.

“Ei ram le hnam hmasawnna ding chun a hrana rorelna hi a pawimawtak a ni a, chu thil chu ei hmutheina dingin i thawthei tawk tawkin i lo thang ve thei ding am?” tiin, Sinlung suok Zohnathlak Chin, Kuki, Mizo, Zomi le Hmar mipui Manipur-a cheng mimal tin kuoma hin, indawnna hei siem ta ang inla chu za a za in, “Thei e!” ti hi an dawnna ani ngei ding a nih. Sienkhawm, chuong sa khawm chun, vawisunni chena ram le hnam hmangaia mani hringna bawta silai put mek tuhai hin, mipui zaa za haiin ei i dit le ei mamaw em em, ral le sahrang laka khawm zam lova ei pi le puha’n an lo hluolum, tawngkam ngei khawma intim der lova, “Kan pi pu ram” ei ti meu a khawm chun, thu neina pumhlum chu ei nei thei der dal hi thil mak a tling takzet a nih.

Sawrkar sin popo laia sum-le-pai hlepruk awlsamnatak le sum tamnataka hril, Indian Revnue Service (IRS) sin chu kum sawm chuong lai lo thaw tah nisienkhawm, inn hlak Flat hnuoihnung pawl taka khawsa, motor hlak car laia hnuoihnung pawl tak chu hmang hlak, India politics bawlhlaw tak el tah chu hmunphi’n insung hmunhnawk phitfai ani anga phitfai tumtu Pu Arvind Kejriwal chu politics-a an chawmlutna kum khat le a chanve vel ding chauin, India khawpui tak Delhi Chief Minister thungpha a chun 28^th December 2013 khan alo thung ta a nih. Pu Arvind Kejriwal chu a nun lo hmang danhai ang hrimin CM ani le inruola a sin thawhai chun, India ram elchau ni lovin ei chengna khawvel hi a nghawr a nih.

Delhi political boruok hem danglamtu party, Pu Arvind Kejriwal keihruoi pawl Aam Aadmi Party (AAP) chu ei khawpui Lamka sung a ngei khawm Manipur pumpui huopin indin/phun a hei ni nawkna peiah hin ngaituona chu pek naw thei an naw a. Kawngkhat ngaiituo chun AAP sukmuolphotu amanih annawle, ei hnam sukmuolphotu hi ei ni lem el theina lai a um a nih. Asanchu, revolutionary movement thaw meu siin, vawisunni chena inthuruolna lampui hraw thei der lova mipui zaa zain ei i dit le duthusam ram chu tlung thei lova ei hei um elna hin ngaituona chu a sei naw thei naw a nih. Pu Arvind Kejriwal le a thawpuihai chu an thiltumah an chieng em leiin, lalna an chang le inruolin an thaw dingah an inbur hmak a, CM quarter, Minister quarter tihai hluo kher lovin khawlai hmunah umin chenghai sienkhawm, sawrkar department tin chun anni thupek chu an zawm tho tho ding a nih ti an chieng a, an thaw ta ngei bawk a. Chuchu anni sukhrattu le suk hmingthangtu ani nawk ta pei a, “A nei taphawt chu pek belsa ninga tih” ti ziek ang khan, India ram pumpui chungah hin ro la rel nawngan tih, ti chu tukhawma an ti thei bik ta naw a nih.

Ei ram a ruok chu, revolutionary movement thaw mek ei ni ang hrimin, MP, MLA, MDC, VA inthlanghai a chun, selection / support thaw khawm chu a pawi nawna lai a um ruol ruolin, sienkhawm, ei select hai le a select tuhai hin mipui chanvohai chu ei insem zo lem hiel mani aw… tia ring hieltu ei um el ta hi a pawi hle a nih! Ei select hai hlak chun, sawrkar quarter hnawl chu teu lo, a kawp athuoa hluo khelah mani mimal chengna ding in ropui tak tak el chu an bawl tluk tluk bawk! Security guard hnawl hlak chu teu lo, a tam thei ang tak vengtu nei chu ropuinaa ngai lem tu hlak ei tam! VIP culture suk bona lungril nei chu hrillo, VIP light tar sen ver ver chu incheina ang hiela nei hlak ei tam! Selection thawtuhai hlak, select-a um hai chu ram le hnam ta dinga hmangruoa hmang ngaina hrietlo chu hril lo, mani siem lal hai chu mani hnuoi Pathien ang elin ei ngai el man ta aw… ti dinga um pawl ei um bawk! Hnam revolutionary party inti meu siin select a umhai ngaidan le state sawrkar le central sawrkar policy programme siem taphawt chu a ngielangana zawm tu ei um hlak bawk a nih.

Tuhin, India mipui le khawvelin a i thlir mek, India khawpui tak Delhi-a roreltu AAP chu ei khawpui Lamka ah meu khawm Manipur pumpui huop Manpur State Unit chu phun alo ni hiel nawk bawk. AAP thuoituhai hin KNO le UPF hi an biek thiem hlau chun , AAP chu MP neisa ti thei ni hiel a tih. Amiruokchu, mipui vote tlak phal lova ei in tling tir hlau chun Pathien chu hril lo, Pu Arvind Kejriwal ngei khawm hin a lawm chie ding am aw… ti chu ngaituo a tul hle ding a nih. Chuleiin, ei hun hmang mek a hin, silai chawi pawl le mipui inkar a hin in ringzo tawnna a um a tul a. Chu in um tir theitu chu mipui ni lovin silai chawi pawl, a bikin KNO le UPF sunga group hran hran hai hi ei nih. Mipui le silai-nun kengkawtu kar hi inpaw taka a um chun, election leiin buoi ngai nawng ei ta, a tling taphawt chu ram le hnam ta dinga hmangruo tangkai taka hmang theitu chu silai chawituhai hi ei ni lem ding a nih.

Atawp na taka dingin Pu Arvind Kejriwal in Delhi mipuihai chu hmangaina indik taka a hmangai anga KNO le UPF hin ei mipuihai hi ei hmangai ve ani chun, ei mipuihai chunga ei thuneina chu Pu Arvind Kejriwal/AAP-in Delhi mipui hai chunga thuneina (power) a nei let tamtaka insang ani a. (Chu umzie chu ei lampui hluotu le daltu chungah chun ieng ang hremna khawm petheitu ei nina hi a nih) Chu ei thuneina chu a hmang dan ei thiem phawt chun, AAP hming inthang neka ropui hin ei ram le hnam hming hi a lan thang thei ding a nih. Khawvel hunler a meu khawma mani hnam tobul la hre lova, unau sulkhat suok ni ve bawk sia mi khaikhawmtu ding hming (nomenclature) ding tak ngiel khawm la siem thei bawk lova ei hei um elna khawm hi thil danglam tak a tling a. Mani mimal, mani insung khur, mani khawtlang, mani pawl le mani hnama Pathien thiltum hi hrietsuok ngei tuma hringnun hi sut atulin a hun ta a nih. Pathien mi ruotna le mi kona san hi hre suok theitu ei ni chun, Mosie-in a tum naw ang tieng daia a chipuihai a san suok ang khan, ei mipuihai hi retheina sala inthawka sansuoktu ei ni ngei ding a nih. Pathien hring be lotu pawl, AAP hmanin Delhi mipuihai mitah lawmna lungriem mittui an surtir thei si chun, eini ringtuhai hin ieng leiin am ei mipuihai mita inthawk chun lawmna lungriem mittui chu insur tir thei naw bik ei ta? ti ngaituona hi silai-nun (gun-culture) kengkawtu taphawt sungrilah riek ngei sien, ti chu ka duthusam a nih.

Dated: Hmar Runpui

22^nd January 2014

By L.Keivom, former Indian diplomat

Kum 2014 Pathienni hmasa tak January 5 khan Hmar Christian Fellowship Delhi (HCFD) chawibiek inkhawmah thuhrilna chanvo an mi pek a. Hun a tepintĕr leiin ka’n buotsai dan anga fe thei loin banga sanapui inchekin a mi thruoi a, a tawp tienga ka hril tum tak hril hman loin ka siktan a. Ka lungril chun, “A poi nawh. Pulpit huopzau lem daih le rawl ri a tawp ruola bo el lona, DT le website hrang hrangah Part 1 le Part 2 a thre-in hril lem el ka tih” ka ta. Chuong ang chun, kum 2009 June laia ka lo ziek tah ‘Ringna’ ti chuh Part 1-a hmangin, ka thu hril tum tak chu Part-2 dingin ka ruohmang tah lem a nih.

- St. Anselm (1033-1109)

Intellige ut credas (Know that you may believe)

-Peter Abelard (1079-1142)

Kum za hma khan ei pi le puhaiin RINGNA ti trongkam hi an nei ngai naw a, an lo khawsa thei tho. An Pathien biek le tuta ei Pathien biek khom a pangngai tho a la nih. Ieng leia tuta ringna hi ei hringna tluka ngai poimawa ei satpui rak rak am ni tang a ta? Ringna thu tiem, ringna thlai chi, ringna chabi, ringna maicham, ringna meiser, ringna ram, ringna long, ringna mit, ringna bàn, ringna ralthuom, ringna hrat, ringna chau, ringna mawl, ringna thla, ringnaa khuolzin, ringna, ringna, ringna… Ei thunon chu ringna a nih. An leh, ringna ei ti hi ieng am a ni hrim a? Ieng leia a bo chun seramu ei thur ta naw am ning a ta? A umzie tak hrie hi mi ieng zat am um ei ta?

Kristien sakhuo tukvera inthoka thlir a, kristien inchuktirna hlam hmanga ei inkhi chun, mi tin, a chin a lien, hausa rethei, mi mawl mi var, a zo a vai nei thei le hmang thei ni si, Pathienin Ama le mihriem inzomna hrui le van ram kotkhar lut theina chabia ringna hi a hmang leia ei khukpui a nih ti hi a donna tawi tak niin ka hriet. Sienkhom, ringna le a bebawm hi a tam em leiin hi donna khom hi a umzie inril tak sîr hrang hranga inthoka thlirna ziek ding chun hrilfiena bupui ziek a la ngai ka ring. Hi artikul khom hi artikul dang anga ziek thlak zung zung ka tuma chu a bebawm a tam leiin lutna tieng tieng sui ding a lo intieng khup pei a, artikul pakhat chauha inchawi tawka rem khawm chu a harsa kher el. Tuta ka hung thur suok po khom hi eini hriet thiem thei zawng dinga ka ngai anga voi nga lai ka thrum tah hnung a ni a, ka ziek nuom hmun thuma threa hmun khat khom a ni phak nawh.

Chabi poimaw

Isu Krista chun Ama ringa baptisma chang chu sandam a ni ding thu le a ringnawtu chun thiemnaw a chang ding thu a hril a (Marka 16:16). Hnuoia a cheng sunga mi a sukdam taphot deuthaw kuomah “I ringna hi i dampui a nih” tiin a hril deuh zie bok a. A thilthawtheina kut sukchetu chu a dongtu ringna a nizie thu a hril nuom lei a nih. Kong danga hril chun, Pathiena inthoka luong suok malsawmna hnar zomna chu ringna dawt a nih. A puon hmawr chauh khom thema dam inring tlat nuhmei thi put chun damna a chang throt nghal a nih. Isu rongbawlna chanchin ei tiem chun, Ama ring nawtu khuo chun a thilthawtheina ra dong dingin lungril kot an hong nuom naw leiin thilmak a thawpek naw el a nih. Ringna chu Pathien le inzomna chabi poimaw a nih.

Hebrai 11:6 a chun ringna naw chun Pathien suklawm ruol a ni naw thu ei hmu a. Tirko Paula chun lunginsietna zara sandam ei ni thu le chu sandamna chu ringna hmanga ei dong thei thu a hril bakah ringna chu Pathien thilthlawnpek a ni thu a mi hril bok (Efesi 2:8). Ringtuin a ring chu a ring tak tak ngeizie hriet theina chu a thilthawa inthok a nizie Jakob chun a uor a, ringna hi thilthawin a zui naw chun thil thi a ni thu a khekpui thung (Jakob 2:26). Hi thu hi kohran sunga khom ei fepui dan a khuongruol naw a, Roman Catholic le Protestant inkara chadan inthuk tak siemtu a nih. Ringna lei chauha thiemchang ei ni thu uortu Martin Luther trong invetin Jakob lekhathon hi “Bupawl lekhathon” (Epistle of Straw) a ti hiel a, Baibul bua inthrangtir lo khom a nuom hiel a nih. Hi hi Jakob thukhawchang a man fie naw lei a nih. Jakob-in a hril tum tak chu ringtu indik le ringtu tehlem hriet theina chu an ringzie thilthawa an inlangtir le inlangtir lo danah a nih. Ringtu inti chun ringtu a nizie a nungchang le thilthawin inlangtir a ta, an langtir si naw chun ringtu tehlem mei mei a nizie a hril lem a nih. Chu chu ringtu intihaiin inkhinaa ei hmang rop ding a ni hrim a nih.

Chun, ringna hi Baibul inlet sukharsatu laia pakhat khom a ni bok. Hi hi Baibul inlet sin ka tran hnunga ka hmu suok ve chauh a nih. Entirnan, Galati 2:16 Filipi 3:9 hi Version tam lemah “faith in Christ” tia an inlet a ni laiin King James Version chun “faith of Christ” tiin a sie leiin ringna hril fie dan thuah inselna tawp lo a cho suok a nih. Krista ei ringna amanih, Kristaa ringna ei innghat (faith in Christ) umzie le Krista ringna (faith of Christ) ti chu thil danglam daih a ni leiin, KJV inlet dan anga hril fie pawlhai chun mihriemin ei ringna ni loin Isu ringna chu Pathien suklawmtu a ni leiin, chu ringna intrawmpuitu ni poimawzie chu an hril uor. Chu khêla fe threnkhat chun ringna chu lunginsietna thilpek a ni leiin peka umhai chauh naw chun nuom thua pawng ring ngot thei a ni naw thu an inchuktir bok. Chu thu chu hi artikula hin ei chai hman naw ding a ni leiin hun remchanga bi dingin la khêk ei tih.

Hmu thei lo hmu chiengna

Hebrai 11:1 a chun ringna chu thil beiseia chiengna le la hmu lo thil hriet chiengna tiin a hril fie a. Chu chu la them phak lo le la hmu phak lo, sienkhom a um ngei tia hrila um chu awi a, pom a, chu taka innghat hmakna chu a nih. Hi thu hi Delhi Version-a footnote-ah hrilfiena kan sie bakah a hranin artikul ‘Hupostasis’ ti February 21, 2004 khan Delhi Thurawna insuo dingin ka ziek tah nghe nghe. Rom 8:24-25 a chun, “Beiseina leia sandam ei ni a, sienkhom hmu tah zing beisei chu beiseina a ni nawh. Hmu tah zing chu tuin am a la beisei zing ding. Ei la hmu naw ei beisei chun ei nghak fan fan hlak a nih” tiin Tirko Paula chun beiseina le ringna chu tangka mai hni angin a hril. Chun, ama bokin, “Hmu thei hin a mi thruoi naw a, ringnain a mi thruoi lem a nih” (2 Kor 5:7) a ti bakah hmu thei thil chu bo el ding a ni a, hmu thei lo thil ruok chu chatuon dai ropuina a ni thu a hril bok (4:16-18). Hi lei tak hin Hebrai lekhathon ziektu chun Mosie ringna thu a hrilnaah, “Hmu thei lo chu a hmu leiin sel takin a tuor a” (11:27) a lo ti a nih.

Ringna formula, hmu thei lo hmu thei ni tlat bok si chu mihriem thil sut dan pangngai chun thil inkawkal tak a nih. Chu chu a nih a makna le dangdaina chuh. Chu chun mihriem hin mit pahnih, taksa mit le thlarau mit, kong danga hril chun puo tieng mit le sungril mit ei nei thu chieng takin a mi hril. Taksa mita hmu thei lo, sungril mit chauha hmu chieng thei thil a um thu le taksa khawvel le thlarau khawvel a um thu a mi hril sa bok a nih. Chu khawvel pahnihai chu tangka hmai hni anga thil inzom tlat an ni leiin thre hrang tum chu thutak hnawl tumna ang a nih. Peter lekhathona chun a lunginsietna ropui tak leia Pathienin mithi laia inthoka Isu Krista a keithona zarin, hmu lo khoma Ama ringtuhai chu beiseina hring nei dinga nun thar a pek thu dam, an sandamna buotsaia um tah chu ama an ringna leia Pathienin a thilthawtheinaa a hum tlat thu dam le ringna ra, sandamna chu an hmu mek leia hlimna hril seng lo khopa nasaa an sip thu dam a hril a (I Pet 1:3-9). Hi taka hin lunginsietna, sandamna, ringna, beiseina le hlimna ei ti hai hi thil intringmit le inzom tlat vong an ni thu ei hmu bok a nih.

Pei le puntir inkop

Ringna ei ti hi Pathienin a mi sandam theina dinga ama suklawmna dinga thil ei thawpek a ni nawh. Kros-a Isu Krista thina khan mihriem tu khom sandamna sin chu hlen zoin a um a, “A kin tah” tia hnena hlado a’n sam khan Pathienin a lunginsietna zara mihriem sandamna lampui a thlawn lieu lieua a buotsai chu kumkhuoa dinga zo fel a ni tah. Mi po po suol phurtu le an ta dinga thia thilthawtheinaa ropui taka keitho nawka um chu Isu a nih. Ama chauh chu Pathien lungsenna thawi dam theitu le mihriem chunga hremna tlung ding khom la kieng theitu a nih. Sandamtu che chu i ringna ni loin Krista thisen a nih. Kristaa chun hringna a um a, chu chu mihriemhai ta dinga hringna var a nih. Chu hringna var chu nei dinga Krista kuoma mi thruoitu chu ei ringna a nih. Kristain intlanna sin a thlawna a lo thaw zo tah chu dong dingin ringna chun Krista tieng a mi’n pantir a, a sandamna thilpek dong dingin kut a mi’n phartir a nih. Chu ringna chu iem a na?

Iengkim Siemtu Pathien pakhat chauh a um ti ring hin Baibula ringna a hril tak hi a kawk phak nawh. Ramhuoihai khomin chu chu an ring a, an hriet a, triin an inthin hlak (Jakob 2:19). Hnuoia Isu a leng lai khan rala inthok khoma tu am a nih ti hre nalh theihai chu ramhuoihai an ni a, anni soisa lo dingin an ngên chul hlak a ni khah. Pathien thu hriet hi a poimaw bek bek a, amiruokchu, hrietna ringota innghata ring si lo chu thil thlawn a nih. Hriet le ring kop a ngai. Hrietna chu ringna lampui mi’n pantirtu sirbi poimaw hmasa tak a nih. Ei ring ding chun ei ringna ding san hriet hmasak phot a ngai. Hi lei hin Tirko Paula chun, “Thu an hriet naw chun ieng tin am ring thei an ta? Thuhriltu um loin iengtin am hrieng an ta?....Ringna chu thu an ngaithlaka inthoka hung um a na, thu hrila um chu Isu Krista thu a nih” (Rom 10:14,17) tiin a lo hril a nih. A tontira Abelard thu hril ei tar lang Intellige ut credas (Know that you may believe) ti kha “I ring theina dingin hre (hmasa phot) rawh” tiin inlet inla; Anselm hril Crede ut intelligas (Believe that you may know) kha “I hriet theina dingin ring (hmasa phot) rawh” tiin inlet bok inla. Thu inkawkal hoi hle sien khom a ni nawh. Pathien ring ding chun a chanchin thra hriet hmasak phot a ngai thu le Pathien hre ding chun ring phot a ngai thu, ringna kailawna hraw ngei ngei ding sirbi poimaw pahnih hrilna a nih.

Thuthlung Thar huna ‘ringna’ ei hril hrim hrim hi Isu Kristaa intran le Isu Kristaa tawp vong a nih. Habakuk 2:4 a “Ringnaa mi fel chu hring a tih” ti thu Paulan Rom 1:17 a a hung tar lang hi thil thuhmun ni si, a kawk khom inang, sienkhom a hmangna inang chie lo a nih. Babulon sala intang Judahai, zawlneihai thu lo hril lawk ringa zawmtuhai chan ding Habakuk-in a hrilna a nih. Paula ruok chun Isu Krista ringtuhai chan ding a hrilna a ni daih thung. Isu ngeiin, “Kei hi lampui le thutak le hringna ka nih; keimaa fe naw chu tu khom Pa kuom an tlung ngai nawh. Kei mi hrie ni unla chu ka Pa khom hrieng in tih. Tu hin chu in hriet tah a, ama khom in hmu ta bok” tiin a zirtirhai a hril a ni kha. Filip ruok chu a la chieng naw fan leiin, “Tu khom a mi hmu chu Pa hmu a nih. Ieng leia Pa chu mi’n hmutir rawh i la ti rop? Kei Paah ka um a, Pa keimaaha a um ti hi in ring naw a ni?” (John 14:1-14) tiin a kawk-zil a nih. Pathienin fela a ruothai chu a tirh Isu Krista ringtuhai chauh an nih.

Ringna le a bebawm hi a tam êm êm a, hril zo seng chi khom a ni nawh. A ieng zawng khomin hril hril inla, a thu inthlungna ban chu Pathienin Isu Krista hmanga a lunginsietna zara a thlawna mihriem sandamna lampui a hung buotsai thu le ringnaa chu lampui chu hraw lo chun Edena suola lo tlu tah mihriem tu khom ta dingin sansuokna lampui dang a um der naw thuah a tawp vong a nih. Ringna hrim hrim Isua intran le tawp a ni naw chun a fuk naw vong.

Pei hlawk

Ringna ei ti hi pei le puntir inkop ang a nih. Negative side le positive side a nei a. A pei tieng (negative side) panga chun, sandamna dinga mania inringtawkna le mani thilthaw thrata innghatna po po pei thlak vong a, “Suol kop keima mihriema hin thil thra hrim a chêng nawh” (Rom 7:18) tia mani inhnawl fai thrak a phut. Isu ngeiin, “Tu khomin a mi zui nuom chun mani insie hmangin, ni tin a kros putin mi zui raw se” a ti a nih. Tlangval hausa, Dan zawm kima inngaiin sandamna chabi zonga Isu a hung pan trum khan, “Keimaah thil thra hrim a chêng nawh” ti nêkin, “Chuong po po chu ka tleirawl tîra inthokin ka zawm dap vong a nih” tiin mani inringzo tak le insuong takin a hril a, a Dan zawmna leiin Pathien hmaah thiem chang dinga inngaina a nei a, a tlak nawzie le mi suol a nizie a hmu thei nawh. Chu chu Israel thla, a hnunga Juda mi hung intihai ngirhmun a ni tlangpui. Insie ruok thrak a, a nei po po pasiehai kuomah pe a, ama zui dinga Isun a hang ti zet chun Juda tlangval hmel kha van innim angin a hung thûm el a nih (Marka 10:17-23).

Hi ei thil hril hi tu laia ‘tlak fai’ ei ti vet leh hin thil thuhmun a ni el thei. ‘A ni el thei’ ka tina san chu a thu kawk umzie a fie naw lei ni loin, a taka ei nuna ei phur suok dan le inmil lo a tam lei a nih. Tla fai dera inhril, “Kha hmaa chu chu kha kha khah ka ni ta nawh” tia inhril tam tak hi ei hang bel chieng a, ei zing thoa ei ek tum che thlak bak chu ieng khom einia inthoka tla hmu le hril ding a vang khop el. Isu lo hmuoktu le a ina intlungtirtu Zakai ruok kha chu a hnunga a chanchin pei ei hriet ta nawa chu, Luka rikawta inthoka ei hmu dan chun, a tla fai chieng khop el. Isu hung hmutu tlangval hausa ei hril tah leh khan a letling char an nih. Zakai chun a nei zatve pasiehai kuoma pe ding le tu thil khom indik lo taka a lakpek taphot chu a let lia rul dingin thu a thlung top el a nih. Ringnaa Isu pomtu tak tak inhrietna chu suol inhrietna, insirna le simna nei a, ieng kim chàn huoma Amaa an tluklut el hi a nih. Chu chu ringna formulaa hril chun ‘tlak hlawk, ruok hlawk, pei hlawk, kiem hlawk, inhmang hlawk’ ti ding ni awm tak a nih. Chu chu a nih “inhmang hlawkah ei tiem, tuorna lawmnan ei tiem” tia hlaa ei sak hlak hih. Tla fai si, sip liem bok si chu a taka hretu le changtu ni lo, bohmang mekhai ta ding chun thu inkawkal le invetthlak tak a nih. Ringnaa changtu ta ding ruok chun thilthawtheina a nih.

Belh hlawk

Belh tieng (positive side) a chun, Pathiena ringna neitu tak tak chun Krista thutak chu pomin a hlut hlak. Sandamnaa thruoi lut thei ringna (saving faith) neitu chun mani thratna le inringzonaa innghat loin, mi suolhai sandam le hum theitu um sun Isu tieng a ngha a, a bĕl hlak. Ringna neitu chun Baibula Krista nina, Pathien Naupa le Mihriem Naupa a nina puonga um, Pathien ni bok, Mihriem ni bok, felna tienga famkim, mi po po suol phura hemde a nina leia voi khat thia Pathien thil tum intlanna sin hlen suoktu, tlanna sin a hlen zoa Pathienin ropui taka a keitho le Pa chang tieng inthrunga chatuona Pathien le rorel le hun bi a kim phaa mihring le mithihai Roreltu dinga la hung nawk ding chu a thuphung el ni loin a tak takin a ringzo a, innghatna dingin a pom hmak hlak. Chu thutak chu a nih Pathien thu, Chanchin Thra ei ti tak hi a nih. Chu thutak ringtu, awitu le zawmtu chu ‘Pathien thu awi’, ringtu, kristien ei tihai hi an nih.

Ringna hlawk

Baibul (NIV) pumpuiah ‘ringna’ ti thu mal hi voi 268 ei hmu a, Thuthlung Hlui (TH)-ah voi 16 a’n lang a, chu lai chun ‘ringna’ (faith) ti tak ruok chu voi hni chauh hmang a ni a, a dang chu ‘trust’ (ringzo) le ‘believe’ (awi) tia hmang an ni a, sienkhom ‘ringna’ tia inlet vong a nih. Thuthlung Thar (TT) ah voi 252 hmang a ni a, a hmang inrim tak chu Tirko Paula a nih. Thilthawhai tiem sa loin, a lekhathona ringot khom voi 137 a hmang a, Hebrai lekhathon hi ama zieka ei pom lem chun voi 173 a hmang a nih. A hmang rawnna tak Rom lekhathonah voi 40 zet a hmang. Chuleiin, Rom lekhabu hi ‘Ringna Bu’ ti hming put tlak a nih.

TH huna ringna hung inlang tran hun chu Pathienin Abraham kuoma thu a thlunga inthokin a nih. “Abram chun LALPA chu a ring a, chu chu a felnaah a pompek a” (Gen 15:6) ti ei hmu a. Abraham inlang hma daih khan Pathien thu zawm mi, mi fel, Pathien mit tlung (Gen 6:8) Nova bakah Abel le Enok hming ei hmu a (Heb 11:4-7). Nova chun kum 120 tâl top mi nuizatbur hlaw khopin long a tuk tlut tlut a, tuiletah a sunghai leh an him pha a. Hebrai lekhathon ziektu khomin, “a ringna chun khawvel thiem naw a’n changtir a, ringna leia thiem inchangtirna rochungtu a lo ni tah” tiin sartifiket insang tak a pêk a nih.

Ringnaa mi huoisen lo fe tah hai, chung tienga inthoka sumpui anga mi’n huol veltu le mi thlirtuhai chanchin ei tiem chun, ringnaa kalchawituhai chu (a) Pathiena innghat mi, a thu zawm mi le a ditzawng thawtu (Luka 17:5); (aw) Antram mu tiet khom ni sien ringna hring neitu le damtea zung keia inthranglientirtu (Luka 17:6); (b) Krista sinthawa innghattu (Rom 5:1-11) (ch) Tuorna, hnawchêpna le hnengdena tuor fan fantu (d) Harsatna an tuok rawn po leh tuorsel deu deu mi (Rom 5: 3-5; Heb.11:1-40; Rom 8: 12-30, Gal. 3:10-13)); (e) hmu thei lo hma tieng hriet chiengna neia beisei taka pan trang trangtu (Heb. 11:1) le (f) chieng faka ringzona neia ngai sukngam hmaktu (John 20:29) an ni vong.

Ringna hlawk lo

Ringnaa sartifiket hmu sang tak ni hiel ding Abraham chu a nuhmei Sari ringna inphet leiin, ram tiem Kanan an lut hnung kum sawmah a che buoi a, chu buoina kakhawk chu voisun chen hin a la sosang pei a nih. Abraham kuoma Pathien thuthlung chu sukpuitling vat vat a nuomna luotah ama remruotna hmangin Sari chun a umpui Aigupta nunghak Hagar chu a pasal kuomah chi thlatu dingin a pek a. Nau a hung paia inthokin sul hnienghnar Hagar le sul thlaler Sari inkar thu chu a hung buoi nghal a. Ismail a hung pieng chun a thaipui nau ni ta lo chawk chu, a nu leh ina inthoka hnot dokin an um a. Kum sangli deuthaw liem tah hnung khom hin Abraham nau ve ve, a thaipui Sari thlahai le a hmei Hagar thlahai chun inchemhar an la ma nawh. Sari ringna telhelin Pathien remruot nghak loa ama lung tlukna a hmang khan khawvel a chokchawrawi hne khop el. Khawvelin buoina tam tak a tuokhai hi Pathien remruot nghak pei loa Sari anga mani lung tlukna zuia baw rok rok mihai thilthawin a kakhawk a ni nuom khop el.

Buoinain a mi nang pha leh ringtu tam tak ringna inphetin a chi-ai hlak. Ama an ring theina dinga Pathienin thilthawtheina mak tak sawm zet hmanga Faraw a hrem hnungin Israelhai chu Kanan ram panin an suok hum hum a, an hlimin an pheikhai khom a zâng. Amiruokchu, Tuipui Sen kamah Faraw le a sipai ruolin an hung nangching zet chun fiein an um a, “Aigupta rama khan thlan ding a um naw leia thlalera hin thi dinga i mi thruoi a lo ni maw!” tia chi-aiin, hani tlum tlumin Mosie an suosal mur mur el a nih. Ringna nghet nei, hmu thei lo hmutu Mosie ruok chun, “Tri naw ro. Ngir nghet unla, voisuna LALPAN sansuokna a hung intlunpek ding cheu hi thlir ringot ro. Voisuna Aigupta mi in hmuhai hi hmu nawk ta ngai naw ti niu. LALPAN dopek a ti cheu; ngaingam takin um trok trok ringot ro” tiin mipui chu a zâp dei a, ropui taka sansuokin an um tah hrim a nih. Ringtu inti seng seng si hi fiena ei tuok pha kâr a lo hla nuom khop el.

Chun, inthlakthlengna um lo ringna hi ringna trangkai lo, ra insuo ngai lo a nih. Chuong ang ringna chu Isu ngeiin grep kaupeng, ra insuo ve lo leh a tekhi a, “Tu khom keimaa um zing naw chu kau sat thlak angin an peihawn a, a hung vuoi a, an rùt khawm a, meiah an pei a, a kang hlak” a ti a nih. Ringtu indik tak chu fe suoka ra insuo ding le insuo zom pei dingin ama ngeiin a mi thlang thu a hril bok. Beiruol le kemping ei thaw changa piengthara inhril tam tak hai lai hin lung sukno zawng thu hmanga thu hriltuhai chil perin a deng thluk, huou huou thlarau chang, simna (repentance) le thu zawmna (obedience) thrang loa hmaithinghawnga ringna hmang tum pawl tam tak ei um a, chu chu ei thrangmawbawk laia pakhat a nih.

Baua ring, a hril chauha tlak tum, a taka thaw pei si lo ringna chu ringna thlawn le umzie bo a ni bok. Chuong ang mi, ringtu inti sihai chu an nih Isu unaupa Jakob-in “thilthawa suklang si loa ringna i nei dan chu mi’n entir la, keiin ringna ka nei a nih ti thilthawin inentir ka ti che” tia inkungfu dinga a cho tawl chuh (2:14-26).

Chun, ringnaa kal ei chawinaa hin ei pheikhai a’n ruol naw dingzie hre chiengtu Tirko Paula chun, “Ringnaa mi hrat naw chu a ngaidan inselpui kher loin, lawm lut el ro” (Rom 14:1) tiin infuina thu a ziek a. Mi pakhat ta dinga hriet thiem el thei kha mi hrat naw ta ding chun hriet thiem thei lo, a kalchawi sukbahlatu le a ringna sukphettu a ni theizie thu chieng takin a mi hril a nih. Fak le dawn le Sikpui Kut hmang thua inselna um rop khom hi chuong ang thil lei chu a nih. Pipu thil hrim hrim ban vong dinga inzirtirna indik lo an lo intu, tu chena ringtu tam tak ringna la zar buoi zing khom hi a nih. Ieng anga Pathien thu thra khom ni sien, tlanglam zaia ei sak chun Setan thuomhnawa ngai nghal pawl ringtu inti lai hin a tam lem ei ni ka ring. Chuleiin, mawlnaa innghat ringtu chun taksa le thlaraua a mawlna khel a tlung thei der nawh. Tlunga a’n ngai a ni chun ama le ama a’n hlèm a nih. Chuonga mani le mani inhlem, a thua hla tak tlung, a taka tlung phak si lo chu hmu ding ei tam.

Ringna infie

Tirko Paula chun, “Ringnaah in um le um naw inen chiengin, mani ngei infie hlak ro” tiin Korinth kohran kuomah a ziek a. Ringnaa an um le um naw infiena dinga a hril chu anniah Krista a um le um naw inen fie a nih. A um ti an hriet naw chun an ringna chu a lem chauh a nizie thu a hril nghal bok a nih (2 Kor 13:5).

An leh, ei ringna a hrat le hrat naw iengtin am fie thei ei ta? Peter-in tui chunga kea lawn Isu a hmu chun a lungphûr thutin, “Tui chunga i kuoma hung thu mi pe rawh” a ta, a pêk a, kein tui chunga chun Isu panin a fe ve el tah a. Sienkhom Isu hmel en zing loa thli le tuifawn a en phing leh a tri a, a pil tran tah a nih. Tritna, ringhlàna, beidongna le lungzingna hai hi ringna hmelma an nih. Chu chu ni tina buoina thlipui le harsatna tuifawn so buon buon chunga ringna longa intawl ringtuhai hin ei nun senga ei thil hmasuon zing a nih. Sienkhom, Peter chun santu dingin Isu ko nachang a hriet a, a hei ban nghal a, “Ringna tlawm, ieng dinga i ringhlel am a na?” ti pumin Iengkim Lalpa chun a sanhim tah a nih. Hi chanchina hin ringna umzie dam, ringna chu ienga innghat ding am a na ti dam, ringna hmelma le ringzona lungril sukphettu chu tritna a ni thu dam le sansuokna chu khaw laia inthoka hung am a ni a ti chieng takin ei hmu a nih.

Ni khat chu zirtirhaiin Isu kuomah, “Kan ringna mi sukpungpek rawh” (Lk 17:5) tiin an hni a. Chun, pa pakhatin Isu sukdam dinga a naupa, ramhuoi man a hung thruoi khan a ringna a’n sit leiin, “Ka ringhlàna hi mi hnèpêk rawh” (Mk 9:24) tiin a hni bok ti ei hmu a. Hienghai hin an hni fuk hle a nih. Ama chu ei ringna bulpui le sukfamkimtu a ni leiin Ama en tlata ringnaa ei intlansieknaah hma tieng pana sel taka tlan ding ei nih (Heb. 12:2). Thil dang po po neka ringtuhai hni rop ding chu ei ringna mi sukhratpek hi ni tlatin a’n lang. Chu ding chun ringna indik put a ngai. Ringna indik put ding chun Pathien thu hriet fie le hriet rawn a ngai. Mihriem hrietna khela Pathien thuruk inthukzie mi hril fie theitu chu Thlarau Thienghlim a nih. Ringna hi khawvel hnea ngamna (1 John 5:3), thiemchangna le Pathien le inremna (Rom 5:1), Pathien suklawm theina (Heb 11:6), Pathien felna inlangna (Rom 1:17), chatuon hringna nei theina (John 3:16) a nih. Chuleiin, khukpui naw ziezang ei ni nawh.

Ziektu: Pu R. Th Varte, Senior Anthopologist, Shillong

Ofis thil le inzawmin Mysore ah inzinna hun remchang October 2012 khan a um hlauva. Mysore khawpui kalan zin ngainaw leiin inhawkna rieu ka nei reng a. India ram ah Mysore hi khawpui pawimaw, City of Heritage, City of Sandalwood le City of Sacred Temple tia anlo ko hlak a ni leiin hmu hi ka nuomve reng reng a, chuong thei dinga lampui a um leiin ka lawm kher el.

MYSORE PALACE

India hi British sawrkar kawl a bun lai khan Lalram (Kingdom) hrang hranga um ei ni a,Mysore khawm hih Lalram (Kingdom) pakhat chuh a nih. Vijayanagar lalram lo ni hlak chuh Raja Wodeyar kutah pekin ama chuh lalin 1578-khan a hung inthung a. Chu inthlasawng peiin rorelna an hung chel ta pei a. Pa huoisen Mysore Tiger ti hiel hming put Haider Ali naupa Tipu Sultan (1761-1799)–in a hung inchu tlak nawk tah a, a rorelna hnuoi ah Mysore lalram chuh hun iemani chen a um a nih. Kum 1799 tawptieng British thahratna hmangin lakkir a hung ni nawk a. Krishnaraja Wodeyar III kuta pek kirin a hung um a, chu Lal inthlasawngpei chun India ram zalenna a hmu chen khan Mysore kingdom a rorelna chuh a um tah pei leiin Wodeyar dynasty ti a hung nih.

Mysore hi ram hausa hieng Iron ore, Bauxite, Coal le Diamond hai umna a ni a; chubakah, Sandalwood chingna hmun tha ani bawk leiin lal danghaiin an hung sukbuoi ten hlak.

British saltang suokna dar a hung inri a, India ram khawmin aqma puola rorel theina a hung hmu khan Mysore State ti ani a, State capital khawm Mysore a nih. Hun sawtnawte hnungin a State hming hi Karnataka tia thlak a hung ni a, Capital khawm Bangalore (Bengaluru) tieng an hung sie nawk ta pei a nih. Lal thuneina sukbova India ram mipui rorelna hnuoi a siem a tul si leiin Sawrkai laipui leh inremna thatak siemin, vawisun chenin Mysore Lalram a Lal thisen rawngkai (Royal family) inthlasawngpeihai chuh Mysore Palace a hin an cheng a, sawrkar khawmin a ngai pawimaw em em. Hi Palace a ding lieu lieuvin budget hran siempekin Mysore Palace Board hai kuta iengkim sie a nih. Hi Palace lut man chuh Rs 50/- a nih. Inzin mi (Tourist) hmun dang danga inthawka hung nitin a luthai ringawt khawm sum tam tak an laklut zing a nih.

Mysore khawpui a hin Hindu temple hrang hran tiemsenglo a um bakah, an pi le pu thilhluihai duottaka enkawlna hmun ani a; Kristienhai Biekin St. Philomena's Church kum 1956 a bawl India ram a Cethedral church lien tak khawm a um bawk leiin “Mysore the heritage city of India” or “City of Sacred Temple” ti hih a phu hlie hlie’n an lang.

DUHSERRA FESTIVAL

Pi le pu haiin hnunglam a Sabar anti ang deuvin keikhawm Duhserra festival kumkhat sunga a ropui taka annei hlak hi ka tuok fuk hlauva vangnei kan ti hle. Duhserra festival hi India ramah Mysore a hin an lak ursun na hmun tak a nih. Dasara (Duhserra) 402na hmang dingin India ram chauh nilovin ram dang danga mihai khawm an insingsa mup mup a, Goa a inthawk Mysore fena ding direct Train buotsai a ni bawk. Special Train Mysore le Bangalore inkar October 23-24 siem a ni bawk.

Dasara (Duhserra) a nipui ni tak chun Mysore Palace Hindu puithiem tlangsuok bikhaiin an sakhuo dan (Puja) annei phawt a, Golden Howdah 750 kgs a rik an Pathien Chamundeshwari lim an sie, Sai sawm ruolin an hung phursuok hlak a. Golden Howdah tak hi chuh Sai lienpa a hming Balaram in phur ata a danghaiin an zui hlak. Ama Sai lienpa Balaram hi kum 54 a upa Thithimathi, Kodagu District a mi a nih. An sangzie chuh 2.70 meters, a seizie 3.77 meters le 4,535kgs a rik a nih. Kum 13 vengvawng a zawnin Duhssera a nipui ni hin Mysore Palace a inthawk phursuokin Sayaji Rao road ah km 5-zet a hla Bannimantapa ground chen Duhserra procession nei hlak a nih. Amiruokchuh, tukum hin chuh Balaramin Golden Howdah a phur theinaw ding ani tlat el. Asanchuh, ramhnuoi a a fak zawngna ah a changsuol palh hlauva, mi pawi tawkin, tuol alo that palh lei a nih an tih. Chuleiin, ama ai-awtu dingin Sailienpa Arjuna, Balaram kaiza vengtu a thang hlak khah an ruot talem a nih.

Arjuna ( Sailienpa) tading chun promotion a hmuve na a ngai a ni a. A thlaktu Arjuna chuh kum 52 a upa, Balle Elephant Camp, Nagarahole a inthawk a hung, 2.80 meters a insang, 3.77 a sei le 5,520 kgs a rik a nih. Dasara (Duhserra) hih eini kumkhat sunga ei ursun tak Kristmass ang a inser ani leiin hi procession ding lei ringawtin Arjun (Salienpa) hmathuoina’n Duhserra hma karhni sung khan zingkar rehearsal an hung nei zie hlak a. Mysore Palace a inthawk Sayaji Rao road km 4 zet a hla lamlien sir chuh tukhawm lut lo dingin an inhuon vawng a. Vehimtu Police khawm hi taka ding 5,000 ruot an ni bawk. A ni le hun a hungtlung ta ngei a, zantieng dar 3:30-4:00vel Duhserra procession ding lo hmuok tumhai chun lamlien sirah sun dar 12:00 velin anlo inthung bit vawng nghal a. Lal Isu Jeriko khuoa chawimawia a um a min ngaituo tir rum rum chuh. Ka tlungna Hotel tuol pukah khawm hmun ka chang zo naw leiin a chung sawnga kalo tlir liemve a ni khah.

Hi procession a hin District hrang hrang a inthawkin an biek Pathien dang dang tableaus show 35 neka tam thaw’n mipui hmaah an lam huol a, khuong le anri thei taphawt mutin an chawimawi a, An lak ursun bawk leiin pui tak a nih.

MYSORE UNIVERSITY

Kum 1916 Krishnaraja Wodeyar IV Mysore a Maharaja ani lai indin ani a. department 37 post graduate inchukna a um a. Karnataka state sunga University hmasatak a nih. Mysore University hin Library a nei tha em em el a, hi library hih kum 1965 khan His exellency Dr Radakrishna the President Republic India chun building thar hawngna a nei a. Tuhin lekhabu 8,00,000 chuong hlulut ani a, hi taka hin Kannada tawnga mi 75,000 a thang a, 2,400 journal le 1,00,000 volumes of journals an nei bawk. Hi university hih ramdanghai tadinga 10% hauh (Reserve) a ni leiin South Aferica, Nigeria, Thailand, China le hmun dang dang a inthawk an hung kai ve. Ei tading chun an kil deu khawm ning ata, tuchen a hin hi university a lekha inchuk eium ka hriet nawh. Naga le Mizo Studenthai chuh insukhlim khawp an um.

RAM- NGAWPUI LAL

Karnataka hih ram hausa em em Sadalwood ringawt khawm a ramsung intodelna khawp nei a nih. Koose Muniswamy Veerappan (Veerappan or Sandalwood Veerappan ti a hriet lar) ramhnuoimi khawm khah hienglai ram ngawpui a hin rawi iemani zat nei a inkul hlak a ni a. “Ram-ngawpui Lalpa” ti a ko mi tisim a nih. A kut lum a hin mi (civil, forest department tiengmi le police) 119 velin an hringna an chan hnungin a lu man Rs 50 million dingin sawrkarin a puong a, kum 2004 khan Policehai kut a a hringna alo chan tah a nih. A chanchin kimchangin ngainuom um tak chuh hun nawka hung insuo ei tum a nih.

October 26, 2012

Ziektu: Pu L.Keivom, Inpui.com Columnist

Kum 2013 ni nuhnung tak, December 31 zing dar 10:30 a lo ni dĕr tah. Thingpui dawn malama ka hang suikir chun, kum 2013 hi mani nun senga thu a phurzie fûn khawmtu ding thupui tawite hril seng ding ni inla, ieng am ning a ti aw? ti ka ngaituo a. Kum 47 liem tah a Sergio Leone dairekna hnuoia an film siem Clint Eastwood, Lee Van Cleef & Eli Wallach inchangna le hming hlun an siemna, voi tam tak ka en tah leh tu chen khoma ka la en nghok lo The Good, the Bad and the Ugly chu ka lungrilah a hung inlang a. Inthlang nuhnung taka hmai thŭm Delhi tlanga Congress hai chun 2013 hi “The Ugly” ti mei an ta; ‘tling threlh apiang pawitih a zual’ ti pawl BJP chun ‘The Bad’ ti nuom an ta; ‘rina loha uibŭk sa’ tia khêk pawl Aam Admi Party, Arvind Kejriwal marawihai ruok chun “The Good” ti ngêi an tih.

Tu kum kum bul tieng khan David Buhril kuomah (fiemthuly and konfidensially), “Kum 2013 hi kan innei kum sawmngana, Golden Jubilee a ni ta a, keini ta dinga kum vangnei a ni el bakah ei ram le hnam ta ding khoma kum vangnei, kha hma kum tam inrim taka ei lo suol tah thil hrang hrang, abikin intuoi tharna, iemani bek a hung tlung ka beisei a nih” tiin ka hril a. Kum a hung thar a, thla hnina ei suo chauh ti-ah Hmar Inpui thruoitu thar, February 15, 2013 khan an thlang a, thruoitu thar le thatho mi fel tak takin ngirhmun poimaw an hung chel a, thla khom an sukmuong hle. Hnamin thuok thar laa tha thar putin, zaper thâ thrum tah, khûp tlep tah le bân thâ zoi tah sang mar nawka hma tieng pan dingin mi tam takin ei beisei a, chu ding chun ei insingsa bok a. T.Khuma dungthulin, “Kawl ang a êng tran ve tah ei lengna” tiin ei lungril darbenthek benin, mi tin hmŭr a’n phu sep sep niin a’n lang.

Sienkhom, thimna lal chu buoina lal a ni tlat leiin, mi thra le indika insie, thlarau mia inngai, zawlnei Mikaia hun laia thlarau khelhlip changtu zawlnei ruol ang el kha rawi a hau èm ém a, chuonghai laia threnkhat chu a hung chok tho amanih ti ding ang elin, thil a hung tlung a, Inpui thruoituhaiin hma ieng khom an la lak hman hmain, an beisei letlingin Delhi tlangah boruok thra naw tak a hung suok a, kong khata thlir chun a beidongumin a vangduoi thlak a, thla iemani zât zet ei khawvel zim buoiin thil dangin hmun a chang naw a, a poi takzet a nih. Ei sawsaiti hi tuthlaw le laptop inkara leng, betlebut khawvela cheng mi tam tak ei la um tlat si leiin, hang inhril fie el thei ruol lo khopa zau chadan a um a, mi nuizat bur ei kai naw thei naw a nih. Inthlak thlengna hun a tlung ding pha chu hieng ang thil dangdai le mak tak tak hi a tlung hlak hrim a nih. Sienkhom chuonga sietna hmangruoa hmang dinga mihai dawi vettu chu Pathien a ni ngai nawh. Saula sunga lut le Juda Iskariot sunga lut kha, an inkarah kum sang chuong hiel tla sien khom, a pangngai tho a nih. Hieng ang mihai hi ‘The Ugly’ laia zĕl sa ding ni awm tak an ni laiin, anni chun ‘The Good’-ah an inngai tlat.

Sienkhom, kei chu thil innîm le inthim zawnga thlir mi (pessimist) ni loin, khaw var mawi tak la hung suok ding beiseia thlir mi (optimist) ka ni leiin, ei thil tuok threnkhathai hi inthlak thlengna dinga khawfingchat hung tlung ding hriltuah ka ngai tlat a, ka bei a dong nawh. Harsatna hung tlung hrim hrim hi ei nina tak tar langtu a ni nuom hlak a, ei beram vun silhai ei hang hawk zet chun, ei inhmu chieng tawl thawkkhat niin ka hriet. Chu boruok chun Guwahati tieng khom a hung kangkai pei a, Kristmas ei hang hnai meu chun zu khawn chang lo, Gospel Centenary hmang ding lai khoma zie lo insuo tah threnkhatin a hranin sa bêl an hung kuol tah pei a nih. Zawlnei Amos hun laia Lalpa PATHIEN kha zangaina PATHIEN-ah inchang hlauh naw sien chu:

Chu ni chun sŭnchang lai tak,

Nisa intlâktir ka ta,

Sun pachang lai zing siin,

Hnuoi hi hung inthim a tih.

Kûta in ruoi thrèhai chu,

Ruokngha ruoiah inchang a ta,

In hla sakhai po po khom chu,

Trap hlaah inchangtir ka tih (Amos 8:9-10 DV)

a ti ve a ni khomin dem rak chi ni kher naw nih. Mi tin an thilthaw ang peia rul hi Pathien thusuok, ringtu le ringnawtuhai chunga khom ieng lai khoma thutak ngîr zing chu a nih.

Chu chun ei hma dom ding pikzie amanih zuomumzie le ieng hmangruo am hmangin hma ei tawn pei ding a na ti iemani chen a tar lang a, thil lawmuma ngai ding a nih. Chu chu a tak ngeiin Hmar Inpui thruoituhai chun an tong nghal a, theitawp suoa siem thrat tumin Rengkai-ah March 20, 2013 khan HSA Buonzawl-ah inkhawm ko a ni a, Delhi, Guwahati, Chandigarh le Pune-a inthokin, HSA, Hmar Fellowship le Welfare Society tin aiawtu dorzon khat chuong palai an hung intir a. Sienkhom, bawsetua ngaihaiin hnam inpumkhatna neka mani pawl bing trânghma an ngaina chu an sakhaw biek tak a ni tâk tlat lei le pawla turŭna thlarau inrui pawlin thisen insuo ngama thrang an khaw tlat leiin Inpui thruoituhai ta ding khoma hma hang lak zui ngaina a um ta naw a, an thrahnemngaina chu a hlamzui tah hri a nih. A tuka ka tlungna ina ICI thruoituhai an hung khomin Gurkha sipai angin an khong thra hle a, sienkhom an ke tet khan an khaitelel bak chuh a sukthĕn nawh ti an hriet si nawh. Lawmum ka ti pakhat ruok chu, anni lai khan Krista Isu thlarau kol pakhat pahnih an la um niin ka hmu a, an beram thruoihai ta ding khomin a thlamuongum thlak hlein ka hriet.

A ieng ieng khom chu ni sien, Delhi-a ei Sinlung khawvel chu a pangngai neka hrat lem hmanin a fe pei a, ei ringthar khawvel phun khom a phuntuhaiin an dit dan ang taka an enkol zui pei dingah ngai inla, an nuom dan ang takin khawsa raw hai se, fei ruok chu baw ve loin. Mani thilthaw senga a maw phur le a ra sik le mani kros seng put hi thil umphung dinga khuonu ruot, thutak ngir zing chu a nih. Inthuruolna le inpumkhatna huonga hung lut nuom nawk hai ruok chu naupa tlan hmang unaupa lungril puthmang kha hnawlin, a pa, lo lawm luttu lungril kha puta lo lawm lut ding a nih. Tam tak lem chu an thu le hla khom ni loa khawsa an nih. Inpumkhatna dit loa kawi ve rêng rĕng hai ruok chu khawtlang ta dinga mi hnoksak an ni leiin, an inlengna hmuna an um a thra tak. Chuong zawnga thlir chun, 2013 March thla bula thil tlung kha khawtlang le ram le hnam ta dinga inthlit fimna hun remchang, Pathienin eini ngei hmanga a mi hremnaah ngaiin, mi dang maw inphur ding zong loin, ei dawi sa vek fatu ei ni leiin a tûrin a mi fang siet tuor dingin inpuocha inla nuom a um. Kohran pawl hrang hrang inkara buoina le insèkhêna hi eini lai chauh ni loin hmun hrang hranga khom um hlak a ni laiin, pawl pakhatin mani pawl trânghma keina leia hnam pum inthuruolna vuok chen vong khom poiti loa hma a lak voi khatna a ni leiin a law dan thiem a’n tak a; suolin taluo a nei si naw leiin, ieng anga pangzatum le râpthlakin am hi tûr hin hnam inthuruolna le inpumkhatna a fak siet pei ding ti khom hisap phak ruol a ni nawh.

Delhi tlanga ei khawvel vangneina le damtea hma ei hung sawn pei theina chu inthuruol taka lungthu pathum- HSA, DHWA le HCFD- haiin kal an chawi tlang lei a nih. Insomdawlin an inphuhruk tuo a, iengkim thawnaah inthuruolin an thrang tlang a, hmun danga thaw thei lo amanih le thaw harsa an ti khom zâng tak le zo takin an thaw thei pha hlak a nih. Tlawmngaina thilah, khaw lai hmuna khom Delhi tlanga tlawmngaina a tak ngeia an kengkawna le a hrila hril loa a thawa thawa an phur suokna hi hmu ding a tam ta naw el thei. Khawtlang, inchuklaihai le kohran thilthawna ienga khom neitu nina changin an thrang tlang vong a, sorkar thoktuhai khomin an awfis an maksan chara inthokin khawtlang thila chu sorkara an nina thè thlain vantlangah an inhlawm lut vong a, kâr a um nawh.

Hi hi a theina san poimaw pakhat chu biekbuk khata tu pawl kha pawl ti um loa Fellowship hnuoia ei inlawi tlang vong lei a nih. Hmun danga thaw thei ta lo, kohran pawl hrang hranga thruoituhai hung inzin chang khoma an inhmu le inlawi tlang theina dawkan um sun chu Fellowship-a chawibiek inkhawm a nih. Chu inthuruolna boruok chu hung vaw se a, March thla bula a hrana inkhawmna an hung neia inthokin hieng pêm tharhai hmel hi ieng thawnaa khom hmu ding a um ta nawh. Sienkhom Delhi-a a nawlpui inlawinaa ruok chu kha hma neka inthuruol lem le hrat lemin kal ei chawi pei a, intuoi tharna thlarau khomin hmun a hluo lien deu deu a hoi. Kum danga ei la tong ngai lo, hla pawl inruolsieknaah lawmman pakhatna le cheng fai nuoi thum ei thralaihaiin an dong. Chun, Hinduhai laia rongbawlna khomin ra hlimum insuo peiin, ringthar nasa takin an pung a. Delhi Thurawn khom hi inpêm tlawmte leia thi el dinga an hril kha a hring zui pei chauh khom ni loin, a sungril tieng insawi mukin, a hrât deu deu. Chu ra suok, mit ngeia hmu thei chu August 24-a 2013 Fresher Social Meet-a tlangzarh ‘TLAITLAN’ kha a nih. Chun, 7^th Northeast Tomchon Memorial Football Trophy 2013-ah ei pasaltrahaiin pakhatna le lawmman cheng faiin nuoi nga an dong bok a nih. Pêmhai trongtraina le bawsietna ra lei chu ni kher naw nih.

Sung bing thilah

August 27, 2013 khan artikul ‘Thlazing-Tlaitlan’ ti ka ziek a, Delhi Thurawn le website hrang hrangah an insuo a. Hi artikula hin August thla sunga ka nun le inzoma inchik tlak thil tlung threnkhat ka ziek a. Abikin, DT Editorial Board-in kum khatah voi li bek Special Edition insuo dinga thutlukna a siem tah anga a suok hmasa tak, TLAITLAN ti hming chawi chu mellung poimaw a nizie thu ka thluoina a ni tak a.

Special Edition insuo dinga thuthlukna an siem hi ka hriet ni chun ka lawm èm ém. A san chu, naute anga ka duot, ngaisak le hlut Delhi Thurawn (DT) chun kum 30-na a suo kum 2013 khom hin kulcho el loa tha thar insuo a, thâ sukthak a, zak khawng a, hma tieng pana a la’n per zek zek lei a nih. A mi hung betu Zakaria Varte, naupang chikte, inchum bat el a ni laia Elizabeth Varte-in Rengkaia inthoka umpui ding le lekha inchuktir dinga a hung thruoi thlak hlim lai dam chu sinema angin ka mitthlaah a hung inlang a. Tuta anni rawi, Delhi tlanga seilienhai hi HSA le ram le hnam kalchawina kong tinrenga kut le ke poimaw an hung ni el tah dam hi Pathien malsawmna a nizie a mi’n ngaituo nontir a, lungrilin lawmthu ka hril mol mol a.

August 15 hi India ramin zalenna a hmuna ni a ni el bakah ka nuhmei Darthrachong piengna ni a ni a, a piengcham hi ofisial thil leia sungkuoa kan lawm hman naw chang khoma India mi, tlukledingawn neka tamin kum tina an ni inser hlak a ni tlat leiin kan nu hi a vangnei chauh khom ni loin mi ‘nihlaw’ a nih. Ka ruol le pai le ka’n hnaipui tam tak khom hi August thlaa pieng an nih. Chun, 1988-a inthoka tu chena ka ni inser hlak chu Burma rama Aungsan Suu Kyi le a pawlhai National League for Democracy (NLD) ni inser hlak, 8.8.88 champha a nih. Sipai rorelna hnuoia inthoka suok a, mipui rorinrelna lak lut tumin kum 1988 khan mipuiin thla thum ding lai lam an hraw mup mup a. Hmu el dinga an inbeisei laiin sipai bokin 8.8.1988 khan thuneina an hung lak nawk a. Hieng hun lai hi a kip a kawia mit ngeia thlirtu le na ngeia ngaithlatu ka ni leiin, khanga mipuiin hnĕna nopui an dom trĕp nia an inngai laia an kuta inthoka ben thlakpek an hang ni nawk el kha chuh, lung a dong hle.

Mipui roinrelna hi an hmu theina dinga a kûl a tâia thranga suolpuitu ka ni ve leia sipai sorkar theida kai hiel ka ni a, an hmu teuhzie khom hretu ka ni a, ‘tling threlh apiang pawi tih a zual’ ti ang el khan, poitiin ei inchek tlok tlok el a nih. A rama chenghai le himna zonga khawvel hmun hrang hranga tlan dar le umhmun khuor mi sang tam takin hi ni 8.8.88 hi mipui sorkarna (democratic government) suol suok dinga beipui thlakna ni-ah an ngai a, khŭn takin kum tin an inser zie hlak a nih. Delhi tlanga khom Kawlram buoi leia rifiuzi tlan khawmhai inbuk tamna Janakpuri-ah kum tin an inser hlak a, kum tam kha khuollienah ka va thrang tah hlak a nih.

Tu kum khan August 8 kher kher hi North Cachar Hills le Cachar-a tlangmihai ngirhmun fe pei dan ding hril tlang dinga Sorkar Laipuiin HPC (D) aiawtuhai Delhi tlanga inhmupui dinga rem a ruot ni a ni tlat chu tie! Kei khom Observer dinga an mi fiel leiin, ni dang ka lo pom nuom ngai nawa chu lungril thlakin, tuta trum chu thrang dingin ka lo inpuocha a. Sienkhom, insilna pindanah ka tlu pal leiin ka voi tieng dar inchuktuona ka tet pelsol a, hospital-ah ka fe lem a ngai tah tlat leiin ka thrang hman ta naw a. Hi inbiek hi Guwahati tieng sunzom dinga ti a ni angin a sai lawkna dingin inhmu khawm nawk a ni a, lampui thar rel tung mek a nih. Ka thu zuk suklang nuom tak chu, ka ta dinga ni poimaw, ka ni inser hlak ni champhaa Sorkar Laipuiin Delhi-a inbiekna hun a hung ruot tlat kha a nih. Chu ni chun vang iemani hung phur ngei dingin ka beisei a nih.

Delhi-a inbiek zo hin Mizoram sorkar le Sinlung Hills ngirhmun hril zom dinga August 14-a inbiek rot le ruot tah angin, chu hun chu nang hman dingin ka mikhuol threnkhat chun Aizawl an pan tung nghal a. Aizawla inbieknaa hin, kha hma kum tam an lo simbudawi tah hlak anga dawi zom pei an tum kha an nuompek ta naw leiin, hlawtling takin an inbiek tlol a. A hma khoma voi tam a trong invet kha sunzomin, Mizoram sorkar thruoitu chun, mani khuo le tuihai le inkap dan ding phierpui ding ni awm hrima Aizawl tlanga hmarsak ram tieng vengtu sipai laltak a ko zing si laiin, inkap sunzom nawk el ding chu poi a tizie hrilin, India zalenna ni inzaum tak chu a awle mitthliin a sukporche ti chanchinbu tiemtuhai chun hrieng an tih. India le Pakistan ta dinga zalenna an hmuna thla August hi a letling zawnga hmang chu khuonu remti zawng khom ni kher naw nih.

A nih, vanin a ruotui ren thrak loa hnuoiah buok a, thing le ruo, thlai chi tinreng le hlo hnahai inthrang hlut hluta a chawm hun Thlazing thla bok hin a nih, kum zahni chuong British hrengkol lo bun tah India khawmuolpui (sub-continnent) chu a hrengkol sût thlakpeka insuo zalen a ni hun chu. Hi Thlazing, thla vangnei bok hi a nih ka koppui ding khom ka hriet hma daia inthoka hringnun bu zawla lo sietu chu nih. Tu kum 2013 hin malsawmna bawm chawiin keini sungkuo khom a mi hung kan a. Serampore College-a inthoka ka naupa David Lalhmingsang Keivom ekzam rizal hung hawnin, Bachelor of Divinity (BD) thra takin a tling a; a hung suok char kha khawvela radio hmanga rongbawlna lien pawl, Trans-World Radio (twr) ah Communication Manager sin a hmu nghal bok a nih.

A sang, kan mi tlum tak, New York khawpuia um photo-journalist James Lalropui Keivom khomin India zalenna ni le a nu piengcham ni tak khan New York khawpuia Photo-Journalist Association-in kum tina thla la thiem fal bik a thlanghai lai lawmman paruk zet a dong a, a dong rawn tak a ni bakah a thlalak pakhat lem chun ‘inlâr tak’ nina a dong bok a. Hi hma khom hin kum tin deuthaw lawmman a lo dong tah hlaka chuh tuta anga chawimawina insang hi a la dong ngai nawh.

London-a khawsa, kan naunu upa tak Margaret Thangmawi Keivom (Mawi Limited) khom Overseas Indian Associations haiin Fashion Designing tienga India ram cheimawitu laia mi suongum nia an ngai leiin chawimawina inhlan an nuom thu le sina a buoi leia a la hman hri naw thu le kum 2014 March-a dinga a hun a son hlat thu khom Thlazing thla bok hin an mi hung hril a. Hieng naw khom hi thil dang tam tak, beisei phak lo sir hrang hranga inthoka Pathien kut inlangna a tam a, a hun ruota a hung keu pha leh ei la hril pei ding a nih.

New Zealand tienga um, kan tunu hmasa tak Jessy Darmawi Keivom-Lockhart, kan naunu pahnina, Helen Ruolsingpui Keivom (Deputy Chairperson, District Board) naunu, Wellington (New Zealand)-a khawsa chun February, 2013 khan New Zealand Army-ah Lieutenant Colonel (Psychiatrist) sin a zom bok a. Helen sin chel hi sin liena hril ding ni naw sien khom, New Zealand-a Asian mi khawsahai laia hieng ang ngirhmun hluo hmasa tak a nih. Kum 2013 khan DHWA chun ‘Chawimawina’ a’n hlan nghe nghe. A naunu sin chel khom hi chuong ang tho chu a nih.

Hienga vangneina chungchuonga kan insung inthuoma a um el hih kan fel le tlak bik lei ni loin, kan hma khala ieng lai khoma hnuoi tienga inthoka mi lo domtu, Lalpa thratna le lunginsietna zar lieu lieu a nih.

Baibul inlet & suta rongbawlna

September 28, 2013 khan artikul pakhat dang, ‘Thrangpuitu Ban Sei’ ti ka ziek a. Chu taka chun kum 2007-a sut le tlangzarh tah Baibul, Delhi Version-tia hriet lar hi international standard-a inphân danga mawi taka sut nawk ding le a sutnaa sum le paia mi santu ding chu Pathienin a mi pek ding a nih ti beiseia ringnaa kan buotsai a ni thu le chu chu bawzui dinga Sivakasi (Tamilnadu) a ka’n zin thu ka ziek a. a A hnuoia hin a laktawi ka hung zep nawk:

Kum 2002-a sorkar sina inthoka ka penson charin mi tu khom ruoi le sor ni loa mani lungpuok ngeia a hran hlaka Baibul inlet thrat le chu chu Manipur simthlang Senvon khuoa Gospel a hung lutna zabili 2010 hma ngeia mi dang sum thaw khawma inthok ni loa mani thaw suok ngei sum hmanga sut chu kha hma daih a ka target a ni a, chu chu zabili hma kum thumah hlenin a um a, Senvon-a ngei October 13, 2007 khan tlangzarh a nih. A kûl a tâia mi enpuitu H.K.Kawllienthang le hi rongbawl sin kan thaw ngat ngat sunga kan tonhriet poimaw tak tak laia pakhat chu Pathien ringumzie, mihriemin ei chana innghat thaw ding ei tlâk phot chun ama tienga a thu tiem chu hni non khom ngai dĕr loin, mihriem beiseina khêl daia nasain, a hlen zat zat hlakzie thu chu a nih. Chu le inzom pei chun a nih mani sum senga India sim tawp pan dinga vuongnaa kan zin hih.

Baibul (Delhi Version) hi hawrop inhrol phura sut, phek 1700 zeta sa, kilogram 1.2-a rik, thingtlanga meivar um nawnaa le tarmit thra an nei nawna hmuna khom nu le pa-in harsa loa an tiem thei dan ding ngaituoa duong a ni a. A hmangtuhaiin an hril rawn tak chu a sa le rik thu a nih. ‘Chanchin Thra mansapui’ paitu hnama inngaihai khom hin inkhawm sung chauh khom Baibul rik tap el pai chu ei lo pei naw tlang khop el. A hung suoka inthoka sawt naw te-ah computer le mobile-a inthoka tiem thei dinga sie a ni khan thralai tam tak chun remchang takin mobile-ah an chawi ve thung a, an tiem le tiem naw chuh thu dang ni sien. India ramah mobile-a Baibul sie hmasa tak a parietna ei niin ka hriet, Lalchungsiem Thlawngate bengvarna zarin…

A ieng khom chu ni sien, Baibul inlet thar sut hmasa tak hi tu khomin a aitecheuna anga ngaiin, siem thrat le sukdika sut nawk vat dinga riruong a ni hlak angin Delhi Version khom sut zo a ni char khan ennon sin tran nghal a ni a, a sut dan ding le mi sutpuitu ding lampui lungrila dap zing pumin, mihriem thaw thei bak khela iengkim sukpuitlingtu, thrangpuitu bân sei, tawpintai nei lo Pathien kutah kan innghat top a…

Iengtin am thil a hung inher pei ding ti ka hriet naw laiin, ni khat chu John Ruolngul-in Hanoi-a inthokin a mi hung biek a. “Pu Muong, printing press tienga sumdawng Indian Company pakhatin hi taka hin UN project-ah kontrek an hmu a, Vietnam sorkar le a ram mi, hmu lo inbeiseihan dang tuma nasa taka thrang an lak leiin contract khom sign thei loin ni kum khan an lo um ta a, an bei a dong der a. An chungthu hrilpui dinga Indian Embassy an hung inpun leh kan sukfelpui a. An lawm taluo kha, “Iem kan thawpek thei ding che” tiin an palai Dr. Manoj Verma hin a mi’n don lep a, pawl ding dang a hriet naw bok leh, inah dam a hung leng a” tiin a mi hung hril a.

“Kei chun, “John, innu inzin lai, i parol lai a nia chu lo nghok naw rawh. A hung leng nawk pha leh ei Baibul prawzek hi lo hril la, khawl thra nei an ni bok a, ieng chen an an hung thrang thei ding ti lo indon rawh. Pathien hung tir khom an ni el thei a nih” ka ta. Ka ti ang chun a lo hril a, an theitawpa Baibul sutna thrang an nuom thu an hril bakah, India rama an hmunpui Sivakasi-a um Director Senthil Kumar chu lo inbiekpui dingin a address le mobile nambar iengkim an mi hung thon a. An Company hming chu Lovely Offset Printers Private Limited a nih. A hmunah mani ngei fe hmasak phot thrain ka hriet leiin Chennaia um, unau sungkuoa inman, Rathinavelu chu ka zuk telefawn a. “Chennai-ah hung thla phot la, i fe nuomna taphotah fepui ka ti che a, Maldives-a i um laia Pu H.T.Sangliana hai le ei hril vet, Security Training Academy indinna dinga ram acre 50, Madurai-a inthoka km 75 vela hla, Kerala le inramrinaa kan inchawk dam ei va sir ding a nih” a ta.

Chennai-Madurai-Sivakasi

September 23, 2013 Thawtranni chawhnung dar 2:30-ah Madurai panin vuongnain kan suok a, 3:50-ah kan tlung a, ka fena ding Sivakasi tienga ka’n hmupui dinghai car hung thona chun kan chuong a, zantieng dar nga inrik vangah kan tlung a. Ka fena san tak, Baibul sut thu chu Senthil Kumar, Director, Lovely Offset Printers Private Limited leh kan hril nghal a, minit sawm sungin kan zo a, kum 2014-a sut tran dingin kan rèl a. Baibul sutnaa hmang lekhapuon, Bible Paper hi an tawk thrang naw leiin, a sut tak chu Bangalore-a a ruolpa, hieng ang tawk thrangin buoipui a ta, a dang po po chu anni buoipui ding a ni thu Director chun a mi hril bok a.

Chu zoah an faktawri a mi fangpui a, an khawl hmanghai chu German siem, a thra tak chi vong a ni a, pui rep rep tak a nih. Assam rama inthoka hung le chu faktawri-a thok chu thralai iemani zat an um a, a thren chu ka’n biekpui a, mi thar deu vong an la ni thu an hril. Hi faktawri kan fang lai chun ka ruolpa L.Rokung, kum 2003-a muol liem tah le hausa dang Liensangvung inthukopa kum 1962-a Churachandpur-a printing press hmasa tak, a hminga L & R Press an inbuk, an hung inthrut lai chu mitthlaah a hung inlang a. Hieng lai hin hieng ang khawl hi Churachandpur lai chu a la um naw leiin, a en ding ringotin khaw hrang hranga mi an hung fuon khawm hlak. Hi Press-a hin a nih lekhabu puitling ka buotsai hmasa tak, HMAR HLA SUINA ti chu 1980 khan kan insuttir ni. Tuta faktawri-a ka khawl hmuhai le L & R Press inkara hin kum 50 chauh a la tlaa chuh hmasawnna tienga an inkar hlatzie chu mel sang tam a ni tah. Ei buonhai hi mihriem taksa put ve an nia chu pa le pa inkar hlatzie hi hril ngam khom a ni nawh. Trong khat hmang seng seng, uisa fa seng seng lai khom, tuthlaw le laptop civilisation inkara chenghai inkar khom hi a hla ta hle a, “a pawng bik a phai bik um loin” ti hla hi bau chauh naw chun ei sak ruol thei ta nawh.

September 26-ah dam takin Delhi ka chuong lut nawk a. Pathien lunginsietna le thratna zar lieu lieu leiin, thangsuoa hung inlawi angin ka’n ngai. Kan zin sung po poa ka fena taphota ka thil tuok chu ditsakna ngot a nih. Damlai suk le tunga ka voi le chang, ka hnung le hma sir tina mi vengtu, Baibul sut dinga Delhi-Hanoi-Chennai-Sivakasi-Bangalore suikhawmtu le iengkima mi thrangpuitu Pathien bân hi a lo va hang sei de aw!

A sut dan ding sukfel a nia inthok hin thla khat sung ngeia sut thei dinga inpei fel tumin Kawllienthang leh Final Editing & Revision sin kan thaw ngat ngat a. Chu sung chun Shillong tieng Umran Retreat-a thrang dingin ni sawm ka suok bakah, ka hung kir kar khat hnungah New York tieng chawlkar hni inzinin ka liem thla nawk a. December thla tawp hma ngeia zo kan tum tlat leiin ni tin a tam takah darkar nga bak inna hun ding ka nei nawh. March 2014 sung ngeia a bu thar hmel Lalpa zar lieu lieu-in hmu hman ei beisei a nih.

Umran Retreat

Kum 2013-a thil tlung lawmum le hriet zing tlak chu Shillong phak hma km 33-a um Umran-a Rural Resources and Training Centre (RRTC) a Hmar Inpui thruoituhai huoihota thu le hlaa fienrielna October 23-25 a ei nei kha a nih. Tlawmngaia sum le paia hma hung latu Dr. Rochunga Pudaite le mi dang dang hai khah lawm an umin inpak an phu takzet a, an thrahnemngaina chu a thlawnin luong ral naw nih ti chu Retreat-a hung thranghai kha hrepuitu ringum an nih. Hieng tienga mi sukphurtu le a phusa taka thrang ding ni awm tak pawlin an bawikawt ruok kha chuh kum bul laia hnam inthuruolna dai thriektuhai voi rimsie an lo inruipui ve lei khom a ni el thei.

Thil thra a hung hring suok hmasa tak nia inlang chu Manipur, Assam le Mizorama Hmar Literature Society thruoituhai Aizawl tlanga December thla bula Hmar MIL le inzoma an inhmu khawm kha a nih. Ieng anga mong rik ei ti khom hi a khîk hartu an um pha chu an inphu zuk hlak hrim a nih. Ei don tlang dinga thra ruok chu, ei thu le hla tui tling po po hi sawr khawmin thu le hlaa hnam hmasawnhai inkhina noah sung tah inla, far ieng zat am intling khawm a ta? ti zawna hi a nih. Ei hrietna po po intling khawmin Vai mithiem pakhat hrietna a buk hne teuh naw ang bokin, ei secular literature bŭk hi pângpat bawr khat buk nêkin a zâng lem el thei ti hih tapsak zawla insan puom rak neka ei ngaituo chieng a mamaw khop el. Thu le hla rikzie buknaah dikri le taitlil inzaum nei tam tak inhawr khawm ringotin thu a phur nawh.

Tlangkawmna

Ieng khom hi famkima siem a ni naw ang bokin, kum 2013 kha kum vangnei a nizie hril lang khom kan inhnaipuihai sungkuo pahnia inthoka thinaa kuol khum (bracketed) a nih. January 13, 2013 khan kan sangpa Laltranpui (Trana) nuhmei, kan farnu Lalhlimpui chun muol a mi liemsan a, Shillong-a a tuka an vuinaah Delhi-a inthokin ka hang thrang hman a. December 24, 2013 Kristmas urlawk niin Imphala um kan tupa Dr (Prof) Lal Dena nuhmei, kan farnu bok Lalhlupui thi thu an mi hung hril a, a tukah Sielmat-ah an vui a, sienkhom kristmas mi hmangpui dinga London-a inthoka hung kan naunu upa tak Margaret Thangmawi le a pasal Tim Awan an hung tlung hlim a ni leiin ka tupa chu ka hang trawiawm hman ta nawh. Kristien indik thukhawchanga hril chun, thina kotsuo kânhai hi vangneina tawpkhawka hlangkaia um, van ropuina chang kumkhuo dinga an chatuon in dinga Lalpa buotsaia inlawi lut ti ding ni lem a tih. Chu chu kum thar hongna ding le kharna dinga ringtuhai ta dinga duthusam a nih. Ringtu ta ding chun thi hi hlawkna el khom ni loin chatuona hring songna a nih.

Tiemtuhai po po kum thar 2014 ditsakna chibai vochuom ka buk. (December 31, 2013 Tuesday, Delhi).