Hnamro Tling: Hai Re Hai 4!

By Joseph Joute, Freelance journalist

Kum iemani chena inthawka hnam tin laia Hmar love song le hnam hla mawi tak taka mi runtu, Lalsanglien Zote – Hai Re Hai series Music Video Album – chun hma a la sawn pei a. Hai Re hai 1 le 2 lem kha chu thenkhatin khawvar zak zaka an lampui hlahai an nih a. Lalsanglien Zote le Mary Jone hai rawl lem kha chu tamtakin ei ngaizawng kha an na, thilum lai po pova hlutak Hmangaina thu zaia an chawi kha tukhawma ei ngai nghawk naw chu ni takin an lang!

Gospel Music le hlain North East India ei run mek laia hnam hla le saihlaa ei unau hnam danghai lo run ve mektu chu Hai Re Hai hi niin ka hriet. Chun, Hai Re Hai music album series thatna pakhat chu, ei hnam ro, thu le hla, pi-pu nun, custom, tradition le culture kawng tamtakah a humhalin a chawimawi niin ka hriet leiin a hlutna hi danglam bik rieun ka hriet a nih.

Ka khuol zin – Bangkok - hung tlung ni sawtnawtein Hai Re Hai 4 promotional banner lien kuoua intar Rengkai kawtthler lai ka hmu a. 2011 kuma ka sangpa Lalsanglien-in a mi hung pan a, album an buotsai thu a mi hung hril kha ka hriet suok a. An lo puitling nawk an ta maw, ka ti lungril a.

Ni 2 hnungah kan inah a hung a, “U pa, Hai Re Hai 4 kan zo tah a. Mass hmaa release kan tum a, nang bawkin mi lo preview pek la ka nuom a nih,” a hung ti a. Chawp le chila an lo zofel chu chawp le chilin ka hang enpui ve nghal a. Kum khat sung zet zawt an lo buoipui tah, tha le zung, sum le pai, hun le ni tamtak an lo sengna, hmuntin ramtin an fangkuolna ra chu Hnam Ro a tlingin ka hriet.

A Nina: Hai Re Hai 4 hi Hmar hla ngawt 15 khum khawm a nih a, eini laia ding chun Music Video Album hla tamna tak, changtu tamna tak, producer, musician, cameramen, editor le artistes tamna tak a la ni awm!

Hmar music video album hla 15 um hi k la hriet meuh nawh a. Gospel music video album Ms Nemi Tuolor siem Kalvari kha ka preview a, hla 15 a um a, anachu tribal tawng hran hran 10 umna a nih a, Hmar hla 3 a thang a. Hmar hla hlir hlak hla 15 umna music video album chu tuta Hai Re Hai 4 char hi niin ka la hriet!

A music hai khawm hi eini laia thiem pawla ei hriet James Rochullo dam, Aizawla inlar tak Kima dam, Burma tienga inthawka ei hrietlar Thawnga (YZTP) le mi dang dang an nih a. Camera khawm eini laia inlar tak tak PVS Videography, Zolunthang Zote dam, Kaia Zote, Mung Neihsial, Bereka Intoate, Lalditsang le Amos Cable, Sakawrdai hai chen dam an nih a. Thiemna chi tamtak funkhawm a nih.

Editing hi Uptown Cable, Darngawn Computers le George Neihsial le mi dang dang an nih bawk a.

Studio ringawt khawm a hran hran Zonun Records, Aizawl, DohDoh Records, Bible Hill, Rengkai, Vision Recording Studion, Rengkai Road le a dang dang an ni a. A that dan a hran seng a nih.

Host Artistes hi nuhmei an tam hle a, Hai Re Hai series-a chu an tamnatak la ning a tih. Mary Jone, Zothangsung Zote, Carolyn Biakthansangi, Lallawmzuali Khiangte, Catherine Ralsun hai bakah saktieng ram Myanmar hlasakthiem, Hmar nunghak ang hlawla hmeltha, zei le nal, Lalpanliani (Pantei) single hla pahni a um bawk a.

Pantei hlahai lem hi chu “Ka D Sakhmelmawite” ti le “Tap lai ka bang thei nawh” ti Pu Vella Hmar phuok ve ve an ni a. Pantei hlasak thiem el bakah, video camera tha tizawng tak a lo ni bawk leh. Setting hote nisien la khawm, Miley Cyruz a ang thula, a chang leh upa met Shania Twain a ang thul bawk. Acting le nina tinrengah chu Pantei original kha a ni a, album a sukmawi hlein ka hriet!

Director hi eini laia hla leng lawng direction thiem pawl tak JB Taite (John Banyan) le Gabriel Neitham an ni tlangpui a, insit a um naw hle.

A Hlahai: Thil dang dang neka tha ka ti chu, a sunga um hla an remkhawm dan hi a nih. A hmasataka mi “Lengi kan Rawh” ti hlaa ei pi-pu huna inthawka ei hnam hlapui hai tamtak music mawi em ema an hang rem khawma, Hmarkhawlien Cultural Troupe han mawi em ema ei hnam lam hai an hang inentir hi hnam ro hlu tak nin ka hriet a. Ei culture promote na hmangruo tha tak a ni nghal bawk. “Our custom, Our Identity” ti ang hrimin, a hla thu thenkhat hlu ka ti em em chu; 

“Pheivawr sieu sieu, chawnbawn vai mawi ri’n vangkhuo a nghawr vel; 

Ruolthar nun khaw nuomna Sikpui;

Chinlai lenruol zaleng an mawi sawrthlapui eng riei hnuoiah!”

ti hla le lam mawi tak tak ei hang pholang hi ei hnam ro promote-na chi khat niin ka hriet a. Hieng ang digital document ei nei hi ei vangnei hle a, a hlu hle a nih!

Pu Timothy Zote (Timothy Zole tiin an zieka chu, Zote a nih) hlaphuok Aw Kan Hmarram ti hla le casts han tulai deuva an hang rem-play lem hin chu Green Day hai le Hard Ray ang vel thoa zei khawm ei lo um a ni hi tie, ka ti a. Chun, thangthar hai hi Hmar tawng lam le ziek kawngah nasataka Hmasawnna ding ei nei ei ti lai zingin, hnam dang “Ka first lettal” ti dam “I lub you” tia thingbul tlan huola lamhai hla ei ngai nuom em em tho hai laka chu ei tawng lam hi a fie a, a fel bik em em a. Hla mi ding renga Pathienin a mi lo siem ni awm reng ei nih!

Amiruokchu, thangthar na na na chu, “Hmangaina” tina dingah “Hmangeina” ti dam, “Ditsak bik rieu” ti dingah “Ditsak biek rieu” an ti nawk ang lawi si! “Lenruol zaleng an mawi” ti dingah “Lenrul zaleng an moi” dam, “Vangkhuo a nghawr vel” ti dinga, “Vangkhu a nghawr vel” ti dam hi chu Hmar ni naw chun hriet naw awm reng an na. Hmar nunghak tlangval nisi chun, Hmar tawng indik taka lam le ziek thiem tumin, thanghluihai dam rawn pei inla chu tuta nek hin hma sawn ei tih!

Chuong sa sa khawm chun Lalsanglien Zote tumruna hi tulai thangthar huna ding chun, tluk-lo-rim an nawm a nih! Pathien khawmin ei thei tawk bak a mi phut naw ang bawk hin, ram le hnam chawisang le sukphuisuina ding hin chu ei thei tawk bak chu tukhawma an mi phut nawh a. Ei thei tawk ei thaw hi a hluin a ropui hle a nih!

Conclusion: Hai Re Hai 4 chen siem thei dinga tlangval lai taka ka sangpa a hang um hi ram le hnam an vawi takzet a nih ti a chiengin ka hriet leiin, chu tukvera chun ram le hnam mipui khawmin lo thlir ve inla, Hai Re Hai 4 series music video album hlutna hi hmu thel naw manih ti hi a nih ka khar nuom dan chu.

Tulai technology a changkang ta a, thangthar peihai ta ding lem chun thil awmsam te te thaw theina ding dam, ei hlahai mawi em em, changkang em em si, pi-pu nun le ei culture-tradition vawnghimna le chawilarna ni bawk si thil haiah khawm, tuta neka changkang lem le tha lema thaw theina ding lampui a hung um pei ding a nih ti hrein, thang le thar peihai khawmin chu standard chu ei hnawtphak ve pei theina dinga thang lak hi a tul hle a nih ti hre bawk inla, ei hlawkpui pei ngei ka beisei.

Taksa khawpna dinga bawngsa/arsa ser khat inchawka, ni khat khawm daih lo nek khan chu, lungril le thlarau chawmna hmangruo pakhat Hla Rimawi 15 zet umna hi Rs. 200 pei khawmin inchaw la, ni khat chauh ring naw ti nih! 

Hme an hnik naw chun bufak an hnik naw ang bawkin, hringnunah hin Thu le Hla (hme) a hlimum tak tak thei nawh. Chu hlimna pe theitu che chu Hla Rimawi a ni a, chu chu Hai Re Hai 4 hi a nih! 

Rengkai, Bible Hill, Dec. 11, 2012