Zawngin a Mongkhawn hmu loin a ruol Mongkhawn a Nuisaw

By Pu Zarzolien Keivom, Regular Contributor

Ei thupui khi mani nina hre fu loa mi thrat nawna hril ching hlakhai hrilnain upahai chun an lo hmang hlak. Ei Lalpa Isu hi khawvela a hung lai khom khan hi thu tlukpui char hi hmangin Farisaihai le Lekha ziektuhai kawknain “Iengtiziea mani mita thingtum um chu ngaimaw si loa I unau mita thil hlek um chu i hmu am a na” tiin a lo hril bok (Mathai 7:3). Pathien thuin kumza lai a lo chenchil tah tulai kohranhai hi ei Lalpa Isu hungin mi hang enfie sien, kohran thruoitu le membarhai lai hin mani mongkhawn hmu si loa ei ringtu chanpuihai mongkhawn chau hmua nuisaw ching hlak iengzat chie am um ei ti aw ti hi ngaituo tham tak niin an lang.

Mivar le inrila ngai le thlaraua sipa ei ngaihai lai khom hin mani mongkhawn hmu zat zat thei hi chu kutpar thlieka tiem khop khom ei um dim chu aw! Lekha inchukhaiin an sierkop thiem thei naw thu an hril hi ka hriet tawng hlak a, chu neka mi tinin ei thil thiem thei naw zawng tak chu mani mongkhawn hmu hi ni lem seng dingin ring a um. Mani felna le thratna chau hmu thei, chongkor mit nei ei tam lei tak ku hih ni ta veng a tih, kohran thilah ni leh, hnam thilah ni leh, hieng lawm lawma pawl phun ei hrat el ku hi ti dingin a um chu tie. Hlepruk theina ding hmunah ei um naw leia ei hlepruk ve naw lei el khom ku hin Pathien lawmzawng thaw ei ni bik chuong der le, ei sinthawna le ei ngirhmunin lo zir ve ta ngat sien chu, thlarau mi nia inngai tam tak hai hi a hlep rawn rawn khom ei ni ve el thei a ni aw! Chuong ang bokin Pathien kohran intihai lai khom hin mani thrangna kohran thrat nawna hmu thei bar loa kohran danghai thrat nawna le baksamna hmu thei vieu hi ei tam ring a um. Ieng dang nekin mani mongkhawn hmu hi chu an tak ma ma chu a ni hih.

Pathien meuin ka lungril ang put mi David, Jesai naupa ka hmu suok tah, ama chun ka ditzawng taphot chu thawng a tih, tia a lo hril meu khom khan Pathien ditzawng taphot chu a thaw vong bik chuong naw niin a’n lang. 2 Samuel 11 ei hang tiem a, a ho zawng le a pangzat um zawnga ngai lem chun tiem inring khom ei ngam naw a, hmulthi a suktho uor el a nih. A sipai haiin ral doa an buoi mup mup laia ama a lal tak chu Jerusalemah ngai muong muta umin, zantieng ni nemah a in chungzawlah lungngam charin an vak vela, nuhmei pakhat tui insil lai a zuk hmu phut chun hmel thra a ti hle chu ni naw nim, tu am a nih ti zong suok dingin mi a tir ta nghal a, Suol thaw dinga ieng dinga lal David chu an hmaw bek bek el am ni tang a ti le aw! A mi tir hlak chun chieng em em elin Eliam naunu Bethsheba, Hit mi a sipai Uria nuhmei a nih tiin Davida chu a hril a. Ngaisak chi an naw chu ti el nekin ral rama Uria um chu remchanga lain mi chu a zun thruoitir a a lo zalpuia, a in tieng a kir nawk ta a. Nuhmei chu a hung inrai ta a, nau a pai thu chu David kuomah mi a’n hriltir ta a. Davida chun a suol thupna dingin Uria chu ral hmatawnga siein a that tah a nih. Mihriem mit hi a chak zawng le a ditzawng thilhai hin a sukdel tlat hlak leiin a sie le a thra ngaituo nachang a hriet naw a, tum khom a tum sin ngai naw a niin a’n lang.

David khom kha Bethsheba hmel thratna khan a mit a suk del tlat leiin Pathien dit naw zawng a thaw ding a nih ti hrim a ngaituo thei ta naw a, tuol chen a la that thei ding a ni ti khom ngaituona chang a hriet thei ta naw ni takin a’n lang. Mita ei hmu le naa ei hriet hai hin suol dinga thlemnah mi thruoi lutin mani mongkhawn tak ngiel khom ei hmu thei ta ngai naw a nih. 2 Samuel 12 ei tiem chun Davida hin a mongkhawn reng a hmu naw thu ei hmuh. Zawlnei Nathan hmangin David kuomah tekhi thu Pathienin a’n hriltir a. Khaw pakhata hin mi pahni an um a, pakhat chu mi hausa a na, pakhat dang ruok chu mi pasie a na, mi hausa pa chun beram ruol le bawng ruol a hau em em a, mi rethei ruok chun beram la chikte a vai a, a fak le a dawn ang ang chu an trawmpui a, a angsungah a pom in, a nau ang hielin a cheibawl a. Chun, mi hausa chun mikhuol a neia, a beram ruol le a bawng ruol laia mi chu thata thlaithleng siempek nekin mi rethei beram latuoi chu a lakpek a, a thatpek a tiin. Davida chun ama chan chin zawlneiin a hril a nih ti reng a hriet thiem thei chuong der nawh. Nasa taka lungsenin, Lalpa hringna sal hielin chu thil thawtu chu thi tlak a nizie le hieng thil hi a thaw lei le lunginsietna a nei naw leiin a beram chu a let liin a rul ding a ni thu chu Nathan a hril a nih. Nathanin David kuomah “Chu pa chu nang hi i nih” tia a hril khan a mongkhawn lo sazie a hmu thei chau a nih.

Kohran thruoitu le hnam thruoituhai, Pathienin a zawlnei tu am a nih hung tir ta ngat sien Lal David nek hin ei chan a thra bik ngut dim chu maw ti dam hi ngaituoum tak chu a nih. Nuhmei uire lai tak an hung mana Isu kuoma an hung thruoi trum khom khan suol nei lo loin deng hmasa raw se a hang ti khan a hotu lien taka inthokin a dot dotin to trokin an trin diel diel el a ni kha. Ei kohran chanpuihai rorel dan inlai tawka ei ngai naw leia ruol ding fiela pawl hran ei hang phun chot chot el dam hi chu ei Pathien thu le chu a’n hme naw hulhuol niin an lang. A thilthaw dan hrim hi, thi tlak a nih ti a mi ro ei rel khumhai dam hi zawlnei Nathan hung tho nawkin ei tlak nawna hai mi hung phorlang pek ve sien chu, David nek hman khan ei hmai a mawk lem ring a um.

Filipi 2:3 ah ei hmu angin,” Mani tranghma siel taka iengkhom thaw loin tu khomin inngaitlawm takin mani nekin mi dang thra lemah ngai raw seh. Mani hmakhuo chau ngai loin mi dang thratna ding khom zong ro” ti hi zawm seng inla chu ei hnam sungah kohran pakhat chau ngir a ta, Hnam sipai inti hai khom pawl khat chau ni bok ei ta, tuolthi khom um naw bok ei tih ti hi ring a um. Ei mongkhawn ei hmu naw lei chau a hieng thil po po hi ei thaw hlak a ni leiin Krista lungril ang putin ei um danhai inthlak danglam ei tiu. Ei kum za kristien nina hi uongpui el loin ra thra insuo dingin tho har ei tiu. Ei hnam ei ram le Pathien ram lienna dinga Krista lungril ang put, mani nina maksan ngam thruoitu iengzam ei um ding leh?

KEIVOM RUN, Greater NOIDA

25 August 2012.