Pathien Rawl I Hriet Hlak Am?

Ziektu: Pu Zarzolien Keivom

Johan 10:3 a chun a beramhai chu an hmingin a ko seng a, a thruoi suok hlak, a ti a. Isai 49:15-16 a chun, nenetuia a chawm lai naute a nuin a theinghil hlak maw? A rila ra naupang ngei chu a lunginsiet naw ding maw? A theinghil a ni khoma kei chun theinghil nawng ka cheu. En ta, ka kutphaa hin i hming ka ker a ni hi! a ti a nih. Pathien hin ei mi nizie khom hi a hriet chieng: nau thu awi am awi lo, malsawm tlak am tlak lo, mi ringum am um lo tihai chenin a mi hriet fai vong. Pathien hin a mi lo va hriet chieng lawm lawm awm de aw! Sam 139-a chun Davidan hieng hin a lo hril a ni khah:

Aw LALPA, nang chun ngun taka 1 Aw LALPA, nang chun ngun taka

Mi dap suokin i mi hriet vong.

Ka thrung ka ngǐrhai i hriet a,

Răl hla taka inthok khomin,

Ka ngaituohai i hmu tlang vong.

Ka fĕna le ka chawlna hai,

Nangin iengkim i hmu vong a,

Ka um dan po po i hriet chieng.

Ka hril hma khomin aw LALPA,

Ka hril ding po po i hriet vong.

13 Ka taksa bung tin i siem a,

Ka nu sŭlah i mi rem khawm.

Mak tak le râpum taka siem,

Ka ni leiin lawmthu ka hril,

I thilthaw makzie ka hriet chieng.

Arûka siem ka ni lai a,

Hnuoi rila i mi rem khawm lai,

Ka rurĕl iengkim i lakah,

Thup hrim hrim a um dĕr naw kha.

Ka ruongâm la kim lohai chu,

I mitin i hmu fai vong a,

Ka nihai a’n tran hma daiin,

Ka dam sung hun dinga ruot chu

I lekhabuah a chuong vong.

Mi lal le ropuihai hmelhriet ni hman ei nuom a, chuonghai po po siemtu le chawisangtu Pathien hmelhriet el khom ni loin, a naupa Isu zara a nau, a ro hluopuitu ding chu ei nih. Ei nauhai ei hriet chieng nek hmana mi hre chieng lemtu, a kutphaa ei hming ker ngattu Lalpa Pathiena neitu ei lo ni zing el chu a ropuiin a thlamuongum ngei!

Unau dittak, nang teh berampu thra Lal Isu’n i hminga koin a thruoi suok ta hlak che’m? Khaw tie’m a thruoi hlak che? Iem an thawtir ta hlak che ti hang ngaituo chieng raw khai! Paula khom kha Pathienin a ko suok lai khan tisa le thisen an rawnpui naw thu a hril khah. Berampu thra Lal Isu chun a beram po po a khal suok vong pha leh an hma a thruoi a, a beramhai chun an zui hlak a nih. Nang khom i ngaidan ringotin Pathien hnung zui tum naw la, i hmathruoitu dingin berampu thra Lal Isu mol hi hmang hlak rawh. Lalpa thrang loa hun i lo hmang liem tahai po po kha kokir ruol loin muol lo liem ta hai sien khom, kum 2014 a inthok bek hin chu i thil thaw ding taphotah Lalpa rawnin, a phalna la hmasain ama leh iengkim thaw tlang dingin lo inbuotsai ta rawh.

Lalpa rul ka nuom che,

Ka nun le êng pŭk chu,

Thlarauin mi thrangpui sien,

A hmun li’n rul ka che

ti-a Upa Ngamain hla a lo siem ang in hmun li a rul ei inzuom naw khoma a hmun khat bekin aw!

Beram vengtu thra chu a beramhaiin an zui hlak, a rawl an hriet leiin. Mi dang chu zui naw ni hai, tlan hmang san lem an tih, a rawl an hriet naw leiin ti Johan 10:5 ah ei hmuh. Unau, Pathien rawl i hriet ta hlak am? Ei damlai ni tin nunah hin rawl pahni char hriet ding a um hlak, chu rawl pahnihai chu thre hran le hriet hrang a ngai a nih. I thrè hrang thiem hmâ khat chun i nun ram buoi zing a ta, trawl zing bok a ta, i thil ditzawng, nuomzawng le chakzawng taphot chu Pathien rawlah ngai hlak bok i tih. Tisa ditzawng chu Pathien thlarau dona a nih ti ei hriet, chu rawl chu Rukrupa rawl a nih. Rukru chu inru ding dam , sukhlum ding dam le sukse ding dam chauin a hung hlak ti Johan 10:10-ah ei hmuh. Ringtu intihai lai hin Pathien rawl le Setan rawl hre hrang lo kristien nun buoi ei tam lei am a ni ding, hieng lawm lawma Pathien kohran intihai laia beram inrukpekna le insuksietna le inthatna chen a tlung inzing ut el ta hi maw! Pathien rawl hriet tumin ngaiven thrang ei tiu.

Tisa le thisen rawn hlakna lungrila chun Pathien rawl an hriet tak tak thei ngai nawh. Piengpui lungrila inphum tlat hi a nih, Jeremia 17:9 a, lungril hi ieng po neka mi hlem hmang chungchuong a na, beidongum khopin a sie a, tu’n am hre thiem thei a ta? a lo ti chuh. Chu mi hriem lungril tak chu a nih Pathienin thlak danglam dinga a naupa khat neisun a mi pek nasan chu nih. Filipi 2:5-a chun Krista lungril put ro a lo ti chuh. Ei piengpui lungril hi siem thrat ni loin Krista lungrila thlakthleng a ngai. Chu ngirhmuna inthok chun Pathien rawl ei hriet chieng thei chau a nih. Chu Krista lungril, ei nia um chun Pathien rawl a hriet hlak leiin a mi thruoina taphotah ei fe thei hlak a nih. Chu Krista lungril chu ei put hmâkhat chun Pathien rawl le Setan rawl hre hran thei tak tak ngai nawng ei tih. Galati 4:6 a chun, nau in ni tah leiin Pathienin a Naupa Thlarau chu ei lungrilah a hung inchengtir a, chu Thlarau ngei chun” Abba, Pa” tiin a ko hlak a nih.

Unau, chu Krista lungril chu nangmaah a um ta chun Pathien hmangaina rawl chu hre thiem thei tang i ta, i lungrila thlaler hmun chu ram hnawngah hung inchang tang a tih. Chu thuruk chu a nih Pathienin Ezekiel hmanga “Lungril thar peng ka ti cheu a,in sungah thlarau thar sieng ka ta; in lungril lung anga ngar chu la suokin pangti anga innem lungril peng ka ti cheu” ti-a a lo hril chuh.(Ezekiel 36:26).

Ka hriet hi Lalpa Isu rawl a nih,

A mi kona kut ka kuom tieng a phar;

Ama thisen ngei chun a min tlan tah,

Lalthrungpha hmaa chun a min thiem tah.

Amen.

Tiemtu dittak, Ka hriet hi Lalpa Isu rawl a nih, ti hla hi iden chara sak thei ngei dingin ditsakna tlampui sipin kan hlan che!

KEIVOM RUN(Greater NOIDA)

03 January 2014.