Live music-a Pathian fakna hla sak kan uar chho leh ta a, ngaihthlak a nuam thei khawp mai. Amaherawhchu, zaia rawngbawlna pawimawh lutuk mai kan neih thinah hian, ngaithlatuten an hriat that theih loh, music ring em em, hlasatu aw hriat theih bawk si loh, ngaithlatute’n beng hup chawn chawn ngaia, kan tih palh thin hian, fak hla hmanga Pathian thuchah kan puan chhuah tur kha ngaithlatu mipuiten an hre thei ta thin lo va, hei hi ngaihtuah a ngai a ni. Engtinnge ni ta ang le? Mite tan, fakna rimawi aiin bengchheng mai a ang thin riau i ti ve lo maw? Kan zai a tawp ruala, an bula mite an han hrilh ru a, “a hahdamthlak huai mai ,thereng vuakthlak ang huai a ni” an lo tih sap thin chuan, Pathian a ropui ber lo palh mai ang tih a hlauhawm tlat thin a ni. Heti zawng hian, Pathian fak nana LIVE MUSIC ti thintute leh SOUND lam khawihtute hian ngaihtuahna hmang tlang ta ila, kan rawngbawlna hi a hlu zual sawt thei ang em?
1. SOUND : Biak In tina sound lam khawihtute hi KTP te kan ni tlangpui a. Miin zaia rawngbawlna an rawn neih lai hian Sound track ring lutuka play vak palh hi a awl em em thin a ni. Lung tha lo leh battery hmanga thaw mai mai tawhte an inkhawm ve thin sia, a zaitu aw, zawi leh lutuka volume pek palh theih a ni bawk a. He thil pahnih a lo thlen palh hian kan rawngbawlna hi ngaithlatute tan bengchheng em em leh thuchah awmlo a lo ni palh thei thuai mai a. Sound buaipuitute hian fimkhur takin tihpalh awm lo turin i inveng tha ang u. Pathian Biak Inah hian a theih phei chuan tan hma, sound operator thutna-a kan thut chiah hian kan rawngbawlna hi mite ti chiai miah lova kan hlen chhuah theih nan Pathian hnenah inhlan hmasa thin ta ila. Sound buaipui hi Pathian rawngbawlna pawimawh lutuk a ni tih hi kan thinlungah hian rik nawntir reng thin ila a va tha dawn em. Zai turte an din tawh hnua mike kal lo, an han kik pawha la kal mai lovah te hian kohhran mipui kan phawkleka, hnung lam kan hawi vak vaka, sound enkawltuin thil dang alo tih palh daih changte a lo awm a, hei hi setanan kan Pathian biak inkhawm min tihchiaina hmanruaah a hmang palh mai ang tih a hlauhawm tlat a ni. Han ngaihtuah chiang ve mah teh u, setana hian kaninkhawm tihbuaina hmanruaa hman theih tur hi a zawng reng thin a nia.
2. LIVE MUSIC : Aw le, kan thupuiah aw. Biak In, Kohhran Hall, etc-ah te Live music-in Pathian fakna hla sak hi kan uar leh ta hle a, a lawmawm khawp mai. Live music hi ngaithlatute tan, hmuhnawm leh ngaihnawm a ni khawp a, ngaithlatute nun a chawm em em a, Pathian pawh a lawm ngei hi ka ring thin a ni. Mahse…tih palh a lo awm leh tlat thin a, A RING LUTUK, inkhawm hruaituin “A music, a ring tha bawk a, a hla sak kan hre thei lova, mahse Pathian fak nana tih a nih chuan Pathianin engkim a hre vek e” tih nachang a hriat loh phei chuan, setana’n inkhawm tihchiaina remchangah a lo hmang palh mai ang tih a hlauhawm em em a ni, i ngaihtuah tlang teh ang u.
Zai dawna guiter herh mil paha, perh chhin vak vak te hi a mawi lova, zahawm deuhvin, zawi deuh a tih theih ani ang ti ru. Tin, Drum hi Biak In chhungah phei chuan, khawng chhin khawng chin lo thei ta ila, zahawm takin a hunah vaw ta mai ila, a that inring ve em? A tha ang ti ru! Hetia kan han tih chhin vel hian mipui an lo phawklek tawh thin a, hnung lama pavalai hawkdak deuh ho phei chuan an ring an fan uak uak a, an mawng an kan uk uk tawh mai thin si a. Ni e, Live music ngata fak hla kan han sak hi chuan Pathian pawh hi a ropui zual bik thinin a hriat a, Guiter in han lek chhuak sap sap atang hian mipui chuan thinlung inhawng takin phur em emin, thei thur tui tak ei chak em em ei dawna chil a put zawi zawih ang hian kan lo nghakhlel em em tawh thin a mahse, pawi em em thin chu a ring lutuk leh tlat thin hi a ni. Hawh u, kan Pathian hi a zahawm si a, zahawm takin, Pathian fakna hla, kan sak hriat theih ngei turin, live music kan tih leh hmasak ber atangin, i ti tan ang u hmiang aw.
Courtesy: Palai Weekly, EFCI Shillong Newsletter
Post a Comment
Comments not related to the news or article may be deleted.