Tawn mangah Lt. Col. Rajeev Bakshi leh

By: Muona Infimate.

I Kuomah thil hril nuom nei hlak lang khom, ka lo hril nuom ngai naw a.Sienkhom voizan hin lo theiloa ka ngai leiin i mangah ka hung in lar a nih.Tipaimukh mipuihai ta dinga ka thina kha kum 7 liemta sien khawm, kei chun ka la thei nghil nawa, nangin i mi lo theinghil ani khawma vawizana ka hril hai bek hi, lungrila mi kawl pek tlat dingin ka ngen che.

Thu dang ka hril hma'n kei ni Dogra hai chanchin la hung hril met lang. Kan thlatu hai chu Aryans hai kha an ni a, Hindu a khawm hnam insang(high caste) kan ni bawk a. Chun Indian History-a Rajput sipai hai kha keini hi kan la ni pei a nih. Mi dangin India hung run an tum lai khawma thi chena thang la hlak mi kan ni a. kan hmelma hai khawma an min khawkpui hlak hrim a nih. Kei ni Dogra hai hi hieng state pathum Jammu & Kashmir, Himachal Pradesh le Punjab-a hai kan cheng a. Kan bubitna chu Himalayan foothills Jhelum le Sutlej vadung inkar lai khi a nih a. A hma chun khieng lai khi Rajput hills states ti'n an ko hlak a. British hai chun Rajput hills a inthawka sipai-a inzieklut hai chu 'DOGRAS' ti'n an ko hlak a. "They are Patriotic people" tiin Historian hai chun an ko bawk a nih.

13 Dogra Regiment-a Commanding Officer ka lo ni ve leiin Dogra Regiment chungchang la hung hril pei lang. Kum 1877 April 20 khan Sialkot ah Dogra Regiment hi indin tharin sukhrat nawk zuol a hung ni a. Chuong hun lai chun 37th(Prince of wales's) Dogras(1st battln.),38th Dogras(2nd battln.) le 41st Dogras(3rd bttln.) an um a. Hieng hai hi The Great War: La Basse 1914,Festubert 1914-15,Givenchy 1914,France and Flanders 1914-15,Egypt 1915,Afghanistan 1919 le Second World War:Burma,Magwe,Malaya le Kota Bahru-a hai khan an thang tawl a, an che fuk leiin 'Battle of Honours' khom inhlan an nih a. Chun hienglai hun hi pre-Independence war a ni a. Dogra hai chu British Indian Army tia ko an nih a. Hun a hung fe peia battallion pathum hai chu pakhata luong khawmin kum 1922 khan 17th Dogra Regiment tiin pumkhatin a hung um a. Kum 1947a India in Independent a hung hmu khan 17th Dogra Regiment chu sem darin a hung um nawk a. 1st Battallion chu kum 1981 khan 7th Battallion ni dingin 'reroled' thaw ani a. Chuong chun Vawisunni hin Dogra Regiment chun Battllion 18 (2nd battln -19th btln.) a nei a nih.

Dogra Regiment hi Indian Army-a Branch pakhat ve a ni a. Kan Regiment insignia(inchikna) chu Sakei a ni a. Dogra tlang a cheng hai chun Sakei hi ' Tlang pathiennu’ a nih ti’n an inza em em hlak a, pathien anga ngaiin Dogra mipui chun an lo biek hlak a nih. Kan Regimental centre chu Faizabad(U.P) a ni a. Kan motto chu ' Kartavyam Mata Ki Jai (Duty before Death) a ni a. Kan 'war cry' chu Jawala Mata Ki Jai (Victory to Goddess Jawala) ti ani a. Chun kei ni hi sipai hnuoia lawn pawl kan ni bawk a. Chun, Dogra Regiment a inthoka Army Chief General hmasatak chu Gen.Nirmal Chander Vij (2002-2003) kha a nih. Bangladesh-in zalenna hmu ngei tuma nasa taka thang a lak lai khom khan, Dogra hai kan zu che fuk hle a. Pakistan hai hratna tak le an inhumhimna Suadih chu Dogra hai chun zu hlu khumin an zu hne ban tah a nih. Hi tuma hnena changtu 9th Dogra Regiment hai chu 'The Battle honour of Suadih' ti chawimawina chu ropuitaka inhlan an nih. Chuonga Pakistan hai an in surrender phing chun U.K a chanchinbu pakhat ‘The Sunday Times Dec.7 1971’ chun hieng hin a lo tar lang a "The total collapse of the Pakistan Army's resistence is one of the most intriguing puzzles of the war in the East".

The 13 Dogra Regiment chun kum 2004 April khan 56th Raising day ropui takin Lachang(North Sikkim) ah hmangna a nei a, kan hlim tlang hle a. Chun,13th battallion hi Lt.Col Digbag Singh in Punjab khawpui laia pakhat Jalandhar-ah kum 1948 April ni 6-a a tungding ani a. Kan battallion hi kum 1971 khan ' The Battle honour of Siramani' chawimawina khom pek a lo ni ta bawk a. Chun kan battallion bawk hi kum 1971 khan 'Theatre honour of East Pakistan' pek a lo ni ta bawk. Chun kan battallion hin gallantry awards 98 a lo dawng ta bawk a nih.

Kan regiment 13 Dogra hi ram buoina le helpawl tamna Jammu&Kashmir le North east-a hai fe in nasatakin hma a lak a. Chuong chun Tipaimuk biel a helpawl hai kap dingin kan hung inthawk dawk ve a. An nun an rawng hle a nih ti khawm chu kan hriet a. Ka Commandna hnuoia chun Parbung Tipaimukh chu kan hung tlung ta a. Chuongchun lam hriltu ding le Taithu le Parbung inkara lo ambushtu ding hai le chun Tipaimukhah kan in the fel diem a. Chuong chun january ni 19 zan chun Parbung khuo kan pan phei a. A zing jan.20 ni chun kan mission chu tan dingin kan insingsa mup mup a. Mipui chu a ruka inrel hmang dingin kan hril pei a. Zingkhuo a hung var chun tlang pakhatah kan kai a, helpawl hai kap dingin thanghmun kan lak a.

Sipai regiment hrang hrang ni inlang khawm, ka rawi 13 Dogra regiment hai po chu tlang tienga insawn tung dingin ka hei hril a. Chu laia thil um dan hai la hei hril met lang. Ni thum lai bu fa talo kan ni leiin kan sawl hle a. A khuo mipui thenkhatin tui le mawt fak ding an mi hung pek a. Sienkhom, chuong fa hman ding khawm chu kan ni naw leiin, kan inkapzo phaa kan fak lem ding thu chu ka hmangai em em Parbung mipui hai chu ka hril mawl mawl a. Chuong lai zing chun mipui khawlai dunga nu le nau, pitar le putar thlabar em ema an sa himna ding zawnga Dawrkawn tieng pana hung tlan khawm hai ka hei hmuin ka lungril an sukna em ema. A then tit luot leia inhnuoia intawm khawm an um bawk a. Mipui beidawng em em hai hmel ka hei en chun, keini a'nthawk beiseina lientak an nei a nih ti chu an mit le an hmel inlang dan a'nthawk chun ka hei hriet thei nghal a.

Tipaimukh mipui haiin 'Hmarram Saviour ' an mamaw zie dam, thuoitu ringum le mihuoisen an mawmaw zie dam, le Mosie anga mani hnam tan tlat ngam mihriem an mamaw takzet niin ka hmu a. Kei chun hi lai hmuna cheng hai an him naw chun, India mi an ni ve si a, an ni an him naw chun India ram a him naw angah ka ngai a.

Chuonga ka rawhai an inzo fel chun kan hei insawn tung pei a. Ka rawi Sniper chawi hawn khat hai chu Jubilee Standard School tieng kan fe tir a. Kei khawm chu ka rawi hai hawnkhat le chun ICI 'N' biekin sir le a hnungtieng chun position chu remin kan inzo fel vawng a. Chuong lai zing chun Satthiek zawla nunghak tui chawi hai khawm chu kan hei hmu thei ran a. EAC sikul tlanga mei awia ngir helpawl hai khawm chu kan hmu ran a. Air field tlanga um hai khawm chu kan hmu bawk a. Helpawl haiin mipui an um chil an leiin a buoitlak na khawm a tam khawp el a. Nuom anga satthiek tienga civil mihai ko dawk hman an ni naw leiin a pawi ka ti hle a. Chuong chun kan hei inkap ta a. Helpawl pahni chu kan hei kap fuk nghal a, airfield tlanga kan kap fuk pa chu a hmunah a thi nghal a, a pakhat lem  chu la thi nghal lova a ruolhaiin asuka an kei phit lai kan hmu bawk a. Kan motto 'DUTY BEFORE DEATH' chu hrie zingin thang nasatakin kan lak a. Darkar khat chuong kan lo inkap a lo ni ta zing!.

EAC sikul tlanga helpawl pakhat chun lamkhuong bul besanin a hmang leiin a kap fuk an tak khawpel a. Biekin sira ka bawk lai chu ka thova, lamkhuong bul hliea helpawl pakhat chu ka hei target tah a. Chuonga ka va suok dawk hnung, inthrung puma kan inkap lai chun vangduoitlak takin a mi hung kap fuk ta hlau a. Ka hei en chun ka awm chungchar hi a lo nia, ka awmphaw huop bak char a ni leiin ka tading chun damna ruol a lo ni ta nawa, ka rawi haiin 'Sap…Sap' tia tap rawla an mi hung ko chu ka la hriet theia, amiruokchu ka khuo hmu a hung buoi tan a, an tawng hai khawm chu ka hung hriet kukal nuk nuk tah a.

Chuonga ka damsuo naw ding ti ka hriet phing chun ka nuhmei le ka nauhai chu ka lungrila hin an hung inlang vang vang tah a. Sung kima kan um lai hai dam chu ka la hei ngairuot thei a. Tlakhla hle lang khawm thil um thei ding a ni ta nawh ti ka hriet leiin, chu tieng chu ngaituo tah lovin, Keiin ka hringna kan hlan leia Tipaimukh mipui hai an ram sunga zalen taka an um dan ding hai chu ka ngaituo ta lem a, ka lawm bek bek el a nih.Chuleiin, la dam nawk ding khawm ni lang ka thupui ding chu "There is nothing more valuable in life than the love of Tipaimukh people. I am always ready to sacrifice my life for the people of Tipaimukh" ti hi la ni rawp a tih. Hienga thil ramtin ka ngaituo lai chun glucose an mi khai hi a lo ni ran a. Biekin hnung tieng an mi lo inzal a lo ni zing bawk. Chuong lai zing chun a mi kaptu khawm an kap hlum ve a lo ni zing el. A mi phurtu ding helicopter ri chu ka na a hin a hung inri vang vang a. Ka la dam dim aw ti a kan ngaituo lai chun ka bo riei riei a, ka hmangai emem ka nuhmei kuoma ka thil incha tum chu hril hman tah lovin ka lo boral hi a lo ni ta zing el.

Chun hi thu hi mi lo hril pek dingin ka ngen che. HELPAWL hai that chimit vawng an ni naw nasan chu Taithu le Parbung inkar, Keivawm muola helpawl hai kap dinga fe hai laia a commandpa kha an ni mi a lo ni leiin hnung tieng pensawmthum a kir pui leia tlan dawk hman an nih. Chun in ram hin thuoitu tha le huoisen a mamaw hle a. A ram mi hai tadinga thi ngam khawp mihriem in mamaw  takzet anih ti chu i kuoma kan lar tawpna ni bawk dingin ka la hung hril ni sien. Chun Hmar thangsuopuon mawi takel ka Memorial laia in mi khai phar pek hi ka lawm takzet a nih.