By Darsanglien Khawbung

“Aw tlangval, I tlangvalnaa chun hlim rawh; I vânglai nihaia chun I lungril chu hlim sien la, I lungril lampui chu hraw la, I mithmu ngeia chun; amiruokchu, hieng thil po poa ding hin Pathien chun rorelnaah a ṭhuoilut ding che a nih ti hre rawh.”

“I vânglai nihaia chun nangma siemtu che chu hrezing la, kumhai a hung hnai a, ni ṭhanawhai a hung tlung hma le; chu huna chun, “ Annia chun inhawitina ka nei nawh”, I tina hun a hung tlung hma hin”.(Thuhriltu:-Bung:11:9 le Bung:12:1&2)

Khawvel mithmu a mawi nuomna hin, thi hnina lampuia a mi ṭhuoia. Puotieng mawina ei ngaihlu leiin, ei damsung ni chu, lemchang thiem tak angin ei inlang a. Mi min khi dan ding chuh ei ni’n ei siemlawk a. Chu chu einina tak anga inlang tir tumin ei buoi em em hlak si.

Abiktakin, nipui ei hmang ni a hai hin a chieng hlak in an lang. Nunghak le tlangval kawtthler a, in hawi chen a, zu le sa le inhawi chen a, damsung ropuina tehlem hnawtin, siemtu hrefu loa, ei hang in thevir vel hi chu. Ei ta dinga thi chen a mi hung intlantu lâi chu a nâ naw thei naw ding chu a ni. Ei ṭhatlai hun hi Lalpa’n a I dit lai tak a ni si a.

Leh! Ei ṭhalai pui tamtak hai in khawvel pâr tlanna, khawlai hruot a, hlimhlawp rawng an bawl lai a. Biekin sung ngei a, khawvel mithmu a, pâ naw le ṭhen le ruolhai in khawlai a, invak ding le, inrui dinga an fielna hai hnawl a, Lâm tuol zâwl ngei a, Pathien inpâk a, hei lâm dâr dâr hmu hi chu, insîr a um naw in,pâ naw ni hi…… “A MAWI A NÎ̂Î̂”. Pâ taka hremhmuna fe nek chun, pâ naw taka vanram lut chu an hawi lem awm si a. Khawvel le a mawina pâr tlantu hai mithmu a, nuizat um’in inlang inla khawm, tâwpna ni a chun, an ni hai nêkin ei hlimin ei lawm lem ding a na. chu hunah chun inti pâ tak a, siemtu hrefu lo a, khawvel pâr tlan chun, hlawkna hrim a nei nawh; ti an hrietsuok chau ding a na. hunṭha le lawm um ei nei sung hin, thaw ro Lal sin hih thaw seng ei tiu. Kum tharin ieng am a hung hringsuok ding ti ei hriet si naw a. Ei ṭhatlai hun le hrat lai hun  hi, siemtu’n a dit si a. A hnunga insîr’in sawtna ieng khawm a nei awm si nawh a.

Ziektu: Pu L.Keivom, Inpui.com Columnist

Lalpa, rul ka nuom che, Ka nun le êng pûk chu.-Upa Ngama 

Saidan khaw mi Upa Ngama chun Lalpa thrang loa a hun a lo hmang ral tah po po chu a sui kir a, poiti le insîrin a awm a dom vong vong a. ‘Takchapa’ tia thrang khomin sekhon khat khom a kei kir thei ta nawh ti a hriet a,

Hun fe peihai, Lalpa loin,

Khaw lai am an tlung ta a ?

Kìr ruol loin muol an liem tah,

Hun la umhai iengtin am hmang ka ta?

tiin hla mawi le ropui takin kum 1945 khan a khêk suok a. Hi hla hi kum sawmruk nêka upa ni tah sien khom sak a la hlaw zing chauh khom ni loin, hnama ei dam khawsuoka, ei sakhuo khom ei la chel zing phot chun, a la ropui deu deu ding a nih.

A nih, mi tu khom Krista leh an intuok phaa an nuna thil hung tlung laia pakhat chu hun hlutzie le hun an lo hmangthai mei meihai kha zuk inpâma insîr ngawi ngawina lungril put a ni chu tie! Kong dang zawnga hril chun, hringnun tawizie dawnkhawl nachang an hung hriet a, thil thra thawna ding hun lawmum peka an um an lo hmang riral mei meihai kha an inpàm a, thil thra thaw dinga inhawmthawna lungril an hung put nghal hlak a nih. Pathien leh inzomna nei taphotin hun hlutzie le inpâmumzie an hriet chieng hlak. Chuleiin Upa Ngama khomin, “Lalpa rul ka nuom che, ka nun le êng pùk chu” tiin a khêk suok a nih. Isu intuokpuitu dang Zakai khomin, “Ngai ta, Lalpa, tuta inthok chu ka sum zâtve pasiehai sem ka ta, tu thil khom indik lo taka ka lakpek chun a lêt liin rul ka tih” a ti hrim a ni kha. Pa dung tawi le chèmbe ni sien khom Isu a’n tuokpui hnung khan chu a dung tawina hrimin thû a phur ta nawh.

Kan makpa Upa Ngama hming zuk sàm tâka chun lung hlui a sukleng vong vong a. Chuleiin, a chanchin tlawmte hang tar lang vak ei tih. Saidana kan in hmar tienga um, huon dai intrawm kan ni a. Pa zâng inkùl khauh, rawl thâm chât el, dumziel hè, chêr khen khon, fiemthu thiem le trongkam thiemna tieng chu ‘Ka pu tuk’ ti ang khopa a piengpui hrim a nih. Dier khom ama hi a kei sawt pawl tak niin ka hriet. Thuhril a thiemin a thu a hring a, mi sermon haw ve loa  ama awma inthoka suok thu tharlâm phu suok hlak mi a ni leiin sawt tak a hril khomin nghok tik a um thei nawh. Hmar Hla Suina ka buotsai lai a chanchin indon dinga ka pan hlak bakah ama ngeia ziek dinga ka phût angin kimchang takin a hung ziek a. Chu le kum 1960-70 bawr vela hrang hlui la damhai chanchin anni kut ngeia ka’n ziektirhai chu hnam ro hlu an nih ti hrein indoi takin tu chen hin ka la kol thra a. Hieng hla phuoktu, mi hmasahai laia hun hlutzie le pamhmaizie hlaa hril rawn tak chu Upa Ngama niin ka hriet.

Upa Ngama hin a hming tak nekin a nau lutir hming chawia ‘Singhleipa’ tia hriet le ko duot a hlaw lem a. Ama hi Watkin Roberts-in Senvona gospel meiser a hung sit lut kum 1910-a Taithu khuoa pieng le a hnunga a’n pèmna Parbung khuoa a naupang laia lekha inchuk a nih. Ziek le tiem dan a’n chuk hnungin sikul a chawlsan a. Parbunga a’n pèm hnungin kristienah a’n pek a, sienkhom sawt riel loin a tluksan a. Pipu dana thangsuo tumin bu le sa ineina ding tiin siel  a vai a. Hausak tumin Thanlon-ah dawr dam a siem a, sienkhom a thaw zom pei naw leiin Parbungah a kir nawk a. Butukhuonglawm dam thaw tharin, a thuneitu tak ‘Lawmlaisa’ an tia dam a thrang a, sùn le zàn zu inruiin a khawsa hlak a.

Kum 1939 khan a nauhai pathum le a nuhmei leh Pastor Thangler kutah baptisma an inchang a. Chu hnung kar khatah a naupa Singhlei, Taithua a puhai ina um chu thruoi dingin a fe a. Sunbu fak khopa Parbung tieng a hung kir chun lampuiah rawlin mi suol a nizie le Pathien ta a nizie a hung hril a, hlimna hril thei loa thuomin a um a, mitthli pumin Parbung a hung tlung a. Chu hnung chun a thil nuom zawng po po a hung inthlak danglam a, mi pieng thar a lo ni tah a nih. A kum nawk 1940-in hla a phuok tran a, KAN SIENGNA THIM LAL KULPUI ti chu a hla phuok hmasa tak a nih. Hi kum bok, patve hun laiin Hmarchamuolah a riek a. A hun liem tahai hmang loa a lo hmang ralhai chu a sui kir a, a’n pàm êm êm a,

Hun liem tah hnung chu a pâm an ta maw Lalpa!

I hmangaina leiin ko kîr thei ka ti’m?

‘Ko kîr thei lo e, ka nau, hun liem hnung chu’

tiin poi a tizie hlain a phuok a. Hi hlaa hin kha hmaa Diebol hmangruoa a lo thrang leia a’n sîrna thu le Pathienin a hung thlamuongna thu chieng takin ei hmu a. Chu hmangaitu ditsakna kut chu chel dingin thu an tiem tah hrim a nih.

            Thina thim hnuoia a’n thrung laia a lungrila ‘pielral khawfing hung chat’ chu hla chaua puong suok loin khaw hrang hrangah puong dar dingin a’n zin suok a. Trongtraia mi sukdam theina khom 1942 khan a chang a, sienkhom sawtnawte hnungah lakpekin a um nawk a. Kum 1943 chawhmain mang mak tak a nei a. Mi pahni hin kelchalte keiin a tuolpuka an hung thlung a hmu a. A hei indon chun, “Lalthangpain, ‘Kei hlak ka um ta naw ding a ni si a, hi kelchalte hi Singhleipain hung kol ta lem raw se, hang pe ro’ a ti a nih” tiin an hril a. A zan nawk chun a bauah hmul tam deu el a lo mawng a, inhmaw takin a hang pot leh a tam lem a hung mawng nawk pei a. A mang lawk ang hrim hin Pastor Thangngur (Lalthangpa) chu kum tawp December 20, 1943-ah a thi a, hla tienga a kalbi lo rem tah chu Ngama chun hung sunzomin, a baua inthokin hla tam tak a hung put suok hrim a nih.

            Kum 1944-45 khan Lungthulien ram Kawnpuiah a va’n bawk a. Ama ngeiin, “Hi kum hni bawka ka um sung hi hnuoi ka hluo kum sung po poa chu hi sunga ka sipna le ka lawmna hi a hma khom khan a hnung khomin a um ta naw hrim hrim a nih; vanchanglang khuo an ti ang pawl a nih. ‘I hnung tienga i umna hlui po poa khan i um nuomna lai takah um nawk thei la, khaw lai tak am um i nuom a?’ mi ti hai sien, ‘Kawnpui bawka khan um nawk ka nuom’ ting ka tih. Ka bawkte chu a dung hlam thum le kiuthle, a khang hlam hni le kiuthle, a lieng chu inji thinga ka khit de a ni a, a ropui naw hle a. A mi umpuipa a thra a, in ka hluo lai po poa chu in inhoi pakhatna a tling tak a nih” tiin a hril. Hi kum hin a nun hluihai sui kirin, hmang loa a lo khaw ralhai chu a ngaituo a, a’n pàm a,

            Hun fe peihai, Lalpa loin,

            Khaw lai am an tlung ta a ?

ti hla ropui tak hi a phuok hiel  a nih.

            Hi hlaa hin a hun sei lem a hmang ral hnung, a hun lèr tieng nia a hriet hnunga hringna thar amaa par anga hung vul chu lawma a hlim thu a hril laiin, hun liem ta hnung hmang loa a lo hmang ral mei meihai chu a’n pàm êm êm thu a hril bok a. A ‘nun le êng pùk’ chu thlarau thrangpuina zarin a hmun lia rul a nuom a, inhawmthawna lungrilin a sip a. Hieng ang lei hin rongbawlin hmun tinah a’n zin suok a, hla ropui tak taka thuomin a um pei bok a nih.

            Hi hla a phuok hin kum 35 mi chauh a la nih. Sienkhom, a hun sei lem a hmang zo hnung, a hun lèr tieng niin a ngai a, chu chu a hlaah chieng takin ei hmuh. Hieng hun laia India rama mihriem dam kum pangngai chu kum 30-35 vel a ni hrim a a nih. Tlangrama rimsi taka thosi, thrangthrâm le invot kara natna tinreng tlakbuok hnuoia kum tluona hling le hrâm bul insuolpuihai lem chu an hringnun a tawi zuol a. Khaw hrang hranga thlan muol hang fang inla, lungphuna an kum zat an ziekhai hi hang bi inla, kum 30- 40 inkara muol liem deu vong an lo nih. Chuleiin, a hun lèr tieng tlung taa a’n ngai hi thil awm hrim a nih.

Chu thu, ‘hun lèr tieng’ zuk hril tâka chun kum sawmnga deuthaw liem taa D.M.College-a ka kai laia English hla phuok thiem P.B.Shelley hla A Lament ti ka baihat ka zuk hriet suok chu tie! Shelley chu kum 30 chauh (1792-1822) a dam a, sienkhom English literature a hring sung chun a hming le a hniekhnung maksanhai hi bo ngai naw nih. Kum sawmthum a tling hma khomin a hun lèr tienga chuong a ni tah ti a hriet leiin,

O World! O Life! O Time!

On whose last step I climb,

Trembling at that where I had stood before;

When will return the glory of your prime?

No more-Oh, never more!

Out of the day and night

A joy has taken flight:

Fresh spring, and summer,and winter hoar

Move my faint heart with grief, but with delight

No more-Oh, never more!

tiin, lawmnain an trinsan tak thu dam, sik le sa inthlak danglam chun hlimna neka lungngaina an hung phur lem takzie dam le a vanglai hunhai chu an hung kir tah naw ding thu dam mawi le rienginko takin hlain a lo insam suok a ni khah. Hi hla hi ka tiem zatin ka lung a sukno naw thei nawh.

            Sienkhom, Upa Ngama-in a hun sei lem a hmang zo hnunga hun lèr tienga a nuna Krista a hung vul thu a hril ruok hi chu P.B Shelley hla anga sùnna thu ni loin lawmna thu le inhawmthawna thua sip a ni lem. A nun le êng pùk chu lawm taka a let lia rul dinga a’n tiemna chu Pathienin a don a, hi hla a phuok hnung hin kum 37 zetin a dam kum a la sukseipek a nih. Parbunga inthokin Rengkaiah a’n pèm a, Rengkaia inthokin Saidanah a’n pèm nawk a. Leilet thra a bengbel hnung chun fak le dawnah a hung phuisui ve ta a, lo sin thaw tienga inhmang loin a hun awl tam lem chu Kailamhnuoi le Kailamchung biel hrang hrangah thuhrila inzinin a hmang thei tah a nih. Chu ruol chun hla thra tak tak amaa inthokin a luong suok a, chuonghai chu voisun chena ei sak nghok thei lo hla an la ni zing. Hla a phuok tam tak hi a thu le thluk a ruola hung inlang an ni leiin, a phuoktu ni loin a ziek thlaktuah an ngai a, ama ngeiin, “Secretary-a thrangin kan ngai lem” tiin a hril.

            A rongbawlna a hlawtling vanglai takin, Lal Davida ang khan Phulpui khuoah ngalri phêngphet an ti angin nunghak lakah a tlu a, kohran phuorna chen a tuok pha a. Mani insukhlum hiel nuom khopin suolna tinreng khurah iemani chen lutin a’n tàl buoi a. Khanga inhawmthawa a hun sei lem hmang zoa inngai tah khan a kum tlawmzie suonlamin,

            Theina ieng khom ka nei nawh,

            Ka kum khomin a dai nawh;

            Hmingsietnahai tuor zo

            Hmel khom ka la put nawh;

            Ka phur a rik taluo, ka Lalpa!

tiin a key a thlak danglam nawk dai el a nih. Ringtu fel le suongum tak tak khom an sir inphet a, suol bawiah an tlu lut pha chun an hmel siet le hemna inkhumna dinga an dap hmasa tak chu suonlam a nih. Adam khomin Eden huona ama inhril hlîpna dinga hmangruo a dap hmasa tak chu suonlam a ni kha. A hming khom hi pangzatum ka ti tlat chu tie! 

            Hienga a khawsak hnung hin 1953 kristmas tuk khawfing chat ruolin a lungrilah harna khawfing a hung chat a, “Misuol dum tak a varna chu, Kalvari thisen hlu a nih” ti hla hin a kei tho nawk tah a nih. Har tharna hung dong zui peiin Kohran Upaa namnghetna khom February 7, 1971 khan a chang tah a nih. Ama hi pa huoisen le lêmderna nei lo, a tlak nawna khom ip dêr loa hlaa inzawt ngam a ni a, a hming a put indik khop el.

            Kan inhmu nuhnung tak chu kum 1981 kum bul khan a nih. Chuong lai chun Saudi Arabia-a kan um lai a nih. Kum 1980 kristmas hmangin Churachandpur-ah kan suok a, Sielmat PMS Bungalow-ah kan innghat a. Ka lekhabu buotsai ‘Hmar Hla Suina’ khom sut zo a ni tah leiin January 31, 1982 khan Sielmat Christian High School-ah chuong laia Manipur sorkara Minister (Agriculture) Pu Ngurdinglien chun a tlangzar a. Hi trum hin Tuithraphai Hmar khuo tina inthoka mi poimaw le challang chu an kim vong ti thei khopin an hung thra a. Upa Ngama khom phûr êm êmin a hung thrang ve a. Ka lekhabua hin Pastor Thangngur ti loa chu mi mala hmun hluo rawn tak a ni leiin a lawm a. “Ka thlan chunga lungdaw neka lungdaw poimaw lem le hlun lem ding i mi dawpek leiin hamthra ka’n ti takzet a, ka lawm bêk bêk a, Pathien hmingin lawmthu ka hril che. Lal ram ta ding le ei ram le hnam ta dinga thil nasa tak thaw pei dingin Pathienin vengin malsawmnan vur pei raw se che” tiin lawmthu le malsawmna thu a mi’n hlàn a. Kan inhmu nawk hma, November 22, 1982 khan muol a mi lo liemsan tah a nih.

            Sienkhom, hla thra tak tak a mi maksanpekhai leiin hnama ei dam khawsuok sung chu a hming le a hlutna rè ngai naw nih. A bula inthoka ei hla thur suok hi lungril taka sak a, kum thar phek ei phok trana inthoka mi tinin, “Lalpa rul ka nuom che, ka nun le êng pùk chu” tia ni tina a tak taka ei nun ngeia Lalpa thratna hi a lêt lia rul dinga hma ei lak seng chun, Gospel Centenary kum khel tieng hi kum vangnei le hlawk tawpkhawkah inchangtir ei tih. A lêt lia thil thra thawa Lalpa thratna rultu chunga chun Lalpan a tlawm takah a lêt rietin rul ngei a tih. Inchuklaihai khom, Lalpan thil thra thawna dinga hun hlu a pek tawl hi kum dang anga hmangthai mei mei loa Ama chawimawina le ropuina dinga a lêt lia rul tuma lekha an tiem lêt li an tiem phot chun, kum hmasa nekin a lêt liin hlawtling lem an tih. Chu nêka New Year Resolution thra lem le ropui lem chu um naw nih.

Ziektu: By L.Keivom 

My children don’t have a father, only a mother who is a  virgin!

-TOI (Cartoon)

Inrai versus naupai

“Ar that dan kong khat chauh a um nawh” ti angin nau pai dan khom hi kong khat chauh a lo ni nawh. Nuhmei-pasal inpawlnaa inthoka naupai hi eini trong chun ‘inrâi’ ei tih. Chuleiin, nau neinaa thi hrilna trongkam ‘raichea thi’ ti khom hi a hung pieng a nih. Hi hi mihriem ei hung insieng dan le pieng dan tak chu a nih.

            Kum sanghni vel liem tah khan thil dangdai tak, pasalin pawl si loa nuhmei pakhat nau pai ei hriet a. Ama chu nunghak thienglàm Mari a nih. Chuong anga naupai mak chu khawvel histawria rikawt um hmasa tak a nih. Nau inpaitirtu chu Thlarau Thienghlim a ni thu Baibulah ei hmuh. Mari hi Thlarau Thienghlim leh nupa nun chèna inrai a ni naw a, Thlarauin nau inpaitir dan danglam tak hmanga a’n paitir a nih. A nau hung pieng khom chu kristienhai chun ‘nau thienghlim’ ei ti a, chu chu Saptronga ‘holy/immaculate conception, virgin birth,’ an ti kawi nuoi hi a nih.

            Chuleiin, Hmar tronga Baibul inlet sin, tuta Delhi Version hung ni tah hi kan buoipui lai chun ei Baibul hmang hlak a, “nunghak thienghlim chu inrai a ta” (Mat 1:23) ti hi Pathien remruot dan leh inmila kan hriet naw leiin “nunghak  thienghlim chun nau pai a ta” tiin kan sie ta lem a. Baibul pumpui sut dinga ngun taka kan en nawk trumin ‘nunghak thienghlim’ ti hin ‘virgin’ ti a kawk bik chie naw leiin “nunghak thienglàm chun nau pai a ta” tiin, nuhmei-pasal inpawlna thrang loa Isu kha hung insieng le pieng a nizie tar lang thei dingin kan hung sie ta lem a nih. A san chu, ‘inrai’ ti le ‘nau pai’ ti hi thil thuhmun angin ngai hlak inla khom, theulawzi taka Isu insieng dan sui le hrilnaa chun an kawk chu hnuoi le van anga indanglam a nih. A hmasa hi Isu hung pieng ding thu Setan hril nuom dan ding tak ni mei a ta, a nuhnung ruok hi chu Pathien remruot dan ang taka thil hung tlung a nizie hrilna a nih. 

            Tu laia nau pai dan amanih, nau inpaitir dan danglam mi thiemhaiin an hung dap suok chu ‘in vitro fertilization’ (IVF) method an tih. Nuhmei le pasal chia thil hrik an lak suok a, chuonghai chu labawretawri-ah intuitirin an inopkeutir a, chu chu a paitu ding sulah an thun a, nuhmei-pasal inpawlna thrang dêr loin nau an inpaitir thei a nih. Mani nau pai hman naw khomin mi sul hawa inpaitir thei a nih. Chuong ang method chu hmanga November 28, 2008-a nau nuhmei nei Rajo Devi, Haryana mi chu kum 70-a upa a ni ta a, a pasal khom kum 72 mi a nih. Baibula Sari ti loa chu hi nu hi khawvel hrieta upat hnunga nau nei nuhmeihai laia chu a la upa tak a nih. Chu method chu Isu hung insieng le pieng thua khan Pathienin a lo hmang dai tah a nih. IVF method pangngai nêk daia changkang lem a nih ti ruok chu inhmai ruol a ni nawh. A ieng khom chu ni sien, ‘IVF’ method an hung hriet suoka inthok hin Thlarauin Mari kha nau a’n paitir ti thu, thil thei loa kha hmaa ngai hlak kha, thil thei a nizie chieng takin ei hriet tah a nih. Thil thei loa ei ngai tam tak hi ei hrietna le thiemna tlawm lei a nih.

            Thil mak dang, September 12, 2005-a India chanchinbu hrang hrangin an ripawt chu Scotland rama Roslin Institute-a an thil hmu suok, nuhmei le pasal chia inthok ni lo, nuhmei le nuhmei chia inthoka nau insiengtir thei dan thu a nih. Hi hi Saptrong chun ‘parthenogenesis’ an ti a, chu chu Grik tronga a umzie chu ‘nau thienghlim’ (virgin birth) tina tho a nih. Hi thil hi rannung chi inthla thei dan an ensinnaa inthoka an hmu suok a ni a, mihriema ruok chu an la ensin hri naw a, sienkhom thil thei a nih ti an hriet. Chuonga pasal thrang loa nuhmei le nuhmei an intodel thei ding a ni ta si chun a letlingin khawvel hi a’n thlak danglam ding a na, pasal le pasal inkara naute, pasal bokin a pai thei dan zong chu thil makmaw hung ni thei a tih.  Chu hun chu ei tlung phaa ei khawvel um dan ding chu suongtuo thiem a harsa a, ei bo map el a nih. Tuta inthoka kum sangkhat vela ruok chu thil mak a ni ta awm naw vei leh! 

Mihriem Naupa

            Judahai le kristienhai tukvera inthoka thil hung insiem dan, Genesis-a ei hmu dan chun, hnuoi le van le a sunga um thil hrang hranghai chu Pathienin “Um raw se” tia a’n umtir el a ni lai zingin, mihriem le rannunghai ruok chu a siema a siem a nih ti ei hmu a. Chuleiin, hringna thuok an thuok khum ngat mihriem lem hi chu ama angpuia siem a ni leiin a siem uluk hle a nih. Chu thuruk, thlarau mita hmutu Davida chun “mak tak le râpum taka siem” a ni thu a tlang insampui hrim a nih (Sam 139:14). Mihriem a siem dan makzie le ropuizie hi mihriemin hrietna le varna tienga hma ei sawn ang dungzui peiin ei la hung hriet zuol deu deu ding a na, ei hmu suok rawn po leh ei maktina khom a zuol pei ding a nih. Tu hin chu tlawmte chauh, zaa sawmkhat vel ei hriet suok phak trawk a, ei theina khom chu bak chu a hmang dan ei la hriet nawh. Zaa sawmnga vel ei hriet suok a, ei theina khom ei hmang thei pha chu ngaituona hmangin nuomna hmun hmunah ei la fe thei ding a nih.

            Pathienin ama angpuia a siem mihriem chungthuah “Um raw se” ti thu a hmang ve naw hi theulawzi inril tak niin an lang. Chuleiin, mihriem sandamna lampui a remruot khom “Um raw se” tia inumtir el loin, a thu tiem chu ama ngeiin mihriem taksa puta a hung hlen theina dingin mihriem insieng dan le pieng dan lampui chu hung hrawin, zaa za Pathien Naupa le Mihriem Naupa a ni kop theina dingin Thlarau Thienghlimin Mari chu a’n paitir a, nuhmei sunga inthokin mihriem taksa le nina po po neiin a hung pieng a nih. Chu nau pieng chun Pathien Naupa nina le Mihriem Naupa nina a nei kop naw chun Pathien sandamna prokram hi hlen thei a ni si nawh. Hi thil hi a mak êm leiin ringna mit le lungril mit ngot naw chun hmu chieng thei a ni nawh.

            Hi thu ei hril lai le inzom hin Hmar Christian Fellowship, Delhi-in kum 17 a tlingna champha September 4, 2005-a a lawm trum khan mipui insam ruol dinga HCFD Thuring (Statement of Faith) an buotsai le an mi’n sampui kha hang hril hai inla. Hi Thuring hi kha hmaa kohran tuoltroin mawl taka an lo buotsai, an trongkam hmang khom la songnawi deu el, en chet le siem thrat um loa kohran tinin ei hmang sawng pei a nih. Kha taka khan Isu Krista chu Pathien Naupa a nina ei pom thu a uma chu Mihriem Naupa a nina chu ei pom sa ve naw amani ding, a thrang ve tlat naw a nih. Kei chu hieng thila hin ka ti kher kher bok a, thuring an insam ruol lai khan ka bau ka phong ve naw hrim hrim a nih.

            Hi Thuring hi Baibul le inmila her rem ding chun siem thrat ngiel a ngai thu ka hril leiin kum 2006 khan siemphuisui rot a ni a. Hung bi chieng ding le siemphuisui dinga an mi fiel leiin Baibul inchuktirna le inmila ka hriet dan angin Thuring chu ka rem thra a, a kim nawna laia ka hriethai chu ka thol bit bok a. Chutaka chun thil dang iemani zat ka bel sa bakah Mihriem Naupa a nina khom ka zep sa a. Kum 2006-a inthok khan HCFD chun Thuring insam ruol a nei pha Mihriem Naupa a nina a pom thu hi a chuong ve tah a nih. Kohran dangin Mihriem Naupa a nina hi an la bân zing am ti ruok chu ka hriet phak nawh.

            Ei thupuia bok kir nawk inla. Hnuoia Isu Krista rongbawl dan chanchin ziektu mi pali- Matthai, Marka, Luka le Johan-hai chun uor nuom bik an nei seng a. Mathai chun Isu Krista chu Thuthlung hluia Judahai lal Messia hung ding hril lawka lo um ngei chu a nizie thu a uor hle a. Marka chun rongbawltu Siehlaw a nina a uor a. Luka chun Mihriem Naupa a nina a hril uor a, Johan chun Pathien Naupa a nizie a hril uor ve thung a nih.

Mathai ziek ei bi chieng chun, Judahai lal hung ding a ni ngeizie sukchiengna dingin Abrahama inthoka Mari pasal Josefa chen, pasal tienga Isu thlatu bulhai fimkhur takin a hung sui chet chet a. A tum tak chu Isu Krista kha Abraham thla, Juda hnama mi Davida thla fe peia inthoka hung pieng, Davida lalthrungphaa inthrung dinga ruot sa a ni thu sukchieng a nih.

            Ei hang bi thuk pei chun, Isu Krista hungna ding le sandamna sin a hlenna ding lampui chu siktan tumin Setanin a bei char char a, a siktan vàng váng chang a tam el. Chuong thilhai chu Genesis-a inthoka kros-a hnena changa a tho nawk ni chenin hmu ding a tam èm èm. Chuong laia pakhat chauh chu hang thlir ei tih. Davida thla fe peia inthoka Messia la hung ding thu hril lawk a ni lai zingin, pasal tienga Davida thla fe tung pei Jekonia (Jehoiachin tia an ko bok) chu Nebukadnezzar-in salah a man a, Babulon tieng a thruoi a. Mak tak elin, Jekonia le a thla peihai chu Davida lalthrungpha hluo thei lo dinga Pathienin Jeremia (22:30) hmanga trongsie a lo inphur ta sa an lo ni dai el!

Nau nei dêr naw ang elin,

Hi mipa hi inchik rawh:

Pa hmuingil lo ding a na,

A thlahai laia tu khom,

A hmuingil um naw ni a,

Davida lalthrungphaah,

Tu khom inthrung naw ni a,

Judai ram chungah tu khom,

Inlal ngai bok naw ni hai.

            Hi hi thil buoithlak tak chu a ni phot el. Sienkhom, Pathien thu ruot a ni tlat leiin inkhêl thei a ni bok si nawh. Thil inlumlet dan ei thlir pei chun, a chunga hrila um hi a hung indik thlap vong a nih. Babulon sala intang Juda lal Jehoiachin (Jekonia) huna inthoka Isu hung pieng chen khan, kum zaruk ding lai, Davida lalthrungpha hluotu lal tu khom an um ta nawh. Mihriem thila sut chun an mang thrak ti thei a nih. Mari pasal Josefa, Nazaret khuoa karpentar chu Davida thlaa inthoka sui chun Israel lal, Davida lalthrungpha hluotu ding a nih. Amiruokchu, ama khom kha trongsie phur Jekonia thla fe pei laia mi a ni leiin a hluo thei nawh. Chuleiin, Isu kha Josefa thisena inthoka insieng, a naupa ni sien chu, Davida lalthrungphaa thrung thei lo ding a nih.

Luka ruok chun huop zau takin, Isu chu “mi ngaia chu Josefa naupa a nih” (3:23) tia hril tranin a thlatuhai chu Mari chi zunga inthokin a sui a, mihriem po po intlan dinga hung, Mihriem Naupa a nizie sukchiengna dingin Davida thla a nina chu Davida le Bathseba naupahai laia pakhat Nathan fe thlengin a sui lut a, mi po po pa Adamah a sui tawp a. Hi thla hi Jekonia thlahai anga trongsie phur a ni ve naw leiin, Pathienin vantirko hmangin, “Tri naw, Mari, Pathien ditsak i nih. Ngai rawh, nau pai i ta, nau pasal nei i ta, a hmingah Isu i sak ding a nih. Ama chu mi ropui tak ning a ta, Chunghnungtak Naupa ting an tih. Lalpa Pathienin a thlatu Davida lalthrungpha chu pêng a ta, Jakob thlahai chungah chatuonin inlal a ta, a ramin kin ni nei naw nih” tiin Mari a hril a ni kha (Luka 1:30-33).

Hi hi Pathien thil rel dan inthukzie le makzie, Thlarau thilthawtheina hmanga, hril lawka a um ang thlapa Mari hmanga thu chu taksaa a hung inchangtir dan chu a lo nih. Hieng thil neu neu, ngaisak tlaka ei ngai nawhai hin umzie inthuk tak an lo nei a nih ti hre suok ding khopa Baibul thu hi ei bi pei phot chun, phêk tina hin ringna sukhrattu le suknghettu ding thu rangkachak, Pathien ropuizie le makzie hrilna, pai dan chi hrang hranga pai, a lo tam a nih.

Mi var, mihriemna hin chu,

A ngaituo suok zo thei naw ie,

Ka Sandamtu i thuruk hi.

Ziektu: Pu L.Keivom, Inpui.com columnist

A hming Maka, Remruottu Lalpa,

Chatuon Pa, Rem Lal ropui a nih;

A ramin kin ni nei ngai naw nih,

Zau pei a tih chatuon chen khomin.

- 

            Hmar tronga Baibul inlet ka trana inthokin kha hmaa Baibul thu hre vieua ka lo inngai thlâk rok hlak chu ka lo hriet nawzie le ka hriet ka tihai khom ka lo hriet chieng nawzie ni tinin ka hmu suok thar a. Chuonghai laia pakhat chu REMRUOTTU MAK  (Wonderful Counsellor), kha hmaa le tu chen khoma MAKA, REMRUOTTU ei ti hlak hi a nih.

            An hril dan chun, kum 1611-a sut King James Version, mi tam takin Baibul lai po poa Baibul bik rieua an ngai nuom hiel, sienkhom hang bi chieng ruok chun inlet suol a tama tam um ve tho hi, khawla suttuhaiin Isai 9:6 hi proofreading an thaw laiin a fainal thawtu laia mi insukfel pakhatin WONDERFUL COUNSELLOR ti thu mal pahni inkara hin comma (,) a lo thai zau a, hming pakhat ding kha hming aiawtu pahnih, WONDERFUL le COUNSELLOR tiin a hung insuo a, chu chu einin MAKA, REMRUOTTU tiin ei lo inlet ve nawk ta pei hi a nih. Hi ‘comma’  chikte hin hi lai châng hi nasa taka a suk-coma leiin ei thu le hla a phier buoi nasa hle a, chu lung ina inthoka intâl suok ngaina chu ei hriet ta naw ni takin a’n lang tah.

            Hi hi ei ni chauh khom ei lo ni nawh. Hnam hmasawn lem le var lema ei ngaihai lai khom hin thluok hmang sa loa a ringa ring tlut el dinga lungril an intŭna hmuna chu thing chu thing a nih ti an ring lai zingin lung khom hi thing a nih an ti chun an ring sa ve tlut el hlak a nih. Chuong ang bokin khêl khom tak, tak khom khêlah an pom el. Sakhaw lekhabua ei ngai le pom ta hnung, ei rǐl rem zawnga thu le hla châng ei lo inngaizawngpui tahai lem chu thlaraua ei dong nia ei bel tlat leiin, ieng anga indik lo khom ni sien, a’n dik nawna ei hmu suok thei mei mei nawh. Sakhuo hi iemani kong zawnga chu mit sukdeltu hmangruo thra tak a ni hrim a nih. Mit inkal naran chu daktor thiemin an ăt a, an siem thra thei a, sakhuoa mit inkalna ruok chu siem thrat mei mei ruol a ni nawh.

            Chuong laia entirna pakhat chu THU CHU TISAA hung inchang thu, ei bau inkhap zat deuthawa ei săm tum hi a nih. Tisa chu thlarau kaltu a na, tisa chun Pathien a suklawm thei naw a, tisa thil le Pathien thil chu inkal le indo zing nia inchuktir si a, mihriem sandamna dinga Pathien remruot THU chu tisaa inchangtira ei hril chun Setan duthusam tak ning a ta, iengtin am sandam ni tang ei ta? THU chu TISAA hung inchang lo ni ta ngat sien chu, tu khom sandam ding ei um nawh ti hi zing nisa hung suok ding nêka chieng lem a nih. Ei thiempuhai hlei hlei hi, hi thua hin khêl hril rawn tak an ni leiin, THU chu TISAA a hung inchang thu an hril zat hin hremhmun thuo khat peiah lut ding ni hai sien, thuo tama inril le lumah inper vong an tih ti hi hril buoi khom a ngai nawh.

            Ieng leia chu ngirhmuna chun ei intàng am a na? A donna tawi tak chu: Ei Baibul hmanga thu mi lo inbatuhai lei a ni ka ring. Indik tawpkhawk dinga thil ei ngai tah hrim hrim chu a’n dik le  a’n dik naw ngaituo loa mawl ring ringot hi ringtu inti tam tak chǐng dan a ni tlangpuiin ka hriet. Chuong ang khawtlang chu ransa le inhneng zinga la khawsa a ni nuom khop el. Amiruokchu, mihriem hi chuong ang dinga Pathienin a siem chu ni kher naw nih. Ni nêk hmanin, mihriem chu thutak, thu inthup le inril, varna thu hmu thei dinga Pathienin ama angpuia a siem a ni lem. Mihriem hi thilhring le rannung hai anga siem ni loin, mihriem chu taksa put si, sienkhom ‘Mihring’ dinga siem a nih.

            Chuong chu ni siin, hnam var le changkanga ei ngaihai khomin ieng dinga thu mal pahnih, WONDERFUL COUNSELLOR inkara comma an lo sie suol chu an hriet suokna dingin kum za tel an ngai am a na? A suol a nih ti an hriet hnungin iengtin am an thaw a?  A hmasa takin, Pathien thu chu sunhang khat khom bo lo dinga inziritirna chu a umzie tak hre chieng si loa an changchawi tlut leiin, chuonga ngai pawl chun, Baibula thu mal tin hi sukbo thieng loin an ngai a, a ni ang angin an pom tlut el a nih. Pathien thu chu sunhang khat khom bo lo ding a ni lai zingin, a thu ziek thlatuhai le ziek sawng peituhai chu mihriem vong an ni leiin an trong bau le kut hmanga an ziek thlaknaah ieng zat hiel am an suksuol ding ti hi an ngaituo ngai naw a, tam tak chun ngaituo nachang khom an hriet bok nawh. Chu chu ringna hrat le hrat naw thil ni loin mawl thil lei a nih.

A buoithlakna tak chu, Pathien thu ziek suol le inlet suolhai chu an thaw suol a nih ti an hriet hnung khomin an lo hmang innâl tah leiin KJV le a sangawi zawnpuihai chun thlak an la tum chuong naw hi a nih. Chuong ang mi chu eini rawi lai khom ei um ve tho. Ei lo hriet bel tah chu ieng anga Pathien thu lo khom ni sien Pathien thu indik tak anga pom zing tumna lungril ei nei ve tlat niin a’n lang. Chu huonga chun THU, TISAA hung inchang, Kristmas ei hmangna san tak khom hi a tla tlat a nih. THU chu Pathien kaltu ‘tisa’ thilah ei bauin inchangtir inla khom, ei lungrila a umzie ni awma ei ngai chu indika ei hriet leiin, Belzibub thukhawchang ding ni awm tak chu Pathien thuah ei bel tlut el a nih. Pathien chu thlarau a ni a, chu thlarau le ei inzom thei dan um sun chu Ama Pathien ngei chu mihriem taksa puta hung inlang a nih. Kong danga hril chun, Pathien remruot chu thu chu ‘tisaa’ inchangtir ni loin thu chu taksa, mihriem taksa puta hung inchangtir phot a, chu mihriem taksa put ngei chu hmanga mihriem sandamna dinga a remruot mak tak el chu hlen suok a nih. Chuleiin, a hlentu hminga khom Remruottu Mak, Pathien Hrat, Chatuon Pa, Remna Lal (Isai 9:6) tiin a pieng hma kum zasari neka tam hielah Pathienin Isai bauah a lo puong lawk a nih.

Thuthlung Hlui hi chik taka ei bi chun, bu tin deuthawa hin Pathienin Bethlehem le Kalvari fe thlenga mihriem sandamna ding a la hung hlen suok ding thu hi an hriet der loin Israelhai khan a umzie ding an lo thaw lawk ngat ngat a nih. Chu Pathien remruot chu mihriem hmanga fe thleng ding a ni si leiin, Sandamtu hung piengna dinga a chi-hnam thlang chu Davida thla hung peia inthoka suok ding chu a nih. Chu Sandamtu hung pieng ding chu Pathien Naupa ni si, sienkhom mihriem dana chu Davida naupa tia ko a ni bok ding a nih. Chu lampui chu khar tum le siktan tumin sun le zan Setanin thrang a lak a, a hung piengna ding hnamhai chu ieng lai khomin Pathien lakah a’n heltir ngat ngat el a nih. Remruottu Mak ni naw sienla lem chu, mihriem hisapna ringot chun a tum hi hang hlen suok ngaina hrim um naw nih.

Chuong sa khom chun, Davida thlaa mi, lal hung inthla sawng peihai laia pakhat Jekonia le a thla peihai chu Davida lalthrungpha hluo thei lo dinga siemin an um der el! Matthaiin (1:11-12) mihriem inthla dan anga Isu thlatuhai chanchin a suina ei en chun Jekonia hming ei hmu a. Chu pa thlaa mi hung inthla sawng peia a tawpna chu Josefa a na, ama chu Mari pasal a nih. Josefa hi Isu Krista thlatu anga ngai ni si, sienkhom a nauin ama chi pai si lo a ni leiin Luka chun Isu chu “mi ngaia chu Josefa naupa a nih” tiin a ziek kher a nih (3:23)

Judahai chanchin ei sui kir chun, Isu hung pieng hma kum zaruk sung khan Davida lalthrungphaa inthrung pakhat khom an um ta nawh. A san chu hi hi a nih. Babulon lalin Juda lal sala a thruoi kha a hming chu Jekonia (Jehoiachin tia ko bok ) a na, ama chu a thlahai Davida lalthrungphaa thrung um lo dinga Jeremia hmanga Pathienin trongsie a’n phur ta sa a nih. Hieng hin a lo hril a nih (Jer 22:24-30):

24 “Nang Jehoiachin* hi Juda lal Jehoiakim naupa, ka suoi namna kutsebi khom ni la, ka kuta inthokin ka phawi suok ding che a nih. 25 That dinga zongtu che, Babulon lal Nebukadnezzar kuta le Kaldaihai kuta ngei chun pe suok ka ti che. 26 I piengna ni lo ram dangah nang le i nu, a hringtu che hi pei suok ka ta, chu taka chun thîng in tih. 27 Kir nawk in châk êm êmna rama chun kir nawk ta naw ti niu” tiin.

28 Hi Jehoiachin hi bêl koi dar,

Mi hnawl hnung a ni naw maw?

Ama le a thlahai chu,

An hriet ngai lo rama chun,

Ieng leia an pei suok am?

29 Aw ram, aw ram, aw ram,

LALPA thu hi lo ngai rawh!

30 Hieng hin LALPA chun a hril:

Nau nei dêr naw ang elin,

Hi mipa hi inchik rawh:

Pa hmuingîl lo ding a na,

A thlahai laia mi tu khom,

A hmuingîl um naw ni a,

Davida lalthrungphaah,

Tu khom inthrung naw ni a,

Judai ram chungah tu khom,

Inlal ngai bok naw ni hai,”

Tiin LALPA chun a puong.

Chuong chu a ni leiin, Krista Isu kha Josefa naupa chu ni sien, Davida lalthrungphaa inthrung thei lo dinga trongsie inphur ta sa ni vêng a tih. Chuleiin, Luka ve thung chun (3:23-38) Isu thlatuhai a suinaah a nu Mari tieng sungkuo suiin, Nathan fe thlengin Davida-ah a lut a, chu thlaa chun trongsephur Jekonia (Jehoiachin) kha a um ta naw leiin trongsephur sungkuo a ni ta nawh. Chuleiin, Pathienin a vantirko hmangin, “Tri naw, Mari, Pathien ngaisak i nih. Ngai rawh, nau pai i ta, nau pasal nei i ta, a hmingah Isu i sak ding a nih. Ama chu mi ropui tak ning a ta, Chunghnungtak Naupa ting an tih. Lalpa Pathienin a thlatu Davida lalthrungpha chu peng a ta, Jakob thlahai chungah chatuonin inlal a ta, a ramin kin ni nei naw nih” tiin a hril a ni kha.

Chuong anga Pathienin rem a hung ruot leiin Isu chu Pathien Naupa, Mihriem naupa, Davida naupa, Josefa naupa, Mari naupa, hrillawkna thu po po khom sukkimtu a hung ni tah a nih. Pathien thil rel dan hi a makin hriet phak ruol lo a na, Remruottu Mak a lo tling takzet a nih.

By  L.Thanmawia Pajamte

Lakhipur (proper Hmarkhawlien khuo) hi a hma chun Cachar Land Corporation, Company le Vai mimal ram a nih. Kum 1918 lai khan Hmarmi tlawmte in Vengsak lai hmun neiin an um tana. Kum 1920-in IBP Mission in Hmunpui dingin a buotsaia. Pu H.K. Dohnuna in a hung dela. Chutaka inthok chun mi hung pung tanin “Mission Veng” ti a ko a hung nia, voisun chen hin ko a la nih. Chu hmun chu Cachar Land Corporationa inthawka kum tin bigha khat ah ` 4/- in June 21, 1921 khan lak a nih. (Lamthuom poimaw & Zawllung October, 2012 by L. Keivom).

Chu Mission ram le Field chu Sorkarah Mission ta a nina lekha feltak a lo umnaw ni awm a na. Khawtlang le a deltu Kohran hai chun “Mission Field” tiin an ko zing a. Kum 1968 in ICI Kohran a hung buoi a, a hung koi khan pawl pakhat chu “ICI” ti le “ICI Ziding” tiin an inkova, tuta EFCI Kohran hi a nih.

Khanga Kohran a hung buoi khan hmun le hmang sukfel a tul leiin Kum 1968 khan Zamindar P.C Gupta kuta inthawkin ICI Ziding chun an chawk fela, Patta No. 3, Dag No.27,28 tia feltaka record a nih. Kum 1972 a ICI buoi a hung re khan ICI Ziding ti chu EFCI tia hung thlak a nih. Kohran ram khawm chu Kum 1974 khan EFCI hminga transfer (Nam jari) thaw a nih. Chulaia Attorney Power neitu Rev. Lalthankhum Sinate hminga record a nih.

Field sir saktieng(East) a chun Mission School a um a (Tuhin Sorkar Hmar LP School a um tah, Chu School bawl ding khawm chun EFCI Kohran ah hnina siema bawl a nih.) Field simtieng panga chun Mission House a uma. Rev Taisen, Rev. Lalchanlien le Rev. Ramlien Pudaite haiin an hluo. Fiel tlak tieng (West) a chun Pastor Quarter 1961 khan bawl a nia, voisun ni chen hin hluo a ni zing. Chu sira chun EFCI Biekin bawl a nih.

Hienga a sir tuoka Mission/Kohran School, Quarter le Biekin a um, lei hin a laia inkhelna zawl chite um chu Kohran rama ngai a lo ni hlak leiin inkhelna pawimaw a um zat le Field Develop ding a ni chun EFCI Kohran ah hnina siem a ni hlak. EFCI Kohran in a ta angin ngai sien khawm Khawtlangin Field an neinaw leiin an chului ngam bik nawh. Thangthar hai lem chun Khawtlang ta angin an ngai ta hiela, a awm tho.

Kohranin hma a hung sawn peia, Development scheme dang dang hung thaw a nuom ta lei le khawtlang le inhrietthiem nawna a hung um ta dep dep leiin Kum 2006 khan EFCI Kohran thuoitu hai, VC le Val Upa haiin ziek ngeiin an sukfela. Kum nga khawtlangin la hmanga, chu sung chun VC le Val Upa haiin Field thalem le puitling lem lo zawng dinga ti a nih. Hi hun hi Kum 2011 khan a tawp ta leiin EFCI D/S Rev. John Lalnunmawiin VC ah remind a hang thaw a. Hi inremna hi khawtlangin an pawm nawk ta naw leiin buoina chu a zuol ta a nih. Hi lai ram thua hin khawtlang chu voitam an inthunga, sienkhawm a ram neitu EFCI Kohran chu Ko an ni ngai nawh. Ko ni hlak hai sien, thataka inbiein, Field chu kohranin lekha an nei bawk leiin chang hai sien, field thalem le puitling lem ngaituo nisien, Kohran khawm theitawpin thang hung la ve hai sien ti nisien ti chu Kohran in a nuom thei hle. Sienkhawm a tha zawnga lampui dap an um ngainaw leiin Kohran chun pawi a ti thei hle a nih.

EFCI Biekin le Pastor Quarter lam, kum 51 zet lo hraw ta na chu vantlangin inkhel nan an hung zau pei leiin lamhraw ding a um tanaw a. Mani ram ah Biekin lam takngiel khawm neita lo chu tiin lam origin, Field sir zar zar chu JCB in pil invur tir a nih. Inhawi le hlim taka kohranin an hrawna chu khawtlangin December, 19,2012 khan huot hmang vong dingin thu an passed ta a.

Chu thu chu EFCI Kohranin an lo hriet phing chun ram lekha hai khawm la enfela, a tul a ni chun kohranin an kut hnung khawm nisien huot hmang el ding le, Kristmas hlim taka ei la hmang theina dingin la huot hmang naw hram dingin VC le Val Upa hai kuomah lekha le bauvin hnina siem a ni a, Lalpa Isu hminga ngen an nih. Sienkhawm an pawm chuong nawh.

Chuongchun December, 19, 2012, zing 6:30 in vantlang an pungkhawm a. EFCI Kohran thuoitu hai chu an hma ah ngirin Pathien hminga la sukse lo hram dinga ngen an nih. Sienkhawm val upa hai, HSA thuoitu hai le Club thuoitu haiin Kohran ngenna chu bengah rawngah ngai lovin Biekin lam chu an cho siet ta a, Biekin inhuonna dai khawm chu an suksiet ta a nih.

Thil maktak pakhat chu heinga Pathien biekin lam meu le an huonna dai sukse dinga an rel an rel lai hin Hmarkhawlien khawsunga Kohran pawl dang dang Pastor le Upa hai Local member hai chu a tawng an um nawh a, an fuitu ah an thang lema. A suksietna a khawm hin Pastor le Upa dam an thanga. Ban phar pakhat khawm an um nawh. Hi hin EFCI Kohran chu khawtlangin an er bik hrim hrim mani aw ti thei a nih.

Orissa State, Pakistan, Indonesia le Nigeria ramah Kristien hai an suk duda a, an biekin hai an suksiet peka, mak ei ti hle a. Hmarkhawlien a hin a siper a tlung ve tah a nih. Gospel centernary hmang hnung Hmar civilized world ni hnungah History danglam le mak a voikhatna chu Hmarkhawlien a hin a tlungta a nih. Hi thil thanaw hin Hmarkhawlien ah thang tam nghawng ta mei a tih.

Hi thil a tlung ding zana chun EFCI Kohran hai chu Biekin ah fekhawm a nia. EFCI Kohran In 110 neka tam, a sevel khawdanga EFCI Kohran hai chu incha khawma thang lo lak dim a nih ti chu hril tlang a nia. Chuonga thaw a ni chun buoina suok ngei a ta, mithi ruong le hliem chu Field a inthok inzawn dawk zut zut a ni ding ti chu a chiengsa a ni leiin Krista dung thulin, Beramte a hmul vawtu hma a to zinga a um anga to el dingin Kohran hotu haiin mipui chu an ngen a. Chuongchun Kohran mipui hai chu hotu hai thu angin an tova. Khawtlangin an Biekin lam le dai an suksiet hai chu lungna le mitthli pumin an thlir ta lem a nih.

Pu L.Keivom 

Silent night, holy night
All is calm, all is bright
Round yon Virgin Mother and Child
Holy Infant so tender and mild
Sleep in heavenly peace
-Joseph Mohr 

Kristmas zùn

            Kristmas a hung hnai a, a boruokin a mi hang chim meu hin chu, ngai aw loin iemani ei ti deu hul chu tie! A hang hril suok dan khom ka thiem nawh. Khawsik hung intran dinga a mi thram lai ang deuh hi niin ka hriet. Thaw thrang leia ngaia nei el thei khom a ni nawh. Upat leia rè el chi khom a ni bok nawh. Upat hnunga a mi thram dan le naupang laia a mi thram dan a danglam mei mei chauh a nih. Naupang lai chun hma tieng beiseinain a mi thruoi a, thingtlanga lem chu kristmas phaa silfen thar ei inbel ding chu hril lo, belpuia khu hlut hluta sa an suong, a’n hnikzie khom ei hriet tah hlak chu hang kil nawk ei chak a, hung tlung vat vat sien ei ta, December thla bula inthok lem chun ei thrung khom a’n dèn ta nawh.

Upat hnung ruok chun kristmas sikserin a mi thram pha leh nun hlui chul hnung ramah ngaituona a’n zin kuol a, kumpui sul tamin hnawl anga a lo chim nel tahai chu ruom dapa ru trawl indar phung el, Pathien mi hmang zawlnei Ezekiel rawl hrea an hung tho sung sung ang el khan, an hung tho nawk a, lung hlui a’n leng vong vong a, “Bethlehem ngaina chul hnung, par ang a vul nawk tah’ ti hla hi naah a’n bu veng veng zing el a nih.

Tuta hi lekha ka ziek lai ngei khom hin ka ngaituona chu Pherzawl tlangah a kir nghal a. Lal pieng hun chawimawi dinga tlang tina tlangsam par vul chuk el dam, fai tak le nal taka kristmas hmuok dinga Changpui tuikhur amanih Maukot tuikhur amania puonsawp le insila fiel bikhai leh kan fe lai dam, kan khaw sak Zopuia siel keia kan fe lai dam, hall cheimawina ding sawlfang thing puta kan fe lai dam, ruoithrenaa hmang ding hnachang hna kan lak lai dam, zan tieng in tin deuthawah kristmas bei ding suka an inthumron tlut tlut lai ri dam, meipuia sep ding thing bul trawl kan fom lai dam, zanah Independent Church biek in kotzawla meipui intrek uoi uoi hnuoia,

Hlimna ni ropui chu a var,

Zan tieng ni kawlrawnah a liem;

Hnuoi Bethlehem dai re a nghak,

A hming chu Lal Immanuel

tia khuongpui, khuongte le seki leh inrem bak baka Van Lal nau kan inawi lai dam le thil dang dang ka mitthlaah an hung invir let vut vut a nih. Kristmas hi a tleipuitu ta ding chun ieng kong zawng khomin tleipui tham a lo tling hrim a nih. Tu lai lem chu, a hmang suol ei ti ti hi an hmang dan kia inrui nasa lem lem an ni nuom khop el.

            A khulang khangna dinga thu mal zali chuong zet ka zuk ziek hi ka thu ziek tum chu a la ni nawh. Amiruokchu, kristmas zùnpuiah ei hang lut hin chu tonhriet hang phor suok ding a tam taluo a, ei inring naw karin nun hlui chângin a mi lo phi awk nawk el hlak a nih. Hi bung le chang hi pumpel thei mol lo thil a nih. Manipura chenghai lem chun kristmas hi kum za khom ei la hmang tling nawa chu ei ram le hnam le mi mal nunah inpui hluotu a ni ta a, ei Sikpui Kut ropui tak khom a hlân dèr a, a chim pil a, hnam hmangaina kutin khawpuia umhaiin ei kei tho nawk leia hung hring nawk mei mei a nih. Kristmas hi a huhang a na a, sumdawnghai ta ding lem chun an sekibusuok dawbol a ni ringot el. Krista ringnawtu Marwarihai tak tak hi kristmas sor nasatu an nih.

Bethlehem tlang

            Chuong chu a ni laiin, Bethlehem khawzawl ruok chu Arab-hai le Judahai inkara pawlitiks boruok leiin, iemani chena inthok khan ni danga a khuo keng lo hiel khopa tam  khawvel hmun hrang hranga inthoka biekzin le kristmas hmanga hung an phul el hlak ang khan, abikin kum 2006 hnung lem chun a lùn zo ta nawh. Bethlehem hi Palestinhai ram hluo bik sunga um a ni a, a mihriem chenghai khom Arab kristien deu vong an nih. Israel le Palestinhaiin inremna thuthlung an siem angin Palestinhai chun an ram hluo chin sungah sorkar hrang an siem a. Sienkhom anni sunga mi kukal le turu pawlin Israelhai lakah buoina siem an thrul chuong naw leiin, Israel sorkar chun Palestina le an ramri zar zarah kul bang insang tak a bawl huol vong a, Bethlehem chu kul bang puo tieng, Arabhai enkolna hnuoiah a lo um tah a nih. Remna le muongna a um nawna hmun chu ieng anga hmun thienghlim le inhoi khom ni sien mi an ngampa naw leiin damten rausan a tuok hlak a nih. Manipur khomin chu lampui chu a hraw mek a nih. A poi khop el.

            Bethlehem hi Jerusalema inthoka km riet vela hla ni sien khom tu ruok hin chu a karah mi an cheng rawn tak leiin khaw khat ang vong an ni tah. A hming hmasa chu Ephrath ti a nih.  Jakob nuhmei  Rachelin hi hmun an tlung hin a nau tlum tak Benjamin a nei a, a thipui a, a thlan khom Bethlehem tlung hma hin lam sirah a la um zing. September 28, 1993 Thawleni chawhnung tienga Bethlehem tlang ka kai hmain hi thlân hmuna hin minit sawm ka chawl a, mani thlatuhai thlan hmun sir ang elin lung a’n leng rum rum thei chu tie!

Bethlehem hi Jerusalem neka feet zakhata inzo lem, a sim sak nghaa muol inzam thla diei, hmun mawi tak a nih. A puollawi lienna tak le hmun thengthaw tak chu Shepherds’ Fields an ti a, chuong lai hmun chu beram tlatna hmuna an nei hlak a nih. Hieng lai hmun hi Davida thlatu laia mi, nawchizor Rahabi naupa Boaza le Ruthi an intongna hmun kha a nih. Ruthi chun Obeda a hring a, Obeda chun Jesai, Jesai chun Davida. Hieng lai hmuna hin Davida chun a tleirawl laiin beram a veng hlak a, a beram hung se tum sakeibaknei le savom dam a that a, an ran sehai khom an baua inthokin a’n chù thlak hlak a nih. Filistinhai mi hrat khawkheng Goliatha khom kha hieng laia a beram vengna virvom bok hi hmangin a nih a deng thluk bul chuh. Chuong a tonhriethai chu hmangin, a hung upat hnungin,

            Mi vengtu Berampu chu,

Ka Lalpa a ni leiin,

Tlasam ngai hrim hrim naw ning

tiin hla ropui takin a khek suok a ni kha.

            Chuong lai hmun bok chu a nih beram vengtu danghai kuoma Lalpa ropuina hung inlang a, vantirkoin chatuon thuthlung, mi tin ta dinga chanchin thra lawmum, mihriem sansuokna ding thu a hung puongna le van zaipawl hung chim thla huk a, hlapawl ropui an hung remna hmun kha. Kristmas a hung hnai pha pha leh chu Bethlehem dai re, vanmihai zai hung vawrna hmun chun lungril le ngaituona a hîp a, chu hmuna chun kristien po poin lungrilah sun le zan umni ei kham hlak a nih. Zaipuhai lunglai a run a,

            Berampuhai ram truonna,

            Serafimhan zai an vawrna chu

            Ka Lal piengna i lo nih.

            Aw angelhai chun hung sak non nawk sien,

            Bethlehem dai hmun khawsawta ka leng lai hin,

            An rimawi le an thawmhai chu,

            Ka lungrilah kumkhuoin cham raw se.

            Aw van angelhai hla sak ri chun,

            Bethlehem dai a nghor vel ie,

            An lawm hla ri zam velhai chun..

ti le hla tam tak el chu ei khawvel hmun tina inthokin a hung far thla truk truk a, chuong hlahai chu kristmas huna mi’n awitu tak an nih.

Silent Night

            Chuong laia hla ropui pakhat chu German tronga Joseph Mohr phuok ‘Stille Nacht! Hidige Nacht!’ ti, Saptronga Silent Night! Holy Night!  tia an inlet hi a nih. A phuok hun le a phuok dan chanchin hi hril dan hrang hrang um sien, a chanchin tlangpui nia an hril chu ngainuom a um kher el. Chu chu a tawi thei ang takin hang hril ei tih. Kum 1815 khan Europe ram chokbuoitu Napoleon an man hnungin Europe-a thruoitu lien po po chu Vienna-ah inkhawmpui neiin Europe ram um dan ding an rel a, chu taka an thuthlung zam chu Treaty of Vienna Convention ti a nih. Chu taka inthok chun Europe-ah iemani chen inremna le muongna a hung um nawk a, kum tam kristmas hmang dukdak thei loa umhai chun kristmas hmang dingin an insingsa nawk thei tah a nih

Amiruokchu, Napoleon-in Europe ram a chil sop hrep lai, mani in lum khom nghak thei loa an um sung khan tu khom kristmas hmang mumal thei an um naw bakah an piano le rimawi hmangruohai a lo nghar-ĕk zo a, mazu ruol huongtauin lawmsa tiin, ha tât ngei nan an hmang a, an lo rèt siet nasa hle a. A thra sunhai khom a ri a lo dul zo ta a, her thrat lo chun hmang theia muol a um ta nawh.

Chuong ang ngirhmuna an um lai chun, kum 1818 khan chuong laia Prussia an ti, tuta Austria ti hung ni tah rama um, Alp tlangrama Salzburg vadung kama khaw chikte Oberndorf khomin urlawk zana Mass an nei ding chu khùn taka hmang tumin an inbuotsai a. Chu hmuna an Assistant Pastor Joseph Mohr, kum 26 mi chun an kohrana an pianist le zirtirtu Franz Gruber chu zingtieng a va pan a, kum 1816-a a hla phuok, a thluk la siem lo chu zan inkhawma perkhuong le sak thei dinga a thluk siempui dingin a fiel a. An piano hlak a ripertu ding a kum nawka hung chauh ding a ni leiin perkhuong chauh naw chu rimawi tum ding an nei nawh. Chuong lai chun biek ina hla sakna dinga perkhuong hmang chu thil porche anga an ngai a nih. Kan tleirawl lai chen khom khan ei kohran thruoituhai ngaidan chu chuong ang tho chu a la nih. December 31, 1957 zana kum hlui inthlàna dinga hla ka phuok, perkhuong le Rengkai ICI biek ina kan sak kha biek ina hla sakna dinga perkhuong ei lak lut ka hriet hmasakna tak a nih.

Joseph Mohr le Frank Gruber khomin an biek in St. Nicholas Church-ah December 24, 1818 zan inkhawmah perkhuong le remin zing tienga hla thluk an siem chu an sak a. Chu hla chu khawvelin hla a hriet lar pawl tak laia mi ‘Silent Night! Holy Night!’ ti hi a nih. An sak trum hin inkhawmhai lungril a tawk hle a, tam tak mitthli a tla niin an hril. Amiruokchu, a hnungin a chanchin hriet zui a ni el ta naw a, kristmas nawk khomin an sak zui ta naw khom a ni el thei. Vangnei thlak takin a phuoktu Mohr chun kum 1820 khan a kawpi thra takin a lo siem a, a ziekna phek mong hnuoi voi tieng chun a phuoktuah ama hming, chang tieng monga chun a thluk siemtuah Franz Gruber hming, a phuok kumah 1816 tiin a ziek a. Chu ziek chu um naw sien, hi hla hi kumkhuoa bo song ding a nih. Chuonga a riral song chu Lalpan a phal si nawh.

Kum 1825 khan an biek in St. Nicholas Church chu riper thra vong dingin mi pakhat Carl Mauracher an ruoi a. Chuong lai chun Joseph Mohr chu hmun dangah a lo inson ta a. Carl Mauracher-in piano siena hmun a riper lai chun hla ziek hi a hmu a, an ram Tyrol tlanga Ziller phaia chun a chawi a. Tyrol mihai hi rimawi tieng inhnik mi an ni leiin hi hla hi an sak lar a, “Tyrolian folk carol” ti hming a put pha hiel a. Prussia lal King Friedrick Wilhelm IV-in hi hla hi carol hlaa a dit tak a ni leiin Berlin-a Director of Royal Court Choir chun a phuoktu sui suok dingin hma a lak a, 1854 khan Salzburg bielah an sui lut a, a phuoktuhai hi an hmu suok a, chawimawina an pek bok niin an hril. Amiruokchu, hi hla hi a hung inlar phing leh a phuoktu nia inhril le insâl an hung pung a. A thluk siemtu Franz Gruber ngei khom chuonghai laia pakhat chu a nih. Amiruokchu, kum 1997 khan Salzburg Museum chun a tira a Manuscript le a phuoktu indik tak an hmu suok a, Joseph Mohr chu a hla phuoktu, Franz Gruber chu a thluk siemtu an nih ti chu sel ruol loin an namdet tah a nih.

            Saptronga inlet hmasatu tak chu John Freeman Young (1820-1885) a na, chu taka inthok chun chappui kang vanglai ang elin British ramper khawvel hmun tinah a hung in dar tah a nih. Trong tenau tiem sa loin, hi hla hi trong 300 chuongin an inlet ta a, inlet pei zing bok an tih. Mizo tronga inlettu chu thu thiema hmingthang Upa Lalmama a ni a, Mizorama mingo misawnari hmasahai khom khan a saptronga mi nêk hmanin a thra lem an ti hiel a nih. Hieng ang khopa kristien ram le ram naw khom fang dar nasa hla hi vang ngot a tih. Lalpan ama chawimawitu hmangruohai chu inkhel loin a chawimawi hlak hrim a nih. Ring tlak Pathien a ni takmeuh si a.

            Ngun takin hi hla hi hang ngaithla veng veng la, a thu le a thluka hin hang cheng la, i hriet naw karin Bethlehem dai re, berampuhai ram truonna, van inthieng em em, arasi paw tuor hnuoia serafimhai zai remna hmuna chun thruoi tlung nghal a ti che.  Chu hmun chu a nih lungruol taka tlang hrang hranga cheng Zohnathlakhai kum tina ngaituona le thlaraua ei lengkhawmna hlak chu. Chu hmun fienriel, van hmangaina tuipui a hung fawn lutna, van le hnuoi inzoma an infawpna, lawmna thli a hrang del delna hmuna lungril le thlaraua chengtu chun kristmas ruoi tak tak a kil hlak a nih. Hla phuoktu Patea khomin chu chu thaw dingin a mi fiel zing a nih:

            Awleh, tu hin fe veng ei tiu,

            Hmun khawsawt tieng chu pan pei ei tiu.

            Chawhnung ni nêm, September 28, 1993-a van mihai zai remna hmun phai rai inhoi tak el ka fang ni chun Pherzawl khaw hlui fang ang elin lung hlui an leng vong vong a. Khuong-seki leh rem a, insim hmer hmer a Thangngur hla phuok ‘Zan ril laia Berampu’ ti hla saka kan insawi del del lai chu mitthlaah chieng em emin a hung inlang a. Pang lum hlata ei inhnengpuihai rim dam hnârah a hung inzăm lut chem chem a. Khanga lungkima Bethlehem muol fanga Lal pieng hun ei inawi lai kha a taka fang nêk daiin a mawi lemin a lo inhoi lem  chieng khop el.

            Tiemtu po po kristmas chibai vochuom ka buk a, in kristmas ruoi seng khom taksa le thlarauah khuoizu angin thlum raw se. 

DECLARATION-CUM-RESOLUTION

December 22, 2012 hin Conference Hall, National Institute Social Defence (NISD), West Block-1, Wing -7, RK Puram, New Delhi-ah Hmar Welfare Association (DHWA), Hmar Christian Fellowship, Delhi (HCFD) le Hmar Students' Association (HSA, Jt. Hqrs., Delhi) le nu-le-pa fe khawmin ICI 63rd General Assembly Resolution No.5 hi ngun taka ngaituo a ni a. A hnuoia ang hin kan rel:

Sam 133 le Marka 16:15 thupuia neia Delhi le a sevela khawsa Hmar tawng hmanghaiin pawl ti bik um loa lungruol taka Pathien lunginsietna le thuoinaa HCFD hnuoia chawibiek inkhawm le hmun hran hrana rawng kan bawlna hi sukchai thei le sukdar thei Hmar tawng hmang kohran pawl dang hrim hrimin HCFD remtipuina thang loa, a hrana chawibiek inkhawm nei kan remti naw a, tu khawmin inthuruolna le inpumkhatna sukbahla le suksie thei thil hung thaw lo dingin kan rêl.

Hi chungthu le inzawma May 02, 2007-a MTNL Hall, Sector-VI, RK Puram-a Delhi Hmar Mipui inkhawmna a ban phara pawl indin lo dinga thupuong a lo siem tah ang dungzuiin, pawl dang hminga Hmar tawng hmanghai lai a hrana inkhawm um lo dingin kan rel.

Hi thurel hi inzaa Independent Church of India 63rd General Assembly Resolution No. 5 sut dingin ICI Moderator kuomah ziek ngeia ngenna siem tha kan tih. Kohran dang dang khawin hi thutlukna hi Pathien hminga mi’n za pek dinga ngen ni sien tha kan tih.

HCFD, DHWA le HSA Jt. Hqrs., Delhi a inthuoi dan le kal an chawi pei dan ding thlir le ngaituo tlang dingin Delhi khawpui le a sevela Hmar tawng hmang, Biek-in khata inlawi po pohai inhmukhawmna January 26, 2013 khin nei ni sien tha kan tih. Hmalatu dingin HCFD, DHWA, le HSA a Chairman/President le Secretary hai kan ruot.

Sd/-
Upa (Dr.) LALSIEMLIEN PULAMTE
Chairman, HCFD

Sd/-
C.THANT KHOBUNG
Chairman, DHWA

Sd/-
JAMES PUSING SANATE
President, HSA, Jt Hqtrs., Delhi

GUWAHATI HMAR CHRISTIAN FELLOWSHIP

(An Interdenominational Evangelical Fellowship)

CBCNEI Compound, Pan Bazar, Guwahati ‐ 781001

To

The Moderator/Secretary,

Independent Church of India

Sielmat, Churachandpur, Manipur

Subject: Delhi khawpuia ICI binga inkhawmna siem chungchang

Lalrama thawpui dittakhai,

Ei Lalpa Isu hming thienghlimin chibai kan bûk cheu.

Independent Church of India, 63^rd General Assembly thurel Resolution No 5. dungzuiin, ‘Delhi sungah remchang hmasa taka kohran pawl bik hminga inkhawmna nei ta dinga thurel’ chanchin hi kan lo hriet ve a. Hmar Christian Fellowship, Delhi hi Delhi khawpuia Hmar tawng hmang haiin tawng thu leia Delhi Mizo Inkhawm huna inkhawm ngai lo tam tak an hung um ta leiin kohran pawl bik um lovin Delhi Hmar Christian Fellowship tiin kum 1988 khan indin a lo ni a. Hmar hnam tlawmte mi hnung hnawta ei um zing lai Delhi ah kohran pawl bik um lova kum 25 deu thaw inthuruol tak le hrat taka rawngbawlin hma an lo lak khu mitinin ei lawmpui chau ni lovin, nasa nawk zuola hma an sawn theina dinga tawngtaipui tuhai ei nih a. Chuonglai zinga hi thu hung inher suok hin nasa takin lungril a thawng a, pawi kan tih a. Eini laia inremna le inhmangaina, inditsak tuona khawpui lien haia a um hi a suksiet nasa hle ding niin kan hriet a, pawi kan ti takzet a nih. Chuleiin, lungril takin a hnuoia thuhai khu ngun nawk zuola Hnam pumpui huoma Pathien ram thlira in hung ngaituo thar ngei Pathien hmingin kan hung ngen cheu:

• Hmar Christian Leaders’ Forum huoihawtna hnuoia Hmar Gospel Centenary 2010 declaration No. 5 na khan hieng ang hin kohran thuoitu popo haiin ziek le sign a nih a. “Khawpui hmun hran hrana Hmar Christian Fellowship indin theia a um hi lawmum kan tih. Hmun danga khawm indin theia a um pei tha ti a nih. Hmar Christian Fellowship hai le Kohran pui amani pawlpui amani hai inkara iengkim inkalna um lova Networking system tha tak neia rawngbawl le sinthaw tlangna ei nei thei peina dinga hma lak a pawimaw”. Hi declaration hi inza taka, Pathien ram le Hnam pumpui huopa hma ei lak nawk zuol kan nuom.

• Hnam pumpui huopa Hmar Christian Fellowship, Delhi in rawngbawlna an nei khu nasa takin Pathienin mal a sawm a, sorkar sinthawtuhai le inchuklai haiin an tangkai pui emem a. Pathien rama nasa nawk zuola hma an lak theina dingin pawl tinin a hma neka nasa lema ei thangpui nuom a um hle.

• Kohran inthena tam taluo leia khawtin ah indaidanna um hi ei hnam tadinga ei thangmaw bawk a ni leiin, khawpui lien lem haia lungruol tak le inthuruol taka rong ei bawl tlangna le inkhawm kawpna hi keidar lova siem hrat lem dingin hma la thar nawk lem inla.

• Khawpui haiah Hmar kohran pakhatin ‘kohran pawl hminga’ inkhawmna ei nei a ni chun a kakhawk ding hi thil ditum lo le ngai ngam lo khawp a ni ding a nih. Pawl tinin inkhawmna a hranin India ram khawpui haiah hung nei ve tum ngei an ta. Ei lim ding chu ngun taka ei ngaituo chun ‘Setan lawmzawng tak – inthedarna le innghir innghona’ a hung ni ta ding a nih.

• Hlapawl sak khawp um lo KTP, rongbawl thei taktak khawp lo pawl kohran hung suok a ta. Chu inthena lungril chun HSA, HYA, Welfare Society hai chen a hung nghawr nawk ding a ni leiin, Pathien hminga hi thu hi a thei hram chun keikir nawk dingin kan ngen takmeu cheu a nih.

• Thangthar kohran hung inthang duong pei dinghai lai, inhmangaina le inlainatna chi the nawk sau sau inla. Chuchu thangthar kuoma ei ‘thilpek’ (gift) ropui tak a ni kan ring tlat bawk.

• Khawpui lien haia project pawl tinin an neihai hi kan lawmpui zing lai, Pathien hminga inlawi khawmna ‘Fellowship’ tha tak ei nei hi tluong taka a fe pei hi ei duthusam a ni ngei kan ring tlat bawk a.

• Pathien thuoina zarin tuhin khawpui hieng Delhi, Pune, Mumbai, Chennai, Bengalaru, Ahmednagar, Silchar le Guwahati hai ah Pathien thuoina zar lieu lieu in HCF/HWS hai ei nei a. Naupang tete haiin anni le anni in enkawlin theitawpin Thlarau rama an hrat theina dingin hma an lak hram hram hai hi, pawl chi le lungril tukhawma ‘tu’ lova tawngtaina leh ei sana, hma ei lak seng kan nuom takmeu a nih.

• Hieng khawpui kohran haia pawl binga hmun zu suot nek hmanin kohran lien deu hai hin Pathien hminga Pastor dam deputation a in tir hi mi tamtak lungril le beiseina khawm anih

Chuleiin, ICI hotu dittakhai kuomah hi ngenna tlawm tak kan hung siem hi, ei hnam le ei ram chauh ni lovin Pathien ram a lien lema thlirin (larger context) a thei hram chun, lunginsiet taka mi keikir pek nawk dingin Pathien hmingin kan hung ngen cheu a nih.

Lalrama in thawpui

(Rev. Dr. H M Songate)

Chairman

(Dr. Chawngrolien Chonzik)

Secretary

Copy to: RPC- NE I, EFCI, EAC, PCI Vongzawl Presbytery, Hmar Fellowships at Indian Cities